1-2. (a) Ngera bebil er a tekoi el remesiungel a Jehovah a locha mo oumededenger el kirel? (b) Ngera kede mo mesaod er tia el suobel?

 ROKUI el chad el meklou me a mekekerei a ngar ngii aike el taem el bo loumededenger. a El ua tiang, ka molatk er a kekerei el Sioning el oumededenger el kmo a Jehovah ngmera el omekerreu el kirel. Tiakid a uchul me ngdiak lulterekokl a rengul a mo metecholb. Me a lechub e molatk er a odam el ngii a uluusbech er a klengeasek er ngii el nguu a Renged el mo kot el diak el ureor me a udoud. Chelechang e ngklunga el chad e a ududel a kmal di mo mad er aike el lousbech a telungalek er ngii, me nglocha oumededenger er a omelilt er ngii er a lengeasek. Molatk er a chudelang el lodos el dikea kmal klisichel a bedengel. Nglocha mo mechitechut a rengul lengii el dikea el sebechel el meruul aike el lurruul er a ngar er a mong. Ngmla ta el moker chouaika el ker: ‘A Jehovah ngmera el mesekak? Ngmle worth er ngii aike el tekoi el kchiloit el kirel a Jehovah? Ngak, ak dirk usbechall er a Jehovah?’

² A lsekum e ngdiak de sumechokl chouaika el ker e ngkmal sebechel tomellii omengull er kid. Ngar tia el suobel e kede mo mesaod er a rolel e a omellach er a Biblia sebechel ngosukid sel bo doumededenger el kmo (1) a Jehovah ngomekerreu el kired, (2) ngmle ungil omelilt el deriruul er a ngar er a mong, me a lechub (3) kede dirk usbechall er a Jehovah.

 ROLEL E KE SUMECHOKL A KLAUMEDEDENGER ER KAU

3. Ngera ta er a rolel e ngsebeched el sumechokl a klaumededenger er kid?

³ A ta er a rolel e ngsebeched el sumechokl a klaumededenger er kid a oeak a dosiik a nger er ngii er a Tekingel a Dios. Sel doruul el uaisei e ngmo smisichid, kede mukeroul er a klereng, e mo sebeched el “misisiich el dechor ra kloumerang.”—1 Ko. 16:​13, BT.

4. Ngmekera ‘dorriter a rokui el tekoi?’ (1 Thesalonika 5:21)

⁴ Monguiu er a 1 Thesalonika 5:21. Mutebengii el kmo a Biblia melisiich er kid el mo ‘merriter a rokui el tekoi.’ Ngmekera doruul er tiang? Ngsebeched el tirterii el kmo aike el doumerang a klemerang loeak a domekesiu er aike el lolekoi a Biblia. El ua tiang, molatk er ngike el kekerei el Sioning el loumededenger er a belkul er osengel a Dios. Ngii el lomdasu el uaisei e ngbelkul a kmo ngklemerang? Ngdiak, ngungil a ‘lorriter a rokui el tekoi’ loeak a bo lodengelii a uldesuel a Jehovah el kirel.

5. Ngmekera sebeched el ‘rongesii’ a nger er a Jehovah er a kerid?

⁵ Sel donguiu er a Biblia e ngua “dorrenges” er a Jehovah el mengedecheduch er kid. Engdi a bo dodengelii a uldesuel el kirel a ileakl el ker e ngdiak el sebeched el di menguiu e merekong. Ngkired el smiik e mesuub aike el bades el ngosukid el longer er a kerid. Ngsebeched el meruul a research lousbech aike el klekedall er omesuub el bla lotobed a cheldebechelel a Jehovah. (Osi. 2:​3-6) Ngsebeched el meluluuch lolengit er a Jehovah me lomekrael er a research er kid e lengesukid el metik er a uldesuel el kirel a kerid. E seikid e ngsebeched el losiik omellach er a Biblia me a information el chatter er a blekeradel el dengar ngii. Ngdirrek el sebeched el ngmai a klungioled sel dorriter a cheldecheduch er a Biblia el kirir tirke el mlo chobangel a osisiu el tekoi el dechelebangel.

