1. Ngmekera 2 Korinth 3:1-3, NW e ngosukid el moba omereng el saul el kirel a techall el sebeched el mesuub a Biblia lobengkel a chad e ngmo metecholb? (Momes er a siasing er a medal tia el babier.)

NGMO uangera uldesuem sel mesa chad el milsuub a Biblia el ngar er a territory er a ongdibel er kau el mo metecholb? Ngulterekokl el kmal mo dmeu a rengum. (Mt. 28:19) E a lsekum e ke milsuub el obengkel, e kulterekokl el kmal semeriar el mo mesa tia el tekoi! (1 Th. 2:19, 20) A ngelsecheklel me a techolb er ngii a ochotii a meringel el ureor me a blakerreng el kau me a rebebil el ngar er a ongdibel a mirruul el ngilsuir. Me ngsebeched el omekedong er tirke el dirk mlo metecholb el disaiplo el dingar el babier el ochotir tirke el milsuub lobengterir me a ongdibel el rokir.​—Monguiu er a 2 Korinth 3:1-3, NW. *

2. (a) Ngera el klou a ultutelel el ker a kired el melatk er ngii, e ngera uchul? (b) Ngmekera omosaod er a chad el mesuub a Biblia? (Momes er a footnote.)

² Ngkmal dmeu a rengud el mesa el kmo ngar er aika el mereko el eua el rak, e te bekord el 10,000,000 el chad el meliuekl er a beluulechad a mesuub a Biblia * er a bek el buil. Ngar er a chelsel aika el osisiu el rak, e te bekord el 280,000 a mlo metecholb er a bek el rak el Sioning er a Jehovah e beches el disaiplo er a Jesus Kristus. Kede mekera ngosuterir a rebetok er tirka el miliol el mesuub a Biblia me te mo nguu a techolb? A Jehovah a dirk omesterir a techellir a rechad el mo Sioning er ngii. Sei a uchul me kede mora tkurrebab el sebeched el ngosuterir el olengeriakl  me te mo metecholb er a di mereched el taem. E le ngkmal mla mo kosekodel a taem!​—1 Ko. 7:29a; 1 Pe. 4:7.

3. Ngera kede mo mesaod er tia el suobel el kirel a dosuub a Biblia lobengkel a chad?

³ A obis er a Resioning er a Jehovah a mirruul a survey el mo mesa el kmo kede mekera dengesuterir a rebetok el chad el dosuub lobengterir el olengeriakl el mo nguu a techolb, e le ngkmal mla mo orechudel tia el ureor er a omeruul el disaiplo. Ngar tia el suobel me sel ongingil, e kede mo omes aike el sebeched el suub er a remeketeketang el pioneer, missionari, me a rudam el oldingel a ongdibel. * (Osi. 11:14; 15:22) Te mesaod aike el sebechir tirke el olisechakl me a remesuub lobengterir el meruul me luut el mo ungil a omesubir er a Biblia. Ngar tia el suobel, e kede mo mesaod a eim el tekoi el bek el chad el mesuub a Biblia a kirel el meruul me lolengeriakl el mo nguu a techolb.

4. Ngera kired el mtebengii el kirel a omesubel a Biblia el meketmokl er a medal a tuangel er a blil a chad?

⁴ Te betok el rudam me a rudos a mesuub a Biblia lobengterir a rechad er a medal a tuangel er a blirir. Me alta tia ungil rolel a domekeroul a klemeriarreng er tir er a Biblia, engdi chouaika el omesaod a blechoel el di mekedeb e diak lengar ngii er a bek el sandei. Me a rebebil er a rudam me a rudos a olengit el nguu a dengua er a chad el semeriar me bo el sebechir loudengua me a lechub e te text e ouchais er ngii a tekoi er a Biblia me lolemolem a klemeriarreng er ngii. A chouaika el omesaod a sebechel melemolem el betok el buil engdi ngdiak bo luchul e ngmo ungil medengelii a Biblia. Me ngsebechel a chad el mesuub el mera el olengeriakl el mora telbilel a reng me a techolb a lsekum ngdi seikid a ildisel a taem el longoit er ngii el mesuub a Tekingel a Dios? Ngdiak el sebechel.

5. A doltirakl er a Lukas 14:27-33, e ngngera ngmillisiich er ngii a Jesus el sebechel ngosukid er tia el ureor er a omeruul el disaiplo?

