1. Ngmilekera Jehovah e ochotii el mo er a Moses? E ngera me tiang a klou a ultutelel tekoi?

A DIOS a mlo duum er a Moses er a ta el taem, e ulechotii a Ngklel er ngii me a bebil Blekerdelel. A Jehovah a mle sebechel mesaod el kirel a klisichel me a lechub e ngllemesel a rengul, engdi ngbai ulemuchel el mesaod el kirel a blekerdelel el bekokuii e dirrek el chubechubechad. (Monguiu er a Exodus 34:5-7.) A Moses a mle soal el mo medengei el kmo, a Jehovah ngmo olengeseu er ngii me a lechub e ngdiak. Me a Jehovah a millisiich aika el blekerdelel el omeketakl er ngii el kmo ngkmal semeriar lolengeseu er a remesiungel. (Exodus 33:13) Ngmo uangera uldesuem sel bo modengei el kmo a Jehovah a kmal omekerreu er kid? Tia el suobel a mo mesaod el kirel a klechubechub, el ngii a blekeradel el rullid el mo mekngit a rengud er a rebebil el chuarm, e mo soad el olengeseu er tir.

2, 3. (a) Ngera ochotii el kmo a rechad a sebechir lolecholt er a klechubechub? (b) Ngera uchul me ke semeriar el mo medengei a omesodel a Biblia el kirel a klechubechub?

² A Jehovah a kot el chubechubechad, e a rechad a ulebeob lokesiul. Me ngsebechir a rechad el mo omekerreu er a rebebil, el mo  lmuut er tirke el diak lodengelii a Jehovah a blechoel el olecholt er a klechubechub. (Genesis 1:27) Ngar er a Biblia e kede metik a betok el cheldecheduch el kirir a rechad el ullecholt er a klechubechub. El ua sel taem el Salomon a mlo kirel losiik el kmo ngtecha er tirke el teru el redil a mera el delal a tolechoi, me ngmillasem er tir er a ledu me lemetuk ngii el tolechoi. Me ngike el mera el delal a tolechoi a kmal mlo chubur ngii el tolechoi me ngullengit er a king me lenguu el msa ngike el ta er a redil. (1 King 3:23-27) A ta er a ungil kerebai el kirel a klechubechub a redil el ngelekel a Farao. Sera lebetik er a dirk tolechoi el Moses, e ngmle medengei el kmo ngika ngelekir a rechad er a Hebru me ngmle kirel lokodall. Engdi “ng mlo chubur” me ngkilengei el mo oungalek er ngii.​—Exodus 2:5, 6.

³ Ngera me ngkired el mesuub a lmuut el betok el kirel a klechubechub? E le Jehovah a kmal soal a bo doukerebai er ngii. (Efesus 5:1) Alta e kede ulebeob el kired el mo chubechubechad, engdi ngdiak demecherrungel, e dirrek el blechoel el di mo melatk er a di kid. A lebebil er a taem e ngmo meringel er kid el melilt el kmo kede olengeseu er a rebebil me a lechub e kede kuk di omdasu er kid. Me ngera sebechel el ngosukid el lmuut el mo semeriar er a rebebil? A kot, e bo desa sel rolel er a Jehovah me a rebebil a lolecholt er a klechubechub. E a ongerung, e kede mo mesa sel rolel e ngsebeched loukerebai er a klechubechub er a Dios, me sel uchul me ngungil a doruul uaisei.

4. (a) Ngera uchul me a Jehovah uleldurech er a rechanghel el mo er a Sodom? (b) Ngera el klubeled a denguu er a tekoi el dilubech el mo er a telungalek er a Lot?

⁴ Ngkmal betok a omesodel a klechubechub er a Jehovah el ngar er a Biblia. E a ta er ngii a sel omerellel el mo er a Lot. Ngika el Lot a melemalt el chad “el kmal mlo chuarm” er a mekngit el omerellir a rechad er a Sodom me a Gomora. Tirka el chad a dimlak el olecholt a omengull el mo er a Dios, me a Jehovah a tilbir el kmo te rredemelel a mo mad. (2 Petrus 2:7, 8) Me a Jehovah a uldercheterir a rechanghel el mo mesubed er a Lot el kmo, ngkirel chemiis e le beluu er a Sodom me a Gomora a mo metemall. Me a Biblia a mesaod el kmo: “Ma Lot a dirk mirrus er a rengul, e ngdi RUBAK a mlo chubur me [a rechanghel] a siluchar a chimal ngii ma bechil ma re terul ngelekel e ngilititerir el mor a ikrel a beluu e milechititerir.” (Genesis 19:16) Me sel blekerdelel a Jehovah el mle ungil medengelii a tekoi el lechelebangel er ngii a Lot, a oterekokl a rengud el kmo ngungil medengei a ngii di el ringel el bo dechelebangel.​—Isaia 63:7-9; Jakobus 5:11, 2 Petrus 2:9.

