1, 2. (a) Ngera sel mle kot el klou a ultutelel lureor el lurruul er ngii a Jesus, e ngera uchul? (b) Ngkired el mekerang me bo dungil el “kldemel a Dios er a ureor”?

 A JESUS KRISTUS a mle daiksang, e a uriul e ngmlo mesiou er a Dios. (Markus 6:3; Rom 15:8) Ngkmal mle ungil meruul aika el eru el bedengel a ureor. Sera dirk el daiksang, e ngmilsuub el mo meduch lousbech a dongu el meruul a klekedall lousbech a kerrekar. E sera bo losiou er a Dios, e nguluusbech er a dmolech el klemedengei er ngii er a Bades el lolengeseu er a redi chad el mo medengei a klemerang el ngar er a Tekingel a Dios. (Mateus 7:28; Lukas 24:32, 45) Me sera bo el 30 a rekil e ngmlo diak loureor el daiksang, e mlo mesiou er a Dios e le ngmle ungil medengei el kmo tiaikid a kot el klou a ultutelel lureor el mle sebechel el meruul er ngii. Ngdilu el kmo a berkel a klumech er a ungil chais el kirel a Rengedel a Dios, a ta er a uchul me a Dios a ulderchii el mei er a chutem. (Mateus 20:28; Lukas 3:23; 4:43) Me a Jesus a mle mechesang el omerk er a ungil chais, e mle soal a rechad a bo loruul er a osisiu el tekoi.​—Mateus 9:35-38.

² A oumesingd er kid a diak de daiksang, engdi kid el rokui a mesiou er a Dios el olisechakl er a rebebil el kirel a ungil chais. E tia kmal klou a ultutelel lureor e le Dios a oungerachel er ngii. Me kid  a okedongall el “kldemel a Dios er a ureor.” (1 Korinth 3:9; 2 Korinth 6:4) Kede kongei aike el tekingel a ta er a milluches er a psalm el kmo: “A uchetemel a tekingem a klemerang.” (Psalm 119:159, 160, NW) A tekingel a Jehovah a klemerang. Tiaikid a uchul me ngsoad el mo ‘melemalt a dosaod a klemerang’ sel domerk er a klumech. (Monguiu er a 2 Timothy 2:15.) Me kede melasem el lmuut el mo meduch lousbech er a Biblia, el ngii a kot el klou a ultutelel el dongu er kid, el mo olisechakl er a rechad el kirel a Jehovah me a Jesus me a Renged. Me a cheldebechelel a Jehovah a mla meskid a betok el meklou a belkul el dongu el ngosukid el mo ungil meruul er a omesiunged, me ngkired el mo meduch lousbech. Aika el dongu a ngar er a chelsel a Blil a Dongu el Kirel a Osisechakl.

3. Ngera kired el mo kerekikl el melatk er ngii sel doruul er a omesiunged? E mekera Rellir 13:48, NW e ngosukid el mo meruul er tia el tekoi?

³ Ke locha mo melatk el kmo ngera me ngokedongall el Blil a Dongu el Kirel a Osisechakl, e diak el Blil a Dongu el Kirel a Berkel a Klumech. E le tekoi el “omerk” a belkul a kmo kede ouchais el kirel a klumech engdi a tekoi el “osisechakl” a belkul a kmo kede mesaod er a klumech me bo lsebechel a chad el mo medengei a tekoi el lerenges, e bo loltaut aike el tekoi el lesuub. Me ngar er a chelsel tia el di kmedu el mo nguemed el blekeradel, e ngkired el mo melasem el omuchel a omesubel a Biblia, e olisechakl er a rechad el kirel a klemerang me bo lsebechir el mo disaiplo er a Kristus. Me tia belkul a kmo ngkirel mo blak a rengud losiik er tirke el rokui el “rredemelel a diak a ulebengelel el klengar,” e ngosuterir el mo omuchel el mesiou er a Jehovah.​—Monguiu er a Rellir 13:44-48, NW. * (Momes er a footnote.)