⁵ A Jesus a mle ta el losaod a tekoi el kirel a chad el meruul a lsoal mo disaiplo er ngii. Ngmillekoi el kirel a chad el soal omekedechor er a tebekebok me a king el soal mo oumekemad. Ngdilu el kmo a chad el mo omekedechor a kirel kot e “ng mo dengchokl e mes a mo cheral” tia el tebekebok e a king a kirel “omuchel el tirterii” el kmo a resoldau er ngii ngsebechir el mo kutmeklii a tekoi el lullatk er ngii. (Monguiu er a Lukas 14:27-33.) Me ngdi osisiu, a Jesus a mle medengei el kmo a chad el soal mo disaiplo er ngii a kirel kerekikl el merriter aike el kirel meruul el mo oltirakl er ngii. Sei a uchul me ngkired el melisiich er tirke el dosuub  lobengterir me bo losuub er a bek el sandei. Ngmekera doruul er tiang?

6. Ngera sebeched el melasem el meruul er ngii me a rechad el dosuub a Biblia lobengterir bo lolengeriakl er a omesubir?

⁶ Momuchel lokiu sel mrellii a omesubel a Biblia er a medal a tuangel el telkib el mo kemanget. Alta ngsebechem el mesaod er a lmuut el ta er a bades er a Biblia sel mluut el mo oldingel er ngii. Me a chad er a blai sel bla bo el sau er tiang, e ngsebechem el oker er ngii a lsekum ngar ngii a basio el sebechiu el mo dengchokl e dmak el mesaod a suobel. A nger er ngii a mo ochotii a osengel el kirel tia el omesubiu. Cherengel a taem e ngsebechem el oker er ngii a lsekum e ngsoal mesuub el eru el taem er a chelsel a ta el sandei, me bo lemereched el olengeriakl. Me nguaisei, engdi ngdirk ngar ngii a kirel meruul er ngii.

7. Ngmekera ngike el olisechakl e ungil kutmeklii el kirel a bek el temel a omesuub?

⁷ Kau el olisechakl a kirem el mo ungil kutmeklau el kirel a bek el temel a omesubiu. Ngsebechem lomuchel el menguiu a suobel el bo mosuub e omes a bades. Bo modengei aike el meklou a ultutelel el tekoi. Momtab er a dai er a suobel, mekekerei el dai, ker, bades el kirel mechuiu, siasing, me a ngii di el video el mesaod er a tekoi el bo mosuub er ngii. E molatk er a chad el mesuub me a rolel e ngsebechem el mesaod er a suobel el ngar er a beot e bleketakl el rolel me lsebechel el mo medengelii e oltaut er ngii.​—Neh. 8:8; Osi. 15:28a.

8. Ngera ngosisecheklid er ngii a tekingel a apostol Paulus el ngar er a Kolose 1:9, 10 el kirel a doluluuch el kirir tirke el dosuub lobengterir?

⁸ A ta er a tekoi el sebechem el meruul er ngii el kutmeklau a mo meluluuch el mora Jehovah el kirel ngike el mesuub me aike el lousbech. Molengit er a Jehovah me lengesukau el mo ungil lousbech er a Biblia el olisechakl me bo el sebechem el rutechii a rengul. (Monguiu er a Kolose 1:9, 10.) Molasem el melatk aike el tekoi el sebechel mo meringel er ngii el mo medengei me a lechub e ngkongei. Lak mobes el kmo a turrekong er kau a soam el ngosuir el olengeriakl el mo nguu a techolb.

9. Ngmekera ngike el olisechakl e ngosuir a chad losuub lobengkel el mengetmokl er ngii el kirel a omesubir? Mosaod.

⁹ Kede oureng el kmo ngokiu a deblechoel el mesuub a Biblia el obengkel a chad e ngmo oba omereng el saul el kirel aike el bla leketmokl a Jehovah me a Jesus el kirel, e mo soal mo medengei a lmuut el betok. (Mt. 5:3, 6) Ngike el  mesuub a mo ngmai a klungiolel er a omesubel a lsekum ngmelebedebek aike el losuub. Me ngungil a omosaod er a klungel a ultutelel a longetmokl el kirel a derta el omesubiu loeak sel longuiu er a suobel er a uchei e lolebedebek er a rolel e ngsebechel loltaut er ngii. Ke mekera ngosuir? Mdak el mengetmokl er a ta er a suobel e mochotii a rolel a omoruul er ngii. * Msodii a rolel e ngsebechel metik er a nger er a ker, e mochotii a rolel a lolecha olengchelel er aike el meklou a ultutelel tekoi me lak lobes er a nger er a ker. E molengit er ngii me longer el di ousbech a tekingel. Sel loruul uaisei, e ke mo medengelii a klemedengei er ngii el kirel a suobel. Engdi ngar ngii a lmuut el ta er a tekoi el sebechem el melisiich er ngii el mo meruul er ngii.

