1. Ngera bebil er a sengk el bla dengai er a Jesus?

 NGDIAK a chad el mla ngar tia el chutem el bekururau lolengeseu er a rebebil el ua Jesus. Sera lengar tia el chutem e nguluusbech er a mengasireng el klisichel el olengeseu er a rebebil. (Lk. 9:​12-17) Ngmilskid sel kot el ngarbab el sengk er aika el rokui, er a lekengei el mo mad el kired. (Jn. 15:13) Sera lebekiis er a kodall el mei er chelechang e ngdirk melemolem lolengeseu er kid. Ngua letilbir, ngullengit er a Jehovah me lebeskid a chedaol reng er ngii el lolengeseu e mengelaod er kid. (Jn. 14:​16, 17; 16:13) E oeak a ongdibel er a Rekristiano e a Jesus a melemolem el omeskid aike el dousbech me bo lsebeched el meruul er a remo disaiplo el meliuekl er a beluulechad el rokir.—Mt. 28:​18-20.

2. Te rua techa uldimukl er a “rechad el sengk” el losaod er tir a Efesus 4:​7, 8 (NW)?

² Molatk er a lmuut el ta er a sengk er a Jesus. A apostol Paulus a milluches el kmo a uriul er a lebora eanged a Jesus e ‘ngmilskid a rechad el sengk.’ (Monguiu er a Efesus 4:​7, 8, NW. a) A Paulus a silodii el kmo a Jesus a milsterir tirka el sengk el mo olengeseu er a ongdibel er a kakerous el rolel. (Efe. 1:​22, 23; 4:​11-13, BT) Chelecha el taem e tirka el “rechad el sengk” a uldimukl er tir a re ministerial servant, remechuodel er a ongdibel, me a re circuit overseer. b Nguaisei, te diak el mecherrungel me te mo mecheuid. (Jak. 3:2) Engdi a Rubak er kid el Jesus Kristus ousbech er tir el lolengeseu er kid; te sengk er ngii el mei er kid.

3. Momekesiu er a rolel e kid el rokui a sebeched el support a urerir a “rechad el sengk.”

 ³ A Jesus a millutk er tirka el “rechad el sengk” el mo meleketek er a ongdibel. (Efe. 4:​12, BT) Me nguaisei engdi kid el rokui a sebeched el olengeseu er tir el meruul er tia el klou a ultutelel el ngerechelir. Ngsebeched el lomekesiu er ngii er tiang: A rebebil er kid a teloi er a ureor el lomekedechor a Blil a Ongdibel. A rekuk bebil a di support er a ureor loeak a omeruul el kall, olidiuul, me a lmuut el bebil. Ngdi osisiu, kid el rokui a sebeched el support a urerir a re ministerial servant, remechuodel er a ongdibel, me a re circuit overseer loeak a tekinged me a omerelled. Ka me dosaod a rolel e ngsebeched el ngmai a klungioled er a meringel el urerir me a rolel e ngsebeched lochotii el mo er tir me a Jesus el milskid tirka el “rechad el sengk” el kmo kede oba omereng el saul el kirir.

RE MINISTERIAL SERVANT A ‘OLENGESEU ER A RE BEBIL’

4. Ngera bebil er a rolel e a re ministerial servant ‘ullengeseu’ er a taem er a rekot el Kristiano?

⁴ Taem er a rekot el Kristiano e te mla er ngii a rudam el lullutk er tir el mo ministerial servant. (1 Ti. 3:​8, NW) Tirka tirke el mirruul a ureor el ‘olengeseu er a re bebil’ el Paulus a milluches el kirir. (1 Ko. 12:28) A re ministerial servant a mirruul a meklou a ultutelel el ureor el kirel ruoll me bo lsebechir a remechuodel el mo ulturk osengir er a olisechakl e omecheliu er a ongdibel. El ua tiang, a re ministerial servant a locha ullengeseu el meruul a copy er a Bades me a lechub e te ulemechar a klekedall el lousbech el meruul a copy er ngii.