4. Kede mekera metik er tirke el “rredemelel a diak a ulebengelel el klengar”?

⁴ Kede mekera metik er tirke el “rredemelel a diak a ulebengelel el klengar”? A di mle ta el rolel e tirke el kot el Kristiano a mlo sebechir el metik er a rechad a ulekiu sel omerk er a klumech. A Jesus a dilu er a redisaiplo er ngii el kmo: “Ma cho bo msiseb ra ngiidi le mats malechub e ngiidi le beluu e kom sikii a chad el redemelel.” (Mateus 10:11, BT) Me kid a kired el meruul er a osisiu el tekoi er chelechang. Me nguaisei, engdi ngdiak domdasu el kmo a rechad el diak el blak a rengrir, e mekedidai a rengrir me a lechub e ngdiak lomekerreu er a Dios, a mo kongei el rongesii a klumech er a ungil chais. Kid a osiik er tirke el melemalt a rengrir, e ngariou a rengrir, e mera el semeriar el mo medengelii a klemerang. Ngsebeched lomekesiu er tia el blekeradel el osiik er a rechad el ua lurruul er ngii a Jesus er sera loudaiksang. A kot e ngulemuchel el osiik a ungil kerrekar er a uchei er a bo loruul a klekedall el ua chesimer me a ongelungel me a lmuut el bebil. Seikid e ngsebechel nguu a blil a dongu er ngii, e ousbech a dechal e meruul aika el klekedall. Me ngdi osisiu er chelechang, e ngkired lomuchel el losiik er a remelemalt a rengrir el chad, e mo ousbech a dongu er kid me a duch er kid el ngosuterir el mo disaiplo.​—Mateus 28:19, 20.

5. Ngera el tekoi a kired el mo medengei el kirel a dongu el ngar er a chelsel a Blil a Dongu el Kirel a Osisechakl? Momekesiu. (Momes er a siasing er a uchelel a suobel.)

⁵ Ngar er a chelsel a blil a dongu, e a derta el dongu a ngar ngii a ulterekokl el usbechel. El ua tiang, ka molatk aike el dongu el Jesus a uluusbech er sera loudaiksang. * (Momes er a footnote.) Nguluusbech a dongu el melai a klemengetel a klalo, e melecha olangch, e melasech, e  omsibs, e mengeduib a kerrekar, e uluusbech a dongu el omeklemalt a klekedall e omuid el oldak ngii el klekedall. Me ngdi osisiu, a derta el dongu el ngar er a chelsel a Blil a Dongu el Kirel a Osisechakl a ngar ngii a ulterekokl el usbechel. Mada me bo dosaod a rolel e ngsebeched lousbech aika el meklou a ultutelel el dongu.

6, 7. (a) Ke milekera er a omousbech er a contact card? (b) Ngera me kede ousbech er sel invitation el kirel a miting er a ongdibel er kid?

⁶ Contact Card. Aikang a mekekerei el klalo engdi ngkmal ungil dongu el ouchais er a rechad el kmo kid kede rua techang, e omekrael er tir el mora website er kid el jw.org. Ngar tia el website e ngsebechir el mo medengei a lmuut el betok el kired, e sebechir lolengit a omesubel a Biblia. Te kuk betok er a 400,000 el chad a mla olengit a omesubel a Biblia lokiu a jw.org, e a rebetok el dart a dirk olengit er a bek el sils! Ngsebechem lolab a bebil er aika el contact card, e dirrek lousbech sel mongedecheduch er a rechad el cho betik er tir er a bek el sils.