6. Ngmekera miting e ngosukid el mo mesmechokl a klaumededenger er kid?

⁶ Kede dirrek el “lorrenges” er a Jehovah el mengedecheduch er aike el miting er kid. A lsekum kede ngar er a bek el miting e ngsebeched el mo rongesii a kmung ngerang er a cheldecheduch me a lechub e ng comment er a chad el ngii a locha sel kmal dousbech er ngii el mo onger er a klaumededenger er kid. (Osi. 27:17) Ka me dosaod a rolel e ngsebeched el sumechokl a bebil klaumededenger.

SEL MOUMEDEDENGER EL KMO A JEHOVAH NGMERA EL OMEKERREU EL KIREM

7. Ngera el ker a locha bo loker er ngii a rebebil?

⁷ Ngmla ta el molatk el kmo, ‘A Jehovah, ngmera el mesekak?’ A lsekum e ke feel el kmo ngdiak a ultutelem, e ke locha mo omdasu el kmo ngkmal diak el sebechem el mo sechelil ngike el Ulemeob a rokui el tekoi. A King David a locha dirrek el mlo omdasu el uaisei. Ngkmal mle mechas a rengul el kmo a Jehovah omtab er a rechad e uleker el kmo: “RUBAK, ng mo ngera belkul a chad me ke kuk kmal melatk er ngii? Ng di chad, e ke kmal kerekikl er ngii?” (Psa. 144:3) Ngar ker a sebechem el metik er a nger tiang?

8. A doltirakl er a 1 Samuel 16:​6, 7, 10-12, e ngera ngomes er ngii er a rechad a Jehovah?

⁸ Ngar er a Biblia e kede suubii el kmo a Jehovah omekerreu el kirir tirke el diak el meklou a ultutelir er a rebebil. El ua tiang, a Jehovah ulderchii a Samuel el mora blil a Jesse el mo mengilt er a ta er a ngelekel el mo king er a Israel er a ta er a klebesei. A Jesse ulleker er a reteuid el ngelekel el sechal el mo omes er a Samuel engdi ngdimlak lokerir ngike el kot el kekerei el David. b Me nguaisei engdi a  Jehovah a ngileltii a David. (Monguiu er a 1 Samuel 16:​6, 7, 10-12.) A Jehovah a milsa el kmo a David ngmera el techang er a chelsel, ngika el kekerei el chad a milengreos a tekoi er a klereng.

9. Ngera uchul me ngsebechel mo ulterekokl a rengum el kmo a Jehovah omekerreu el kirem? (Dirrek el momes er a siasing.)

⁹ Molatk er a rolel e a Jehovah mla ochotii el kmo ngomekerreu el kirem. Ngomeskau a ulekrael el chatter er aike el mousbech. (Psa. 32:8) Ngmekera sebechel meruul er tiang a lsekum e ngdiak lungil medengelkau? (Psa. 139:1) Sel moltaut a ulekrael er a Jehovah e mesa rolel e ngngosukau, e ngmo ulterekokl a rengum el kmo ngomekerreu el kirem. (1 Kr. 28:9; Rel. 17:​26, 27) A Jehovah a mes aike el moruul me lsebechem el mesiou er ngii. Ngmes a ungil blekerdelem e soal mo Sechelim. (Jer. 17:10) E kmal mo dmeu a rengul a lsekum ke kongei el mo sechelil.—1 Jn. 4:19.

SEL BO MOUMEDEDENGER EL KMO NGMLE MELLOMES A OMELILT EL MRIRUUL ER A NGAR A MONG

10. Sel dolatk omelilt el deriruul er a ngar er a mong, e ngera el ker a locha duubech?

¹⁰ A lebebil er a taem e a rebebil a locha mo melatk omelilt el leriruul er a ngar er a mong e mo oumededenger el kmo ngmle ungil me a lechub e ngdiak. Te chiloit a ungil ureor me a lechub e ngtechall el mo ousiobai me lsebechir el mui el mesiou er a Jehovah. Engdi tia locha mle betok el rak er a mla me mong. Te omes er a rebebil el riruul a ngodech el lomelilt er tir el locha betok a ududir e ungilbesul a klengar er tir. Tia uchul me te locha mo melatk: ‘Ngmle worth er ngii aike el tekoi el kchiloit el kirel a Jehovah? Me a lechub e nguchul me ak urriid a bebil el ileakl el techall?’