5. Ngera bebil er a ureor el lolengeseu el loruul a re ministerial servant er chelecha el taem?

⁵ Molatk a bebil er a ureor el lolengeseu el loruul a re ministerial servant er a ongdibel er chelecha el taem. (1 Pe. 4:10) Te locha mukngerachel el mo omekerreu a territory me a lechub e ng accounts er a ongdibel, order a literature er a ongdibel, oungerachel a audio me a sound er a ongdibel, mesiou el attendant, me a lechub e te olengeseu el maintain er a Blil a Ongdibel. Aika el rokui el ureor a meklou a ultutelel me lsebechel ngar ngii a miting er a ongdibel e meketmokl a ureor er a berkel a klumech el ngar er a chelderoder el rolel. (1 Ko. 14:40) Me a lmuut kung, a rebebil el ministerial servant oltobed a part er a Miting er a Klengar me a Omesiunged me a dirrek el cheldecheduch el mora buai. A re ministerial servant a dirrek el locha mo metutk el mo assist er a re group overseer. E ngar ngii aike el taem el qualified el ministerial servant a mo obengterir a remechuodel el meruul a sheperding call.

6. Ngera bebil er a uchul me kede kmal oba omereng el saul el kirel a meringel el urerir a re ministerial servant?

⁶ Ngmekera urerir a re ministerial servant e klungiaol el mora ongdibel? A Beberly c el lodos er a Bolivia a kmo: “Ak mereng a sulir a re ministerial servant le ngsebechek el enjoy er a miting. Urerir a uchul me ngsebechek el mengitakl, onger, orrenges a cheldecheduch, e ngmai klubelek er a video me a siasing. Te meruul a ureor er a security e olengeseu er tirke el mei er a miting loeak a videoconference. Uriul er a miting e te oked er a ureor el mengetmokl er a Blil a Ongdibel, olengeseu a accounts er a ongdibel, e make sure el kmo ngngar ngii a literature el dousbech. Ak kmal oba omereng el saul el kirir!” A Leslie el kiei er a Colombia e bechil a ta er a remechuodel a kmo: “A bechik a kmal ultuil er a re ministerial servant el kirel a kakerous el tekoi. A lak tir e ngkmal mo mechesang me a kmal loba omereng el saul el kirel a blakerreng er tir me tir el kmal kongei lolengeseu.” Kede ulterekokl el kmal dirrek el feel el uaisei.—1 Ti. 3:​13, NW.

7. Ngmekera sebeched el lochotii omereng el saul er kid el kirir a re ministerial servant? (Dirrek el momes er a siasing.)

⁷ Alta kede feel er a omereng el saul el kirir a re ministerial servant, engdi a Biblia mengelechel er kid el kmo: “Mochotii el kmo ko moba omereng el saul.” (Kol. 3:​15, NW) Tiakid a rolel e a Krzysztof el lodam er a Finland olecholt er a omereng el saul: “Ak send a postcard me a lechub e ng text el  lobengkel a bades e ouchais a ileakl rolel e ngii el ministerial servant a millisiich er ngak me a lechub a uchul me a kuba omereng el saul el kirel a ureor el loruul.” A Pascal me a Jael el lobekel el kiei er a New Caledonia a meluluuch el kirir a re ministerial servant. A Pascal a kmo: “A nglungucham er chelechang a kora di mla mo kirir tirkaikid el telutk el odam er a ongdibel lolengit er a Jehovah me bo lobengterir e lolengeseu er tir.” A Jehovah onger aika el nglunguuch, me a ongdibel el rokir a ngmai a klungiaol.—2 Ko. 1:11.

