1. Ngera oterekeklii a rengum el kmo a Tekingel a Dios a ngar er ngii a klisichel? (Momes er a siasing er a uchelel a suobel.)

A RECHEDAL a Jehovah a oumerang el kmo a tekingel el ngii a klemechel el mo er a rechad “a di ngar e mesisiich.” (Hebru 4:12) Kede mla mesa klisichel a tekoi el ngar er a Biblia el oureor er a chelsel a klengar er kid me a relmuut el bebil. A uchei er a bo el Sioning, e a rebebil er tir a mle merechorech, me a ruusbech a mekngit el kar, me a lechub e te di mirruul a deleboes. E a rebebil a kuk mle merael chisir me a rebebil a mle betok a ududir, engdi te ulemelechesiu er tir el ngar ngii a olengesonges er a klengar er tir. (Olisechakl 2:3-11) Me ngkmal dmeu a rengud e le rebetok el dimlak a omeltkir e dimlak lodengei el kmo a klengar er tir ngmo bedul ker a mla mo er ngii a belkul a klengar er tir me a dirrek el omeltkir. Me ngar er a Ongkerongel e ngkmal dmeu a rengud el menguiu a betok el suobel el kirel a tekoi el dilubech er a klengar er a rechad el ngar aike el suobel el “A Biblia a Melodech a Klengar er a Rechad.” Me ngmo lmuut er a taem el rechad a mo Kristiano, me tir a dirk kirir el melemolem el melisiich er a deleuill er tir me a Jehovah el ousbech er a ngelsuil a Biblia.

2. A Tekingel a Dios, ngera ngrirellii er a klengar er a rechad er a irechar?

 ² Ngdiak lemechas a rengud sel domes er a rebetok el suubii a klemerang e mo melodech a meklou el tekoi er a klengar er tir. Tirke el rudam me a rudos er kid er a irechar el tir a uleba omelatk el mo kiei er a eanged a mirruul a meklou lomelodech er a klengar er tir. (Monguiu er a 1 Korinth 6:9-11.) Me sel taem el Paulus a milsaod el kirir tirke el dimlak loudiukes er a Rengedel a Dios, e ngdilu el kmo: “A re bebil er kemiu a [mle] ua isei a blekerdelir.” Me a Tekingel a Dios me a chedaol reng er ngii a ngilsuterir tirka el chad el mo melodech a blekerdelel a klengar er tir. Me nguaisei, engdi uriul er a bo el Kristiano, e a rebebil er tir a mlo remuul a oberaod el klengit me ngmlo uchul a telemellel a deleuill er tir me a Jehovah. El ua tiang, a Biblia a mesaod el kirel a ta el ngellitel el odam el mlo kirel mesuld a ngklel. Engdi uriul e ngmlo ngodechii a blekerdelel me bo lsebechel el lmuut el mo chedal a ongdibel er a Rekristiano. (1 Korinth 5:1-5; 2 Korinth 2:5-8) Me ngmera el melisiich a rengud sel domes er a rudam me a rudos er kid el mle sebechir el meruul a betok el omelodech er a klengar er tir el klisichel a Tekingel a Dios a uchul.

3. Ngera kede mo mesaod er tia el suobel?

³ A Tekingel a Dios el bla lebeskid a kot el mesisiich me ngkmal soad el mo ungil lousbech er ngii. (2 Timothy 2: 15) Tia el suobel a mo mesaod aike el tekoi el sebeched el meruul el ousbech er a klisichel tia el Biblia er (1) a chelsel a klengar er kid, (2) sel doldingel a obliil, me (3) sel dengar medal a ongdibel e dolisechakl. Me a tekoi el desuub er tia el suobel a rullid el mo olecholt er a bltkil a rengud me a omereng el saul er kid el mo er ngika el Demad el ngar a eanged, el ngii a olisechakl er kid el di mo uchul a klungioled.​—Isaia 48:17.

