1, 2. Ngera el tekoi a luluusbech er ngii a Diabelong el melemall er a klechad?

 A BEBIL el klekedall el ua dengua me a tama er a dengki me a mlai me a ice box a mla rullii a klengar el lmuut el mo ungil. E a bebil el klekedall el ua kelel a boes, me a delakl el dub, me a dekool me a atomic bomb, a mla rullii a klengar el lmuut el mo kdekudel. Engdi ngar ngii a lmuut el ta er a tekoi el dilubech er a uchei er aika el rokui el ngii a kmal mla tomellii a klechad. E tiang ngerang? Ngblulak! Sel domulak e kede melekoi a tekoi el dodengei el kmo ngdiak el klemerang el sebechel mengeuid, me a lechub e mengeblad er a ta er a chad. Me ngtecha dillii a kot el blulak? Ng Diabelong! A Jesus Kristus a omekedong er ngii el “demal a blulak.” (Monguiu er a Johanes 8:44, BT.) * (Momes er a footnote.) Ngoingerang e ngdillii tia el kot el blulak?

² Ngdillii tia el blulak er a betok el telael rak er a uchei er a chelsel a sers er a Eden. A Adam me a Eva a mle dmeu a rengrir el kiei er a chelsel a klebokel el Baradis el Jehovah a kiltmeklii el kirir. Ngdilu er tir el kmo a lsekum te mo kolii a rdechel “sel kerrekar er a mo  medengei a ungil ma mekngit,” e te mo mad. Alta e a Satan a mle medengelii tia el tekoi, engdi nguluusbech er a bersoech el melekoi er a Eva el kmo: “Ng kmal diak le merang, ng diak bo mad.” Tiaikid a mle kot el blulak. A Satan a dirrek el dilu el kmo: “A Dios a melekoi el ua isei ele ng medengei el kmo sel bo mkelii e ng mo mellomes a rengmiu, e mo ua ingii el mo medengei a ungil ma mekngit.”​—Genesis 2:15-17; 3:1-5.

3. Ngera me sel blulekngel a Satan a kmal mle mekngit, e ngera dilubech el tiaikid el blulekngel a uchul?

³ A Satan a kmal mle durengul el omulak e le ngmle ungil medengei el kmo a lsekum a Eva a mo oumerang er ngii e mo kolii sel rodech, e ngmo mad. E tiaikid el tekoi a dilubech. A Eva me a Adam a mlo diak lolengesenges a llechul a Jehovah me a cherengel a taem e te mlad. (Genesis 3:6; 5:5) E a ngaruchei er ngii, e ngokiu a kngtil a Adam, e a “kodall a ulemerk el mor a re chad el rokui.” E a mera er ngii, a “kodall a milengedereder er a rokui el chad . . . , el uldimukl er tirkel dimlak le bor a osisiu el klengit, el ua Adam el ulietii a tekingel a Dios.” (Rom 5:12, 14) Tiaikid a uchul me ngdiak demecherrungel, e dirrek el diak dolemolem el ngar el ua sel uldesuel a Dios er a uchei. Kede bai di ngar el mo bekord el “okeuid el rak” e a lsekum kede ‘mesisiich e kede mo okai,’ engdi a klengar er kid a di mui er a “blekiklreng ma uldikel.” (Psalm 90:10) Aika el rokui el tekoi a mlo er ngii el blulekngel a Satan a uchul!

4. (a) Ngera el ker a kired el mo medengei a nger er ngii? (b) A doltirakl er a Psalm 15:1, 2, e te rua techa sebechir el mo sechelil a Jehovah?