REMECHUODEL ER A ONGDIBEL A “MERINGEL EL OUREOR ER A DELONGELIU”

8. Ngera me a Paulus a mle sebechel meluches el kmo a remechuodel er a taem er a rekot el Kristiano a mle “meringel el oureor”? (1 Thesalonika 5:​12, 13, NW)

⁸ Remechuodel er a taem er a rekot el Kristiano a mle meringel el oureor el kirel a ongdibel. (Monguiu er a 1 Thesalonika 5:​12, 13, NW; d 1 Ti. 5:17) Te ‘ulemecheliu’ er a ongdibel e uleltobed a miting er a ongdibel e dmak el chelechad el meruul omelilt. Te ‘milengelechel’ er a rudam me a rudos er tir e ngar er a rolel a bltikerreng e te milsmechokl er tir lomekerreu er a ongdibel. (1 Th. 2:​11, 12; 2 Ti. 4:2) Me tirka el odam a dirrek el mle meringel el loureor el mesiou a telungalek er tir e melemolem el mesisiich er a tekoi er a klereng.—1 Ti. 3:​2, 4; Tit. 1:​6-9.

9. Ngera bebil er a ngerachel el lolab a remechuodel er chelecha el taem?

⁹ Remechuodel er chelecha el taem a mechesang el chad. Te omerk er a ungil chais. (2 Ti. 4:​5, NW) Te kutmeklii a ungil kerebai loeak a blakerreng er tir el lomerk er a klumech e mengederoder er a ureor er a berkel a klumech er a territory er kid e train er kid el mo meduch el omerk e olisechakl. Te dirrek el mesiou el oukerrekeriil, el ngar er a klechubechub e diak omengetukel er ngii el kerrekeriil. A Kristiano sel lerellii a oberaod el klengit, e a remechuodel a meringel el loureor el lmuut el sumechii a deleuill er ngii me a Jehovah. E a osisiu el taem e te kerekikl me a ongdibel a melemolem el klikiid. (1 Ko. 5:​12, 13; Gal. 6:1) Engdi ngaruchei e a remechuodel a lodengelterir el kmo te mengkerengel a sib. (1 Pe. 5:​1-3, BT) Te ungil prepare e oltobed a cheldecheduch el mengai er a Bades, e melasem el mo medengelterir a rokui el chedal a ongdibel, e meruul a sheperding call. A rebebil er a remechuodel a dirrek el olengeseu er a ureor el omekedechor e maintain a Blil a Ongdibel, organize a convention, me a ureor er a Hospital Liaison Committee me a Patient Visitation Groups, e a osisiu el taem e te dirk omekerreu a lmuut el bebil er a ngerachel. A remechuodel a kmal meringel loureor el kired!

10. Ngera bebil er a uchul me kede appreciate er a remechuodel el kmal meringel loureor?

¹⁰ A Jehovah ulemlaoch el kmo a remengkerengel a sib a mo ungil el omekerreu er kid me ngmo diak de “medakt ma lechub e bo lesebek a [rengud].” (Jer. 23:4) A Johanna el odos er a Finland a kmal mlo medengei el kmo aika el tekoi a mera el klemerang er a lebo er ngii oberaod el secherel a delal. Ngkmo: “Alta ngmeringel er ngak ouchais a ngar er a renguk el mora rebebil engdi ngngar ngii a ta el mechuodel el dimlak kungil medengelii el kmal uleba kllourreng el bedul ngak, milluluuch el lobengkek, e ulelterekokl er a renguk er a bltkil a rengul a Jehovah el mei er ngak. Ngdiak remember a tekoi ledilung, engdi ak remember el kmo ak mle feel el safe. A kuumerang el kmo a Jehovah ulderchii el me olengeseu er ngak er a melemalt el taem.” Te mekera remechuodel er a ongdibel er kau e mla ngosukau?

