1. Ngera uchul me a rebetok el chad a rrau a rengrir?

NGBETOK a klechelid er chelecha el taem el melekoi el kmo te Kristiano e mesiou er a Dios er a rolel e ngodeuir a rengul. Sei a uchul me a rebetok el chad a rrau a rengrir! Te oker el kmo, “Ngngar ngii a di ta el mera el klechelid me a lechub a rokui el klechelid a odeuir a rengul a Dios?” Kid, ngmera el ulterekokl a rengud el kmo aika el dolisechakl a klemerang me a rolel a omengull el loruul er ngii a Resioning er a Jehovah a oltirakl er a soal a Jehovah? Ngmera el sebechel mo ulterekokl a rengud er aika el tekoi? Ka me dosaod aike el tekoi loterekokl a rengud.

2. A doltirakl er a 1 Thesalonika 1:5, e ngera uchul me a apostol Paulus a mle ulterekokl a rengul er a klemerang?

² A apostol Paulus a mle ulterekokl a rengul er a klemerang. (Monguiu er a 1 Thesalonika 1:5.) Tia el ulterekokl el reng er ngii a dimlak di lultuil er a rengul. A Paulus a mle blak a rengul el mesuub er a Tekingel a Dios. Nguluumera el kmo a “Dios a dilokou a Chedaol Llechukl el rokui er a dingerir a re milluches.” (2 Ti. 3:16) Ngera ngmiltik er a omesubel er a Bades? Ngmiltik a diak el sebeched lomtok el ocholt el kmo a Jesus ngike el telbiil el Mesias, el ngii el tekoi a dimlak el sorir a remengeteklel a klechelid er a Chijudea lomes. Tirka el mengeteklel a klechelid a millekoi el kmo te omtechei er a Dios engdi omerellir ulechotii el kmo te cheblad. (Tit. 1:16) A Paulus a dimlak el uai tir el melilt aike el sorir loumerang er a Biblia e chemoit a chetirir. Ngika bai mle kltmokl el mo olisechakl e oltaut a “telbilel a rengul a Dios el rokir.”​—Rel. 20:27.

3. A bo doba ulterekokl el reng e ngbelkul a kmo, ngkired el mo medengei a nger er a rokui el kerid? (Dirrek el momes er a baks el “ A Urerel me a Uldesuel a Jehovah a ‘Kuk Betok er a Ikel Sebeched el Mchais.’”)

³ A rebebil a kmo a mera el klechelid a kirel longer a rokui el  ker, el mo lmuut er aike el ker el diak a bleketakl el nger ngii er a Biblia. Ngmera el sebeched lomdasu el uaisei? Molatk er a Paulus. Ngika millisiich er a rekldemel er a klemerang el mo ‘merriter a rokui el tekoi,’ me nguaisei engdi ngdirrek el millekoi el kmo ngngar ngii a bebil tekoi el diak lodengei. (1 Th. 5:21) Ngmilluches el kmo, “Ikel dodengei a diak le cherrungel,” me a “ikel domes er chelechang a di ua ia osenged er a mekngit el dirk el diak le bleketakl.” (1 Ko. 13:9, 12) Me a Paulus a dimlak lodengei a rokui el tekoi me kid el dirrek. Me nguaisei a Paulus a mle medengei a uchetemel a klemerang el kirel a Jehovah. E aike el ble lodengei a ulelterekokl er a rengul el kmo ngmla metik er a klemerang.

4. Ngmekera dolisiich er a klaumerang er kid el kmo kede mla metik er a klemerang, e ngera kede mo mesaod el kirir a remera el Kristiano?

⁴ A ta er a rolel e ngsebeched el melisiich er a klaumerang er kid el kmo kede mla metik er a klemerang a sel bo domekesiu er a rolel a omengull el lekiltmeklii a Jesus er aike loruul a Resioning er a Jehovah er chelecha el taem. Ngar tia el suobel e kede mo mesa el kmo a remera el Kristiano a (1) diak longull a bleob el chelid, (2) mengull er a ngklel a Jehovah, (3) betik a rengrir er a klemerang, e (4) kaubltikerreng er a delongelir.

