CHISEL A KLENGAR ER A RECHAD
A Jehovah a Ulemekngeltengat er Ngak el Kirel a Omelilt el Kurruul
Ngmle rak er a 1939. E aki milekiis er a metuda klebesei e ulemekall el kuk kemanget er a ta el sikang el mora kekerei el mats er a Joplin el ngar er a dimesngebard er a Missouri, U.S.A. Ngar isei, e aki milekekokemam el melecha tract er cheungel a chesimer er a derta el blai er tia el basio el ki moldingel er ngii. Me sera ki bo merek e aki ngilasech er a mlai e ulemekall el mo olsiuekl er a rebebil er kemam. Ngar tiaikid el taem e ngmellemesang. Engdi ngera uchul me aki mlo oldingel er a uchei er a lengasech a sils e di mle mereched el merael? Ak mo ouchais er a uriul.
NGAK a mlechell er a rak er a 1934. A demak me a delak el Fred me a Edna Molohan, a mla mesiou el Remesuub er a Biblia (Resioning er a Jehovah) el 20 el rak. Ak kmal oba omereng el saul e le te ulsisecheklak el mo betik a renguk er a Jehovah. Aki kiliei er a Parsons, el kekerei el beluu er a dimesungos er a beluu er a Kansas. A oumesingd er a rechad el mlara ongdibel er kemam a mle ngellitel. A telungalek er kemam a mle blechoel el ngar er a miting e dirrek el teloi er a ureor er a berkel a klumech. E sel bo el sueleb er a Sebadong e aki mo oldingel er a tkul a rael, el domekedong er ngii er chelechang el ousioning er a buai. A lebebil e aki kmal mo mesaul a bedengam, engdi a demak a di blechoel el mechar a imelam el ice cream sel ki bo merek.
Tia el kekerei el ongdibel er kemam a ngar ngii a kmal klou el territory er ngii luldimukl er a bebil mekekerei el mats me a betok el sers. Me a rebebil el chad er a sers a dimlak lomeskemam a udoud el kirel aika el babier, e bai milskemam a iasai, me a ngisel a chermir el malk, me a lechub a malk el dirk chad. A demak a mla locha udoud el kirel a babier el ki morous, me aika el kall a di olengeseu el omekang er a telungalek er kemam.
OUSIONING ER A TEMEL A CAMPAIGN
A demak me a delak a mla er ngii a phonograph el luluusbech er ngii el meruul er a ureor er a berkel a klumech. E ngak a dirk mle kekerei me ngdimlak lsebechek lousbech er ngii, engdi ngkmal mle ungil a renguk lolengeseu er tir el orrael a rekodo, el cheldechedechal a Brother Rutherford, sel ki bo moldingel er tirke el semeriar me a dirrek el tirke el mesuub a Biblia.
Ngak me a demak me a delak el ngar er a medal a mlimam el sound car
A demak a ngiluu a klou el speaker el loia er a bebul a mlimam el 1936 Ford, e rirellii el mo sound car. E tiang a kmal mlo ungil el kirel a ureor er a odingel. Aki blechoel lomuchel el orrael a bebil el ongngak el olechau osengir a rechad, e mo orrael er a cheldecheduch el mengai er a Biblia. E a uriul e aki merous a babier el mo er tirke el semeriar.
Ngar er a kekerei el mats er a Cherryvale, Kansas, e a demak a ulemekall er tia el sound car el mo soiseb er a town park, el betok el chad a mo er ngii e olengull
sel Sandei. E a rebulis a mlei e dilu er ngii el kmo ngdi sebechel lousbech er a sound car er a ikrel tia el park. Me a demak a ngiluu a mlai el mora rael el ngar bita er tia el park me ngdirk sebechir a rechad el ungil lorrenges er a prokuram el merael. Ngkmal mle ungil a renguk el obengkel a demak me a obekuk el Jerry er a chelsel a chouaika el taem.Ngar er aikaikid el taem, e aki mirruul a ileakl el campaign er aike el territory el rechad er ngii a kmal omtok er a urered. Me ngua kulsaod er a uchei, aki mekiis er a metuda klebesei e mekekokemam el melecha tract me a booklet er cheungel a chesmerir a rechad. E a uriul, e aki mo kebetech er a ikrel a beluu e mo kaodengei el kmo ngar ngii a ulebdechem er a rebulis me a lechub e ngdiak.
