SUOBEL EL BO DOSUUB 46
CHELITAKL 49 Domotech er a Rengul a Jehovah
Rudam, Ko Meringel Loureor el Mo Ta er a Ministerial Servant?
“Ng bai klou el deurreng a dorous er a dolai.”—REL. 20:35.
LOLISIICH ER NGII A SUOBEL
Melisiich er a retelecholb el odam el mo er ngii a urungulir el mo ministerial servant e qualify el mo er tia el rolel omesiou.
1. Ngmle uangera uldesuel a apostol Paulus el kirir a re ministerial servant?
RE MINISTERIAL servant a meruul a meklou a ultutelel el ureor el kirel a ongdibel. A apostol Paulus a kmal uleba omereng el saul el kirir tirka el blak a rengrir el odam. El ua tiang, sera loluches el mora Rekristiano er a Filipi, e ngulemasech er a re ministerial servant el lobengterir a remechuodel.—Fil. 1:1, NW.
2. Ngua ngera osengel a odam el Luis el kirel a ngerechelel el ta er a ministerial servant?
2 A retelecholb el odam el meklou me a mekekerei a omelechesiu er a klou el deurreng el lolengeseu er a ongdibel el ministerial servant. El ua tiang, a Devan a mle 18 a rekil er a lemetutk el mo ministerial servant. E a odam el Luis a miltutk el mo ta er a ministerial servant er a le 50 me a derengel a rekil. A Luis a mesaod er a uldesuir a rebetok er a lolekoi el kmo, “Ak mera el omes er ngii el ileakl el techall el mesiou er a rudam me a rudos el ta er a ministerial servant, tokubets sel kulatk er a bltikerreng el bla lochotii el mei er ngak!”
3. Ngera el ker a bo dosaod?
3 A lsekum ke ta er a telecholb el odam e dirkak bom ta er a ministerial servant e kau, ngsebechem el rullii el mo turrekong er kau? Ngera mo odbechau el mo meruul er tiang? E ngera el blekeradel a lolekoi a Bades el kmo ngkirem el mo olab e ngmo sebechem el mo ta er a ministerial servant? Ngar tia el suobel e kede mo mesaod a nger er aika el ker. Me nguaisei engdi a kot e kede mo mesaod el kmo ngngera el lureor a loruul a ministerial servant.
NGERA NGMERUUL A MINISTERIAL SERVANT?
4. Ngera ngmeruul a ministerial servant? (Dirrek el momes er a siasing.)
4 A ministerial servant a telecholb el odam el mla metutk er a chedaol reng el mo olengeseu er a remechuodel el meruul a meklou a ultutelel el tekoi er a ongdibel. A rebebil ministerial servant olterekokl el kmo a re publisher a ngar ngii a territory me a babier el lousbech el lomerk er a klumech. A rekuk bebil a olengeseu el mengetmokl e maintain er a Blil a Ongdibel. A re ministerial servant a dirrek el mesiou el attendant e orrael a sound me a video sel letemel a miting. A betok er aike el loruul a re ministerial servant a kmal klou a lengesuir. Me nguaisei engdi a ngaruchei er ngii te mesisiich er a tekoi er a klereng. Ngbetik a rengrir er a Jehovah e kiei el loltirakl a llechul. Te dirrek el kmal betik a rengrir er a rudam me a rudos er tir el Kristiano. (Mt. 22:37-39) Te mekera retelecholb el odam e sebechir el loureor el mo ta er a ministerial servant?
5. Ngmekera odam e sebechel loureor el mo ta er a ministerial servant?
5 A Biblia omasech aike el blekeradel el kirel a odam el mo olab e ngmo sebechel el metutk el mo ta er a ministerial servant. (1 Ti. 3:8-10, 12, 13, NW) Ngsebechem el loureor el mo rodemii tia el ileakl el techall er omesiou loeak sel mosuub aika el blekeradel el losaod a Biblia e meringel el loureor el mo olab. Me nguaisei engdi ngkirem el kerekikl el merriter er a uchul me ngsoam el mo oba tia el ileakl el techall.