5. Ngera kede suubii er a Jesus el kirel a melemalt el rolel a dongull er a Dios, e mekera doltaut aike el lullisechakl?

⁵ A Jesus a kmal betik a rengul er a Jehovah a uchul me ngmilengull er a Jehovah el di ngii el tang er a lengar er a eanged me a lengar tia el chutem. (Lk. 4:8) Ngullisechakl er a redisaiplo er ngii el mo meruul el uaisei. A Jesus me a reblak a rengrir el disaiplo er ngii a dimlak a ta el ousbech a bleob el chelid el ngar er a omengull er tir. A Dios a Reng me ngdiak a ngii di el ngera el sebechel a chad el rullii el mekesiur a  klebkellel a Jehovah! (Isa. 46:5) Engdi ngkuk mekerang a doruul a sangto e doluluuch el mo er tir? A Jehovah dilu el ngar er a ongeru el llach er aike el Teruich el Llach el kmo: “Ng diak moruul a bleob el chedum ma lechub okesiul a ngar a eanged, ma lechub e ng ngar a chutem, . . . Ng diak mosus er a ngii di le bleob el chelid.” (Exo. 20:4, 5) Aika el tekoi a kmal bleketakl el kirir tirke el sorir lodeuir a rengul a Dios.

6. A Resioning er a Jehovah te oltirakl er a ngera el rolel omengull er chelecha el taem?

⁶ A rechad el mesuub a reksi a kmo, a Rekristiano er a taem er a rechapostol a milengull er a Dios el di ngii el tang. El ua tiang, a book el History of the Christian Church a melekoi el kmo a rekot el Kristiano a “kmal mo mederdirk a rengrir” er a usbechel a bleob el chelid er a blil omengull. Chelecha el taem e a Resioning er a Jehovah oltirakl er a rekot el Kristiano. Ngkmal diak doluluuch el mora re “sangto” me a lechub e ngchanghel, e kmal diak doluluuch el mora Jesus. Ngdirrek el kmal diak dongull a banderang me a lechub e ngngii di el tekoi el omtechei er a beluu me a lechub e ngkabelment. A ngii di el orrimel el bo dechebangel me kid a rruul a rengud el mo olengesenges a tekingel a Jesus el kmo: “A Rubak el Dios er kau, . . . di le ngii el tang cho mosiou er ngii!”​—Mt. 4:10.

7. Ngera klekakerous er a Resioning er a Jehovah me aika el bebil er a klechelid?

⁷ Chelecha el taem e a rebetok a kmal sorir loltirakl er a remerael chisir el mengeteklel a klechelid. Te kmal sorir tirka el chad el rengud te mengull er tir. A rebetok el chad a mora ikelesia er tir, omechar a book el loltobed, e melenget a betok el udoud el mora ike el cheldebechel el lolengeseu. A rebebil a kmal el oumerang a bek el tekoi el lolekoi. Te kuk semeriar lomes er tirka el chad el ngar ruchei er a lsekum a Jesus a mleder mederir. Te kmal ngodech er a remera el mengull er a Jehovah el diak a mengeteklel a klechelid er tir. E le alta kede mengull er tirke el omekrael, engdi kede kongei er a bleketakl el osisecheklel a Jesus el kmo: “Kemiu el rokui a di odam.” (Mt. 23:8-10) Ngkmal diak dongull er a rechad el ka dongull er a remengeteklel a klechelid me a rulab a dereder. E kmal diak dolengeseu a cheldebechel el lolisiich. Kede bai diak domekbitang e diak dechedal tia el beluulechad. Ngoeak aikakid el rolel e kede kmal ngodech er a betok el klechelid el melekoi el kmo te Kristiano.​—Jn. 18:36.

8. Kede mekera medengei el kmo a Jehovah a soal a dousbech er a ngklel e soal a rokui el chad a bo lodengelii?

⁸ A ta el taem e a Jesus a milluluuch el kmo: “Chedam, mkebkellii a ngklem!” A Jehovah a ulenger er ngii el klou a ngerel er a eanged el kmo ngmo meruul el uaisei. (Jn. 12:28) A Jesus er a loruul er omesiungel e ngmilengebkall er a ngklel a Demal. (Jn. 17:26, BT) Ngdi osisiu, a remera el Kristiano omes el kmo ngkmal ileakl a techellir el lousbech er a ngklel a Dios e ouchais er a rechad el kirel.