A lmuut el ta er a kmal ungil rolel a omesiou a okedongall el information march. Aki oubail a meklou el sign e merael el meliuekl er a beluu. Ak dirk melatk er a ta el taem el rudam a mlei er a belumam e merael el oubail a sign el kmo “A Klechelid a Omedikl e Mengeblad.” Te ulemuchel er a blimam, e mirrael el bekord el 1 el mael el meliuekl er a beluu, e liluut el mei er a blimam. Ngmle ungil a rengmam e le ngdimlak a chad el merrob er tir, engdi ngbai mla er ngii a rebetok el mlo sorir el mo medengei el kmo ngera ngar ngii.
A MEKLOU EL ONGDIBEL ER A TAEM ER A DIRK KEKEREI
A telungalek er kemam a blechoel el mora Texas er a temel a meklou el ongdibel. A demak a uluureor er a kombalii er a railroad, me ngmle sebecham el ngar er a train el di tada el mora meklou el ongdibel e dirrek el oldingel er a rechedemam. A klou el ochedal a delak el Fred Wismar me a bechil el Eulalie a kiliei er a Temple, Texas. A okdemelek er a Fred a siluubii a klemerang er a uchelel aike el rak er a 1900 el ngii a taem er a dirk lekekerei, e mlo metecholb, e uluuchais er a rebebil er ngii el uldimukl er a delak el kirel a tekoi el lesiluub. A rudam er a central Texas a kmal ungil medengelii a okdemelek er a Fred e le ngmilsiou el zone servant (chelechang e ngokedongall el odam el oldingel a ongdibel). Ngmle ungil a blekerdelel e dmeu a rengul e blak a rengul, e dirrek el kmal mle ungil kerebai el kirek.
Ngar er a rak er a 1941, e aki mlara train el mora St. Louis, Missouri, el mora klou el ongdibel. Me a rokui el mekekerei el ngalek a mlokedong el mo dengchokl el kmeed er a platform e orrenges er a cheldechedechal a Brother Rutherford, el dai er ngii a kmo “A Rengelekel a King.” E a uriul er tia el cheldechedechal, e a rokui el 15,000 el mekekerei el ngalek a ngilai a sengk. A Brother Rutherford me tirke el olengeseu er ngii a mirrous er kemam a beches el babier el Children.
Ngar er a April 1943, e aki mlora Assembly er a Coffeyville, Kansas el dai er ngii a “Call to Action.” Ngar isei, e ngtilobed a subed el kmo a rokui el ongdibel a mo mengetmokl er a beches el skuul el Skuul el Kirel a Urerel a Dios. Aki dirrek el ngilai a babilengam el ngar ngii a 52 el suobel el ki bo mosuub er tia el skuul. E a uriul, e ak mlo otebedii a kot el cheldechedechak. Tiaikid el assembly a kmal mle ileakl er a renguk, e le ngak me a relmuut el bebil a mlo metecholb er a ralm el ngar er a telelluk er bita er a sers.
NGKMAL MLE SOAK EL MO MESIOU EL NGAR ER A BETHEL
Ak tilobed er a high school er a rak er a 1951, me ngmlo kirek el melatk el kmo ak mo mekerang er a klengar er ngak. A obekuk el Jerry a milsiou el ngar er a Bethel. Me ngkmal mle soak el mora Bethel, me ak uldureklii a application er ngak. Me ngdi mle telkib er uriul, e ak mlokedong el mora Bethel e ulemuchel el mesiou er sera March 10, 1952. Tiang a kmal mle ungil el omelilt el krirellii, e le ngmla ngosukak el lmuut el mo ungil mesiou er a Dios.
Ak uluureng el mo oureor er a printery el olengeseu el meruul a magazine me a lmuut el bebil er a babier. Engdi ngdimlak a ta el bo kuureor er ngii. Ak bai mlo oureor el waiter e a uriul e ak mlora uum. Ngkmal mle soak a urerek e dirrek el siluub a betok el tekoi er ngii. Aki kaitutechei el oureor, me ngar ngii a ulengellek er a chelsel a ta el sils. Ak blechoel el mora Bethel library me a kuusbech aike el betok el babier el mesuub el di ngak el tang. Tiang a ngilsukak el smisichii a klaumerang er ngak me a deleuill er ngak me a Jehovah. Ngmla rullak el mengal mo ulterekokl a renguk el mesiou er a Jehovah el ngar er a Bethel a lsekum ngsebechek. A Jerry a tilobed er a Bethel er a rak er a 1949 e mlo bechil a Patricia, engdi te kiliei el di kmeed er a Brooklyn me te ullengeseu e dirrek el millisiich er ngak e le kdirk mlo soiseb er a Bethel.