⁷ Invitation. Tia el mla meketmokl el invitation el mora miting er kid a kmo: “Aki mengemedaol er kau el mo mesuub a Biblia el obengterir a Resioning er a Jehovah.” Ngdirrek el melekoi el kmo ngsebechem el meruul er tiang “el ngar er aike el miting er kemam” me a lechub e ke “mesuub.” Me tia el invitation a ouchais er a rechad el kmo kid kede rua techang, e dirrek el mengemedaol er “tirke el kerekikl er a tekoi er a klereng er tir” el mo mesuub a Biblia lobengked. (Mateus 5:3, NW) Engdi tia el okedong a mora rokui el chad el mei er a miting alta ngdiak lekengei el mesuub a Biblia. Me sel lemei er a miting er kid, e ngmo sebechir el mtebengii el kmo ngsebechir el suub a betok el tekoi el kirel a Biblia.

8. Ngera me ngklou a ultutelel el kirir a rechad el mei er a miting er kid el kesengil e ngta el taem? Mosaod.

⁸ Ngklou a ultutelel el kired el melemolem el mengemedaol er a rechad el mei er a miting er kid el kesengil e ngtang. E ngera uchul? E le sel lemei, e ngmo sebechir el mesang el kmo a Resioning er a Jehovah a olisechakl a klemerang er a Biblia, e olengeseu er a rechad el mo medengelii a Dios, el diak leua klsuul klechelid. (Isaia 65:13) El ua tiang, a ta el obekel er a beluu er a Merikel el Ray me a Linda a mlo mtebengii tia el klekakerous er a sesei el rak er a uchei. Te uluumerang er a Dios e mle sorir el mo ungil medengelii. Me te tilbir el mo merael el mesarech a rokui el ikelesia er a chelsel a belurir, el ulsiik a eru el tekoi er a uchei er a bo lekengei el mo chedal. Me a kot e ngmle sorir el ngar ngii a lesubii er a ikelesia, e a ongerung e ngkirir el mesang el kmo a rechedal a ikelesia a ungil loubail el ua blekerdelir a rechad el melekoi el kmo te mesiou er a Dios. Tia el blekeradel a millemolem el betok el rak e le ngmle betok a ikelesia er a belurir. Engdi ngmlo mekngit a rengrir er a uriul. Ngdimlak a ngera el lesubii, e a rechedal a ikelesia a kmal mekngit a rolel a loubail el diak lolecholt a omengull. Me a uriul er a ulebongel el ikelesia el llechukl er a babilengir, e a Linda a mirrael el mo oureor, e a Ray a mlo remei. Me ngar er a omerolel el mo remei, e ngulemekall el engelakl er a Blil a Ongdibel. Me ngulemdasu el kmo, ‘Ak di mo tmuu el mo mesa el kmo ngera ngar ngii.’ E tiang a kot el mle ungil tekoi el blo lolechesuar! A rebek el chad el ngar er a Blil a Ongdibel a mle ungil a omerellir e kmal ungil loubail. A Ray a mle dengchokl er medal, e kmal mlo soal a tekoi el lesiluub! Tiang a kora mekltkid er a omesodel a Paulus el kirel a chad el mle ketengel me soiseb er a miting e dilu el kmo: “A Dios a meral ngar a delongeliu.” (1 Korinth 14:23-25). Me a uriul er isei, e a Ray a millemolem el mei er a miting er a bek el Sandei. E ulemuchel el  mei er a miting er a Klengar er Kid a Rekristiano me a Omesiunged. E a Linda a dirrek el ulemuchel el mei er a miting er kid, alta e tirkang a mle ngar er a 70 me a derengel a rekrir, engdi te ulemuchel el mesuub er a Biblia, e dirrek el mlo metecholb.

9, 10. (a) Ngera me ngbeot a dousbech a tract? (b) Msodii a rolel a dousbech er a tract el Ngerang a Rengedel a Dios?

⁹ Tract. Ngar ngii a kleai el tract el ngar er a blil a dongu er kid. Ngbeot a dousbech, e dirrek el kmal ungil dousbech lomuchel a cheldechedechad. Sera letobed aike el kot el tract er kid er a rak er a 2013, e ngmla mo er ngii a bekord el eim el biliol er ngii el motobed! Aika el tract a di osisiu a format er ngii. Me sel bo meduch el ousbech er a chimong, e ngmla mo sebechem lousbech er rokui! Me ngmekera cho mousbech er a tract el omuchel er a cheldechedecham el mora chad?