11. Ngera milengesang er ngike el milluches er a Psalm 73?

¹¹ A lsekum ngdirrek el mengesang er kau a kmeed el losisiu el ker, e molatk a ble lolechesuar  er ngii ngike el milluches er a Psalm 73. Ngulemes er a rebebil el kora mle mesisiich a bedengir, betok a ududir, e diak a mondai er tir. (Psa. 73:​3-5, 12) Sera lesa el kmo ngkora kmal mle ungil a klengar er tir e ngmlo feel el kmo ngdiak a belkul a blakerreng er ngii el mesiou er a Jehovah. Ngmle “chuarm er a chelliloil sils” e le ngii lulemdasu el uaisei. (Psa. 73:​13, 14) Ngmilekera sumechokl aika el diak lungil uldesuel?

12. A doltirakl er a Psalm 73:​16-18, e ngmilekera ngike el milluches er ngii e sumechokl a diak lungil uldesuel?

¹² Monguiu er a Psalm 73:​16-18. A milluches er tia el Psalm a mlora templo er a Jehovah. Ngar isei e ngmlo sebechel lungil el omdasu. Ngmlo mtebengii el kmo alta ngkora kmal beot a klengar er a rebebil, ngdimlak a omeltkir el kirel a ngar medad. Tia el klemedengei a milsang a budech e le ngmlo ulterekokl a rengul el kmo a tekoi er a klereng a sel kot lungil omelilt. Tiakid a uchul me ngmlukbeches a rengul el mo melemolem el mesiou er a Jehovah.—Psa. 73:​23-28.

13. Ngmekera sebechem el metik er a budech a lsekum ke oumededenger a bebil omelilt el mriruul er a ngar er a mong? (Dirrek el momes er a siasing.)

¹³ Ngsebechem el metik er a osisiu el budech loeak a ngelsuil a Tekingel a Dios. Ngoeak a ngera el rolel? Molebedebek a kerresel a tekoi el molab, luldimukl er a mekreos el tekoi el ngar er a eanged, e momekesiu er aike el mo duubech el mo er tirke el di mo ngmai aike el lomeskid tia el beluulechad. Te di ultuil er aike el bla leketmokl er chelechang e le ngdiak a ngera el kirir er a ngar medad. Engdi kau a bla letibir a Jehovah el mo er kau a klengeltengat el lengelakl er aike el sebechem el mdasu. (Psa. 145:16) Mdirrek el melatk: Ngmera el sebeched el mo medengei el kmo ngmo uangerang a klengar er kid okmo kede riruul ngodech el  omelilt er a ngar er a mong? Engdi ngngar ngii a chimo el tekoi el ulterekokl: Tirke el meruul omelilt loltirakl er a bltkil a rengrir el mora Dios me a rengar bita er tir a mo blechoel el lolab aike el luchul a mera el deurreng.

SEL BO MOUMEDEDENGER EL KMO KEDE DIRK USBECHALL ER A JEHOVAH

14. Ngera el blekeradel a lengar er ngii a rebebil, e ngera el ker a locha mengesang er tir?

¹⁴ A rebebil er a mesiungel a Jehovah diak el sebechir el meruul a betok el sorir e le te mechudelang, ngar ngii a secherel a bedengir, me a lechub e ngchelitechetul a bedengir. Tia locha mo rulleterir a rebebil er tir el mo oumededenger er a klungel a ultutelir er osengel a Jehovah. Te locha mo oker, ‘Ngak, ak dirk usbechall er a Jehovah?’