5. Ngmekera Tekingel a Dios e osisecheklid el mo meduch lolecholt er a klechubechub?

⁵ A Jehovah a dirrek el mla osisecheklterir a rechedal el mo olecholt er a klechubechub. Ka molatk er a ta er a llechul el lebilsterir a rechad er a Israel. A lsekum a ta er a chad a lmeng a ududel a tang, e ngike el lulleng a ududel a nguu a ikrel a bilel e orekedii el mo lmuut er sel taem el bo lebsa ududel. (Monguiu er a Exodus 22:26, 27.) Engdi ngike el lulleng a ududel a kirel el nguu sel bilel ngike el milleng a udoud el msang er a uchei er a lengelt a sils me lak bo lemekerasem sel bo leklebesei. Me a chad el dimlak el chubechubechad a locha mo diak el soal lolluut er a ikrel a bilel ngike el belsel, engdi  Jehovah a ullisechakl er a rechedal el mo chubechubechad. Me ngera el omellach a sebeched el nguu er tia el llach? Lak molechib er osengem er aike el lousbech a kldemem el Kristiano. Bo lemera el ngar er a rengum el soam el ngosuir a odam me a lechub a odos er kau el ngii a chormang.​—Kolose 3:12; Jakobus 2:15, 16; monguiu er a 1 Johanes 3:17.

6. Ngera kede suubii er a klechubechub er a Jehovah el mo er tirke el mlo er a klengit el chad er a Israel?

⁶ A Jehovah a kmal mle chubteterir a rechad er a Israel el mo lmuut er a taem el lebo er a klengit lomtok er ngii. Kede menguiu a tekingel el kmo: “A RUBAK el Dios er a re demerir a millemolem el oldurech er a ruderchelel el mor tir, ele ng mle soal el osebelterir a re chedal e dirrek el osebelii a Templo.” (2 Kronika 36:15) Me ngdi osisiu, ngkmal kired el mo chubteterir tirke el dirkak bo lodengelii a Jehovah el tir a ngar er ngii a techellir el mo obult er a mekngit lomerellir e mo sechelil a Jehovah. A Jehovah a kmal diak lsoal a ngii di el chad a bo lengemed er sel mereku el kerrekerilel. (2 Petrus 3:9) Me chelecha el dirk ngar er ngii a taem, e ngkmal soad el omerk er tia el klemechel el mo er a rokui el chad, e dengesuterir tirke el rokui el sebeched el ngosuterir me lenguu a klungiolir er tia el klechubechub er a Dios.

7, 8. Ngera me a ta el telungalek a oumerang el kmo a Jehovah a ulechotii a klechubechub el mo er tir?

⁷ Chelecha el taem e te kmal betok el mesiungel a Jehovah a mla chormii a klechubechub er ngii. El ua tiang, ngar er a beluu er a Bosnia, er a chelsel aike el rak er a 1990, e a kakerous el bedengir a rechad a mle meringel kaumekemad. E a ta el telungalek el kiliei er isei a mla er ngii a 12 a rekil el ta er a ngelekir el sechal el bo domekedong er ngii el Milan. A Milan me a ta er ngii me a demal me a delal me a relmuut el bebil el Sioning a mla er a bus el ngar er a omerollir er a Bosnia el mo er a Serbia. Te mo er a klou el ongdibel er sel beluu, e a demal me a delal a millatk el mo metecholb er isei. Me ngar sel oliochel er tia el beluu, e a rebebil soldau a milsang a telungalek el chad er a ngodech el kebliil me te uleltengel er tir er a bus. E kilengei er tirke el bebil er a rudam me te melemolem er a omerollir. Tirka el soldau a mlo eru el klebesei el lorreked er tir me ngdimlak lorael. E a uriul e ngike el soldau el uluungerachel er sel taem a mlo oker er a merredelel el kmo ngmo mekera er tirka el chad. Me tirka el telungalek a mle dechor e orrenges er ngika el merreder el dmu el kmo, “Mngititerir el mo er rikl e momoes er tir!”