9. Te milekera rekot el Kristiano e ochotii el kmo te milengull er a ngklel a Dios?

⁹ Kedeb el taem er a lemeteketek a ongdibel er a taem er a rekot el Kristiano, e a Jehovah “mle ketengel loldingel rar Chisentail e ngilteterir ar chedal ra chelsir el kirel a ngklel.” (Rel. 15:14, BT) Tirka el kot el Kristiano a kmal mle dmeu a rengrir el ousbech er a ngklel a Dios e ouchais er a rebebil el kirel. Te uluusbech er a ngklel a Dios el omerk er a klumech e melluches a babier er a Biblia. * Te ulechotii el kmo te chad el kirel a ngklel a Dios.​—Rel. 2:14, 21, BT.

10. Ngera ochotii el kmo a Resioning er a Jehovah a rechad el kirel a ngklel a Jehovah?

 ¹⁰ A Resioning er a Jehovah, te chad el kirel a ngklel a Jehovah? Molatk a olechotel. Chelecha el taem e a rebetok el mengeteklel a klechelid a mla mora tkurrebab el klisichir el omart er a ngklel a Dios. Te mla otebedii er a oidel a Biblia er tir, me a rebebil omul er a usbechel a ngklel a Dios er a ikelesia er tir. * Ngkmal bleketakl el kmo te di ta el Resioning er a Jehovah a mengull e oldanges er a ngklel a Dios. Kede omerk er a ngklel a Dios el kuk ngaruchei er a ngii di el klechelid. Kede mla mora tkurrebab el sebeched el rodemii a ngkled el Resioning er a Jehovah. (Isa. 43:10-12) Kede mla otobed a betok er a 240 el miliol el copy er a New World Translation of the Holy Scriptures, el ngii a mla lmuut el olutii a ngklel a Jehovah el mora aike el basio el ruliuid a Biblia ultebedii. Kede dirrek el oltobed a babier el ngar er a betok er a 1,000 el omelekoi el ngii ousbech er a ngklel a Jehovah!

11. Te milekera rekot el Kristiano e ochotii a bltkil a rengrir el kirel a klemerang?

¹¹ A Jesus a kmal mle betik a rengul er a klemerang, el ngii a klemerang el kirel a Dios me a moktek er ngii. Ngmle kiei el oltirakl er a klemerang e dirrek el luluuchais er tia el klemerang el mora rechad. (Jn. 18:37) A remera el uleltirakl er a Jesus me te dirrek el kmal mle  betik a rengrir er a klemerang. (Jn. 4:23, 24, BT) El ua tiang, a Petrus a millekoi el kirel a Klekristiano el kmo ng “Rael er a klemerang.” (2 Pe. 2:2) Bltkil a rengrir a rekot el Kristiano er a klemerang a uchul me te ultngakl a uldasu er a klechelid, siukang, me a di uldesuir a rechad el dimlak loltirakl er a klemerang. (Kol. 2:8) Ngdi osisiu er chelecha el taem, a remera el Kristiano a mora tkurrebab el klisichir el “oltirakl er a klemerang” loeak sel kerekikl el kmo a rokui el klaumerang er tir me a rolel a klengar er tir a oltirakl er a Tekingel a Jehovah.​—3 Jn. 3, 4.

12. Ngera duubech sel lsekum tirke el omekrael a mtebengii el kmo ngngar ngii a klemedengei er kid el kirel lobeketakl, e ngera uchul me te meruul el uaisei?

¹² A rechedal a Dios er chelecha el taem a kmal diak ledu el kmo ngcherrungel a klemedengei er tir er a Biblia. Ngar ngii a taem el leriruul a cheleuid er a omesodel a osisechakl er a Biblia me a rolel a lomekrael er a ongdibel. Tia diak lemechas a rengud er ngii. A Biblia bleketakl lochotii el kmo a melemalt el klemedengei a mo obeketakl er a omerollel a taem. (Kol. 1:9, 10) A Jehovah a mekekokil louchais er a klemerang el mei er kid me ngkired el kongei el oba kllourreng el mengiil er a llomes er a klemerang el merael el mo mellomes. (Osi. 4:18) Tirke el omekrael sel lutebengii el kmo a klemedengei er kid el kirel a ileakl el klemerang a kirel obeketakl, e te kmal di mereched el mo meklemeltii. Alta betok el klechelid er chelechang a meruul a omelodech er a osisecheklir el mereng a rengrir a rechederir me a lechub te mo oltirakl er a beluulechad, engdi a omelodech el loruul a cheldebechelel a Jehovah a mileketmokl el mo olekeed er kid er a Jehovah e mo oltirakl er a rolel a omengull el lekiltmeklii a Jesus. (Jak. 4:4) A omelodech el doruul a oltirakl er a klemedengei er kid er a Biblia el mla obeketakl, el diak loltirakl er a uldesuir a rechad er a beluulechad. Ngbetik a rengud er a klemerang!​—1 Th. 2:3, 4.