11. Ngmekera sebeched el lochotii omereng el saul el mora remechuodel? (Dirrek el momes er a siasing.)

¹¹ A Jehovah soal a dengar er a rengud el lochotii a omereng el saul el mora remechuodel el “kirel a urerir.” (1 Th. 5:​12, 13, NW) A Henrietta el kiei er a Finland a kmo: “A remechuodel a kmal kongei lolengeseu er a rebebil engdi tia diak lebelkul  a kmo ngngar ngii a extra temir me a klisichel a bedengir me a lechub e ngdiak omelsemai er a klengar er tir. Me a lebebil ak dmu er tir el kmo, ‘Ke medengei el kmo ngerang? Kau a kmal ungil mechuodel. I hope e ke medengei.’” A odos el Sera er a Türkiye e a melekoi el kmo: “A remechuodel ousbech a omelisiich me lsebechir el melemolem el meruul a urerir. Me ngsebeched el luchesii a card el mo tir, omengur lobengterir, me a lechub e kede oureor el lobengterir el lomerk er a klumech.” Ngngar ngii a ta er a remechuodel el kmal moba omereng el saul el kirel a meringel el urerel? Mosiik a rolel e ngsebechem el lochotii er ngii omereng el saul er kau.—1 Ko. 16:​18, NW.

A RE CIRCUIT OVERSEER A MELEKETEK

12. Ngera el lmuut el ta er a tekoi a mileketmokl er a taem er a rekot el Kristiano el mo melisiich er a ongdibel? (1 Thesalonika 2:​7, 8)

¹² A Kristus Jesus a milsa ongdibel a “rechad el sengk” el mesiou el ngar er a kuk ta er a rolel. Ngar cheungel a ulekrolel a Jesus e a remechuodel er a Jerusalem a ulderchii a Paulus, Barnabas, me a relmuut el bebil el mo odam loldingel ongdibel. (Rel. 11:22) E ngerang? Osisiu el luchul me a re ministerial servant me a remechuodel a miltutk: mo meleketek er a ongdibel. (Rel. 15:​40, 41) Tirka el odam a milengoit a betok el mo meruul er tia el ureor. A lebebil e ngmle sebechir el loriid a klengar er tir engdi te mirruul el uaisei el mo olisechakl e melisiich er a rebebil.—Monguiu er a 1 Thesalonika 2:​7, 8.

13. Ngera bebil er a ngerechelir a re circuit overseer?

¹³ A re circuit overseer a blechoel el ngar omerael. A rebebil er tir a merael a kemanget el omerael el mo oldingel ongdibel. Bek el sandei e a circuit overseer oltobed a cheldecheduch, meruul a sheperding call e oltobed a miting er a re pioneer, remechuodel, me a miting er a odingel. Ng prepare a cheldecheduch e organize a circuit assembly me a convention. Ngolisechakl a skuul el kirir a  regular pioneer, organize a miting el kirir a rokui el pioneer el ngar er aike el ongdibel el ngar cheungel, e meruul a lmuut el bebil er a ureor lomsang a branch office el lebebil er a taem e ngorechudel.

14. Ngera bebil er a uchul me kede kmal appreciate er a rekmal meringel loureor el circuit overseer?

¹⁴ Ngera el klungiaol a lengai ongdibel er a re circuit overseer el sengk? A odam er a Türkiye a mesaod el kirel a odngelir a rudam el loldingel ongdibel el kmo: “A bek el odngelir a odbechak el mo mengoit er a lmuut el klou el taem el olengeseu er a rudam me a rudos er ngak. Ak mla meet er a rebetok el circuit overseer engdi ngdirkak a ta er tir el mla rullak el mo feel el kmo te kmal mechesang me a lechub e ngmeringel a bo dongedecheduch er tir.” A Johanna el dulsaod er ngii er a uchei a uluureor lobengkel a circuit overseer el loldingel, engdi te dimlak lebetik er a ngii di el chad el ngar er a blai. Me nguaisei engdi ngmelekoi el kmo: “Ngkmal diak kubes er tiakid el sils. A reteru er ngak el redil a millukl el mo kiei er cheroid me ak kmal mle miss er tir. Ngika el circuit overseer a millisiich er ngak e ngilsukak el mo mesa el kmo, ngar er a omesiunged el mora Jehovah e a cherroid a di tedeb engdi ngar er a beches el blekeradel e ngmo diak a ulebengelel a techelled el mo dmak.” A rebetok er kid a dirrek el ngar ngii a ungil memory er kid lobengterir a re circuit overseer er kid.—Rel. 20:37–21:1.

