1, 2. (a) Ngera sebechel mo duubech e le rechad el diak lulserechakl a rengrir? (b) Ngera me ngkmal kired el mesaod er tia el blekeradel?

A ULSERECHAKL el reng a blekeradel el sebechel a Jehovah el ngosukid el mo olecholt er ngii. (Galatia 5:22, 23) A Jehovah a cherrungel el olecholt er tia el blekeradel engdi kid a diak, le ngdiak demecherrungel. E mera el tekoi, tia el blekeradel el diak lulserechakl a rengrir a rechad a uchul me ngkmal betok a mondai er a rechad er chelechang. Ngsebechel mo uchul e ngmo meringel er a rechad el meruul a meklou a ultutelel tekoi el mechir sel temel, me a lechub e te mo mekngit er a skuul me a lechub e ngurerir. Sel bo lak lulserechakl a rengud e ngsebechel mo uchul a mekngit el omelekoi, me a imis el omelim el rrom, me a meringel el odechelakl me a dertel a chebechiil me a klou el blals, e mo meruul a tekoi el dikea el tabesul, e mo uchul e a chad a mo kelebus, me a lechub e ngmo meringel a uldesuel, e dirrek el mo uchul a bekoiueiuul el rakt el okiu a durs me a dirrek el kldiull el dimlak er a telbiil.​—Psalm 34:11-14.

² Me a rechad el diak lulserechakl a rengrir a mo uchul a mondai el kirir me a dirrek el rebebil. Me chelecha el taem e ngmla obeketakl el kmo, a rechad a kmal diak lolecholt er a ulserechakl el reng. Engdi ngdiak lemechas a rengud, e le Tekingel a Dios a ulemlaoch el kmo a blekerdelir a rechad el diak lulserechakl a rengrir a ta er a ochotii el kmo, kede kiei er a “ulebongel er a beluulchad.”​—2 Timothy 3:1-3.

3. Ngera me ngkirel el mo ulserechakl a rengud?

 ³ Ngera uchul me ngkirel el mo ulserechakl a rengud? Ngar er ngii a eru el meklou a ultutelel el uchul. A kot, e a rechad el sebechir el mtebechel a rengrir me a uldesuir a blechoel el kesai a mondai er tir. Ngdirrek el beot er tir el mo er ngii a kmes el deleuill er tir me a rebebil, e mo diak el bekongesengasech a rengrir e di lesebek a rengrir me a lechub e lemeringel a uldesuir. E a ongerung, a lsekum ngsoad el melemolem el sechelil a Dios, e ngkmal kired loltngakl a ngii di el orrimel e dirrek el mo kerekikl el omtebechel a urungulel a rengud. E tiang a tekoi el Adam me a Eva a mlo diak el sebechir el kutmeklii. (Genesis 3:6) Me a rebetok el chad er chelechang a di uai tir el chuarm a meringel el mondai e le ngdimlak el sebechir el mtebechel a rengrir.

4. Ngera sebechel el melisiich er a rechad el meringel er tir el mo ulserechakl a rengrir?

⁴ A Jehovah a ungil medengei el kmo, ngdiak demecherrungel me ngmeringel er kid el mo ulserechakl a rengud. Me nguaisei, engdi Ngii a kmal soal ngosukid el mo oltngakl a mekngit el urungulel a rengud. (1 King 8:46-50) Ngdi ua betik a rengul el Sechelei, ngblak a rengul el melisiich er tirke el meringel er tir el omtebechel a uldesuir me a urungulir. Me ngar tia el suobel e kede mo mesuub el kirel a blekerdelel a Jehovah el oba ulserechakl el reng. Kede dirrek el mo mesaod a bebil kerebai el ngar er a Biblia el kirir a rechad el mle ulserechakl a rengrir me a redimlak, e dirrek el mo mesaod a bebil tekoi el sebechel ngosukid el mo oba ulserechakl el reng.

5, 6. Ngera el rolel a ulserechakl el reng a bla lochotii a Jehovah el kired?

