1-2. Ngmekera diak el melemalt el omeruul e ngar ngii a lerellii el mora rederta er kid?

 A JESUS uluuchais er a okesiu el kirel a melakl el dil el millemolem el lolengit er a chad er a kerrekeriil me lebsa llemalt. A rebetok er a disaiplo er a Jesus a ulterekokl el kmal mle ungil medengelii a lulemelechesiu er ngii ngika el melakl el dil, e le rehutsu el chad er a beluu er tiakid el taem a mle blechoel el diak el melemalt omeruul el mo er tir. (Lk. 18:​1-5) Kid me kede dirrek el medengelii a lulemelechesiu er ngii ngika el melakl el dil e le kid el rokui a ngar ngii a taem el dimlak lemelemalt omeruul el mei er kid.

² A beluulechad er chelecha el taem a klou omengetukel, omekcharm, me a chelebirukel er ngii me ngdiak lemechas a rengud sel lebo lak el melemalt omeruul el mei er kid. (Oli. 5:8) Engdi tekoi el locha diak bo de expect er ngii a sel bo lak lungil omerellel a odam me a lechub e ngodos el mei er kid, e tia sebechel duubech. Me nguaisei engdi a rudam me a rudos er kid a diak el uai a rumtok el durengrir el meruul a mekngit. Te di diak lemecherrungel. Ngsebeched el suub a betok er a omerellel a Jesus el bedul a diak el melemalt el omeruul el mlara rumtok el mo er tir. A lsekum e ngsebeched el loba kllourreng el mo er tirke el diak lemelemalt omerellir el mei er kid, e ngkmal lmuut el kired el lochotii a kllourreng el mora rekldemed er a klemerang! Ngmo uangerang a feeling er a Jehovah sel bo lak el melemalt omerellir tirke el ngar er a ikrel me a lechub e ngchelsel ongdibel el mei er kid? Ngomekerreu a duubech el mei er kid?

3. A Jehovah ngomekerreu sel bo dechuarm er a diak el melemalt el omeruul, e ngerang?

³ A Jehovah kmal lomekerreu a omerellir a rechad el mei er kid. “[Jehovah] a betik a rengul er a melemalt.” (Psa. 37:28) A Jesus olterekokl er a rengud el kmo a Jehovah ‘mo oterekeklii el kmo a  llemalt a mo meketmokl . . . [el] di mereched’ sel lebo el melemalt a taem. (Lk. 18:​7, 8, NW) A Jehovah kmal di kmedung e ngmo mult aike el rokui el luchul a ringeled e kmal diak lebechikid me deluut el mo chuarm er a diak el melemalt el omeruul.—Psa. 72:​1, 2.

4. Ngera el ngeso a bla lebeskid a Jehovah?

⁴ A Jehovah a ngosukid loutekangel er chelechang el dongiil er a temel el mo omeklemalt a rokui el tekoi. (2 Pe. 3:13) Ngolisechakl er kid me ngdiak bo deruul a tekoi el diak lochotii a llomeserreng sel bo lak el melemalt omeruul el mei er kid. Ngoeak a Ngelekel e a Jehovah a meskid a kot el lungil kerebai el kirel sel leduubech a diak el melemalt el omeruul. E meskid a ungil ulekrael el sebeched el loltirakl sel lebo lak el melemalt omeruul el mei er kid.

BO MKEREKIKL OMERELLEM SEL BO LAK EL MELEMALT OMERUUL EL DUUBECH EL MO ER KAU

5. Ngera uchul me ngkired el mo kerekikl omerelled el bedul a diak el melemalt el omeruul?

⁵ A diak el melemalt el omeruul a locha kmal tomellii a rengud e uchul me kede mo feel er a klou el berraod. (Oli. 7:​7, NW) A reblak a rengrir el mesiungel a Jehovah el ua Job me a Habakuk me te dirrek el mlo feel el uaisei. (Job 6:​1-3; Hab. 1:​1-3) Me alta ng normal a bo de feel el uaisei, engdi ngkired el mo kerekikl omerelled me ngdiak bo doruul a tekoi el diak lochotii a llomeserreng.