¹⁰ Nglocha mo soam lousbech er a tract el Ngerang a Rengedel a Dios? Me kochotii a ker el ngar medal tia el tract el mora chad e oker el kmo: “Ngmla ta el molatk el kmo ngerang a Rengedel a Dios? Ke mo melekoi el kmo . . . ?” E sola e oker er ngii el kmo ngera er aika el edei el nger a lengiltii. E lak mdu er ngii el kmo a nger er ngii a melemalt me a lechub e ngcheleuid, e bai di bekengii tia el tract el mo er sel section el “Aike el Lolekoi a Biblia” el ngar er a chelsel e monguiu aike el bades el llechukl er ngii el Daniel 2:44 me a Isaia 9:6. E ngar er a ulebengelel a cheldechedechemiu, e moker er a ker el ngar cheungel a “Tekoi el Sebechem el Melatk” el kmo: “Ngmo ua ngerang a klengar er a cheungel a omengederederel a Rengedel a Dios?” Ngsebechem el mo onger er ngii sel omluut el mo mengedecheduch er ngii. Me sel mluut el mo kasoues, e ngsebechem el ousbech er a 7 el suobel er a brochure el Ungil Chais el Mla er a Dios! el ngii a ta er a dongu el dousbech er ngii el omuchel a omesubel a Biblia.

11. Aika el babilenged, ngmileketmokl el mo mekerang? E ngera kired el mo medengei el kirel?

¹¹ Magazine. A The Watchtower me a Awake! a kot el klou a omerusel me a oidel er a bek el babier er a beluulechad! E le rechad er a betok el kakerous el beluu a menguiu aika el babier, me a tekoi el llechukl er a ikrel a mleketmokl el mo omeksemeriar er a rechad er a bek el beluu. Me ngkired lousbech aika el babier el olengeseu er a rechad el mo melatk a meklou a ultutelel tekoi er a klengar er chelechang. Engdi a kot, e ngkired el mo medengei el kmo ngera el babier a mleketmokl el mora uangera blekerdelel el chad.

12. (a) A Awake! ngmileketmokl el kirir a rua techang, e ngera moktek er ngii? (b) Ngera el ungil tekoi a mlo er ngii e le kau el dirk uluusbech er tia el dongu?

¹² A Awake! a mileketmokl el kirir a rechad el kekerei me a lechub e ngdiak a klemedengei er tir er a Biblia. Nglocha diak a ngera el lodengei el kirel a osisecheklir a Rekristiano, e locha diak lsal loumerang a klechelid, me a lechub e ngdiak lodengei el kmo a Biblia a sebechel lolengeseu er tir er a klengar er tir. A ta el moktek er a Awake! a mo oterekeklii a rengul a chad el menguiu el kmo ngmera el ngar ngii a Dios. (Rom 1:20; Hebru 11:6) Ngdirrek el melasem el olengeseu er a remenguiu el mo oumerang el kmo a Biblia a “kmal meral tekingel a Dios.” (1 Thesalonika 2:13) Me a dai er aike el edei el Awake! er a rak er a 2018 a: “The Way of Happiness,” me a “12 Secrets of Successful Families,” me a “Help for Those Who Grieve.”

13. (a) A public Watchtower, ngmileketmokl el kirir a rua techang? (b) Ngera el ungil tekoi a mlo er ngii e le kau el uluusbech er tia el dongu?