⁵ A ulserechakl el reng er a Jehovah a cherrungel e le ngii a cherrungel er a bek el rolel. (Duteronomi 32:4) Engdi kid a diak demecherrungel. Engdi ngdirk kired el mo omtab er a rolel e ngolecholt er a ulserechakl el reng, me bo lsebeched el mo ungil loukerebai er ngii. Tiang a ngosukid el mo meduch el omtebechel a omerelled el ngar er a melemalt el rolel sel leduubech a tekoi el rullid el mo kesib a rengud. Me ngera bebil kerebai el kirel a ulserechakl el reng er a Jehovah?

⁶ Ka molatk er a blekerdelel a Jehovah er sel taem el Satan a mlo omtok er ngii er a chelsel a Eden. A ultelecheklel a Diabelong a locha rirelleterir a reblak a rengrir el mesiungel a Dios el ngar er a eanged el kmal kilebetiekl, e mlo kesib a rengrir, e dirrek el mlo mechas a rengrir. Me kau me ke locha dirrek el mo omdasu el uaisei sel molatk el kirel a rokui el ringel el ngar er ngii el Satan a uchul. Engdi Jehovah a dimlak bo le kesib a rengul, e ngbai mle bleketakl e melemalt el longer er ngii. A Jehovah a kmal mle tabesul a omerellel bedul a Satan, e dirrek el dimlak di lemereched el mo kesib a rengul er ngii. (Exodus 34:6; Job 2:2-6) E ngera uchul? E le ngii el Jehovah a kmal uleba kllourreng el mesterir a techellir a rokui el diak lemecherrungel el chad, e le ngkmal diak el soal a ngii di el chad a bo leriid “e bai soal a rokui el chad a lobult el mo imikr a kngterir.”​—2 Petrus 3:9.

7. Ngera kede suubii er a kerebil a Jehovah?

⁷ A kerebil a Jehovah a osisecheklid el kmo, ngkired el mo kerekikl el melatk a tekoi er a uchei er a dolekoi, e diak di debekerokl el mo meruul a tekoi. Me sel bo el kirem el meruul a meklou el omelilt, e bom kerekikl el melatk. Moluluuch lolengit er a llomeserreng me bo lsebechem el dmung, me a lechub e ke meruul a melemalt el tekoi. (Psalm 141:3) A lsekum e ngmo kesib a rengud me a lechub e ngmo chetid a tekoi, e ngkmal beot er kid el mo remuul a mekngit. E  tiaikid a uchul me a rebetok a mlo ouuchel a rengrir, e le tir el millekoi me a lechub e te mirruul a tekoi el dimlak lomdasu er a uchei!​—Osisechakl 14:29; 15:28; 19:2.

8. (a) Kede mo metik a ungil kerebai el kirel a ulserechakl el reng er ker? (b) Ngera ngilsuir a Josef el mo otngeklii a bechil a Potifar er sera lolasem el mengesuseu er ngii? (Momes er a siasing er a uchelel a suobel.)

⁸ Ngera el kerebai el medung er a Biblia a mera el olecholt er a klungel a ultutelel a ulserechakl el reng? Ke locha mo melatk er a blekerdelel a Josef el ngelekel a Jakob. Ngultngeklii a omengesuseu er sel taem er a losiou el ngar er a blil a Potifar el ngike el merreder er a remengkar el chedal a Farao. A bechil a Potifar a kmal ngilanged er a Josef e le ngkmal “mle ungil a teletelel e ungil a medal,” me ngmlo betok el taem el lolasem el mengesuseu er ngii. Me ngera ngilsuir a Josef el mo otngeklii tia el blekeradel? Nglocha milengoit er a klou el temel el melatk a tekoi el sebechel mo duubech a lsekum ngkongei er a ongtil ngika el redil. Me sel taem er a lomdechem er a Josef ngika el redil, engdi mle mereched el chemiis er ngii. E dilu el kmo: “Ng mekera e sebechek el mo meruul er cho ua tial mekngit el tekoi e mor a klengit el omtok er a Dios?”​—Genesis 39:6, 9; monguiu er a Osisechakl 1:10.

