Paul: Aki kmal mle excited! Aki mlara omerollam er a November 1985 el mora kot el assignment er kemam el missionari er a Liberia, West Africa. A skoki er kemam a mle stob er a Senegal. E a Anne a dmu el kmo: “Ngkmal di ta el sikang e kede mora Liberia!” E ngii a tuobed a announcement: “Tirke el mora Liberia a kirir el metengel er a skoki. Te ngar ngii a rechad el melasem el melai er a kabelment me ngdiak el sebeched el mo kmerd er a Liberia.” Me ngmle teruich el klebesei el ki mkiei lobengterir a remissionari er a Senegal e orrenges a chais er a Liberia el kmo ngbetok el torak a mui er a bedengir a rulekoad el chad, e kmal mesisiich a tekoi el kmo ngdiak el sebeched el tuobed er a rekeblid a leklebesei. Tirke el diak lorrenges a oboes.

Anne: Kemam a diak ki muai tirke el chad el sorir el melasem a beches el tekoi. Ngak er a kdirk ngalek e te ulemekedong er ngak el Anxious Anne e le ak kmal mle bedektall. Ak kmal dirk bekikl a mo imuul er a rael! Engdi ngkmal mle somam el mora assignment er kemam.

Paul: Ngak me a Anne a mlukeroul er a osisiu el basio el ngar ngebard er a England e di mle 5 el mael a cherridam. A rechad er a blik me a delal a Anne a millisiich er kemam el mo pioneer me aki di diul el ulemuchel el pioneer er a ki mtobed er a high school. Te kmal mle support er kemam el mesiou el mui el taem. Sera le 19 a rekik e ak ngiluu a ileakl el techall el mo mesiou el ngar er a Bethel, me a Anne a mle obengkek er uriul er a ki bo bechiil er a 1982.

Anne: Ngkmal mle somam a Bethel engdi ngmle lmuut el somam el mo mesiou er a beluu lousbech a ngeso er a ruumerk er a klumech. Aki uluureor er a Bethel lobengterir a rudam me a rudos el milsiou el missionari er a uchei, e tia kmal silisichii tia el urungulam. Ngmle bek el kesus el ki moluluuch el kirel el edei el rak. Ngkmal mlo ungil a rengmam er a le invite er kemam er a 1985 el mora 79 el klas er a Gilead! Te mle assign er kemam el mora Liberia, West Africa.

Paul: Aki ngilasech er sel kot el skoki el mle sebechel el mo soiseb er a Liberia. Ngkmal mle klou a dakt er a beluu me ngii a dirk mla er ngii aike el taem el diak el sebeched el tuobed er a rekeblid. A rechad a kmal mle imis el medakt me a mlai er a lekiul  kosebakl e te di mlo kaiuediu e chemiis. Aki milenguiu a bades er a Psalm er a bek el kesus el mengellakl a rengmam. Me nguaisei ngkmal mle betik a rengmam er a assignment er kemam. A Anne a mle missionari me ngulemerk er a bek el sils e ngak a mlara Bethel loureor lobengkel a John Charuk. a A experience er ngii me a klemedengei er ngii er a klengar er a rudam me a rudos er a Liberia a mle train er ngak.

Anne: Ngera uchul me ngkmal di mle mereched el mo betik a rengmam er a Liberia? Ngrudam me a rudos er kid a uchul. Te kmal ullecholt er a bltikerreng me a blakerreng. Aki kmal mlo close er tir me tir a mlo beches el telungalek er kemam. Te milskemam a betok lungil el advice e kmal millisiich er kemam. Ngkmal mle ungil a ureor er a berkel a klumech. A rechad er a blai a dimlak el sorir omereched el merael! A rechad a milsaod a ker er a Bades er a bkul a rael. Ngkmal di sebechem el merael el mo er tir e mengedecheduch er tir. Ngkmal mle betok a study me ngmle meringel omosuub lobengterir el rokui. Ngkmal mle ungil mondai!

Paul: Ngmla er ngii a budech er a beluu el eua el rak engdi ngdi mle kiul el mengodech a blekeradel er a 1989. Ngmlo er ngii a uldikel. Tirke el ulemtok er a kabelment a ngiluu sel basio el lengar ngii a Bethel er a July 2, 1990. Ngmle edei el buil el dimlak ki mongedecheduch er a ngii di el chad er a ikrel a Bethel luldimukl er a telungalek er kemam me a world headquarters. Ngkmal mle klou omelemall, nglemuu, me a olterebek, e dimlak a kmal kall. Tia mle uaisei el 14 el rak er a beluu el rokir.