NGERA UCHUL ME NGSOAM EL MO TA ER A MINISTERIAL SERVANT?
6. Ngera kirel lodbechau el mo olengeseu e mesiou er a rudam me a rudos er kau? (Mateus 20:28; dirrek el momes er a siasing.)
6 Molatk er a Jesus el ngike el kot el ngarbab el kerebai el kired. A tekoi el uleldubech er ngii a bltkil a rengul el mora Demal me a rechad. Tia el bltikerreng a uldbechii el mo meringel loureor, e meruul a ngariou el ureor el kirir a rebebil. (Monguiu er a Mateus 20:28; Jn. 13:5, 14, 15) A lsekum ngbltikerreng seikid oldubech er kau, e a Jehovah mo omekngeltengat er kau e ngosukau el mo oureor el meringel el mo sebechem el qualify el mo ta er a ministerial servant.—1 Ko. 16:14; 1 Pe. 5:5.
7. Ngera uchul me ngdiak el melemalt a lsekum a odam a soal di mo ministerial servant le ngii el soal a chetengakl?
7 A rechad er tia el beluulechad a blechoel mochau a rengrir el mo er tirke el di tir el mengedidai er tir. Engdi tia diak leuaisei er a chelsel a cheldebechelel a Jehovah. A odam el uai a Jesus el bltikerreng a odbechii el mo mesiou a diak el soal a klisiich, chetengakl, me a lechub el soal mengedereder er a rebebil. A lsekum chouaisei el chad a metutk er a chelsel a ongdibel, e nglocha kmal diak lekengei el mo meruul a ngariou el ureor el kirel meketmokl el mo omekerreu er a remekreos el sib er a Jehovah. Nglocha mo omdasu el kmo ngkmal klou a ultutelel me ngdiak el kora meruul chouaika el ureor. (Jn. 10:12) A Jehovah diak bo lomekngeltengat er a chad el kedidai a rengul e soal el mo klou a ultutelel.—1 Ko. 10:24, 33; 13:4, 5.
8. Ngera el omesmechokl a lebilsterir a rechapostol er ngii a Jesus?
8 Ngdirrek el ngar ngii aike el taem el tirke el kot el kmeed er a Jesus a dimlak el melemalt a moktek er tir a oureor el melai a ngerachel. Molatk er a reteru el apostol er ngii er a Jakobus me a Johanes. Te ullengit er a Jesus me lebesterir a klou a ultutelel el deruchall er a Rengedel. A Jesus a dimlak lechat er tir el kirel tiang. Ngbai silodii el mo er tirka el 12 el apostol er ngii el kmo: “Ngikel soal mo kot el ngarbab er a delongeliu a kirel mo mesiungiu; ma lsekum ng ngar ngii er kemiu a soal mor uchei, e ng kirel el mo sibmiu el rokui.” (Mk. 10:35-37, 43, 44) Rudam el melemalt a moktek er tir loureor el mo melai a ngerachel, e le ngsorir el mesiou er a rebebil, a mo klungiaol el mora ongdibel.—1 Th. 2:8.
NGERA SEBECHEL SMISICHII A URUNGULEM EL SOAM EL OLENGESEU ER A RUDAM ER KAU?
9. Ngera sebechel ngosukau el mo er ngii a urungulem el mo soam el mo ta er a ministerial servant?
9 Kau a ulterekokl el betik a rengum er a Jehovah e soam el mesiou er a rebebil. Me nguaisei engdi nglocha diak a urungulem el mo meruul aike el ureor el loruul a re ministerial servant. Ngera sebechel ngosukau el mo er ngii a urungulem? Ngsebechem el melatk er a deurreng el bo mnguu sel bo mosiou er a rudam me a rudos er kau. A Jesus a dilu el kmo: “Ng bai klou el deurreng a dorous er a dolai.” (Rel. 20:35) Ngika kiliei el loltirakl er tia el omellach. Ngmiltik er a mera el deurreng el mesiou er a rebebil, me kau me ngsebechem el dirrek.