9. Ke mekerang e mo kltmokl el oltngakl a omengesuseu?

⁹ Ngera kede suubii er a kerebil a Josef? Kede suubii el kmo a lsekum kede mo chelebangel er a omengesuseu el mo melemall a llechul a Dios, e ngkmal kired el otngeklii. A rebebil a mle meringel el oltngakl a mekngit el blekerdelir er a uchei, el ua imis el omengang me a omelim me a usbechel a mekngit el kar me a omelamech el dekool me a deleboes me a lmuut el bebil er a tekoi er a uchei er a bo el Sioning er a Jehovah. E a uriul er a bo lemetecholb e nglocha mlo er ngii a taem el blo loureng el mo meruul ngii el tekoi. Me a lsekum ke mo chelebangel er tia el omelsemai, e bom chelellakl e molatk er sel telemellel a deleuill er kau me a Jehovah a lsekum ke kongei el mekesuseu. Ngdirrek el sebechem el melatk aike el blekeradel el sebechel el mengesuseu er kau e mo kerekikl el mengeroid er kau er ngii. (Psalm 26:4, 5; Osisechakl 22:3) Me a lsekum ke mo measem er chouaitia el blekeradel, e molengit er a Jehovah me lebeskau a llomeserreng me a ulserechakl el reng me bo lsebechem el otngeklii tia el tekoi.

10, 11. (a) Ngera duubech el mo er a rebetok el ngalek er a skuul? (b) Ngera sebechel ngosuterir a remekekerei el chad el Kristiano me ngdiak bo letemall a llechul a Dios?

¹⁰ A osisiu el blekeradel el dilubech el mo er a Josef, a dirrek el bo el chelebangel a rebetok el mekekerei el chad el Kristiano er chelechang. E a ta er tir a Kim. A rengalek el ledak el skuul a blechoel el di tir el chemat er tir el kirel a rolel a durs el loruul sel bo el weekend. Engdi a Kim a dimlak a omesodel el kirel tia el tekoi. Me tiang a rullii el mo ua lengodech er a rebebil, e mo omdasu el kmo “ngmla mechoit me ngdi ngii el tang” me a rengalek er a skuul a omdasu el kmo ngkebelung e le ngii el diak a sechelil el sechal. Engdi a mera er ngii, a Kim a bai ulechotii a llomeserreng. E le ngmle ungil medengei el kmo, a omengesuseu el mo meruul a tekoi er a durs a kmal mesisiich er sel taem el dirk demekekerei el chad. (2 Timothy 2:22) A rebebil ngalek er a skuul a blechoel loker er ngii el kmo, ngmla ta  el bo le bad lobengkel a sechal. E tiang a msa techellel me ngsebechel smodii a uchul me ngdiak lekengei el meruul a tekoi er a durs. Me kede kmal chemat er a remekekerei el chad el Kristiano el tir a tibir el mo oltngakl a orimel el mo meruul a deleboes, e a Jehovah me ngdirrek el kmal chemat er tir!

¹¹ A Biblia a dirrek el mesaod el kirir a rechad el tir a mlo mechitechut er a omengesuseu el mo meruul a deleboes. Ngdirrek el mesaod aike el tellemall el mo er ngii a lsekum ngmo diak de kilmekl a rengud. Me a lsekum ke mo chelebangel er a tekoi el ua Kim, e molatk er ngike el kebelung el buik el losaod er ngii a 7 el bliongel er a Osisechakl. Ngdirrek lungil molatk er a Amnon me a tellemall el mlo er ngii el mekngit el omerellel a uchul. (2 Samuel 13:1, 2, 10-15, 28-32) Me a ruungalek a sebechir el ngosuterir a rengelekir el mo omekeroul a ulserechakl el reng me a llomeserreng el okiu sel losaod aike el kerebai er a Biblia er a temel a omengull el telungalek er tir.

12. (a) Ngmilekera Josef e mlo sebechel el kilmeklii a rengul el kirir a rubekul? (b) Ngkired el kilmeklii a rengud er a chelsel a uangera el blekeradel?