4. (a) Kede mekerang e rullii a Tekingel a Dios el mo oureor er a chelsel a klengar er kid? (b) Ngmekera omoterekeklii a temem el menguiu er a Biblia?

⁴ Ngkmal kired el mo blechoel menguiu er a Tekingel a Dios er a bek el sils, a lsekum ngsoad a bo loureor er a chelsel a klengar er kid. (Josua 1:8) Oumesingd er kid a kmal mechesang engdi ngdiak el kired el mechei a ngii di el tekoi me lorrob er kid me lak donguiu er a Biblia. (Monguiu er a Efesus 5:15, 16.) Ngsebeched el sikii a techall el mo menguiu er ngii er a dirk tutau, me a mitil a taem, me a lechub e ngkebesengei. Me kede kmal kongei a tekingel a ta er a milluches er a psalm el kmo: “Ng meral betik a renguk er a llechum! Ak melebedebek er ngii er a tutau el mo klebesei.”​—Psalm 119:97.

5, 6. (a) Ngera me ngkired el mo kerekikl el melatk a tekoi el donguiu? (b) Ngmekera e mo oureor er a klengar er kid a tekoi el donguiu e dolebedebek? (c) Ngoeak a ngera el rolel e a omengiuem me a omelebedebekem er a Biblia a mla ngosukau?

⁵ Me nguaisei, engdi ngdiak di lomengiuel a Biblia a ungiang. Ngkmal kired el mo dmolech el melebedebek aike el tekoi el donguiu. (Psalm 1:1-3) Seikid a rolel e ngmo sebeched loltaut ngii el mellomes el ulekrael er a Biblia er a chelsel a klengar er kid. Me ngkmal soad el mecherei a Tekingel a Dios me ngmelodech a blekerdeled e omeksemeriar er kid lokiu sel donguiu er ngii, alta e kede menguiu er ngii el ngar a Biblia me a lechub a tablet er kid.

⁶ Ngmekera e mo er ngii a ultutelel a omelebedebeked  er a Tekingel a Dios? Sel donguiu er a Biblia, e ngkired el mo chelellakl e melatk el kmo: ‘A tekoi el kunguiu, ngouchais er ngak er a ngerang el kirel a Jehovah? Ngokiu a ngera el rolel e ak kultaut a tekoi el kunguiu er a chelsel a klengar er ngak? Ngera el omelodech a dirk kirek el meruul?’ Sel bo dekerekikl el melebedebek a tekoi el donguiu er a Tekingel a Dios, e doluluuch el kirel, e ngrullid el mo soad loltaut er a klengar er kid. Seikid e ngmo sebeched el chormii a klisichel a Biblia er a chelsel a klengar er kid.​—2 Korinth 10:4, 5.

7. Kede mekera e mo ungil lousbech er a Tekingel a Dios sel doldingel a obliil?

⁷ Ngkmal klou a ultutelel el deblechoel el ousbech er a Tekingel a Dios sel domerk er a klumech e dolisechakl er a rechad. A ta el odam a dilu el kmo, “Oleko ke oldingel a obliil lobengkel a Jehovah, e kedi mengedecheduch me a lechub e ke msa techellel me ngkuk mengedecheduch?” Sel taem el donguiu er a Biblia el mo er a chad, e kede msa techellel a Jehovah me ngmengedecheduch er ngii. Me a bades el bo dungil el ngiltii e menguiu er ngii a lmuut el klou a klisichel er a ngii di el tekoi el dolekoi. (1 Thesalonika 2:13) Me kau, ke melasem el menguiu er a Biblia er a bek el techall sel moldingel a obliil?