Anne: A rebebil chedal a kakerous el kebliil a mle kakoad e omekoad er a tang me a tang. Te mla er ngii a resoldau me a ruldechelakl er ker me ker. Te uluubail a kmal ngodech el bail e mla er ngii a klekedellir me tir a mlo soiseb obliil e melai aike el sorir. Osengir a rebebil el kirel omekoad er a rechad a kmo, “kede omekoad a malk.” A bedengir a rechad a mle chachisois er aike el checkpoint e mla er ngii a bebil er ngii el kmeed er a branch. Te mla er ngii a reblak a rengrir el Sioning el lulekodeterir luldimukl er a reteru el missionari.

A rebebil er a Resioning ulemart er a rebebil er tirke el mle chedal aike el kebliil el lulsiik er tir e omekoad er tir, alta ngmle sebechir loriid a klengar er tir. A remissionari me a rengar er a Bethel me te dirrek el mle uaisei. A rebebil er tirke el chiliis a mle bad er a ulaol er a 1st floor er a Bethel er a rekuk bebil a mle kiei lobengkemam er aike el delemerab er kemam el mla er bab. Aki mle share er a room er kemam el lobengkel a telungalek el tir a mle teuid.

Paul: Ngmle bek el sils el tirke el uleldechelakl a millasem el me soiseb er a Bethel el lomes el kmo aki ulemart er a rechad. Sel leduubech tia el tekoi e te mla er ngii a reteua el chad loureor el mengkar. A ta el odam me a odos a ulemes er a mado e a reterung  a mora ikrel a gate er a Bethel e mengedecheduch er tir. A lsekum a chimorir tirke el mlo mengedecheduch a mla er mederir e ngbelkul a kmo ngdi ungil a rokui el tekoi. Engdi a lsekum te ngmai chimorir el mo er ullir e ngbelkul a kmo tirka el chad a sorir a uldikel me tirke el ulemes er a mado a di mereched el mo omart er a resechelimam.

Anne: Uriul er a betok el sandei e a ta el cheldebechel er a ruldechelakl a siliseb er a Bethel. Me ak chilsechesak ngak me a ta er a odos er a benjo el mla er ngii a cabinet er ngii el ngar ngii a berrotel el compartment er ngii. Ngika el odos a siliseb er tiang. Tirka el chad a ulekiuellek el ngmasech er a stairs lolab a bosir. Te millengod er a chesimer el kmal kesib a rengrir. A Paul a millekoi el tir el kmo: “A bechik ousbech er a benjo.” Ngmle klou a ngerel a kungesimer er tia el compartment e mle kirek el lmuut el mechobech ngii el klalo er a chelsel. Ak kmal mlo medakt me a bedengek el rokir a di mlo omritel. Ngmekera ak open er a chesimer er chelechang? Ak milluluuch er a renguk lolengit er a Jehovah me lengesukak. Ak mle open er a chesimer e mle sebechek chelellakl a ngerek el mengedecheduch er tir. A ta er tir a ultitech el me soiseb e melemalt el mo er tia el cabinet e mekisii. Ngulemiis a klalo e kmal mlo mechas a rengul le ngdimlak lebetik a ngii di el ngerang. Ngii me tirka el ulebengkel a mle search aike el lmuut el bebil er a room me a attic. Me nguaisei ngdimlak el betik a ngii di el ngerang.

Paul: Ngmle betok el buil el ngesonges a kelam. Engdi kall er a klereng seikid a mle otil a klengar er kemam. Morning worship er a Bethel a mle blengremam er a tutau, me aki kmal oba omereng el saul e le ngmilskemam a klisiich el ki muluusbech er ngii.

A lsekum e ngmlo diak a mera el kall me a ralm luchul me ngmo kiram el tuobed er a branch e tirke el ki mulemart er tir a lokodeterir. A lebebil e ngkmal mengasireng a rolel e a Jehovah milskemam aike el ki muluusbech! A Jehovah ulemekerreu er kemam er aike el ki mousbech e ngilsukemam el chollakl a dektam.

Me alta blekeradel er a beluu a di mirrael el mo diak omelatk el kirel me nguaisei engdi llomes er a klemerang a mle medidiich. A rebetok er a rudam me a rudos er kid a mle kirir el chemiis el lolsobel a klengar er tir, engdi klaumerang er tir a millemolem el mesisiich me tir a millemolem loba chelellakl el reng. A rebebil er tir a dilu el kmo a mekemad a mle “practice el kirel a kloul ringel.” A remechuodel me a remekekerei el odam ulechotii a blekeu e mirruul aike el rokui el sebechir lolengeseu. A rudam me a rudos el chiliis a mle kaingeseu e ulemuchel el omerk er aike el basio el lechiliis el mo er ngii. Te uluusbech aike el lebiltik er a oreomel el rullii a simple el Blil a Ongdibel e uleltobed a miting. Ngar er a chelsel tiakid el kmal meringel el taem e a miting me a odingel a milsterir a rudam me a rudos omelatk e kmal millisiich er tir. Sera ki morous a kall, bail, me a lmuut el bebil, e te betok a bai ullengit a tet er odingel el diak el bail. Tia kmal rirutech a rengmam. A rechad el miles e mle experience aike el betok el mekngit el dilubech er a mekemad a mle sorir el lorrenges er a ungil chais. Te kmal mle mechas a rengrir er a Resioning el mla er  ngii a mera el bltikerreng me a deurreng er tir alta ngkmal mle mekngit a blekeradel. Tirka el odam me a odos a mle llomes er a chelsel a ilkolk. (Mt. 5:​14-16) A blakerreng er a rudam a uchul me a rebebil er tirka el kmal mle meringel loldechelakl a mlo odam er kid.