¹² Ngokiu a kuk ta er a rolel, e a Josef a dirrek el ulechotii a ungil kerebai el kirel a ulserechakl el reng. Tia sel taem el rubekul a mlei er a Ekipten el me omechar a kall. A Josef a mle soal el mo ungil medengei a uldesuir a rubekul a uchul me ngdimlak louchais er tir el kmo ngii a ochellir. Me sera lesal mo mekngit a rengul e ngchiliteterir e mlo mertii e lmangel. (Genesis 43:30, 31; 45:1) Me a lsekum a odam me a lechub a odos a rullii a tekoi el ongesechii a rengum, e bo moukerebai er a blekerdelel a Josef el mo oba ulserechakl el reng me lak bo mdu tekoi me a lechub e ke remuul a tekoi el bo mouuchel er a rengum er ngii er a uriul. (Osisechakl 16:32; 17:27) Me a lechub e ngar er ngii a chedam el mesuld a ngklel, e ngungil el bo mkerekikl el omtebechel er a uldesuem me a rengum me bo el sebechem el oibngau er a tekoi el modengei el kmo, ngsebechel el mo uchul e ke mo mengedecheduch er ngii. Tiang a kot el meringel el tekoi, engdi ngmo beot er kau sel modengei el kmo ke oukerebai er a Jehovah, e dirrek el olengesenges a llechul.

13. Ngera kede suub er a tekoi el dilubech er a klengar er a King el David?

¹³ Kede dirrek el ngmai a klubeled er a blekerdelel a King el David. Sel taem el Saul me a Simei a ulengasech er a rengul, e ngdimlak bo lekesib a rengul me a lechub e luluusbech er a deruchellel el mo omtok er tir. (1 Samuel 26:9-11; 2 Samuel 16:5-10) Me nguaisei, engdi a David a dirrek el mlo er ngii a taem e ngmlo diak el sebechel el kilmeklii a rengul. Kede medengelii tiang lokiu sel donguiu el kirel a klengit el lerirellii lobengkel a Bathseba me sel omerellel el mo er a mekngit a blekerdelel el Nabal. (1 Samuel 25:10-13; 2 Samuel 11:2-4) Me ngsebeched el suub a meklou a ultutelel el tekoi er a omerellel a David. A kot, e tirke el metutk el mo omekerreu er a rechedal a Dios a kmal kirir el mo ulserechakl a rengrir me lak lousbech er tia el deruchellir el ngar er a mekngit el rolel. E a ongerung, e ngdiak el kirel a chad el mo mesisiich a uldesuel el omdasu el kmo ngkmal mesisiich me ngdiak lsebechel el mekesuseu.​—1 Korinth 10:12.

14. Ngera dilubech el mo er a ta el odam? E ngera uchul me a blekerdeled er a chelsel a chouaika el taem a kmal meklou a ultutelel?

¹⁴ Ngmekera e sebechel el mo ulserechakl a rengum?  Ka molatk er tia el tekoi el dilubech el mo er a Luigi. A ta er a mlai a tuchelii a mlil a Luigi. Alta e ngike el chad a mle uchul tia el accident, engdi ngmocha oldiu er a Luigi, e mla mo soal lokoad er ngii. Me a Luigi a milluluuch el mo er a Jehovah me bo lsebechel el lulserechakl a rengul e lolasem el cholleklii a rengul ngika el chad. Engdi ngii el chad a di millemolem el oldiu. Me a Luigi a liluches a rokui el tekoi el kirel a insurance er ngika el chad e merael, e ngii a dirk melemolem loldiu. A ta el sandei er a uriul, e ngika el odam a mlo oldingel er a redil el mle semeriar. E a bechil ngika el redil a ngike el chad el tilechelii a mlil! Ngika el chad a kmal mlo merur a omerellel e dirrek el ullengit a klausubes. Ngkilengei el mo omekedong er a rechad er a insurance er a Luigi me bo lsebechel el mereched el meruul a mlil. Ngika el chad a kilengei el mo teloi er a omesubel a Biblia, e kmal mlo dmeu a rengul el mesuub. Me ngoeak a tekoi el dilubech, e a Luigi a mlo medengelii a klungel a ultutelel a bo lulserechakl a rengud sel lebo er ngii a accident, e dirrek el mo mtebengii a klou el telemellel a tekoi oleko ngilasech a rengul er sel taem.​—Monguiu er a 2 Korinth 6:3, 4.

15, 16. Ngmekera omesubel a Biblia e ngosukau kau me a telungalek er kau el mo oba ulserechakl el reng?

