Doumerang er a Blak a Rengul el Mengetekled—El Kristus
“E le mengetekliu a di tang el Kristus.”—MATEUS 23:10, NW.
CHELITAKL: 14, 30
1, 2. Ngera el klou el ngerachel a mloterekokl er a Josua er a uriul er a lemad a Moses?
A JEHOVAH dilu er a Josua el kmo: “A mesiungek er a Moses a mla mad. Me chelecha e mkedmeklau kau ma re chad er a Israel el rokui, e morael el mo imuul er a Jordan, el mor sel beluu el bo kbeskemiu.” (Josua 1:1, 2) Me tia mle klou el omelodech el mora Josua el ngii a mle mesiungel a Moses el kirel a 40 el rak!
2 A Moses a mle kemanget el taem el lemengeteklir a rechad er a Israel, engdi chelechang e ngmlo kirel a Josua el mo mengeteklir. Me nglocha millatk el kmo a rechad te mo kongei er ngii el mo mengeteklir me a lechub e ngdiak. (Duteronomi 34:8, 10-12) A ta el babier el mesaod er a Biblia a mesaod er a Josua 1:1, 2 el kmo, a ta er a kot el meringel e kdekudel el temel a kabelment er a beluu, a sel lemengodech a mengeteklel a beluu el kuk mo ta er a chad, alta e tia el tekoi a dilubech er a irechar me a lechub e ngchelecha el taem.
3, 4. Ngmilekera Dios a lomekngeltengat er a Josua e le ngii el uluumerang er Ngii, e ngera el ker a sebeched el loker er ngii?
3 A Josua a mla er ngii a ungil uchul me ngmle bekikl, engdi nguluumerang er a Jehovah, e mle mereched el mo oltirakl a ulekrael er ngii. (Josua 1:9-11) Me a Dios a ulemekngeltengat er a Josua e le nguluumerang er Ngii, me nguluusbech er a anghel el mo omekrael er ngii me a rechad er a Israel. E ngika el anghel a mle Tekoi, el kot el Ngelekel a Dios.—Exodus 23:20-23; Johanes 1:1.
4 A Jehovah ullengeseu er a renged er a Israel el mo sebechir el melodech a uldesuir el kirel a omeldechel a tekoi el mlei e le Josua a mlo beches el mengeteklir. Me chelechang e ngdirrek el betok a meklou el omelodech el meketmeklang. Me kede locha mo melatk el kmo, ‘Me chelecha lolemolem a cheldebechelel a Dios el olengeriakl, e ngar ngii a ungil uchul me kede oumerang er a mla metutk el Mengetekled el Jesus?’ (Monguiu er a Mateus 23:10, NW.) * (Momes er a footnote.) Me a bo donger er tia el ker e kede mo merriter er a rolel a Jehovah a mle mengeteklir a rechedal er a irechar er aike el temel a omelodech.
OMEKRAEL ER A RECHEDAL A DIOS EL MORA BELUU ER A NGLAT
5. Ngera el ngodech el tekoi a dilubech el mora Josua er a bita er a Jeriko? (Momes er a siasing er a uchelel a suobel.)
5 A uriul er a rechad er a Israel er a bo leiuul er a Jordan, e ngdilubech a kmal ngodech el tekoi el mora Josua. Ngar bita er a mats er a Jeriko, e ngmilsa chad el loba saider me nguleker er ngii el kmo: “Kau ke tar a re soldau er kemam ma lechub e ke tar a re cherarou?” Me a Josua a mlo mechas a rengul er ngika el chad er a ledu el kmo ngmle “mengeteklel a urrurt er a RUBAK,” el anghel el kltmokl el mo mesebechakl er a rechedal a Dios. (Monguiu er a Josua 5:13-15.) Alta bebil el cheldecheduch er a Biblia a melekoi el kmo a Jehovah a milengedecheduch er a Josua, engdi tia ochotii el kmo a Dios a locha uluusbech er a anghel el mo mengedecheduch er a Josua el ua lurruul er a irechar.—Exodus 3:2-4; Josua 4:1, 15; 5:2, 9; Rellir 7:38; Galatia 3:19.