10. Ngera me ngklou a ultutelel a donguiu er a Biblia er a bek el sils, e ngera omousbech er ngii me bo el sebechem el ngmai a klungiolem er a omengiuel a Biblia?

¹⁰ A chad el mesuub a diak di lengai a klungiolel er a omesubel er a bek el sandei, ngdirrek el mo klungiolel a lsekum ngdi ngii el meruul a bebil el tekoi er a bek el sils. Ngkirel mengedecheduch er a Jehovah. Ngoeak a ngera el rolel? Sel lorrenges e longedecheduch er a Jehovah. Ngsebechel lorrenges er a Dios sel longuiu er a Biblia er a bek el sils. (Jos. 1:8; Psa. 1:1-3) Mochotii a rolel e ngsebechel lousbech er a “Schedule er a Omengiuel a Biblia” el ngar er a jw.org/pau. * E molisiich er ngii el mo melebedebek aike el losuub er a Biblia el kirel a Jehovah me a rolel e ngsebechel loltaut aike el losuub me bo el sebechel ngmai a klungiolel er a omengiuel er a Biblia.​—Rel. 17:11; Jak. 1:25.

11. Ngmekera chad el mesuub e mo meduch el meluluuch, e ngera uchul me ngklou a ultutelel a leblechoel meluluuch el mora Jehovah?

¹¹ Molisiich er a chad el mesuub el mo mengedecheduch er a Jehovah lokiu sel loluluuch er a bek el sils. Moluluuch el mera el ngar er a rengum er a uchelel me a orokiolel a omesubiu, el meluluuch lobengkel e dirrek el kirel ngii el chad. Me sel lorrenges a nglunguchem, e ngmesuub el mo meluluuch el mera el ngar er a rengul el mora Jehovah el Dios lokiu a ngklel a Jesus Kristus. (Mt. 6:9; Jn. 15:16) Ka di molatk er a rolel a omengiuel er a Biblia er a bek el sils (lorrenges er a Jehovah) me a nglunguuch (longedecheduch er a Jehovah) a lengesuir el mengal mo kmeed er a Dios! (Jak. 4:8) A lsekum ngmo meruul uaisei er a bek el sils, e ngmo ngosuir el olengeriakl el mo meruul er a  telbilel a rengul e mo metecholb. Ngera lmuut el ta er a tekoi el mo ngosuir?

12. Ngmekera ngike el olisechakl a lengesuir a chad el mesuub el mo mekurulii a deleuill er ngii me a Jehovah?

¹² Aike el losuub a chad a diak di lerellii el mo omdasu e ngdirrek el kirel rutechii a rengul. E ngera uchul? A rengud, el uldimukl er a urunguled me a tekoi el domelechesiu a otbechid el mo meruul a tekoi. A Jesus er a lolisechakl er a rechad e ngrirelleterir el mo omdasu a tekoi. Engdi a rechad a dirrek el uleltirakl er ngii e le ngrirutech a rengrir. (Lk. 24:15, 27, 32) A chad el mesuub a kirel mesa el kmo a Jehovah a mera el Chad er a rengul, el sebechel mekurulii a deleuill er ngii lobengkel, e dirrek el omes er Ngii el Demal, e Dios er ngii, e Sechelil. (Psa. 25:4, 5) Me sel mosuub, e mocheuir a osengel ngika el mesuub el mora ika el klebokel el blekerdelel a Dios. (Exo. 34:5, 6; 1 Pe. 5:6, 7) Moruul er tiang el kirel a bek el tekoi el mosaod. Mngesuir el mo oba omereng el saul el kirel aike el klebokel el blekerdelel a Jehovah, el bltikerreng, blekokuii, me a klechubechub. A Jesus a dilu el kmo “a kot el ngarbab el llach e kot el klou a belkul” a mo “betik a rengum er a Rubak el Dios er kau.” (Mt. 22:37, 38) Molasem el melalem er a dmolech el bltikerreng er a Dios er a rengul a chad el mesuub.