8. Ngera me ngdiak di lomengiuel a bades a ungiang el doruul er ngii sel doldingel a obliil?

⁸ Me nguaisei, engdi ngdiak di lomengiuel a bades er a Biblia el mo er tirke el chad el dolisechakl er tir a ungiang. A ruumesingd el chad a diak lodengelii a belkul a Biblia. E tiang a klemerang el kirir a rechad er a kot el dart el rak er a uchei, e dirrek el klemerang el kirir a rechad er chelecha el taem. (Rom 10:2) Me ngkmal diak el kired el mo omdasu el kmo a chad er a blai a medengelii a belkul a bades el donguiu er ngii. Me ngsebeched el ngosuir lokiu sel deluut lomelekl a tekoi me a lechub e nguldasu el ngar a bades, e dirrek el mesaod er a belkul el mo er ngii. Ngoeak tiang e a Tekingel a Dios a sebechel mo remutech a rengrir me a uldesuir a rechad.​—Monguiu er a Lukas 24:32.

9. Ngmekera dengesuterir a rechad el mo semeriar er a Biblia lokiu a tekoi el dedung er a uchei er a donguiu er a bades? Mosaod.

⁹ A tekoi el dolekoi er a uchei er a donguiu er a bades a dirrek el sebechel ngosuir a chad el mo oba omengull el kirel a Biblia. El ua tiang, ngsebeched el dmu el kmo, “Me bo domes a tekingel ngike el Ulemeob el kirel tia el tekoi.” Me a lechub e kede mengedecheduch er a chad el diak el Kristiano e ngsebeched el kmo, “Me bo desa el kmo ngera ngouchais er kid a Chedaol Llechukl.” Me a lechub e kede metik er a chad el diak lomekerreu a klechelid, e ngsebeched el kmo: “Ngmla ta el mrengesii tia el kmal chuodel el omelekoi?” A lsekum kede blechoel melatk el kmo a rebek el chad a di kakerous a blekerdelel a klengar me a klaumerang er tir, e nglmuut el mo blak a rengud el meruul er a uchelel a cheldechedechad el mo omeksemeriar er tir.​—1 Korinth 9:22, 23.

10. (a) Ngera dilubech el mo er a ta el odam? (b) Ngokiu a ngera el rolel e ke mla mesa klisichel a Tekingel a Dios er a taem el moldingel a obliil?

¹⁰ A rebetok a mla metik er ngii el kmo ngkmal klou a klisichel a Tekingel a Dios el mo er a rechad sel lousbech er ngii lolisechakl er tir. El ua tiang, a ta el odam a mlo oldingel er a chuodel el rubak el mla mo betok el rak el longuiu aika el babilenged. A ta er a klebesei e ngtilbir ngika el odam el mo menguiu er a ta el bades el mo er ngii er a uchei er a lomsang a Ongkerongel. Me ngchiliuii a 2 Korinth 1: 3, 4, BT, el kmo: “Chedam ra  klechubechub, el Dios er a bek longelaod, el mengelaod er kid sel de ngara chelsel a ngiidil ringel.” Aika el tekoi a kmal rirtechii a rengul ngika el rubak me ngdilu er ngika el odam me nglmuut el menguiu er tia el bades. Me ngii el rubak a dula el kmo ngii me a bechil a mera el ousbech a ongelaod. Me ngokiu tia el bades, e ngmlo soal el mo medengei a lmuut el betok el kirel a Biblia. Me ngbleketakl el kmo ngkmal klou a klisichel a Tekingel a Dios sel dousbech er ngii er sel taem el doldingel a obliil!​—Rellir 19:20.

11. Ngera el ngerachel a mla moterekokl er a rudam el ngar a medal a ongdibel e olisechakl?

¹¹ Ngkmal soad el mo er aike el rokui el miting er kid me aike el ta el sils el ongdibel me a meklou el ongdibel er kid. E sel kot el ngarbab luchul me kede mong, a mo mengull er a Jehovah. Kede dirrek el mo ngmai a klungioled er aike el tekoi el desuub. Tiaikid a uchul me a rudam el tir a olisechakl el ngar medal a ongdibel a oba kmal ileakl el techall e dirrek el kmal oberaod a ngerachel el mla moterekokl er tir. (Jakobus 3:1) Me ngkmal kirel a osisecheklir el mengai a uchetemel er a Tekingel a Dios. Me a lsekum ke oba tia el ileakl el techall, e ngmekera omousbech er a klisichel a Biblia el mo remutech a rengrir a rechad lorrenges er kau?