6-8. (a) Nglocha ngera uchul me ngkora ua lengodech a ulekrael er ngike el anghel? (b) Kede mekera medengei el kmo aike el ulekrael a mle olechotel a llomeserreng e mlei er sel kot el ungil temel? (Momes er a footnote.)
6 Me ngii el anghel a dilu er a Josua aike el kirel el meruul me bo el sebechel el mo kats er a Jeriko. Me a kot, e a bebil er aika el ulekrael a kora ua lengodech. El ua tiang, ngii el anghel a dilu er a Josua me bo lomotk er a rokui el soldau. E tia belkul a kmo ngmo diak el sebechir el mo oumekemad el sesei el klebesei. Me tia ngmle ungil taem el bo lomotk er tirka el chad?—Genesis 34:24, 25; Josua 5:2, 8.
7 Me tirka el soldau a locha millatk el kmo, ‘Ngmekera ki momekerreu a telungalek er kemam a lsekum a recheraro a mo oumekemad er a camp er kemam?’ Engdi ngdilubech a tekoi el dimlak lolatk el kmo ngmo ngduubech! A rechad er a Jeriko a dimlak bo loumekemad er a rechad er a Israel e te bai mlo medakt er tir. Kede menguiu el kmo: “A Jeriko a mle ulseksikm a chesmerel me lak a chad er a Israel el soiseb er ngii. Ngka le bla er ngii a sebechel el soiseb ma lechub e le tobed er a beluu.” (Josua 6:1) Me tia locha rirelleterir a rechad er a Israel el mengal mo oumerang a ulekrael er a Dios!
8 Me ngii el anghel a dilu er a Josua el kmo a rechad er a Israel a diak el kirir el mo oumekemad er a Jeriko. Ngbai kirir el merael er a mats el tang er a ta el sils el elolem el klebesei, e kuk euid el taem er a ongeuid el klebesei. Me a resoldau a locha millatk el kmo, ‘Tia mera el di mengoit a temed me a klisiched!’ Engdi ngike el diak lemeues el Mengeteklir a rechad er a Israel a mle medengei a tekoi el loruul! Me a bo loltirakl er a ulekrael er ngii a di mo smisichii a klaumerang er a rechad er a Israel, me tir a dimlak a belkul a bo loumekemad er a urrurt er a Jeriko.—Josua 6:2-5; Hebru 11:30. * (Momes er a footnote.)
9. Ngera me ngkired el oltirakl a ngii di el ulekrael el dengai er a cheldebechelel a Dios? Mosaod.
9 Me ngera sebeched el suub er tia el cheldecheduch? A lebebil er a taem, e a cheldebechelel a Jehovah a meruul a tekoi el ngar er a beches el rolel, me ngdiak deblechoel el mo medengelii a uchul. El ua tiang, kede locha dimlak dolatk el kmo ngungil uldasu a bo dousbech a electronic device sel dosuub el di kid el tang, me sel doldingel, me a lechub sel dengar er a miting. Engdi chelechang e kede locha mla mes a klungiolel a bo dousbech aika el klalo. Me sel deues a klungiolel a chouaika el omelodech, e nglmuut el smisichii a klaumerang er kid, me ngii a mengal mo er ngii a kltarreng er a delongeled kid me a rudam me a rudos er kid.
NGMILEKERA KRISTUS E MLE MENGETEKLIR A REKOT EL KRISTIANO?
10. Ngtecha ngike el mera el ulemekrael er tia el klou a ultutelel el miting er a chelechad er a ruungerachel er a Jerusalem el kirel a botk?