Telkib el taem er a uriul er ak bora Bethel, e a rudam a ulsiik er a rebebil rudam el uluureor er a Bethel el sebechir el mo llechukl a ngklir er a list er a oltobed a cheldecheduch er a Bethel. Me a rudam el mle llechukl a ngklir er tia el list a mukngerachel el mo oldingel a ongdibel el ngar er a bekord el 200 el mael a cherridel er a Brooklyn. Ngar isei, e te mo oltobed a cheldecheduch el mora buai, e dirrek el mo oureor lobengkel a ongdibel. E ngak a ta er tirke el milengilt. Me a kulemuchel el oldingel a ongdibel e dirrek el uleltobed a cheldecheduch el mora buai alta e ngtelkib el mle suebek a renguk. Seikid el taem e a cheldecheduch el mora buai a mle ta el sikang a klemengetel. Ak blechoel el mo oldingel a ongdibel el ngar er a train. Ak melatk er a ta el taem el mle Sandei er a sueleb, e mle temel a winter er a rak er a 1954. E ak mlara omerollek el mo remei er a New York, e mle kirek el mora Bethel er sel osisiu el kebesengei. Engdi ngar er a omerollek, e ngmlo er ngii a kmal mesisiich el storm lobengkel a eolt me a snow. Me aike el seng er a mesil er a train a mlo diak loureor, me ngmlo diak lsebechek el mora New York el mo lmuut er a bocha lekukuk er a eim el klok er a tutau er a Kot el Ureor. Me ak kuluusbech er a subway er a train station el mora Brooklyn e di ulerreched el mo oureor er a uum. Ak telkib el mlo meoud, e dirrek el kmal mle mesaul a bedengek e le ngdimlak mechiuaiu el ta el kesus. Engdi sel deurreng er ngak el mesiou aika el ongdibel e dirrek el mo medengelterir a rebetok el rudam me a rudos er kid a lmuut el klou a ultutelel er a ngii di el tekoi el kuruul.
Mengetmokl er kemam el mo broadcast er a studio el WBBR
Ngar er aike el kot el rak er a omesiungek el ngar er a Bethel, e ak ulemuchel el teloi er a prokuram er a omesubel a Biblia el motobed er a bek el sandei el okiu a radio station er kid el WBBR. E aika el studio a ngar er a ongeru el chellibel er sel 124 Columbia Heights. A Brother Alexander H. Macmillan, el mla mesiou er a Bethel el betok el rak, a mle blechoel teloi aika el prokuram er a razio. Aki ulemekedong er ngii el Brother Mac. Ngikang a kmal mle ungil kerebai el kiram a remekekerei el chad el ngar er a Bethel, e le ngmillemolem el blak a rengul alta ngmle chelebangel a betok el ringel er a klengar er ngii.
Aki uluusbech aika el handbill el ouchais el kirel a WBBR
Sera 1958, e ngmlengodech a ngerechelek me ak ulemuchel el oureor lobengterir tirke el tuobed er a Skuul er a Gilead. Ak mle olengeseu er tirka el blak a rengrir el sechal me a redil el ngmai a visa er tir, e kutmokl a rokui el tekoi el kirel a omerollir el mora ike el beluu el bo losiou er ngii. Sel taem e ngkmal meringel a oleng er a skoki, me a ruumesingd er tirke el tuobed er a skuul e mora beluu er a Africa me a Asia a ngar er aike el diall el oltak a ulekloul. E a betok el rak er a uriul e ngmlo beot a oleng er a skoki, me a ruumesingd el missionari a ngar er a skoki el mora ike el beluu el bo losiou er ngii.