10. Ngmilekera Jesus e ochotii el kmo ngdmeu a rengul el mesiou er a rebebil? (Markus 6:31-34)
10 Molatk er a ta er a olechotel a kmo a Jesus a mle dmeu a rengul el mesiou er a rebebil. (Monguiu er a Markus 6:31-34.) A ta el taem e a Jesus me a rechapostol er ngii a kmal mle mesaul a bedengir. Te mlara omerollir el mora basio el diak a chad er ngii el mo olengull. Engdi a seked uleak uchei er tir el mong el sorir a Jesus a lolisechakl er tir. Ngmle sebechel a Jesus el kotouar, e le ngii me a rubengkel a “[dimlak] a deledesir el omengur.” Me a lechub e ngmle sebechel osisecheklterir a chimong me a lechub ngteblo el klemerang e sumesmecheterir. Engdi bltikerreng el ngii odbechii el mo meruul a bek el tekoi el loruul a uchul me “ng mocha olisechakl er tir a betok el tekoi.” E millemolem el lolisechakl er tir el mo lmuut er a le “kosekedela taem.” (Mk. 6:35, BT) Ngika dimlak loruul er tiang le ngii el kirel ngbai ngii el “kmal mlo chubteterir.” Ngmle soal el lolisechakl er tir le ngmle betik a rengul er tir. Ngmle uchul a klou el deuil a rengul a Jesus el mesiou er a rebebil.
11. Ngmilekera Jesus omesterir a rechad aike el lousbech? (Dirrek el momes er a siasing.)
11 A Jesus a dimlak di lolisechakl er a seked el kirel a Dios, ngdirrek el milsterir aike el lousbech. Nguleak a mengasireng el rolel e milsterir a kall e dilu er a redisaiplo er ngii me ngmerous er tir. (Mk. 6:41) Ngoeak tiakid el rolel e ngullisechakl er a redisaiplo er ngii el mo mesiou er a rebebil. Ngdirrek el lulechotii el kmo chouaika el ureor el ngii a loruul a re ministerial servant a meklou a ultutelel. Ka di molatk er a deurreng el blo lomelechesiu er ngii a rechapostol er a loureor lobengkel a Jesus el merous aika el kall el dimerekmo “rokui el chad a milengang e kmal mlo medinges”! (Mk. 6:42) Ngdimlak di leta el taem el Jesus a ngilai aike el lousbech a rebebil el mo ngaruchei er aike el lousbech. Ngika uluusbech er a klengar er ngii er tia el chutem el rokir el mesiou er a rechad. (Mt. 4:23; 8:16) A Jesus a kmal mle dmeu a rengul el olisechakl er a rebebil e omesterir aike el lousbech. Kau me kulterekokl el dirrek el mo metik er a klou el deurreng sel bo mkengei el mesiou er a rebebil el ta er a ministerial servant.
12. Ngera uchul me ngdiak el kirel a ngii di el techa er kid el mo omdasu el kmo ngdiak a ngera el sebechel meruul el lolengeseu er a ongdibel?
12 A lsekum ke feel el kmo ngdiak a kmal ileakl el decham e lak bo lemechitechut a rengum. Ngulterekokl el ngar ngii a ungil blekerdelem el sebeched el lousbech el kirel a ongdibel. Nglocha mo ngosukau omoluluuch e monguiu aike el lolekoi a Paulus el ngar er a 1 Korinth 12:12-30. A tekingel a meketeklii el kmo, kau a di ua rebek el mesiungel a Jehovah el usbechall e mekreos er a ongdibel. A lsekum ngdiak molab er chelechang aike el qualifications el mo ta er a ministerial servant, e lak em give up. Bai moruul aike el rokui el sebechem el lolengeseu er a Jehovah me a rudam er kau. Ngkmal sebechel mo ulterekokl a rengum el kmo a remechuodel a mo melatk el kirem e omeskau a ngerachel el sebechem el meruul.—Rom 12:4-8.