⁴ A Jesus a milsaod el kirel a Satan el kmo: “Ngdiak el dechor ra klemerang, ele ngdiak loba klemerang.” Me a Satan a dirkak lemengodech a blekerdelel. Ngdirk melemolem el “mengeuid ra belulechad el rokir” el ousbech a blulekngel. (Ocholt 12:9, BT) Engdi kid a diak el soad a Satan a longeuid er kid. Me ngkired el mo medengei a nger er a edei el ker. Ngmekera Satan a longeuid er a rechad er chelechang? Ngera uchul me a rechad a omulak? Ngoeak a ngera el rolel e ngsebeched el melekoi a klemerang er a bek el taem me lak doridii a kmes el deleuill er kid me a Jehovah, el ua omerellel a Adam me a Eva?​—Monguiu er a Psalm 15:1, 2.

5. Ngmekera Satan a longeuid er a rechad er chelechang?

⁵ Ngsebeched el diak demecheblad er a Satan. A apostol el Paulus a dilu el kmo: E le “ngdiak lak dodenge ulekbetil.” (2 Korinth 2:11, BT) Kede medengei el kmo a Satan a mengedereder er tia el beluulechad, el uldimukl er a klsuul klechelid, me a mengebirukel el kabelment er a klechad, me a remerechorech a rengrir el chad er a siobai. (1 Johanes 5:19) Me ngdiak lemechas a rengud er a Satan me a remekngit el anghel er ngii el mengesuseu er a rulab a klisiich el chad el mo ‘omulak.’ (1 Timothy 4:1, 2) El ua tiang, a rebebil el chad er a siobai a omulak er a rechad e olterau a klalo el ngii a sebechel melemall er a rechad, me a lechub e te mengeblad er a rechad e melai a ududir.

6, 7. (a) Ngera me ngkmal mekngit a lsekum a remengeteklel a klechelid a omerk a blulak el tekoi? (b) Ngera el blulak a obla mrenges el lomerk a remengeteklel a klechelid?

⁶ Nglmuut el kmal mekngit a lsekum a remengeteklel a klechelid a omulak. E ngera uchul? E le lsekum a ta el chad a mo oumerang a klsuul el osisecheklir, e mo meruul a tekoi el Dios a ouketui, e ngii el chad a sebechel mo diak a techellel el mo kiei el mo cherechar. (Hosea 4:9) A Jesus a mle medengei el kmo a remengeteklel a klechelid er sel taem er ngii a milengeuid er a rechad. Me ngmle bekeu el dmu er tir el kmo: “Kom chebuul kemiu el cheblad el chellimosk ra llach mar Farisee! Ko merael el meliuekl ra daob ma beluu el kirel lomult ra tal sentail, me cho beltiang, e kom rullii el mo kachisois el ngarbab  er kemiu el ngalek ra Gehenna,” el belkul a kmo te mo nguemed. (Mateus 23:15, BT) A Jesus a dilu el kmo tirke el mengeteklel a klsuul klechelid a di ua demerir el Diabelong, el ngii a “omekoad er a re chad.”​—Johanes 8:44.

⁷ Te ngar ngii a rebetok el mengeteklel a klechelid er chelecha el taem er kid. Te locha mo okedongall el bastor me a prist me a rabbi me a swami me a lechub e nglmuut el bebil er a dui. Te di ua Refarisi el diak lolisechakl a klemerang el mengai er a Tekingel a Dios, e bai mla “chemoit a klemerang el kirel a Dios e mo oltirakl a klsuul el tekoi.” (Rom 1:18, 25) A bebil el blulekngir a kmo, “sel ta el mnguu a osobel, e ke di mereko el mo suobel,” me a rechad a ngar ngii a diak lengemed el klengar er tir, me a rulekoad a sebechir el mo ngar el kuk ta er a bedengel a ngar el bleob, me a dirrek el uldasu el kmo a Dios a kongei er a remengolchotaor me a sechal el bechil a sechal me a redil el bechil a redil.

8. Ngera el blulak a di kmedu a remengeteklel a cheldebechel er a balatiks el mo ouchais er ngii, engdi ngkired el mo mekerang?