10 A uriul er a 13 el rak er a bo el Kristiano a Kornelius el ngii a dirkak lobotk, e a rebebil el Chijudea el Kristiano a dirk millemolem el melekoi el kmo a botk a klou a ultutelel. (Rellir 15:1, 2) Me ngar er a mats er a Antiok, e a rudam a mle kaumondai el kirel tia el tekoi. Me a remechuodel a ulderchii a Paulus el mora Jerusalem, e oker a chelechad er a ruungerachel el kirel tia el tekoi. Engdi ngtecha ngike el mera el uleldurech er ngii? A Paulus a silodii el kmo: “Ak mlo ngmasech el ocholt a uchul.” Me ngkmal bleketakl el kmo a Kristus a ulemekrael aika el tekoi me bo el sebechel el monger tia el ker el okiu a chelechad er a ruungerachel.—Galatia 2:1-3.
A Kristus a mle mengeteklel a ongdibel er a Rekristiano er a irechar (Momes er a parakurab 10, 11)
11. (a) Ngera uchul me a rebebil el Chijudea el Kristiano a dirk millemolem el oumerang el kirel a botk? (b) Ngmilekera Paulus e ochotii el kmo ngkilengei el olengeseu a uldesuir a remechuodel er a Jerusalem? (Momes er a footnote.)
11 A Kristus a ulemekrael er a chelechad er a ruungerachel el mo meketeklii el kmo a Rechisentael el Kristiano a dimlak a belkul a bo lobotk. (Rellir 15:19, 20) Engdi uriul er a betok el rak, e a rebetok el Chijudea el Kristiano a dirk millemolem el lomotk er a rengelekir el sechal. E a remechuodel er a Jerusalem a rirenges a tekoi el kmo a Paulus a dimlak loba omengull el kirel a Llach er a Moses. Me te ulengit er a Paulus el mo rullii a ta er a tekoi el mo ochotii el kmo ngoba omengull el bedul ngii el Llach. * (Momes er a footnote.) (Rellir 21:20-26) Te dilu er ngii el Paulus el mo ngoititerir a reteua el chad el mora templo me a rechad lesang el kmo nguleba omengull el kirel ngii el Llach. Me a Paulus a mle sebechel el dmu el kmo, ‘Tia klebelung el tekoi! Ngera uchul me ko molengit er ngak el mo meruul er tiang? A Rechijudea el Kristiano el dimlak lodengelii a belkul tia el ker el kirel a botk a bai mle cheleuid.’ Engdi Paulus a mle medengei el kmo a remechuodel a mle sorir a rokui el Kristiano a bo loba kltarreng a uchul me ngkilengei el mo oltirakl a ulekrael er tir. Engdi kede locha mo melatk er a uchul me a Jesus a milecherei ngii el tekoi er a botk me ngmelemolem el mondai el kemanget el taem alta Llach er a Moses a mlo diak a belkul er a lemad a Jesus.—Kolose 2:13, 14.
12. Ngera sel uchul me a Kristus a kilengei me lengelakl a taem er a uchei er a bo leketmeklii sel ker el kirel a botk?
12 Kede ousbech a taem el mo kongei a beches el klemedengei. A bebil el Chijudea el Kristiano a uluusbech a taem el mo kongei el kmo te mla mo diak lengar cheungel ngii el Llach. (Johanes 16:12) Te mle blechoel el omdasu el kmo a botk a mle olechotel a ileakl el deleuill er tir me a Dios. (Genesis 17:9-12) A rebebil a mle medakt el mo modechelakl er a belurir a Rechijudea e le tir el ngodech er a rechad. (Galatia 6:12) Engdi cherengel a taem, e a Kristus a milsterir a betok el ulekrael lokiu a babier el mlara Paulus.—Rom 2:28, 29; Galatia 3:23-25.