6. Ngera ngosisecheklid a kerebil a Absalom? (Dirrek el momes er a siasing.)

⁶ Nglocha mo soad el melaitechei sel bo lak el melemalt omeruul el mei er kid. Me nguaisei engdi tia sebechel rullii a blekeradel el lmuut el mo mekngit. Molatk er a ngelekel a King David er a Absalom. Ngkmal ngilasech a rengul er a loterebekii a ochedal er a Tamar a half lobekul er a Amnon. A doltirakl er a Llach er a Moses e a Amnon a mle kirel el mo okodall. (Lev. 20:​17, NW) Alta ngsebeched el understand er a klsbengel a rengul a Absalom, me nguaisei ngika dimlak a llemeltel el lomekoad er a Amnon.—2 Sa. 13:​20-23, 28, 29.

7. Ngera ngrirellii el mora ta er a milluches er a Psalm a diak el melemalt el omeruul?

⁷ Sel lak lobals tirke el meruul a delengerenger e kede locha mo oumededenger el kmo ngngar ngii a klungiolel a doruul a llemalt. Molatk er a ta er a milluches er a Psalm el milsterir a remekngit el lomekcharm er a remelemalt engdi te kora di ungil a klengar er tir. Ngdilu el kmo: “Tiaikid a blekerdelir a re dengerenger. Ng betok a ngar ngii er tir.” (Psa. 73:12) A diak el melemalt el omeruul el lules a dirrek el kmal di mlo mengesang er ngii me ngkilo ngoridii a klaumerang er ngii er a klungiolel a dosiou er a  Jehovah. Ngdilu el kmo: “Isei e ak millasem el omtab er itiang, el dirrek a lesal kmal mle chaitituokel.” (Psa. 73:​14, 16) Ngdi mle bleketakl el melekoi el kmo: “Ngdi ngak a kilo kmoubuu; kilo ktmorech.” (Psa. 73:2) A kmeed el losisiu el tekoi a dilubech el mora odam el bo domekedong er ngii el Alberto.

8. Ngera ngrirellii el mora ta el odam a diak el melemalt el omeruul?

⁸ A Alberto a mlotelechakl el kmo ngrirechorech a udoud er a ongdibel. Tia uchul me ngurriid a ileakl el techall er a ongdibel e urridii omengull er a rebetok el chedal a ongdibel el mlo medengei el kirel. Ngmelekoi el kmo: “Ngkmal mle kesib a renguk e mlo medecherecher a renguk.” Ngmilecherei a kngtil a rengul me ngchoitechetur er a klereng, e mlo inactive el eim el rak. Tia el tekoi ochotii a sebechel duubech sel debecherei a ngesechel a rengud el kirel a diak el melemalt el omeruul me lomtebechel er kid.

MOUKEREBAI OMERELLEL A JESUS EL BEDUL A DIAK EL MELEMALT EL OMERUUL

9. Ngera el diak el melemalt el omeruul a mle kirel loutekangel a Jesus? (Dirrek el momes er a siasing.)

⁹ A Jesus a kiltmeklii sel kot lungil kerebai er a rolel a doutekangel a diak el melemalt el omeruul. Molatk a diak el melemalt el omeruul el blo lechuarm er a rebetok, luldimukl er a rechedal a telungalek er ngii. A telungalek er ngii el dimlak el ngar er a klemerang a dilu el kmo ngmla mo  kebelung, a remengeteklel a klechelid a millekoi el kmo ngngilai a klisichel er a remekngit el anghel, e a resoldau er a Rom a millekoi a mekngit er ngii, chillebedii, e mekodir. (Mk. 3:​21, 22; 14:55; 15:​16-20, 35-37) Me nguaisei, a Jesus uluutekangel aika el diak el melemalt el omeruul me a lmuut el betok e dimlak a ta el bo lolaitechei. Ngera sebeched el suub er a kerebai er ngii?

10. Ngmilekera Jesus e outekangel a diak el melemalt el omeruul? (1 Petrus 2:​21-23)

¹⁰ Monguiu er a 1 Petrus 2:​21-23. a A Jesus a kiltmeklii a kmal ungil kerebai el kired sel leduubech a diak el melemalt el omeruul el mei er kid. Ngmle medengelii a ungil taem el longedecheduch me a di lmuk. (Mt. 26:​62-64) Ngdimlak losmechokl a bek el diak el klemerang el tekoi el mildung el kirel. (Mt. 11:19) E sel longedecheduch e ngdimlak lolekoi a mekngit el mora ruldechelakl er ngii me a lechub e lorrouk er tir. Ngulechotii a ulserechakl el reng e le ngii el “ultuil omeltkel er a Dios el melemalt a loukerrekeriil.” A Jesus a mle medengei el kmo a osengel a Jehovah a lmuut el klou a ultutelel. Nguluumerang el kmo a Jehovah mo mesmechokl aika el diak el melemalt el omeruul er a melemalt el taem.