⁸ A rechad er a balatiks a dirrek el mla ousbech a blulak el mengeblad er a rechad. E a ta el kmal klou el blulak el di kmedu el bo louchais er ngii a kmo, “ng budech ma rokui el tekoi a di ungilbesul.” Engdi seikid el taem e “ng di mereched el mer tir a kloul tellemall!” Me ngdiak el kired el mo oumerang a tekingir tirka el chad er a balatiks el tir a melekoi el kmo ngdi merael el mo ungil a rokui el tekoi. Engdi mera er ngii, kid a ungil el medengei el kmo a Sils er a Jehovah “sel le mei, e ng ua tal merechorech a le mei er a klebesei.”​—1 Thesalonika 5:1-4.

9, 10. (a) Ngera me a rechad a omulak, e ngera telemellel aika el blulak? (b) Ngera el tekoi a kired el melatk er ngii el kirel a Jehovah?

⁹ Chelecha el taem, e ngdiak di el tirke el olab a klisiich el chad a omulak. A babier el “Why We Lie,” el lulluches er ngii a Y. Bhattacharjee, a mesaod el kmo “a blulak a kmal mla mo mesisiich el blekerdelir a rechad.” Tia belkul a kmo a rechad a omdasu el kmo ngdi subed, e di ungilbesul a domulak. A rechad a blechoel lomulak me bo lsebechir el di tir lomekerreu er tir, me a lechub e te locha omart a cheleuid el bla leruul, me a lechub e ngklengit el bla leruul. Te dirrek lomulak me bo lsebechir el ngmai a udoud me a lechub e te meruul a tekoi el di mo uchul a klungiolir. Tia el babier a dirrek el mesaod el kmo a rebebil a di ungilbesul er a rengrir a omulak el mora “rechad el diak lodengelterir, me a rechad er a urerir me a resechelirir, me tirke el betik er a rengrir el chad.”

¹⁰ Me ngera telemellel aika el rokui el blulak? Ngmla mo diak a klaumerang er a delongelir a rechad, me a betok el deleuill a mla metemall. El ua tiang, ngmo uangera telemellel a rengul a blak a rengul el bechiil sechal sel bo lodengei el kmo a bechil a mla mora laokreng, e omulak er ngii el lomart a omerellel. Me a lechub, e kuk molatk er a telemellel a lsekum a chad a mekngit er a bechil me a rengelekel sel lengar er a blai, engdi ngmeruul er ngii el leko ngbetik a rengul, e omekerreu er tir sel lengar er a delongelir a rechad. A chouaitirka el chad a sebechir el omulak er a rechad engdi ngdiak dobes el kmo ngdiak el sebechir el mulekngii a Jehovah. A Biblia a mesaod el kmo “a rokui el tekoi a di bleketakl er osengel” a Dios.​—Hebru 4:13.

11. Ngera klubeled el denguu er a mekngit el blekerdelel a Ananias me a Safira? (Momes er a siasing er a uchelel a suobel.)

 ¹¹ Ngar er a chelsel a Biblia, e ngmesaod er a blekerdelir a rubekel el Kristiano el Satan a milengesuseu er tir el mo omulak er a Dios. A Ananias me a Safira a millasem el mengeblad er a rechapostol. Te ulterau a bebil el chetemir e di ngiluu a tedobech er a cheral el mesterir a rechapostol. Tirkang a di mle sorir el mengas a rengrir a rechad er a ongdibel, me te dilu er a rechapostol el kmo te milsterir a rokui el udoud. Engdi Jehovah a mle medengei el kmo te ulumulak, me ngulemals er tir.​—Rellir 5:1-10.