¹³ A ngaruchei el moktek er a public Watchtower   a mesaod a osisechakl el ngar er a Biblia el mora rechad el ngar ngii a telkib el omengull er tir el mora Dios me a Biblia. Te locha medengei a bebil tekoi el kirel a Biblia, engdi ngdiak a melemalt el klemedengei er tir er a osisecheklel. (Rom 10:2; 1 Timothy 2:3, 4) Aike el edei el public Watchtower er a rak er a 2018 a onger a ker el ua: “Is the Bible Still Relevant Today?,” me a “What Does the Future Hold?,” me a “Does God Care About You?”

14. (a) Aike el kleua el video el ngar er a Blil a Dongu el Kirel a Osisechakl, ngmileketmokl el kirel mo mekerang? (b) Ngera el ungil tekoi a dilubech e le kau lullecholt aika el video?

¹⁴ Video. Sel taem er a Jesus, e aike el dongu er a daiksang a di mle ousbech a chim. Engdi chelechang, e a redaiksang a ngar ngii a dongu er tir lousbech a dengki, el ua olecholech, me a bsibs, me a btanget. Me sel domerk a klumech er chelechang, e ngar ngii a lmuut el bebil er a klekedall el uldimukl er a babilenged, el ngii a klebokel el video el sebeched lolecholt el mora rechad. E a kleua er ngii a ngar er a blil a dongu er kid el: Ngera Me Ngkirem el Mesuub er a Biblia?, me a Ngera Meketmokl er a Omesubel a Biblia?, me a Ngera Meketmokl er a Blil a Ongdibel?, me a Te Rua Techa Resioning er a Jehovah? Aike el mekedeb el video a sebeched lorrael er a chelsel a kesai er a eru el bung, e kmal ungil dousbech sel domuchel a cheldechedechad. E aike el mekemanget el video a sebeched lousbech sel deluut el mo oldingel er tirke el semeriar, me tirke el ngar ngii a klou el temir. Aika el video a kmal ungil dongu e le ngsebechel lomeksemeriar er a rechad el mo sorir el mesuub a Biblia e dirrek el mei er a miting er kid.

15. Ngera ngrullii a lsekum a chad a omes a video el ngar er a omelekingel? Mosaod.

¹⁵ El ua tiang, a ta el odos er kid a miltik er a redil el millukl er a Micronesia, el melekoi a tekoi er a Beluulchab. Ngika el odos er kid a ulechotii a video el Ngera Me Ngkirem el Mesuub er a Biblia? el tekoi er a Beluulchab. Me sera lomuchel tia el video, e ngika el redil a dilu el kmo: “Tia omelekingek. Ngkmal diak kuumerang er tia el tekoi! Ak medengelii a accent er ngii e le ngika el chad a chad er a beluak. Ngmelekoi a tekingek!” Me a uriul, e ngdilu el kmo ngmo omes e menguiu aike el rokui el ngar er a jw.org el ngar er a omelekingel. (Momekesiu er a Rellir 2:8, 11.) Ka molatk er a lmuut el ta er a tekoi el dilubech. A odos er kid er a beluu er a Merikel el ngelekel a ta er ngii el sechal a kiei er a ngodech el beluu. Nguldureklii a link el kirel a osisiu el video el mo er ngii el ngar er a omelekingel. Me ngulemes er a video e lilechesii a e-mail er ngii el kmo: “Sel tedebechel el mesaod el kirel a klisichel ngike el mekngit el mengedereder er a beluulechad a kmal mlo mechas a renguk er ngii. Me ak mla meluches el olengit a omesubel a Biblia.” Tiang a kmal klou el tekoi, e le ngika el chad a kiei er a beluu el kabelment er ngii a merrob er a urered!

16. Mosaod a derta el moktek er aika el brochure el: (a) Molengesenges er a Dios Me Bo Mkiei el Mo Cherechar. (b) Ungil Chais el Mla er a Dios! (c) Te Rua Techang a Meruul a Soal a Jehovah er Chelechang?