⁸ Me sel taem el lechadecheduch tirka el soldau, e a reteru el ngodech el chad a mirrael bedul tirka el telungalek. Te mlo mengelulau louchais er tir el kmo te dirrek el Sioning, e a rudam el mla er a bus a silebedeterir er a tekoi el dilubech. Tirka el teru el Sioning a dilu er a Milan me a ta er ngii me bo lsiseb er a mlai e lorael mo imuul er sel oliochel, e le resoldau a diak lomes a babilengir a rengalek. E tir el teru el odam a dilu er a demal me a delal me lorael el mo meliuekl er a rebai er sel kerrekar el dechor er sel oliochel, e bo losiueklterir er a bitang. A Milan a kmal mlo medakt me ngmlo diak lodengei el kmo ngmekerang. E tirka el chad er a blil a uleker el kmo, “Omomdasu e te mo kongei er kid me kede merael?” Engdi sera lorael, e te mlo mesang el kmo tirka el soldau a ua lak lesterir el merolang. Me a Milan me a ta er ngii a mlo kebetech tir me a demerir me a derrir er a bita el oliochel, e dilak el merael el mo er a ongdibel. Ngkmal mlo ulterekokl a rengrir el kmo a Jehovah a mera el ulenger a nglunguchir! Kid a ungil medengei el kmo a Jehovah a diak leblechoel el meruul uaisei el mo omekerreu er a remesiungel. (Rellir 7:58-60) Engdi ngar tia el tekoi el dilubech, e a Milan a dmu el kmo: “Ngua dedu el kmo a rechanghel  a milutek a mederir a resoldau, e a Jehovah a ulelsobel er kemam.”​—Psalm 97:10.

9. Ngmle uangera uldesuel a Jesus el kirir tirke el chad el mirrael lokiuellel? (Momes er a siasing er a uchelel a suobel.)

⁹ A Jesus a kot el ungil el kerebai el kirel a klechubechub. Ngkmal mle chubteterir a rechad e le te mle “suebek a rengrir e metacherbesrir, el ua sib el diak a mengkerengel.” Me ngmilekerang? “Me ng mocha olisechakl er tir a betok el tekoi.” (Mateus 9:36; monguiu er a Markus 6:34.) Engdi tirke el Farisi a kuk mle ngodech, e le te dimlak lolecholt er a klechubechub, e dirrek el mle chetirir lolengeseu er a rechad. (Mateus 12:9-14; 23:4; Johanes 7:49) Me kau, ke ua uldesuel a Jesus el semeriar lolengeseu, e dirrek el olisechakl er a rechad el kirel a Jehovah?

10, 11. Ngkmal kired el blechoel el olecholt er a klechubechub? Mosaod.

¹⁰ Tiang a diak lebelkul a kmo ngkmal kired el blechoel el olecholt er a klechubechub. El ua tiang, a King el Saul a locha ulemdasu el kmo ngolechotel a klechubechub a lsekum ngdiak lomekoad er a Agag, el king er a Amalek el cherrouir a rechedal a Dios. A Saul a dirrek el dimlak lokoad a rokui el chermir a rechad er a Amalek. Engdi Jehovah a dilu er a Saul el kmo ngkirel mekodeterir a rokui el chad er a Amalek me a rokui el chermir. Engdi Saul a dimlak lolengesenges me a Jehovah a ultngeklii me ngmlo diak el king. (1 Samuel 15:3, 9, 15) A Jehovah a ngike el melemalt el chad er a Kerrekeriil el sebechel el menguiu a reng er a rechad, e dirrek el medengei el kmo ngoingerang e ngdiak lekengei lolecholt er a klechubechub er ngii. (Klengiterreng 2:17; Esekiel 5:11) Ngdi kmedung e ngmo oukerrekeriil er tirke el rokui el chetirir lolengesenges er ngii. (2 Thesalonika 1:6-10) Seikid el taem, e ngmo diak a klechubechub er ngii el mo er tirke el rokui el mekngit el chad. Me sel omerellel el mo okngemedeterir a remekngit el chad, a olechotel a klechubechub er ngii el mo er tirke el melemalt el chad el bo lolsobel er tir.

¹¹ Kede medengei el kmo ngdiak el ngerecheled loukerrekeriil el kmo ngtecha kirel mosobel me a techa kirel mad. Ngbai kired el mo er a tkurrebab el sebeched er chelechang el olengeseu er a rechad. Ngera bebil el rolel e ngsebeched lolecholt er a klechubechub el mo er a rechad? Aikakid a bebil er ngii.

