1. Ngera kot el ungil omelilt el sebechel a chad el rullii?

NGBLECHOEL aike el omelilt el loruul a ruungalek el ngar ngii a lerellii er a rengelekir el kemanget el taem. Me a lsekum ngmekngit a omelilt er tir, e ngsebechel mo uchul a mondai el kirir a rengelekir. Engdi a bo lungil a omelilt er tir, e te mesterir a rengelekir a kot lungil techall el mo nguu a deurreng me a ungil klengar. Engdi a rengalek me ngdirrek el kirir el mo ungil a omelilt er tir. A kot el ungil omelilt el sebechel a chad el rullii a mo mesiou er a betik er a rengul el Demad el Jehovah.​—Psa. 73:28.

2. Ngera el ungil omelilt a lurruul a Jesus me a rechad er a blil?

² A rechad er a blil a Jesus a mle sorir lolengeseu er a rengelekir el mo mesiou er a Jehovah e a omelilt el lurruul a ulechotii el kmo, tiang a mle kot el klou a ultutelel tekoi er a klengar er tir. (Lk. 2:40, 41, 52) A Jesus a dirrek el mirruul a ungil omelilt el ngilsuir el otutii a deruchellel er a chelsel a moktek er a Jehovah. (Mt. 4:1-10) Ngmlukeroul el mo oba blekokuii, blakerreng, me a blekeu. A rokui el oungalek el betik a rengrir er a Jehovah a ulterekokl el mo dmeu a rengrir el oungalek er a uai ngii.

3. Ngera el ker a bo dosaod er tia el suobel?

³ Ngar tia el suobel, e kede mo onger aika el ker: Ngera el ungil omelilt a lurruul a Jehovah el kirel a Jesus? Ngera sebechir a ruungalek el Kristiano el suubii er a omelilt el lurruul a rechad er a blil a Jesus? E ngera sebechir a rengalek el Kristiano el suubii er a omelilt el lurruul a Jesus?

4. Ngera el klou a ultutelel el omelilt a lerirellii a Jehovah el kirel a Ngelekel?

⁴ A Jehovah a ngileltii a kot el ungil chedam me a chedil el kirel Jesus. (Mt. 1:18-23; Lk. 1:26-38) A tekingel a Maria el debetik er a Biblia a ochotii a dmolech el bltkil a rengul el mora Jehovah me a Tekingel. (Lk. 1:46-55) Me sel rolel a Josef a uleltirakl er a ulekrael  er a Jehovah a ochotii el kmo ngmilluu er a Dios e mle soal lodeuir a rengul.​—Mt. 1:24.

5-6. A Jehovah ngmilecherei a Ngelekel me ngmo chelebangel a ngera el tekoi?

⁵ Momtab el kmo a Jehovah dimlak lolilt er a remerau el chad el mo oungalek er a Jesus. A tenget el luleldars er ngii a Josef me a Maria er a uriul er a cherellel a Jesus a olecholt el kmo te mle chebuul. (Lk. 2:24) A Josef a locha mla er ngii a kekerei el shop er ngii er a kldaiksang el mla er bita er a blirir er a Nasareth. Nglocha kmal mle beot a rolel a klengar er tir, e le telungalek er tir a mlukeroul el mo uldimukl er a lekesengil e te teuid el ngalek.​—Mt. 13:55, 56.

⁶ A Jehovah ulemekerreu er a Jesus er a bebil telemall engdi dimlak lomekerreu er a Ngelekel er a rokui el omelsemai el blo lechelebangel. (Mt. 2:13-15) El ua tiang, a Jesus a mle kirel loutekangel er a rechedal el tir a dimlak loumerang er ngii. Ka molebedebek er a kngtil a rengul e le rebebil er ngii a uchei e te dimlak lekengei el kmo ngii a Mesias. (Mk. 3:21; Jn. 7:5) Nglocha dirrek el mle kirel loutekangel er a kodellel a demal er a Josef. Me tia locha mle belkul a kmo, ngii el kot el klou a uchul e ngkirel mo oungerachel er a siobai er tir. (Mk. 6:3) Me a Jesus a mlukeroul el mesuub el mo bekongerachel me bo el sebechel omekerreu er a telungalek er ngii. Nglocha mle kirel meringel el oureor el mo mesiou er tir. Me ngkmal mle ungil medengelii a belkul sel mesaul a bedenged er a uriul er a bo demerek el oureor.