13. Ngera kot el klou a ultutelel blekeradel el lolecholt er ngii a remera el Kristiano, e kede mekera mesa tiang er a delongelir a Resioning er a Jehovah er chelecha el taem?

¹³ A rekot el Kristiano a mle betok a ungil blekerdelir engdi sel kot el klou a ultutelel el blekeradel el lulebang el ble lodengelii a rechad, a bltikerreng. A Jesus a dilu el kmo: “Cho bo mkaubltikerreng, e a rokui el chad a mo medengei el kmo kom obengkek.” (Jn. 13:34, 35) Chelecha el taem e a Resioning er a Jehovah er a beluulechad el rokir a melechesuar er a mera el bltikerreng me a kltarreng. A cheldebecheled a diak a mo uai ngii e le kede ta el telungalek el diak a klekakeakl er a renged, beluu, me a rechad er ngii. Kede mesa mera el bltikerreng el ngar er aike el miting, assembly, me a convention er kid. Tia kmal melisiich er kid e rullid el mo ulterekokl a rengud el kmo, a omengull er kid a odeuir a rengul a Jehovah.

14. A doltirakl er a Kolose 3:12-14, e ngera klou a ultutelel rolel e kede kaubltikerreng er a delongeled?

¹⁴ A Bades a melisiich er kid el mo “meral kaubltikerreng.” (1 Pe. 4:8) A ta er a rolel a dolecholt er tia el bltikerreng a sel bo dekausubes er a delongeled e dekaberkakl a chetid er a rechad. Kede dirrek el osiik a techall el mo olecholt er a blekeruraurreng e omtechakl er a rechad er a ongdibel el mo lmuut er tirke el tomellii a rengud. (Monguiu er a Kolose 3:12-14.) Sel dolecholt er tia el bltikerreng e kede ochotii el kmo kede mera el Kristiano.

15. Ngoeak a ngera el bebil er a rolel e kede oltirakl er a omengull el lekiltmeklii a rekot el Kristiano?

¹⁵ Kede dirrek el oltirakl er a rolel a omengull  el lekiltmeklii a rekot el Kristiano el ngar er a bebil er a rolel. El ua tiang, kede chelderoder el loltirakl er a rekot el Kristiano. A cheldebecheled a ngar ngii a rudam el merael el oldingel a ongdibel, remechuodel, me a re ministerial servant el kmal di ua lurruul a rechapostol. (Fil. 1:1; Tit. 1:5) A osenged el kirel a tekoi er a durs er a chebechiil me a chebechiil, cheledolel a rasech, me a urunguled el omekerreu er a ongdibel er a rechad el diak lekengei lobult er a kngterir, a kmal di oltirakl er a kerebai el lebilecherei a rekot el Kristiano.​—Rel. 15:28, 29; 1 Ko. 5:11-13; 6:9, 10; Heb. 13:4.

16. Ngera kede suubii er a Efesus 4:4-6?

¹⁶ A Jesus a dilu el kmo te betok a mo kmo te disaiplo er ngii engdi ngdiak lemera el oltirakl er ngii. (Mt. 7:21-23) A Bades a dirrek el melekoi el kmo a uriul sils e te betok a di mo “oubail er a leko te chedal a chelid.” (2 Ti. 3:1, 5, BT) Me nguaisei engdi a Biblia ouchais er kid el kmo ng ‘di ta rolel a klaumerang’ el odeuir a rengul a Dios.​—Monguiu er a Efesus 4:4-6.

17. Te rua techang oltirakl er a Jesus e oltirakl er a di ta el rolel a mera el klaumerang?

¹⁷ Te rua techang oltirakl er tia el di ta el rolel a mera el klaumerang er chelecha el taem? Kede mla smaod a ocholt. Kede mla smodii a omengull el lekiltmeklii a Jesus el luleltirakl er ngii a rekot el Kristiano. Ngdi ta nger er tia el ker. Te Resioning er a Jehovah. Ngmera el ileakl el techall a dobang el chedal a Jehovah, el medengelii a klemerang el kirel me a moktek er ngii! Mada dolemolem el urrekodel er tia el klemerang el oba ulterekokl el reng.