11. (a) Ngera bebil er a rolel e ngsebeched el control aike el dolekoi? (Dirrek el momes a siasing.)

¹¹ Ngsebeched el loukerebai er a Jesus loeak a de control aike el dolekoi sel lak el melemalt omeruul el mei er kid. A bebil el diak el melemalt el omeruul a diak el meklou el tekoi me ngsebeched el di omes el lengelakl. Me a lechub e kede ngiltii el diak dongedecheduch me lak derellii a blekeradel me lluut el menga el mo mekngit. (Oli. 3:7; Jak. 1:​19, 20) E a lebebil e ngmo kired el mengedecheduch a lsekum kede mesa el kmo ngdiak el melemalt omeruul el mora rebebil, me a lechub ngmo kired el mengedecheduch el mesebechakl  er a klemerang. (Rel. 6:​1, 2) Me nguaisei a lsekum kede ngiltii el mo mengedecheduch e kede mora tkurrebab el sebeched el lochotii omengull me a chelellakl el reng.—1 Pe. 3:​15, 16. b

12. Ngmekera dolterekokl er kid er a “Dios el melemalt a loukerrekeriil”?

¹² Ngdirrek el sebeched el loukerebai er a Jesus loeak a dolterekokl er kid er a “Dios el melemalt a loukerrekeriil.” A rechad sel bo el diak el melemalt omerellir el mei er kid me a lechub e te mo oukerrekeriil er kid, e ngulterekokl a rengud el kmo a Jehovah medengelii a klemerang. Tiakid el ulterekokl el reng a mo ngosukid el loutekangel a diak el melemalt el omeruul e le kede medengei el kmo a Jehovah mo omeklemalt er a blekeradel. Sel debecherei er chimal a Jehovah e ngdiak debechei a klsbengel me a kngtil a rengud me lemukeroul. Aika el teblong sebechel mo uchul e kede rullii a diak lungil el tekoi, sebechel tomellii a deurreng er kid, e sebechel tomellii a deleuill er kid me a Jehovah.—Psa. 37:8.

13. Ngera sebechel ngosukid el mo melemolem loba kllourreng el loutekangel a diak el melemalt el omeruul?

¹³ Ngklemerang el kmo ngdiak el sebeched el cherrungel el lotireklii a kerebil a Jesus. A lebebil e kede mo remuul me a lechub e kede dmu tekoi el uriul e kede ouuchel a rengud el kirel. (Jak. 3:2) E a bebil el diak el melemalt el omeruul a locha bo dechuarm er ngii er a klemengetel a klengar er kid er tia el mekngit el beluulechad. A lsekum nguaisei e bo lulterekokl a rengum el kmo a Jehovah medengelii omomelechesiu er ngii. Me a Jesus el dirrek el mlo chuarm er a diak el melemalt el omeruul me ngmedengelii omomelechesiu er ngii. (Heb. 4:​15, 16) Me a lmuut kung, a Jehovah diak di lebeskid a kerebil a Jesus, ngdirrek el meskid a ulekrael er a Tekingel el ngosukid sel debo dechebangel a diak el melemalt el omeruul. Ka me dorriter a teblo el bades er a babier er a Rom.

“BECHEREI ME DI LE MECHOIT ER A NGESECHEL A RENGUL A DIOS”

14. Ngera belkul a de “becherei me di le mechoit er a ngesechel a rengul a Dios”?

¹⁴ Monguiu er a Rom 12:19. A apostol Paulus a millisiich er a Rekristiano me le “becherei me di le mechoit er a ngesechel a rengul a Dios.” Kede mecherei me ngmechoit er a ngesechel a rengul a Jehovah loeak a debecherei me lolilt el kmo ngoingerang e mo mekera lomeklemalt er ngii. A odam el John el dimlak el melemalt omeruul el mo er ngii a dmu el kmo: “Ngmle kirek el lorreked er a ngesechel a renguk me lak bo krellii a diak lungil tekoi. E tia dimlak el beot. A Rom 12:19 a ngilsukak el mo mengiil e oumera el ultuil er a Jehovah.”