12. Ngera mo duubech el mo er tirke el omulak, e diak lobult er a mekngit el blekerdelir, e ngera uchul?

¹² Ngua ngera uldesuel a Jehovah el kirir tirke el chad el omulak? A rokui el chad el melekoi a blulak, e diak lobult er tia el mekngit el blekerdelir a mo mechoit er a chelsel a “diosech el ngau” el di ua Satan el belkul a kmo te mo nguemed el mo cherechar. (Ocholt 20:10; 21:8; Psalm 5:6) E ngera uchul? E le Jehovah omes er tirka el omulak el di ua rechad el “kor a blekerdelel a bilis” el belkul a kmo a omerellir a kikiongel er a osengel a Dios.​—Ocholt 22:15.

13. Ngera kede medengei el kirel a Jehovah, e tia el klemedengei er kid, ngrullid el mo soad el mekerang?

¹³ Kid a ungil medengei el kmo a Jehovah a “diak le ua re chad el omulak,” ngdirrek a “Dios me ng diak lomulak.” (Ulecherangel 23:19; Hebru 6:18) A Jehovah a kmal ouketui a “blulak el chur.” (Osisechakl 6:16, 17) Me a lsekum ngsoad el oldeu er a rengul, e ngkired el mo melekoi a klemerang. Me ‘lak dekautingaol er a delongeled.’​—Kolose 3:9.

14. (a) Ngera rulleterir a remera el Kristiano el mo ngodech a blekerdelir er tirke el chedal a klsuul klechelid? (b) Msodii a omellach el ngar er a Lukas 6:45.

¹⁴ Ngera ta el rolel el rulleterir a remera el Kristiano el mo ngodech a blekerdelir er tirke el chedal a klsuul klechelid? Kede ‘chadecheduch a  klemerang.’ (Monguiu er a Sekaria 8:16, 17.) A Paulus a dilu el kmo: “Aki bai olecholt er kemam el mesiungel a Dios, . . . e melekoi a meral tekoi.” (2 Korinth 6:4, 7) A Jesus a dirrek el dilu el kmo a “ikel mui er a reng a me tuobed er a ngor.” (Lukas 6:45) Tiang a belkul a kmo a chad el honest a melekoi a klemerang. Ngmelekoi a klemerang el mora rechad el diak lodengelterir, me a rechad er a urerel, me a resechelil, me a rebetik er a rengul. Me chelechang e bo dosaod a bebil el rolel e kede ochotii el kmo kede melasem el meruul a llemalt er a bek el taem.

15. (a) Ngera me ngmekngit a dekiei el erung a blekerdelel a klengar er kid? (b) Ngera sebechel ngosuterir a remekekerei el chad el mo sebechir loltngakl a orimel er tirke el ua meklungir? (Momes er a footnote.)

¹⁵ A lsekum ke kekerei el chad, e nglocha soam el nguu a kengei er tirke el ua meklungem. Me ngokiu tiaikid luldasu, e a rebebil el mekekerei el chad a mo kiei el erung a blekerdelel a klengar er tir. Te meruul er tir el ua lemelemalt a blekerdelir sel lobengterir a rechad er a blirir me a dirrek el ongdibel, engdi ngkmal ngodech a blekerdelir sel lousbech a tekoi er a social media me a lechub e te obengterir a rechad el diak losiou er a Jehovah. Te locha melekoi a mekngit el tekoi, e diak el tabesul a rolel a loubail, e orrenges a chelitakl el mekngit a tekoi er a chelsel, e mo cheltelaol, e ousbech a mekngit el kar, e omart er tir e kasisiik me a lechub e te meruul a lmuut el bebil er a mekngit el tekoi. Te omulak er a redemerir me a rederrir, me a rudam me a rudos er tir, me a dirrek el Jehovah. (Psalm 26:4, 5) Engdi a Jehovah a ungil medengei sel doruul er kid el leko kede mengull er ngii, e a osisiu el taem e kede meruul a tekoi el ngii a ouketui. (Markus 7:6) Me ngbai kmal ungil a lsekum kede oltaut a tekoi el medung er a osisechakl el kmo: “Lak mechechei er a re mekngit el chad; di molemolem el meluu er a RUBAK er a bek el sils.”​—Osisechakl 23:17. * (Momes er a footnote.)