Paul: A lebebil e ngmo kiram el tuobed er a beluu. Ngmle edei el taem el ki bo mdibus er a beluu el telkib e mle eru el taem el ki mdibus el ta el rak. A ta el odos el missionari a kmal ungil smodii aki blo molechesuar er ngii er aki morael: “Sel dengar er a Gilead e te osisecheklid el kmo ngkired el mo betik a rengud er a rudam me a rudos er kid er a beluu el dosiou er ngii loba rengud el rokir, me tiakid aki murruul er ngii. Me aki morael el mo cheroid er a rudam er kemam er a chelsel chouaitia el blekeradel a ua de dul kmo te mla smodel a rengmam!” Aki kmal uleba omereng el saul el mle sebecham el ngar er a kmeed el beluu e olengeseu er a Liberia.

Anne: A May 1996 e a reteua er kemam a mirrael el ngar er a mlai er a branch lolab a meklou a ultutelel el record er a branch. Ngmle somam el mora safe el basio el ngar er a bita el beluu el mle 10 el mael a cherridel. E ngii a duubech a odechelakl. Tirka el uldechelakl a ulemoes el bedul bab, stob er kemam, e ultebedeterir a retedei er kemam e mirrael el lobengkel a Paul. Aki dilechor el kmal mechas a rengmam. E ngii merael el mei a Paul el merserasech a bdelul. A kot e a rengmam e nguleboes engdi ki mlo mtebengii el kmo ngdiak el sebechel el uleboes e le ngika dirk merael! A ta er tirke el chad er a lodbechii el lotebedii er a mlai e ngchillebedii a bdelul. Ngkmal ungil ngdi mle kekerei el telemall.

Ngmla er ngii a mlirir a resoldau el kmeed er kemam el mle mui er a rechad el kmal medakt el merolung. Me aki ulerreked er kemam er a ikrel ngii el mlai. A chad el ulemekall a kmal di milekerokl me ngkilo ki ruebet. Aki ullengit er ngii me lestob engdi ngkmal mle medakt me ngdimlak lorrenges. Ngmle sebecham lorrekedemam engdi sera ki mkerd e ngkmal mle mesaul a bedengam e omritel er a dakt.

Paul: Me aki di mle dechudech e selesodel a bilam e mlo kaiuengeng el mechas er a rengmam el dirk chad. Aki mlo bad er bita er a helicopter el betok a blsibs er ngii er a boes el ngii a ngilikemam el mora Sierra Leone er a bo lekuk. Ngkmal mle ungil a rengmam el dirk chad engdi aki kmal mle bekikl el kirir a rudam er kid el Kristiano.

Anne: Ngmle sebecham el mora Bethel el ngar er a Freetown, Sierra Leone el diak ki mkelsakl e a rudam er tiang a kmal mle ungil lomekerreu er kemam. Me nguaisei engdi ngdimlak el sebechek el stob el lomes er a bdeluk aike el mekngit el tekoi el dilubech er a Liberia. Ngmle bek el sils el di kmedakt el kmo ngngar ngii a mekngit el mo duubech e diak el sebechek el ungil lomdasu. A bek el tekoi el meliuekl er ngak a kora dimlak el mera el tekoi. Sel leklebesei e ak mekiis el di kesib e omritel e medakt el kmo ngngar ngii a mekngit el mo duubech. E meringel er ngak louteliil. A Paul ulemechull er ngak e milluluuch lobengkek. Aki milengitakl a chelitakl er a Renged el dimerekmo bo lak kumritel. Ak mle feel el kmo ngak a kebelngong e mla mo diak el sebechek el mesiou el missionari.