15. Ngera uchul me ngungil a dongiil er a Jehovah el mo sumecheklii a diak el melemalt el omeruul?

¹⁵ Ngmo uchul a klungioled sel dongiil er a Jehovah el mo omeklemalt er a diak el melemalt el omeruul. Sel doruul el uaisei e ngdiak bo dechellungel er a berraod el melasem el mesmechokl er ngii el di kid. A Jehovah offer el ngosukid. Ngua lolekoi el kmo, ‘Bechei a diak el melemalt el omeruul er chimak; Ak mo kutmeklii.’ A lsekum kede kongei er a telbilel a Jehovah el kmo ng “mo melaitechei” e ngsebeched el choitii ngii el tekoi, e ulterekokl a rengud el kmo ngmo kutmeklii el ngar sel kot lungil el rolel. Tiakid a ngilsuir a John el dulsaod er ngii er a uchei. Ngkmo: “A lsekum ak mengiil er a Jehovah e ngmo sumecheklii el lmuut el lungil er aike el sebechek el kutmokl.”

“MOBA UNGIL EL MO KATS RA MEKNGIT”

16-17. Ngmekera nglunguuch e ngosukid el “moba ungil el mo kats ra mekngit”? (Rom 12:​21, BT)

¹⁶ Monguiu er a Rom 12:21 (BT). c A Paulus a millisiich er a Rekristiano el “moba ungil el mo kats ra mekngit.” Ngar er a Cheldecheduch el Ngar er a Rois, e a Jesus a dilu el kmo: “Bo le betik  a rengmiu er a re cherrouiu e moluluuch el kirir a ruldechelakl er kemiu.” (Mt. 5:44) E tiakid a lurruul er ngii a Jesus. Kede locha mla melatk er a ringel el lulemelechesiu er ngii er a ledelii a resoldau er a Rom er a teluo el kerrekar. Ngkmal diak el sebeched el mo cherrungel el mtebengii a klungel a ringel el lulemelechesiu a Jesus el kirel a kmal mekngit e diak el melemalt el omeruul el luluutekangel.

¹⁷ A Jesus a dimlak lebechei a diak el melemalt el omeruul me lebo el mesisiich er ngii. Ngdimlak lolebeakl er a resoldau ngbai milluluuch el kmo: “Chedam, mousubes er tir; e te diak lodengei a loruul.” (Lk. 23:​34, BT) Sel doluluuch el kirir tirke el mekngit el mei er kid, e ngsebechel ngosukid el mo diak el kesib a rengud e mo chelellakl a rengud, e ngodechii osenged el kirir.

18. Ngmilekera nglunguuch e ngosuir a Alberto me a John el loutekangel a diak el melemalt el omeruul?

¹⁸ A nglunguuch a ngilsuterir tirka el teru el lodam el dulsaod er tir er tia el suobel el mo outekangel a diak el melemalt el omeruul. A Alberto a kmo: “Ak milluluuch el kirir tirke el odam el dimlak lemelemalt omerellir el mei er ngak. Ngmle betok el taem el kululuuch lolengit er a Jehovah me lengesukak el mo diak el kesib a renguk er a tekoi el dilubech el mei er ngak.” Ngmdeu a rengud e le Alberto a mla lmuut el mo blak a rengul el mesiou er a Jehovah. A John a kmo: “Ngmle betok el taem el kululuuch el kirel ngike el odam el tilemellii a renguk. Aika el nglunguuch a ngilsukak el mo diak el kesib a renguk er ngii e mo diak kuukerrekeriil er ngii. Ngdirrek el ngilsukak el mo budech a uldesuek.”

19. Ngera kired el meruul er ngii el dimerekmo lemei a ulebongel er tia el mekngit el blekeradel? (1 Petrus 3:​8, 9)

¹⁹ Chelecha el dekiei er a chelsel tia el mekngit el blekeradel e ngdiak dodengei el kmo ngngera el diak el melemalt el omeruul a mo duubech el mei er kid. Me nguaisei a ngii di el tekoi el bo doutekangel e lak demekimd el meluluuch lolengit a ngelseuil a Jehovah. Me a lmuut kung, bo doukerebai omerellel a Jesus el bedul a diak el melemalt el omeruul e dolemolem el loltaut omellach er a Biblia. A doruul el uaisei e ngsebechel mo ulterekokl a rengud el kmo a Jehovah a mo omekngeltengat er kid.—Monguiu er a 1 Petrus 3:​8, 9.