13. Ngera klemerang el kirel aike el qualifications el kirir a retelutk el odam?
13 Molatk er a ta er a uchul me ngungil omoureor el qualify el mo ta er a ministerial servant: Oumesingd er aike el lolekoi a Bades el kmo ngkirel a ministerial servant el olab a melutk el kirir a rokui el Kristiano. A rokui el Kristiano a kirir el lolekeed er tir er a Jehovah, e mo dmeu a rengrir el merous, e kiei lodeuir a rengul a Dios. Ngera el ileakl el tekoi a kirel a odam el meruul el mo ta er a ministerial servant?
ROLEL E NGSEBECHEM LOUREOR EL MO TA ER A MINISTERIAL SERVANT
14. Ngera belkul a ‘kirel el ulterekokl’? (1 Timothy 3:8-10, 12, BT)
14 Ka me dosaod a bebil er aike el tekoi el losaod a 1 Timothy 3:8-10, 12 (BT). a (Monguiu.) A ministerial servant a ‘kirel el ulterekokl.’ Tia dirrek el sebechel moiuid el ng “serious,” “sebeched el ultuil er ngii” me a lechub “a teletelel a uchul me a rechad a respect er ngii.” Tia diak lebelkul a kmo ngdiak el sebechem locherchur e have fun. (Oli. 3:1, 4) Me nguaisei engdi ngkirem el serious el kirel a ngerechelem. A lsekum ngchisem el kmo ngsebeched el ultuil er kau, e ke mo nguu omengull er a rechedal ongdibel.
15. Ngera belkul a “diak lobult a chururir” me a “ka le ngemokel a de merur er ngii el klungiaol”?
15 A “diak lobult a chururir” a belkul a kmo, ke honest e sebeched el loumerang er kau. Ke oltaut a tekingem e diak mongeblad er a rechad. (Osi. 3:32) A “ka le ngemokel a de merur er ngii el klungiaol” a belkul kmo ke honest sel moruul a siobai lobengterir a rechad me a tekoi er a udoud. Ngdiak mousbech a ungil deleuill er kau lobengterir a rekldemem el Kristiano el mengereker.
16. (a) Ngera belkul a “diak le rrengodel er chomelim el bilong”? (b) Ngera belkul a bo doba “klikiid luklatk”?
16 A “diak le rrengodel er chomelim el bilong” a belkul a kmo ngdiak molim a rrom el mo imis me a lechub el chisem el kmo ke chad er omelim. Oba “klikiid luklatk” a belkul a kmo ke kiei el loltirakl a llechul a Jehovah. Alta ngdiak mcherrungel ke melechesuar er a budech el mei loeak sel lengar ngii a ungil deleuill er kau me a Dios.
17. Ngmekera odam e sebechel e lochotii el kmo ngsebeched el lultuil er ngii er a temel ‘omerriter’ er ngii? (1 Timothy 3:10, BT; dirrek el momes er a siasing.)
17 A “meteriter” a belkul a kmo ke mla ochotii el kmo ngsebeched el loumerang er kau el mo olab a ngerachel. Me sel lebeskau a ngerachel a remechuodel e mkerekikl el oltirakl a ulekrael me a uleklatk el lomeskid a cheldebechel. Moterekeklii el kmo ke medengelii a kirem el meruul er ngii me a taem el kirem el mo merek. Sel bo mungil kutmokl a ngerechelem e moba blakerreng el meruul, e a rebebil el ngar ongdibel a mo mesang e mo oba omereng el saul el kirem el lolengeriakl. Remechuodel moterekeklii el kmo kom train er a retelecholb el odam. (Monguiu er a 1 Timothy 3:10, BT. b) Ngngar ngii a reteruich el mora teruich me a eua a rekrir el telecholb el odam er a ongdibel er kemiu? Ngngar ngii a ungil schedule er tir er omesuub e ungil prepare el kirel a miting? Te blechoel el longer er a miting e teloi er a berkel a klumech? A leuaisei e besterir a ngerachel el chatter er a rekrir me aike el sebechir el meruul. Sel moruul el uaisei e tirka el mekekerei el odam a “meteriter.” Seikid e sel lebo el keed er a lluich a rekrir e ngsebechir el qualify el mo ministerial servant.