12. Ngmekera ngike el oltobed er a cheldecheduch e otebedii a cheldecheduch el mengai a uchetemel er a Bades?

¹² A Bades a kirel mo kot el meklou a ultutelel el tedebechel a rokui el cheldecheduch. (Johanes 7:16) Me bom kerekikl er a rolel e ke oltobed er a  cheldechedecham me aike el tekoi el dilubech me a lechub e ngokesiu el mousbech me lak bo luchul e bo lak lungil mtebengii a belkul a tekoi el lolisiich er ngii a Biblia. Lak mobes, ngkmal kakerous sel monguiu el lousbech er a Biblia, me sel molisechakl lousbech er ngii. A lsekum ke chemuiu a kmal betok el bades, e a ruumesingd el chad a mo diak lsebechir el lmatk el rokui. Me bom kerekikl el melilt a bades el soam el mo mesaod, e mongoit a temem el menguiu, e mosaod, e momekesiu e dirrek el bo mungil el loltaut. (Nehemia 8:8) A lsekum a cheldechedecham a mengai er a outline, e bom kerekikl el mesuub er ngii me aike el bades el lousbech. Molasem el mo medengelii a rolel e tia el outline me a bades a dmak loureor, e bo mousbech a bebil er ngii el bades el olisechakl aike el meklou a ultutelel el tekoi el losaod tia el outline. (Ngsebechem el metik a ungil el ulekrael el ngar er a 21 el mo er a 23 el llel sel Benefit From Theocratic Ministry School Education el babier.) E sel kot el klou a ultutelel el tekoi, a sel molengit er a Jehovah me lengesukau el mo meduch el merous er sel mekreos el uldasu el ngar er a chelsel a Biblia.​—Monguiu er a Esra 7:10; Osisechakl 3:13, 14.

13. (a) Ngmilekerang a bades el rirengesii a ta el odos er a ta el miting e kmal mlo rutechii a rengul? (b) Ngokiu a ngera el rolel e a usbechel a Biblia er a temel a miting a kmal mla ngosukau?

¹³ Ngkmal betok a mekngit el tekoi el dilubech el mo er a ta el odos er a Australia er a dirk lekekerei. Me alta e ngmlo medengelii a Jehovah er a uriul, engdi ngmle meringel er ngii el mo oumerang el kmo a Jehovah a betik a rengul er ngii. Ngar er a ta el miting, e ngrirengesii a ta el bades el kmal rirtechii a rengul. Me ngmillebedebek er  ngii e mlo merriter er ngii, el mlo uchul e ngmlo menguiu a lmuut el bebil er a bades er a Biblia. Seikid e ngkmal mlo ulterekokl a rengul el kmo a Jehovah a betik a rengul er ngii. * (Momes er a footnote.) Me kau, ngmla ta el mrengesii a bades er a temel a miting me a meklou me a lechub e ngmekekerei el ongdibel el kmal mlo rutechii a rengum?​—Nehemia 8:12.

14. Kede mekera e ochotii el kmo ngkmal betik a rengud e mengreos er a Tekingel a Jehovah?

¹⁴ Me kid el rokui a ulterekokl el kmal loba omereng el saul el kirel tia el mla meluches el Tekingel a Jehovah el Biblia! Ngii a tilbir el kmo tia el babilengel a mo mukerreu, me ngdirk melemolem el oltaut er tia el telbilel. (1 Petrus 1:24, 25) Me ngkmal soad el mo blechoel menguiu er a Biblia er a bek el sils, e oltaut aike el tekoi er a chelsel a klengar er kid, e dirrek lousbech er ngii el mo ngosuterir a rebebil. E sel doruul el uaisei, e kede ochotii el kmo ngmera el betik a rengud e oba omereng el saul el kirel tia el mekreos el klalo. E a ngaruchei er ngii el rokui, e kede mera loba klou el omereng el saul el kirel Ngike el milluches er ngii el Jehovah el Dios.