7. (a) Ngera el ker a sebechel ngosuterir a rebechiil el chad el mo omekeroul er a rengelekir? (b) Ngmekera Osisechakl 2:1-6 e ngosukid lolisechakl er a rengeleked?

⁷ A lsekum ko bechiil e somiu el mo oungalek, e di lekemiu el oker: ‘Kemam, ngariou a rengmam e betik a rengmam er a Jehovah me a Tekingel? A Jehovah ngmo melilt er kemam el mo omekerreu er ngika el mekreos el tolechoi?’ (Psa. 127:3, 4) E a lsekum ke oungalek, e di lekau el oker: ‘Ngak a kulisechakl er a ngelekek er a klungiolel a meringel el ureor?’ (Oli. 3:12, 13) ‘Ngak ak mora tkurrebab el klisichek el omekerreu er a rengelekek er aike el mo uchul a telemellir er a klechad me a klereng el locha bo lechebangel er tia el beluulechad er a Satan?’ (Osi. 22:3) Ngdiak el sebechem lomekerreu er a rengelekem er a rokui el omelsemai el locha bo lechelebangel. Ngkmal diak el sebechel tekoi. Me nguaisei, engdi ngsebechem el mekekokau e dirrek loba bltikerreng el mengetmokl er tir el kirel a mondai er a klechad loeak sel molisechakl er tir el mo ultuil er a Tekingel a Dios el  kirel a ulekrael. (Monguiu er a Osisechakl 2:1-6.) El ua tiang, a lsekum a chedemiu a melilt el mo otngeklii a mera el omengull, e mngesuterir lokiu a Tekingel a Dios el mo medengelii a klungel a ultutelel a lolemolem el loba blakerreng el mora Jehovah. (Psa. 31:23) Me a lechub a betik er a rengmiu a mad, e mochotii er tir a rolel a lousbech er a Tekingel a Dios el mengelaod a rengrir e lebesterir a budech.​—2 Ko. 1:3, 4, BT; 2 Ti. 3:16.

8. A doltirakl er a Duteronomi 6:6, 7, e ngera mle kirel a Josef me a Maria el meruul er ngii?

⁸ A Josef me a Maria a mle sebechir el ngosuir a Jesus me lemukeroul el mo oba kengei er a Dios, e le te uleltirakl a ulekrael er a Jehovah el kirir a ruungalek. (Monguiu er a Duteronomi 6:6, 7.) Ngkmal mle dmolech a bltkil a rengrir el mora Jehovah, e sel kot el klou a ultutelel el turrekong er tir a mo ngosuterir a rengelekir el mo oba chouaisei el bltikerreng.

9. Ngera el meklou a ultutelel el omelilt a mle kirel a Josef me a Maria el meruul?

⁹ A Josef me a Maria a millilt el telungalek el mo blechoel oltirakl er a schedule er tir er omengull. Te ulterekokl el mlora miting el mla er ngii er a blil ongdibel er a Nasareth, me a Baskua el mla er ngii er a bek el rak er a Jerusalem. (Lk. 2:41; 4:16) Te locha uluusbech aika el temir el dmak el mora Jerusalem el olisechakl er a Jesus me a rebebil er ngii el kirel a reksi er a rechedal a Jehovah, e locha dirrek el uleldingel aike el basio el medung er a Bades. Sera lemukeroul a telungalek er tir, e nglocha mle meringel er a Josef me a Maria el lomelemii tia el schedule er tir er omengull. Engdi te ngilai a klungiolir er ngii! A telungalek er tir a millemolem el kmeed er a Jehovah e le te ngiluu a omengull el mo er Ngii el mo kot.

10. Ngera sebechir a ruungalek el Kristiano el suubii er a Josef me a Maria?

¹⁰ Ngera sebechir a ruungalek el meluu er a Dios el suubii er a Josef me a Maria? A kot el klou a ultutelel a sel mosisecheklterir a rengelekem el mo betik a rengrir er a Jehovah lokiu a omerellem me a tekingem. Bo modengei el kmo sel kot el ngarbab el sengk el sebechem el mesterir a ngosuterir el mo betik a rengrir er a Jehovah. E a ta er a kot el klou a ultutelel tekoi el sebechem el osisecheklterir a mo oltirakl er a ungil schedule er a omesuub, nglunguuch, miting, me a odingel. (1 Ti. 6:6) Nguaisei el kirem el mesterir a rengelekem aike el tekoi el lousbech er a klechad. (1 Ti. 5:8) Engdi ngdiak mobes  el kmo, ngdeleuill er tir me a Jehovah el diak el udoud me a klalo, a mo ngosuterir el mo suobel er a ulebengelel tia el mekngit el blekeradel e mo soiseb er a beches el beluulechad er a Dios. *​—Ese. 7:19; 1 Ti. 4:8.