Oldekdak a diploma er tirke el mo tuobed er a skuul er a Gilead er a uchei er a graduation
A OMERAEL EL KIREL A MEKLOU EL ONGDIBEL
Ngar er a rak er a 1960, e ak milengetmokl er a rolel a omerael el ngar er a skoki er a beluu er a Merikel el mora Europe el kirel a international convention er a rak er a 1961. Me ak silebek el mora ta er aike el meklou el ongdibel er a beluu er a Hamburg, Germany. E a uriul er a klou el ongdibel, e ngak me a retedei el odam er a Bethel a lilengir a mlai e ulemekall er a beluu er a Germany el mora Italy el mo oldingel er a obis er a Resioning er a Jehovah el ngar er a Rom. E ngar isei, e aki mlora France, e mlo imuul er a Pyrenees Mountains, el mo soiseb er a Spain, el beluu el merrob er a urered. Ngmlo sebecham el mesterir a rudam er
kid er a Barcelona a bebil el babilenged, el ki mulemael el lousbech a bilel a gift. Ngkmal mle ungil a rengmam el meseterir! Me ngar isei, e aki ulemekall el mora Amsterdam, e lmuut el suebek el mora New York.Ngar er a rak er a 1962, e ak mlukngerachel el mo mengetmokl el kirel a omerollir a re 583 el rudam me a rudos el mo teloi a ileakl el international convention el meliuekl er a beluulechad. Tiang a mle “Everlasting Good News” Assembly er a rak er a 1963. Tirke el delegates a mle kirir el mora meklou el ongdibel er a beluu er a Europe, me a Asia, me a South Pacific e sola e mora Honolulu, Hawaii, e a ulebongel er ngii a Pasadena, California. Te dirrek el mo oldingel er a beluu er a Lebanon me a Jordan el kirel a ileakl el tour er aike el beluu er a Biblia. Me sel department er kemam a kiltmokl a skoki me a hotel reservation e dirrek el riruul a visa el luluusbech.
A BECHES EL KLDEMEK ER A OMERAEL
Sel rak er a 1963 a dirrek el kmal ileakl el rak er a renguk e le ngar ngii a ungil el uchul. Ngar er a June 29, e ngak me a Lila Rogers er a beluu er a Missouri el mlei er a Bethel er a rak er a 1960, a mlo bechiil. E a ta el sandei er a uriul er a chebechiielam, e aki dilak el ngar er a around-the-world tour e mlo mesarech a beluu er a Greece, me a Egypt, me a dirrek el Lebanon. Me ngar isei, e aki ngiluu a skoki el mora Jordan. Me nguaisei, engdi tia el beluu a milerrob er a urered, me a rulab a dereder a dimlak lekengei lomesterir a Resioning er a Jehovah a visa er tir. Me ngdimlak ki modengei el kmo ngera mo duubech sel ki bo er tia el beluu. Engdi ka di molatk er sel deurreng er kemam, e aki dirrek el kmal kilebetiekl er a ki meseterir a rudam me a rudos el dechor er bebul tia el kekerei el airport el oba klou el banner el kmo “Welcome Jehovah’s Witnesses”! Ngkmal mle ungil a omerollam el mo mesarech aike el beluu er a taem er a Biblia, e omes aike el basio el lekiliei er ngii a Abraham me a Isak me a Jakob, me a basio el Jesus me a rechapostol er ngii a ulemerk er a klumech er ngii, me a dirrek el Klekristiano a ulemuchel er ngii e uleberk el “mor a beluulchad el rokir.”—Rellir 13:47.
Ngar er a chelsel aika el mereko el 55 el rak, e a Lila a kmal blak a rengul lolengeseu er ngak er aike el rokui el ngerachel el mloterekokl er kemam. Aki mlo oldingel er a Spain me a Porutgal el betok er a ta el taem er sel taem el ika el beluu a milerrob er a urered. Me ngmle sebecham el melisiich er a rudam me a rudos e dirrek el ullab a babier me a lmuut el bebil er a klalo el luluusbech el mong. Ngmlo sebecham el mo oldingel er a rudam er kid el mle kelebus er a blil a kelebus er a Cádiz, Spain. Ngkmal mle dmeu a renguk e le ngmlo sebechek el otebedii a cheldecheduch el melisiich er tir.