¹⁵ A Rekristiano a sebechir el mongeseu el mo  oba ulserechakl el reng lokiu sel leblechoel el mesuub e lolatk a tekoi el lesuub er a Biblia. Lak mobes a tekingel a Dios el mo er a Josua el kmo: “Ng kmal diak le kirem el obes er a babier er a Llach. Ng kirem el mesuub er ngii er a llomes ma klebesei, e kerekikl el oltaut er a klengar er kau a bek el tekoi el llechukl er a chelsel. Isei e ng di mo ungilbesul a ikel rokui el moruul.” (Josua 1:8) Engdi ngmekera omesubel a Biblia e ngosukau el mo omekeroul er a ulserechakl el reng?

¹⁶ Kede mla suubii el kmo a Biblia a ngar er ngii a kerebai el ochotii el kmo, ngmo uchul a klungioled sel bo lulserechakl a rengud me a rolel a kede mo chebuul a lsekum ngdiak lulserechakl a rengud. Me ngar er ngii a ungil luchul me a Jehovah a liluches aika el tekoi. (Rom 15:4) Me nguchul a llomeserreng sel donguiu e dosuub el kirel, e bo dekerekikl el melatk ngii el tekoi. Molasem el mo omtab er a rolel e ngsebechem el oltaut er a chelsel a klengar er kau me a dirrek el chelsel a telungalek er kau. Molengit er a Jehovah me lengesukau el mo oltaut a ulekrael er a Tekingel. Me a lsekum ke melechesukau el kmo ngdiak lulserechakl a rengum, e mkengei el kmo ke uaisei. E moluluuch el kirel, e bo leblak a rengum losiik a rolel e ke mo ungil. (Jakobus 1:5) Bo mungil merriter e mosuub a suobel el ngar er a babilenged el meskau a ungil el ulekrael el ngii a sebechel ngosukau.

17. Ngokiu a ngera el rolel e ngsebechir a ruungalek el ngosuterir a rengelekir el mo ulserechakl a rengrir?

¹⁷ Ke mekera e ngosuterir a rengelekem el mo ulserechakl a rengrir? A ruungalek a medengei el kmo a rengelekir a dimlak di lemechell el loba tia el blekeradel. Me ngkirir a ruungalek el osisecheklterir er a ungil blekeradel el okiu sel lolecholt er ngii. (Efesus 6:4) Me a lsekum ke mo mtebengii el kmo a rengelekem a diak lulserechakl a rengrir, e di lekau el merriter er kau el kmo ke olecholt er tia el blekeradel me a lechub e ngdiak. Ngsebechem lochotii a ungil kerebai el kirel tia el tekoi lokiu sel bo blechoel loldingel a obliil, e mngar er a miting me a dirrek el sel moruul er a omengull el telungalek er kemiu. E lak medakt el dmu er a ngelekem el kmo ngdiak, sel bo el kirel! A Jehovah a milsa Adam me a Eva a telkelel a tekoi. E aike el telkelel a tekoi a mle sebechel ngosuterir el mo mengull er sel llemeltel a Jehovah el mengedereder. Me ngdi osisiu, a lsekum a ruungalek a mellach er a rengelekir, e dirrek el mo ungil kerebai el kirir a rengelekir, e te osisecheklterir el mo oba ulserechakl el reng. A bltikerreng er kid el mo er a llemeltel a Dios el mengedereder me a olechotel a omengull er kid el kirel a llechul, a bebil er a kot el meklou a ultutelel el tekoi el sebechem el ngosuterir a rengelekem el mo olab.​—Monguiu er a Osisechakl 1:5, 7, 8.

18. Ngera me ngkired el mo ungil melilt er a remo sechelid?

¹⁸ Me kid el rokui a kmal kired el mo ungil melilt er a remo sechelid, alta e kede oungalek me a lechub e ngdiak. Me a lsekum a resechelim a betik a rengrir er a Jehovah, e te mo melisiich er kau el mo meruul a ungil turrekong er kau e dirrek el ngosukau me ngsebechem el oibngau er a telemall. (Osisechakl 13:20) Me a ungil kerebai er tir a rullau el mo soam el mesuub er sel blekerdelir el olecholt er a ulserechakl el reng. E ngulterekokl a ungil blekerdelem el dirrek el mo melisiich er tir. Me a ulserechakl el reng el denguu a mo uchul e ngsebeched el nguu a kengei er a Dios, e mo dmeu a rengud er a klengar er kid, e dirrek el mo er ngii a techelled el meruul a ungil el mo er tirke el chad el betik a rengud er tir.