11. (a) Ngmekera omengelechel el ngar er a 1 Timothy 6:17-19 e ngosuterir a ruungalek el mo ungil melilt a tekoi sel lomekeroul er a rengelekir? (b) Ngera el turrekong a sebechel a telungalek er kau el melatk el kirel, e ngera el klengeltengat a sebechiu el mo ngmai? (Momes er a baks el “ Ngera Mo Turrekong er Kemiu?”)

¹¹ Ngkmal remutech a rengud sel desterir a rebetok el oungalek el Kristiano el ungil melilt a tekoi el olengeseu er a rengelekir el mo kmeed er a Jehovah! Te blechoel el dmak el meruul omengull er tir. Te dmak el mora miting er a ongdibel me a meklou el ongdibel. E dmak el oldingel a obliil. A bebil telungalek a mo omerk er a klumech er aike el basio el ongdibel a diak leblechoel loureor er ngii. A rekuk bebil a mo oldingel er a Bethel me a lechub e te teloi er a ureor el omekedechor. A telungalek el melilt aika el tekoi a medengei el kmo te mo mengoit a udoud e mo chelebangel a bebil omelsemai. Engdi a klungiaol el bo lengai a rulleterir el mo meteet er a tekoi er a klereng. (Monguiu er a 1 Timothy 6:17-19.) A rengalek el mukeroul er a chelsel a chouaisei el telungalek a mo melemolem el meruul aika el ungil tekoi el lesiluub, e diak a ta el bo louuchel a rengrir! *​—Osi. 10:22.

12. Ngera mle kirel a Jesus el meruul er a lorael el mo klou?

¹² A rokui el omelilt er a Demal a Jesus a di ungil, me a rechad er a blil er tia el chutem me te dirrek el mirruul a ungil omelilt. Me nguaisei, engdi sera lemukeroul a Jesus, e ngmle kirel el di ngii el meruul a omelilt er ngii. (Gal. 6:5) Ngmla er ngii a ilmeklel el melilt a tekoi el di uai kid. Ngmle sebechel el melilt el di meruul aike el soal. Engdi ngbai millilt el lomelemii a ungil deleuill er ngii me a Jehovah. (Jn. 8:29) Ngmekera kerebil e sebechel ngosuterir a rengeasek er chelecha el taem?

13. Ngera el klou a ultutelel el omelilt a lurruul er ngii a Jesus er a lekekerei?

¹³ A Jesus er a lekekerei e ngmillilt el mo chederedall er a demal me a delal. Ngdimlak a ta el lotngakl a ulekrael er tir e bo lomdasu el kmo ngmle medengei a kuk betok er tir. Ngbai di “ulerrenges a tekingir.” (Lk. 2:51) Ngmle blak a rengul er tia el ngerechelel el kot el klou el sechal. Ngulterekokl el mle blak a rengul el mesuub er a kldaiksang er a demal er a Josef me bo el sebechel mengereker el olengeseu el mesiou er a telungalek er tir.

14. Kede mekera medengei el kmo a Jesus a mle blak a rengul el mesuub er a Tekingel a Dios?

¹⁴ A rechad er a blil a Jesus a locha uluuchais  er ngii el kirel a mengasireng el cherellel me a dirrek el tekingir a rechanghel el kirel. (Lk. 2:8-19, 25-38) Engdi a Jesus a dimlak di lungil er a rengul aike el tekoi el lerirenges, ngbai dirrek el di mle ngii el mesuub a Bades. Kede mekera medengei el kmo a Jesus a mle blak a rengul el mesuub er a Tekingel a Dios? E le sera dirk lekekerei, e a resensei er a Jerusalem a mle “mechas a rengrir er a llemesel a rengul a longer er tir.” (Lk. 2:46, 47) A Jesus a di mle 12 a rekil e mla oterekeklii er a rengul el kmo a Jehovah a Demal.​—Lk. 2:42, 43, 49.