18. Ngera belkul a ‘ngdiak a telemellir’?
18 ‘Ngdiak a telemellir’ a belkul a kmo ngdiak a chad el sebechel lotelecheklau er a oberaod el klengit. A Rekristiano a locha mo ngmai a diak el klemerang el ultelechakl. A Jesus mlotelechakl er a tekoi el dimlak el leruul e ulemlaoch el kmo tia dirrek el mo duubech el mora rultirakl er ngii. (Jn. 15:20) Me nguaisei engdi a lsekum e ngmelemolem el klikiid a omerellem, e ke rullii a ungil chisem er a chelsel a ongdibel.—Mt. 11:19.
19. Ngera belkul a “kirel el di ta bechil”?
19 “A chad el mesiou er a ikelesia a kirel el di ta bechil.” A lsekum ke bechiil e ngkirem loltirakl er a di mla moktek er a Jehovah el kirel a chebechiil el delongelel a sechal me a redil. (Mt. 19:3-9) A Kristiano el chad a kmal diak el kirel el mo meruul a deleboes. (Heb. 13:4) Tia dirrek el belkul a kmo ngkirel lochotii a blakerreng el mora bechil. Ngkmal diak el kirel el olengamech er a ngii di el redil.—Job 31:1.
20. Ngmekera chad a ‘lungil omtebechel’ er a delengcheklel?
20 Ng “ungil el omtebechel er a re ngelekel ma telungalek er ngii ma re chad el kie er a blil.” A lsekum ke bdelul a telungalek e ngkirem el omes a ngerechelem er a telungalek el kmal meklou a ultutelel. Moruul er a temel omengull el telungalek er a bek el sandei. Mblechoel el omerk er a klumech lobengkel a derta el chedal a telungalek er kau el mo er sel tkurrebab el sebechem. Mngesuterir a rengelekem el mo er ngii a deleuill er tir me a Jehovah. (Efe. 6:4) A chad el lomekerreu er a telungalek er ngii ochotii el kmo ngsebechel lomekerreu er a ongdibel.—Momekesiu er a 1 Timothy 3:5.
21. Ngera sebechem el meruul er ngii a lsekum e ngdirkak bom ta er a ministerial servant?
21 Rudam, a lsekum e ngdirkak bom ta er a ministerial servant e bo mungil merriter er tia el suobel e moluluuch el mora Jehovah el kirel. Mosuub aike el qualifications el kirir a re ministerial servant e meringel loureor el mo olab. Molatk er a klungel a bltkil a rengum el mora Jehovah me a rudam me a rudos er kau. Molisiich er a urungulem el soam el mesiou er tir. (1 Pe. 4:8, 10) Bo momelechesiu er sel deurreng el bo mnguu sel mosiou er a telungalek er kau er a klereng. Jehovah lomekngeltengat er a blakerreng er kau loureor el meringel el mo mesiou el ta er a ministerial servant!—Fil. 2:13.
CHELITAKL 17 Ngkmal Soak
[Footnote]
a 1 Timothy 3:8-10, BT: Mar diakon dilerrek el uaisei el kirir el ulterekokl, el diak lobult a chururir, ma diak le rrengodel er chomelim el bilong, ma ka le ngemokel a de merur er ngii el klungiaol; e kirir loba klikiid luklatk lomekedelad ra bertelel a kloumerang. Tomuchel el meteriter; e a lak a telemellir e te mochu ra ureor ra klediakon.
b 1 Timothy 3:10, BT: Tomuchel el meteriter; e a lak a telemellir e te mochu ra ureor ra klediakon.
c OMESODEL A SIASING : Ngar er a left el siasing e a Jesus oba klengariourreng el mesiou er a redisaiplo er ngii; ngar er a right el siasing e a ministerial servant olengeseu er a chudelang el odam er a ongdibel.