15. Ngera ngmle ulterekokl a rengul er ngii ngike el milluches er a Psalm 71?

¹⁵ Ngike el milluches er a Psalm 71 a mle bekikl er a osisiu el tekoi. Ngmilluluuch el kmo: “Lak mobes er ngak sel lekea klisichek.” (Psa. 71:​9, 18) Me nguaisei engdi ngika el milluches er tia el Psalm a mle ulterekokl a rengul el kmo a lsekum e ngmelemolem el mesiou er a Jehovah el loba blakerreng e ngmo omekrael e olengeseu er ngii. Ngua lesilubii ngika el milluches er tia el Psalm, a Jehovah dmeu a rengul sel doruul er sel kot el sebeched el mesiou er ngii alta ngngar ngii a mo melsemai er kid.—Psa. 37:​23-25.

16. Ngoeak ngera el rolel e a remechudelang a kmal usbechall er a Jehovah? (Psalm 92:​12-15)

¹⁶ Remechudelang momes er a blekeradel el omngar ngii loba osengel a Jehovah. Ngkmal sebechel ngosukau el mo meloseb er a tekoi er a klereng alta ngngar ngii a melsemai er a klisichel a bedengem. (Monguiu er a Psalm 92:​12-15.) Bo lulturk osengem er aike el sebechem el meruul er chelechang er a bai molatk aike el mla mo diak el sebechem el meruul. El  ua tiang, molisiich er a rebebil loeak a ungil kerebai er a blakerreng er kau me a klemeriarreng er kau er tir. Ngsebechem el mesaod er a rolel a Jehovah a mla ngosukau er aika el mereko el rak e mouchais a telbiil er a Biblia el kmal momes el beduluchei el kirel. E lak mobes er a klisichel a nglunguchem el kirir a rebebil. (1 Pe. 3:12) Me alta ngkakerous a blekerdelel a klengar er kid engdi kede rokui el ngar ngii a sebeched el meruul el kirel a Jehovah me a rebebil.

17. Ngera uchul me ngdiak el kired el omekesiu er kid er a rebebil?

¹⁷ A lsekum e ngmo uchul a ringel lekor kau sel molatk el kmo ngdiak el sebechem el meruul a betok el ngar er a omesiungem el mora Jehovah, e lemechelaod a rengum el kmo a Jehovah mengreos a ngii di el tekoi el moruul. Nglocha mo soam lomekesiu aike el moruul er aike el loruul a rebebil. Engdi lak muaisei! E ngerang? E le Jehovah diak leuaisei. (Gal. 6:4) El ua tiang, a Maria milsang a Jesus a kmal meringel a cheral el cheluch el chilt. (Jn. 12:​3-5) E ngike el chebuul el melakl el dil a di uldob a teblo el sens. (Lk. 21:​1-4) Me nguaisei engdi Jesus a ulemes aika el teblo el tekoi el kmo ngolechotel a klaumerang. A Demal el Jehovah a mengreos a ngii di el tekoi el moruul lekau el betik a rengum er ngii e oba blakerreng el mo er ngii, mo lmuut er a om feel el kmo ngdiak el klou.

18. Ngera mo ngosukid el mo mesisiich er a klaumededenger? (Momes er a baks el “ A Tekingel a Jehovah Sebechel Ngosukau el Mo Diak Moumededenger.”)

¹⁸ Kid el rokui el mo er ngii a klaumededenger er kid a lebebil. Me nguaisei engdi ngua bla desang, a Tekingel a Dios el Biblia, el kmal sebeched el lultuil er ngii, a sebechel ngosukid el mo mesisiich er aika el uldesued. Me mosmechokl a klaumededenger er kau, e becherei a ulterekokl el reng me lebtechir a chelitechetul a reng. A Jehovah ungil medengelkau. Ngkmal appreciate aike el moruul el kirel e mo otutii a telbilel lekor er kau el kmo, ngmo omekngeltengat er kau. Bo lemechelaod a rengum el kmo a Jehovah omes er a rokui el blak a rengrir el mesiungel el kmo te rredemelel a bltkil a rengul me a attention er ngii.