15. Ngmilekera Jesus e ochotii el kmo ngmillilt el mo meruul a soal a Jehovah?

¹⁵ Me a Jesus er a bo lodengelii a deruchellel er a chelsel a moktek er a Jehovah, e ngmillilt el mo meruul er ngii. (Jn. 6:38) Ngmle medengei el kmo a rebetok a mo ouketui er ngii, me nglocha mlo olengoech a bedengel sel lolatk er tiang. Engdi ngmillilt el mo chederedall er a Jehovah. Sera bo el metecholb er a 29 C.E., e sel kot el klou a ultutelel tekoi er a klengar er ngii a mo meruul er a soal a Jehovah. (Heb. 10:5-7) Ngmo lmuut er sera lemedkung er a teluo el kerrekar, e a Jesus a di millemolem el blak a rengul el meruul er a soal a Demal.​—Jn. 19:30.

16. Ngera ta er a tekoi el sebechir a rengalek el suubii er a Jesus?

¹⁶ Molengesenges er a demam me a delam. A demam me a delam a diak lemecherrungel el di ua Josef me a Maria. Me nguaisei, engdi a Jehovah a milsterir a ngerechelir el mo omekerreu, e olisechakl, e omekrael er kau. Me a lsekum ke mengreos a ulekrael er tir e mengull er a deruchellir, e ngmo ‘ungilbesul a rokui el tekoi er kau.’​—Efe. 6:1-4.

17. A doltirakl er a Josua 24:15, e ngera el omelilt a kirir a rengeasek el di tir el meruul er ngii?

¹⁷ Molilt el kmo ngtecha obo mosiou er ngii. Ngkirem loterekeklii er a rengum el kmo ngtecha Jehovah, ngera moktek er ngii, e mekera omoltaut er a moktek er ngii. (Rom 12:2) E seikid e ngmo sebechem el rullii sel kot el klou a ultutelel el omelilt er a klengar er kau, el ngii a mo mesiou er a Jehovah. (Monguiu er a Josua 24:15; Oli. 12:1) A lsekum e ngmo blekerdelem el blechoel el menguiu e mesuub er a Biblia, e a bltkil a rengum me a klaumerang er kau er a Jehovah a mengal mo mesisiich.

18. Ngera el omelilt a kirir a rengeasek el meruul er ngii, e ngera mo rsel?

¹⁸ Molilt el mo nguu a soal a Jehovah el mo kot er a klengar er kau. A beluulechad er a Satan a  tibir el kmo a lsekum ke ousbech a duch er kau el di kirem, e ngmo dmeu a rengum. Engdi a mera er ngii, tirke el sorir el mo betok a kerruul er tir a mo chuarm a rengrir er a “betok el bedengel a ringel.” (1 Ti. 6:9, 10) Me nguaisei, engdi a lsekum ke orrenges er a Jehovah e ngiltii el mo nguu a soal el mo kot er a klengar er kau, e ngmo ungil a klengar er kau e mo “ungilbesul a ikel rokui el moruul.”​—Jos. 1:8.

19. Ngera kirir a ruungalek el diak lobes er ngii?

¹⁹ Ruungalek, bo er a tkurrebab el sebechiu el ngosuir a telungalek er kemiu el mo mesiou er a Jehovah. Omultuil er ngii e ngmo ngosukemiu el meruul a ungil omelilt. (Osi. 3:5, 6) Lak mobes el kmo a omerellem a klou a lerellii er a rengelekem er a tekingem. Me bo moruul a omelilt el mo mesterir a techall el mo sebechir el nguu a kengei er a Jehovah.

20. Ngera el klengeltengat a bo lengai a rengeasek a lsekum te melilt el mo mesiou er a Jehovah?

²⁰ Rengeasek, a rechad er a blimiu a sebechir el ngosukemiu el meruul a ungil el omelilt. Engdi ngkau a kirem el meruul aika el ungil omelilt me bo modeuir a rengul a Dios. Me bo moukerebai er a Jesus e mngiltii el mo mesiou er a betik a rengul el Demam el ngar er a eanged. A omoruul uaisei, e ke mo blechoel mechesang, e mo er ngii a belkul a klengar kau, me kau a mo metik a deurreng er chelechang. (1 Ti. 4:16) E a ngar medad el klebesei, e ke mo oldeu er a rengum er a kot el ungil klengar el ngar ngii!