13. Mochotii a olechotel e ngsebechem el ngosuir a chad el mo mesuub el kirel a blekerdelel a Jehovah.

¹³ Sel mchadecheduch el terung, e mouchais er ngii er aike el uchul me ngbetik a rengum er a Jehovah. Tia locha mo ngosuir el mtebengii el kmo ngii me ngdirrek el kirel mekurulii a kmes el deleuill er ngii lobengkel a Dios. (Psa. 73:28) El ua tiang, ngar ngii a tekoi el ngar er a babier el mosuub er ngii me a lechub e ngbades el olecholt er a ta er a blekerdelel a Jehovah el bltikerreng, llomeserreng, llemalt, me a lechub e ngklisiich, el kmal rutechii a rengum? Mouchais er ngii el mora chad el mesuub e molekoi er ngii el kmo tiang a di ta er a betok el uchul me ngbetik a rengum er a Demad el ngar er a eanged. Ngar ngii a lmuut el ta er a tekoi el kirir a rebek el mesuub a Biblia el meruul er ngii me bo lolengeriakl el mo nguu a techolb.

14. Ngera ngouchais a Hebru 10:24, 25 el kirel a miting er a ongdibel el sebechel ngosuir a chad el mesuub el olengeriakl?

¹⁴ Kid el rokui a soad tirke el mesuub a lolengeriakl el mo nguu a techolb. A ta er a klou a ultutelel rolel e ngsebeched el ngosuterir a sel dolisiich er tir el mei er a miting er a ongdibel. A remeketeketang el olisechakl a melekoi el  kmo tirke el mesuub el di mereched el mei er a miting a mereched el olengeriakl. (Psa. 111:1) A rebebil el olisechakl a melekoi er tirke el losuub lobengterir el kmo ngbetok a bo lesuub er a miting el diak el sebechir el suub er a omesubir. Monguiu er a Hebru 10:24, 25 el obengkel, e mosaod a klungiaol el bo lengai a lemei er a miting. Mochotii er ngii a video el Ngera Meketmokl er a Blil a Ongdibel? * Mngesuir el rullii a mora miting er a bek el sandei el mo klou a ultutelel el tekoi er a klengar er ngii.

15. Ngera sebeched el rullii el melisiich er a chad el mesuub el mo blechoel el ngar er a miting?

¹⁵ Ngera sebechem el rullii a lsekum a chad el mesuub a dirkak lemei er a miting me a lechub e ngdiak leblechoel ngar er a miting? Moba klemeriarreng el ouchais er ngii a tekoi el msilubii er a ta er a dirk mlo merek el miting. Tia lmuut el klou a klisichel er a bai dongemedaol er ngii. Bsa Ongkerongel me a Subeled er a Miting er a Klengar er Kid me a Omesiunged el dosuub er ngii er chelechang. Mocholt aike el bo dosaod er a ongingil el miting, e moker er ngii el kmo ngera lekora kmal semeriar er ngii. A tekoi el bo leues e lerenges sel lekot el mei er a miting a lmuut el kmal mo ungil er a tekoi el bla leues e lerenges er a ngii di el kldibel er a klechelid el bla lebo er ngii. (1 Ko. 14:24, 25) Ngmo medengelterir a rebebil el sebechel loukerebai er tir e sebechir el ngosuir el olengeriakl el mo nguu a techolb.

16. Ngera kired el meruul sel dosuub lobengterir a rechad me bo el metecholb, e ngera bo dosaod er a ongingil el suobel?

¹⁶ Ngmekera dosuub a Biblia lobengterir a rechad me te mo metecholb? Ngsebeched el ngosuir a chad el mo mesa klungel a ultutelel a omesubel loeak sel dolisiich er ngii el mo mesuub er a bek el sandei e bo longetmokl er ngii el kirel a omesubel. Ngdirrek el soad el melisiich er ngii el mo blechoel el mengedecheduch er a Jehovah er a bek el sils e mo mekurulii a deleuill er ngii el obengkel. Ngsoad el melisiich er ngii el mora miting er a ongdibel. (Momes er a baks el “ Aike el Kirel Ngike el Mesuub el Meruul Me Lolengeriakl el Mo Metecholb” el ngar er a 12 el llel.) Me nguaisei, engdi ngdi ua bo losaod a ongingil el suobel, ngar ngii a lmuut el eim el tekoi el kirir tirke el olisechakl a Biblia el meruul me lengesuterir tirke el mesuub el mo nguu a techolb.