Obengkel a Patricia me a Jerry Molohan el mora er a Klou el Ongdibel el dai er ngii a kmo “Budech el Ngar Tia el Chutem” er a 1969
Ngar er aike el rak er a 1963, e ak kiltmokl a rolel a omerael el mora international convention er a beluu er a Africa, me a Australia, me a Central me a South America, me a Europe, me a Far East, me a Hawaii, me a New Zealand me a dirrek el Puerto Rico. Ngak me a Lila a mla mora betok el meklou el ongdibel el kmal diak el sebecham lobes, el ua sel mlo er ngii er a Warsaw, Poland er a rak er a 1989. A rebetok el rudam er a Russia a mlo sebechir el mei er tia el klou el ongdibel. E tiang a mle ketengir el ngar er a klou el ongdibel! Ngmlo sebecham el mo medengelterir a rudam me a rudos el tir a mle kelebus er a Soviet Union el betok el rak el klaumerang er tir a uchul.
A lmuut el ta er a ngerachel el kmal mle dmeu a renguk el meruul er ngii a mlo oldingel e melisiich a telungalek er a Bethel me a remissionari el meliuekl er a beluulechad. Ngar sel ulebongel el odngelam, e aki mlora beluu er a South Korea e dirrek el mlo sebecham el mo medengelterir a re 50 el rudam er kid el ngar er a kelebus er a Suwon. Tirkang a kmal loba tabesul el uldasu e dirrek el lomes el beduluchei el kirel a taem el lluut el mo mesiou er a Jehovah el diak a ngii di el tekoi el merrob er tir. Tia el temam lobengterir a mera el millisiich er kemam.—NGUCHUL A DEURRENG SEL LOLEKETEK A UREOR
Ak mla mesa rolel er a Jehovah a lomekngeltengat er a rechedal er a chelsel aika el mereko el betok el rak. Sera kmetecholb er a rak er a 1943, e a ildisir a re publisher a mle bekord el 100,000. Engdi chelechang, e ngmla mo er ngii a kuk betok er a 8,000,000 el mesiungel a Jehovah er a chelsel a 240 el beluu. Me a meringel urerir tirke el tuobed er a skuul er a Gilead a kmal klou a lengesuir er tia el teketekel a ureor. Nguchul a klou el deuil a renguk sel kuureor el teloi er a rebetok el missionari, me sel kulengeseu er tir el mo sebechir el mora ike el urerir.
Ak kmal oba omereng el saul el di mle kekerei e tibir a renguk el mo tongetengii a klengar er ngak el mo mesiou er a Jehovah, e dirrek el mlo apply el mora Bethel. A Jehovah a kmal mla omekngeltengat er ngak er a chelsel aika el mereko el rak. Me ngobengkel aike el rokui el tekoi el ki muleldeu a rengmam er ngii er a chelsel a omesiungam el ngar er a Bethel, e ngak me a Lila a mera el mle dmeu a rengmam el oldingel el obengkel a bebil el ongdibel er a Brooklyn el kuk betok er a 50 el rak el uchul me ngmla mo er ngii a rebetok el mera el sechelimam.
Ak dirk melemolem el mesiou el ngar er a Bethel el lokiu a ngelsuil a Lila er a bek el sils. Me alta e ngmla mo 84 a rekik, engdi ngdirk dmeu a renguk el meruul er a klou a ultutelel el ureor e dirrek lolengeseu el teloi er a ureor er a branch correspondence.
Ngak me a Lila er chelechang
Ngkmal uchul a klou el deurreng sel bo dechedal tia el mengasireng el cheldebechelel a Jehovah, e dirrek el bo dolechesuar a klemerang er a tekoi el medung er a Malakai 3:18 el kmo: “Kom lmuut el mesa klekakerous er a melemalt ma chebirukel chad, ma klekakerous er a chad el mesiou er ngak ma chad el diak losiou er ngak.” Ngbek el sils el domes er tia el beluulechad er a Satan el di merael el kmal mo mekngit me a rechad a mera el dikea omeltkir e dirrek el dikea ledeu a rengrir. Engdi tirke el betik a rengrir e dirrek el mesiou er a Jehovah a dmeu a rengrir er a klengar er tir, alta e te kiei er a taem er a ringel, e dirrek el oba ulterekokl el omelatk el kirel a ngar mederir el klebesei. Me ngkmal ileakl a techall el dobang el mo ouchais er a rechad el kirel a ungil chais! (Mateus 24:14) A Rengedel a Dios a kmal di kmedu el mo mtechir tia el mechut el beluulechad el oba baradis. Me kede mera el oureng e mengiil er sel sils sel lemei! Seikid e a rokui el ngar tia el chutem a mo mesisiich a bedengir e mo dmeu a rengrir e dirrek el mo kiei el mo cherechar.