A KRISTUS A DIRK MENGETEKLEL A ONGDIBEL ER NGII
13. Ngera sebechel el ngosukid el mo olengeseu er sel rolel e a Kristus a mengetekled er chelechang?
13 A Kristus a dirk Mengeteklel a ongdibel er a Rekristiano er chelechang. Me a lsekum a cheldebecheled a remuul a omelodech el diak dungil medengei, e molatk er a rolel a Kristus a mle mengeteklir a rechedal a Dios er a irechar. Ngar er a taem er a Josua me a lechub a rechapostol e a Kristus a mle blechoel mesterir a ungil ulekrael el mo omekerreu er a rechedal a Dios, e melisiich er a klaumerang er tir, e ngosuterir el mo melemolem el loba kltarreng er a delongelir.—Hebru 13:8.
A ulekrael el lomeskid a blak a rengul el mesiou er chelechang a ochotii el kmo a Jesus a omekerreu er kid
14-16. Ngmekera ulekrael el mlara “blak a rengul e mellomes a rengul el mesiou” e ochotii el kmo a Kristus a soal ngosukid el mo melemolem el mesisiich a klaumerang er kid?
14 Chelecha el taem e a “blak a rengul e mellomes a rengul el mesiou” a omeskid a ulekrael el dousbech er sel blsechel. (Mateus 24:45) Tia el ulekrael a meketeklii el kmo a Jesus a omekerreu er kid. A Marc el teua rengelekel a melekoi el kmo: “A Satan a melasem el mengitechut er a ongdibel lokiu sel loldechelakl a telungalek. Engdi ngokiu a omelisiich el mo meruul a temel a omengull el telungalek er a bek el sandei, e a klumech a bleketakl el mora rebdelul a telungalek el mo omekerreu er a telungalek er tir!”
15 Sel desa rolel e a Kristus a mengetekled, e kede mo ungil medengei el kmo ngsoal el ngosukid el mo melemolem el mesisiich a klaumerang er kid. El ua tiang, a ta er a remechuodel el ngklel a Patrick a dmu el kmo: “A rebebil a miltik er ngii el diak luchul a omelisiich sel lobii a rechad el mora group er tir el kirel a odingel sel le weekend.” Engdi ngdmu el kmo tia el omelodech a ochotii a ulekerreuil a Jesus el mora rokui el ngar er a ongdibel. El ua tiang, a rebebil el rudam me a rudos el merur, me a lechub e te dimlak leblechoel el oldingel a mla mo omdasu el kmo te usbechall. E tia millisiich er a klaumerang er tir.
16 A Kristus a dirrek el olengeseu er kid el mo melemolem el ultaut a osenged el kirel a berkel a klumech el ngii a kot el klou a ultutelel el ureor el meketmeklang er tia el chutem er chelechang. (Monguiu er a Markus 13:10.) A André el dirk mlo mesiou el ta er a remechuodel a mle blechoel el melasem el mo oltirakl a ngii di el beches el ulekrael el mlara cheldebechelel a Jehovah. Ngdmu el kmo: “Tia el mlo mengkekerei er a ildois er a rechad el ngar er aika el obis er a Resioning er a Jehovah a omeklatk er kid er a orechudel el taem er chelechang, me sel klungel a ultutelel a bo dousbech a klisiched el kirel a ureor er a berkel a klumech.”
KEDE MEKERA OLENGESEU EL MELISIICH A ULEKRAEL ER A KRISTUS?
17, 18. Ngera me ngkirel ultaut a osenged er aike el rolel e ngmlo uchul a klungioled e le kid el kilengei a omeldechel a tekoi?
17 A ulekrael el dengai er a Jesus Kristus el ngii a King er kid a mo ngosukid er chelechang me a ngar medad el klebesei. Molasem el mo ultaut a osengem er aike el rolel e ngmlo uchul a klungiolem e le kau el kilengei a dirk mlo er ngii el omeldechel a tekoi. Me ngar er a temel a omengull el telungalek er kau, e ngsebechem el mesaod a rolel aike el omelodech er a miting me a lechub a odingel e ngilsuir a telungalek er kau.