¹⁶ Brochure. Ngmekera dolisechakl er a klemerang el mora chad el metitur el menguiu me a lechub e ngdiak a babier el mesaod er a Biblia el ngar er a omelekingel? Ngsebeched lousbech er a brochure el Molengesenges er a Dios Me Bo Mkiei el Mo Cherechar. A kmal ungil dongu el dousbech er ngii el omuchel a omesubel a Biblia a brochure el Ungil Chais el Mla er a Dios! Ngsebechem locholt aike el 14 el suobel el mora chad el ngar er a ikrel tia el babier e moker er ngii er sel kot el lesemeriar er ngii. E sola e momuchel er seikid el suobel. Ngmla ta el molasem er tiang sel mluut el mo oldingel er tirke  el semeriar? Sel ongedei el brochure el ngar er a blil a dongu er kid a Te Rua Techang a Meruul a Soal a Jehovah er Chelechang? Tia mileketmokl el mo olisechakl er a remesuub a Biblia el kirel a cheldebecheled. Me a lsoam el mo meduch lousbech er ngii er a bek el temel a omesubem er a Biblia lobengkel a chad, e momes er sel March 2017 el A Klengar er Kid a Rekristiano me a Omesiunged​—Subeled er a Miting.

17. (a) Ngera ileakl el moktek er a derta er aika el babier el dousbech el mesuub? (b) Ngera kirir tirke el rokui el mo metecholb el meruul er ngii, e ngera uchul?

¹⁷ Book. A uriul er a omomuchel er a omesubel a Biblia lobengkel a chad el ousbech er a brochure, e ngmla mo sebechem el mo mesuub er a babier el Ngerang Mera el Lolisechakl a Biblia? Tia el dongu a sebechel ngosuterir a rechad el suub a lmuut el betok el kirel aike el uchetemel a osisechakl el ngar er a Biblia. Me a lsekum a chad el mesuub a Biblia a olengeriakl, e mla rokir tia el babier e ngsebechem el melemolem el mesuub lobengkel lousbech er a babier el Molemolem el Ngar er a Bltikerreng er a Dios. Tia el dongu a osisecheklii el mo meduch loltaut a omellach er a Biblia er a chelsel a klengar er ngii. Lak mobes, mo lmuut er a uriul er a lemetecholb, me ngdirk kirel melemolem el mesuub el dimerekmo bo lemerek er aika el eru el babier. Tia mo ngosuir el mo mesisiich a klaumerang er ngii er a Jehovah, e melemolem el blak a rengul el mo er ngii.​—Monguiu er a Kolose 2:6, 7.

18. (a) Ngera ngmelisiich er kid a 1 Timothy 4:16 el mo meruul el ua dolisechakl a klemerang, e ngera mo rsel? (b) Ngera turrekong er kid sel dousbech er a Blil a Dongu el Kirel a Osisechakl?

¹⁸ Me kid el Sioning er a Jehovah a ngerecheled el mo olisechakl er a rechad el kirel a “tekoi ra klemerang, el evangkelio” el sebechel lomekrael er tir el mo nguu a diak a ulebengelel klengar. (Kolose 1:5, BT; monguiu er a 1 Timothy 4:16.) Kid a ngar ngii a Blil a Dongu er kid el ngar ngii a dongu el sebechel ngosukid. (Momes er a baks el “ Blil a Dongu el Kirel a Osisechakl.”) Me bo dousbech aika el dongu el mora tkurrebab el sebeched. A derta er kid a sebechel el di ngii el melilt el kmo ngera el dongu a bo lousbech er ngii er oingera el taem. Engdi lak dobes, a turrekong er kid a diak di dorous a babier, e diak di domesterir a rechad a babier a lsekum te diak el semeriar er tia el klumech el domerk er ngii. A turrekong er kid a meruul er tirke el mo disaiplo el tir a melemalt a rengrir, e ngariou a rengrir, e mera el semeriar el mo medengelii a klemerang, el tir a chad el “rredemelel a diak a ulebengelel el klengar.”​—Rellir 13:48, NW; Mateus 28:19, 20.