16. Ngkirel mo uangerang a nger er kid sel doruul a application er kid el mo soiseb er a mui el taem el lomesiou?

¹⁶ A lsekum ngsoam el mo mesiou el regular pioneer me a lechub e ke mo ta er a mesiou el mui el taem, el ua ureor er a Bethel, e ngkirem el mo rullii a application er kau. Ngkmal klou a ultutelel el kirem louchais a klemerang sel monger aike el ker el kirel a klisichel a bedengem, me a tekoi er a ongelaod el molilt el mo meruul me a blekerdelem. (Hebru 13:18) Engdi ke mo mekerang a lsekum ke mla rullii a tekoi el Jehovah a ouketui er ngii me a lechub e ngtekoi el omekringel er a ukltkem e dirkak mosaod er ngii lobengterir a remechuodel? Molengit er tir me lengesukau me bo lsebechem el mesiou er a Jehovah el klikiid a ukltkem.​—Rom 9:1; Galatia 6:1.

17. Kede mo mekerang a lsekum a rechad el oltutakl er kid a mo oker er kid a ker el kirir a rudam er kid?

¹⁷ Ke mo mekerang a lsekum a beluu el mkiei er ngii a merrob er a urered, me a rulab a dereder a mdechemau e oker er kau a ker el kirir a rudam er kau? Ke mo ouchais er tir a rokui el  tekoi el modengei? Ngmilekera Jesus er sel taem el merreder er a Rom a uleker er ngii a ker? A Jesus a ultutii a omellach er a Biblia el kmo ngar ngii a “belsechel el di deluk ma belsechel el dongedecheduch,” e a lebebil e ngdi liluk el dimlak a ta el tekoi el ledillii! (Olisechakl 3:1, 7; Mateus 27:11-14) Me a lsekum kede mo chelebangel er a osisiu el blekeradel, e ngkired el mo kerekikl sel doruul a tekoi me lak bo duchul e a rudam er kid bo lechelebangel er a kdekudel el blekeradel.​—Osisechakl 10:19; 11:12.

18. Ngkired el mekerang a lsekum a remechuodel a oker er kid a ker el kirir a rudam er kid?

¹⁸ Ke mo mekerang a lsekum ke medengelii a chad el ngar er a ongdibel el mla ruebet er a oberaod el klengit? A remechuodel er a ongdibel a mla mukngerachel el kirir el mengikiid er a ongdibel, me te locha mo oker er kau el kirel aike el tekoi el modengei. Me ke mo mekerang, el ileakl a lsekum ngika el chad a kmal sechelim me a lechub e ngchedam? A Biblia a mesaod el kmo: “Sel molekoi a klemerang e ng meruul a llemalt.” (Osisechakl 12:17; 21:28) Me ngerechelem el mo ouchais er a remechuodel a rokui el klemerang el diak bertii a di telkib er ngii. A remechuodel a ngar ngii a llemeltir el mo medengei a klemerang me bo lsebechir el sikii a kot lungil rolel e lengesuir ngii el chad el lmuut el sumechii a deleuill er ngii me a Jehovah.​—Jakobus 5:14, 15.

19. Ngera kede mo mesaod er a ongingil suobel?

¹⁹ A David a milluluuch el mora Jehovah el kmo: “A klemerang isei cho mongeriil er ngii.” (Psalm 51:6) A David a mle ungil medengei el kmo a klou a ultutelel el tekoi a sel chelsel a rengud. Me a remera el Kristiano a ‘chadecheduch a klemerang’ er a bek el taem. A lmuut el ta er a rolel e kede ochotid el kuk ngodech er a rechedal a klsuul klechelid, a kid lolisechakl er a klemerang el ngar er a Biblia. Me ngar er a ongingil suobel, e kede mo mesaod er a rolel a doruul er ngii lokiu a omesiunged.