Kau ke olengeseu er a telungalek er kau me a rebebil el mo kongei aike el omeldechel a tekoi er a cheldebechelel a Jehovah? (Momes er a parakurab 17, 18)
18 A lsekum kede blechoel el melebedebek el kmo a doltirakl a ulekrael er a cheldebechelel a Jehovah a mo uchul a betok el klungiaol, e ngmo beot er kid el oltirakl er ngii el ulekrael e mo dmeu a rengud. El ua tiang, kid el diak de print a betok el babier el ua uchei a uchul me ngdiak dongoit a betok el udoud. E kid el ousbech a beches el technology a uchul me ngsebeched el merkii a ungil chais el mora rebetok el chad. Me kid, ngsebeched el mo blechoel lousbech a electronic publication me a media? Tia ta er a rolel e ngsebeched el olengeseu er a Kristus el soal a bo dousbech a udoud me a klekedall er a cheldebecheled el ngar er a ungil rolel.
19. Ngera uchul me ngkired el olengeseu el melisiich a ulekrael er a Kristus?
19 Sel dolengeseu el melisiich a ulekrael er a Kristus, e kede olengeseu er a rudam me a rudos er kid el mo oba mesisiich el klaumerang e mengal mo oba kltarreng er a delongelir. A André el millekoi el kirel a dirk mlo er ngii el omeldechel a tekoi el kirel a klungel a telungalek er a Bethel el meliuekl er a beluulechad a kmo: “A ungil blekerdelir tirka el mlara Bethel el kilengei el mo meruul er a chouaika el omelodech a melisiich er ngak el mo oumerang er a rolel e a Kristus a mengetekled, e oba omengull el bedul tirka el mlara Bethel. Te melemolem el merael el obengkel a kuruma er a Jehovah lokiu sel ledeu a rengrir er a ngii di el ngerachel el moterekokl er tir.”
MOUMERANG ER A MENGETEKLED
20, 21. (a) Ngera me ngsebeched el oumerang er a Kristus el Mengetekled? (b) Ngera el ker a bo dosaod er ngii er a ongingil el suobel?
20 Ngdi kmedung e a Mengetekled el Jesus Kristus a mo “kats” e “mo mesisiich a ngarbab el klisiich er a mekemad.” (Ocholt 6:2, BT; Psalm 45:4) Engdi ngme lmuut er chelechang me ngmengetmokl er kid el kirel a klengar er a beches el beluulechad, me a ureor el bo doruul er a chelsel el mo olisechakl er tirke el mo mekiis er a kodall, e olengeseu el rullii tia el chutem el mo baradis.
21 A lsekum kede melemolem el oumerang er a Jesus el Mengetekled e King er kid er a chelsel a ngii di el blekeradel, e ngmo omekrael er kid el mora beches el beluulechad. (Monguiu er a Psalm 46:1-3.) Me chelecha el taem, e a omeldechel a tekoi a sebechel el mo meringel el ileakl a lsekum ngar ngii a lerellii er kid er a rolel el dimlak dolatk er ngii. Me sel leduubech el uaisei, e ngmekera sebeched el melemolem el budech a uldesued e doba mesisiich el klaumerang er a Jehovah? Kede mo mesaod er tia el ker er a ongingil el suobel.
^ Mateus 23:10, NW: “Ngdirrek el ka bo lomekedong er kemiu a rechad el kmo mengeteklam, e le Mengetekliu a di tang el Kristus.”
^ A uriul er a telemellel a Jeriko, e a rehakase a miltik a klou el ildois er a grain el rechad a mirridm engdi te dimlak longang. Tia melisiich a cheldecheduch er a Biblia el ngii a mesaod el kmo a temir el oumekemad a di mle kedeb, me a rechad er a Israel a dimlak el kirir el menga grain er a Jeriko. Me ngii el mle temel a omeridm a uchul me ngmle ungil taem el Israel a mo nguu a beluu e le ngmle betok a kall.—Josua 5:10-12.
^ Momes er a baks el “A Paulus a Mle Ngar er a Eou a Rengul e Mlo Mesisiich er a Omengarm” er a Ongkerongel er a July 1, 2003 er a 16 el llel.