15. (a) A doltirakl er a 3 Johanes 5-8 (BT), e ngmekera sebeched el lochotii omereng el saul er kid el mora re circuit overseer? (Dirrek el momes er a siasing.) (b) Ngera uchul me ngkired el lochotii omereng el saul el mora rebecherir a rudam el meringel loureor el kirel a ongdibel, e mekera doruul el uaisei? (Momes er a baks el “ Lak Mobes er a Rebecherir.”)

¹⁵ A apostol Johanes a millisiich er a Gaius el mo omtechakl er a rudam el loldingel e mo ‘ngoderterir el ngar sel ungilbesul ra rengul a Dios.’ (Monguiu er a 3 Johanes 5-8, BT. f) A ta er a rolel e ngsebeched el meruul er tiang a oeak sel de invite er a circuit overseer el mo omengur. A  lmuut el ta er a rolel a sel de support a arrangement er a odingel er a temel odngelel. A Leslie el dulsaod er ngii er a uchei a dirrek el lolecholt er omereng el saul er ngii el ngar er a lmuut el bebil er a rolel. Ngmelekoi el kmo: “Ak meluluuch lolengit er a Jehovah me lebesterir aike el lousbech. Ngak me a bechik a dirrek el mla lemuches a letter er kemam el mo er tir louchais er tir er a rolel e a odngelir a mla ngosukemam.” Lak mobes el kmo a re circuit overseer a uaikid el ngar ngii a ringelir e mo mesaul a bedengir. A lebebil e nglocha ngar ngii a secherir, suebek a rengrir el kirel, me a lechub e ngmo mechitechut a rengrir. A ungil tekingem me a lechub e ngkekerei el omiange er kau el mo er tir a locha mo onger er a nglunguchel a circuit overseer el lolengit a ngeso!—Osi. 12:25.

KEDE OUSBECH ER A “RECHAD EL SENGK”

16. Ngoltirakl er a Osisechakl 3:​27, e ngera el ker a sebechir a rudam el di tir el loker?

¹⁶ Meliuekl er a beluulechad e kede ousbech er a rudam el mo mesiou el “rechad el sengk.” A lsekum e ke telecholb el odam, e kau ngsebechem el olengeseu el ngar tia el rolel? (Monguiu er a Osisechakl 3:27.) Kau, ke kongei el mo meringel el loureor el mo ta er a ministerial servant? E a lsekum ke mla mo ministerial servant, e kongei el mo meringel el oureor el mo mesiou er a rudam er kau el ta er a remechuodel? g Kau, ngsebechem el meruul omelodech er a klengar er kau me bo lsebechem el apply el mora Skuul el Kirir a Rumerk er a Rengedel a Dios (SKE)? Tia el skuul a mo train er kau e ngosukau el mo mui el usbechall er a Jesus. A lsekum ke feel el kmo ngdiak el sebechem, e moluluuch el mora Jehovah. Molengit er a ngelsuil a chedaol reng er ngii me lsebechem el kutmokl a ngii di el ngerachel el mngai.—Lk. 11:13; Rel. 20:28.

17. Ngera te meketeklii a “rechad el sengk” el kirel a King er kid el Kristus Jesus?

¹⁷ A rudam el Jesus a tiltketerir el mo “rechad el sengk” a meketeklii el kmo ngii omekrael er kid er chelecha el uriul sils. (Mt. 28:20) Kau, ngdiak moba omereng el saul el kirel a King er kid el betik a rengul er kid, e bekururau, e kerekikl er kid, e omeskid a rudam el olengeseu er kid? Mada mosiik a techall el mo olecholt er omereng el saul er kau el kirir tirka el odam el meringel el loureor. E lak mobes el mereng a sulel a Jehovah el Ngike el Uchul “a bek el ungil e cherrungel sengk.”—Jak. 1:17.