Ngkmal diak kubes er a ongingil el tekoi el dilubech. Tiakid el week e aki ngilai a teblo el magazine. A ta er ngii a mle Awake! er a June 8, 1996 el mla er ngii a suobel er a chelsel el dai er ngii a “Coping With Panic Attacks.” Chelechang e ak mla mo medengelii a uchul me ak uaisei. Sel ongeru el magazine a mle The Watchtower er a May 15, 1996 el mla er ngii a suobel er a chelsel el dai er ngii a “Where Do They Get Their Strength?” Ngmla er ngii a siasing er a bangikoi el telemall a osebekel er tia el The Watchtower. Ngsilodii el kmo ngdi uai a bangikoi el sebechel el melai a kelel e suebek alta ngtelemall osebekel, kid me ngdirrek el sebeched el loeak a chedaol reng er a Jehovah el melemolem el olengeseu er a rebebil alta ngmechitechut a rengud er a mekngit el tekoi el mla duubech er a klengar er kid. Me a Jehovah milskak omelisiich el kmal kuluusbech er ngii er a melemalt el taem. (Mt. 24:45) Ak mle research el kirel e rirellii a folder el mui er a suobel el mesaod er ngii e tia ngilsukak. Aika kmal ngilsukak. Cherengel a taem e ngmlo diak ksal chuarm el uaisei el ua ngar er a mong.

Paul: Ngkmal mo ungil a rengmam sel ta el ki bo mrei el mora Liberia. A ulebengelel a 2004 e ngmla mo bekord el 20 el rak el ki mngar er a assignment er  kemam. Ngmla mo diak a mekemad. Ngmla er ngii omelib er a ureor el lomekedechor er a branch. E kemam a kiul el nguu ongit el mora beches el assignment.

Tia kmal mle meringel er kemam. Aki kmal mle close er a telungalek er kemam er tiang. Aki mo mekerang? Aki chiloit a telungalek er kemam e mora Gilead e milsa el kmo sel denguu a klengar er kid el loia er a chimal a Jehovah e ngmo uchul a betok el klengeltengat. Me a beches el assignment er kemam a ngilikemam el mora Ghana, el beluu el kmeed er tiang.

Anne: Aki kmal lilangel er a ki morael. Ngmlo mechas a rengmam er a tekingel a Frank el ta el chudelang el lodam er a ledu el kmo: “Ngkiriu el lobes er kemam!” Engdi ngsilodii el kmo: “Aki medengei el kmo ngdiak bo mobes er kemam engdi ngkiriu loia rengmiu el rokir er a beches el assignment er kemiu. Ngmlara Jehovah me ngkiriu el mo focus er a rudam me a rudos er sei.” Tia silisichemam el lmuut el lomuchel er a beches el basio el dimlak a kmal medengelkemam er ngii.

Paul: Me nguaisei engdi ngdimlak lemeketeket e ngmo betik a rengmam er a beches el telungalek er kemam er a klereng er a Ghana. Te kmal mle betok a Sioning er tiang! Ngkmal betok aki msiluub er a blakerreng me a mesisiich el klaumerang er tirka el beches el sechelimam. Ngmle 13 el rak el ki mngar er a Ghana e aki lmuut el nguu a ta er a beches el ongit. Aki mo mesiou er a branch er a East Africa el ngar er a Kenya. Alta ki kmal miss er a resechelimam er aike el uleak uchei el assignment er kemam engdi aki di mle mereched el mak a beches el klausechelei lobengterir a rudam me a rudos er a Kenya. Ngdi ua Ghana me a Liberia, ngkmal dirk klou a ureor er a Kenya.

Anne: Chelsel aika el mereko el rak e ak mla experience a betok el dakt me a britel. Kengaol e mui er a stress el blekeradel a ngar ngii a bo lerellii er a bedenged, uldesued, me a rengud. Ngdiak bo loeak a mengasireng el rolel e kede mukerreu er ngii. Sel krenges a ngerel a boes e ngmo soak lomudech e mo diak feel a chimak. Engdi ak mla suubii el mo ultuil er aike el lomeskid a Jehovah el melisiich er kid, luldimukl er a ngelsurir a rudam me a rudos er kid. Ak mla mesa el kmo sel lengar ngii a ungil schedule er kid er omesuub, omeluluuch, omerk er a klumech, e ngar er a miting e a Jehovah sebechel el ngosukid el mo melemolem el ngar er a assignment er kid.

Paul: A rebebil a locha mo oker el kmo, “Ngsoam a assignment er kau?” A beluu a sebechel el kmal klebokel engdi ngdirrek el sebechel diak lultebechel e kengaol. Me ngngera lmuut el somam er a beluu? Te mekreos el rudam me a rudos, el telungalek er kid. Alta ngkakerous a ulekuruled me a beluu el dechad er ngii, engdi ngta uldesued. Aki ulemdasu el kmo te uldurokl er kemam el mo melisiich er tir, engdi mera er ngii ngtir a bai mla smisichemam.

Bek el taem el ki molukl e aki mesa mengasireng el tekoi el duubech: klodam er kid. A lsekum kede chedal a ongdibel e ngngar ngii a telungalek er kid. Ngkmal sebechel el mo ulterekokl a rengud el kmo a dolemolem el ultuil er a Jehovah e ngmo smisichid loltirakl aike el dousbech.—Fil. 4:​13, NW.