12. Ke mekerang e ochotii a klechubechub lokiu a omerellem el mo er a rebebil?

¹² Bo lsebechem lolengeseu er a bek el taem. A Jehovah a soal a rokui el Kristiano a bo lolecholt er a klechubechub el mo er a rechad el kiei er bita er tir me a dirrek el rudam er tir. (Johanes 13:34, 35; 1 Petrus 3:8) A ta er a belkul a klechubechub a “obengkel el chuarm.” Me a chad lolecholt er a klechubechub a melasem lolengeseu er tirke el chormang. Me ngkmal kired losiik a bek el techall e mo olengeseu er a rebebil, lokiu sel dekengei el ngosuterir me a lechub e kede mo er a oderechelir.​—Mateus 7:12.

13. Te mekerang a rechedal a Dios er sel taem el lebo er ngii a meklou el telemellel a beluu?

¹³ Bo mteloi a ureor lolengeseu aike el miltemall el beluu. Kede mo chubteterir a rechad  sel domes er tir el chuarm el telemellel a belurir a uchul, e mo soad lolengeseu er tir. A rechedal a Jehovah a merael a chisir el kirel a ngelsurir er a chelsel a chouaika el taem. (1 Petrus 2:17) El ua tiang, a ta el odos er a Siabal a kiliei er a basio el kmal miltemall er a desiu me a tsunami er sera 2011. Ngdmu el kmo “ngkmal mlo mesisiich e mechelaod a rengul” er sera lomes er tirke el rokui el chad er a bebil beluu er a Siabal me a lmuut el bebil beluu el chiloit a temir el mei e olengeseu el meruul a blirir me a Blil a Ongdibel er tir. Ngdirrek el dilu el kmo: “Tia el tekoi el dilubech a ulterekeklii a renguk el kmo a Jehovah a kmal omekerreu. E dirrek a rekldemek el Sioning a mera el kaukerreu er a delongelir, me a rudam me a rudos el meliuekl er a beluulechad a mera el meluluuch el kiram.”

14. Ke mekerang e ngosuterir tirke el smecher me a remechudelang?

¹⁴ Molengeseu er tirke el smecher me a remechudelang. Sel desterir a rechad el chuarm er a secher me a cheluodel, e kede kmal mo chubteterir. Me kede kmal loureng e mengiil er sel taem el bo lak aika el mondai, me kede meluluuch lolengit er a Rengedel a Dios me lemei. Engdi chelecha el dirk dongiil, e kede meruul aike el sebeched lolengeseu er tirke el smecher me a remechudelang. A ta el chad er a omeluches el Jan Boon a milluches el kmo, a ta er a klebesei e a chudela el delal el smecher er a rakt el Alzheimer, a kmal mlo kikiongel a bilel. Me sel taem el loliuid er ngii, e a chad a melngod er a chesimer er a blil. A reteru el Sioning el blechoel el oldingel er ngii a mla er a tuangel. Me te dilu er ngii el kmo ngsebechir el ngosuir.  Me ngii el mechas a dilu el kmo: “Ak kora merur, engdi kulengit me mngesukak.” Me tirka el odos a ngilsuir, e mlo rullii a imelel el tea e kiliei el mengedecheduch er ngii. Me a ngelekel el sechal a kmal mereng a sulir e dirrek el dilu el kmo, a Resioning a mera el “oltaut aike el tekoi el lolisechakl.” Me kau, ke chubteterir tirke el smecher me a remechudelang me ke kongei el mo er aike el sebechem el ngosuterir?​—Filipi 2:3, 4.

15. Ngmekera tia el urered er a berkel a klumech e ngosuterir a rechad?

¹⁵ Mngesuterir a rechad el mo medengelii a Jehovah. A kot lungil rolel e kede ngosuterir a rechad, a sel dosisecheklterir el kirel a Dios me a Rengedel. E a ta er a rolel a sel dengesuterir el mo medengelii a uchul me ngmo klungiolir a bo lolengesenges a llechul a Jehovah. (Isaia 48:17, 18) Me a berkel a klumech a kot lungil rolel e kede oldanges er a Jehovah, e dirrek el mo sebeched lochotii a klechubechub er kid el mo er a rechad. Me kau, ngsebechem el lmuut el kilungii a rolel a omesiungem?​—1 Timothy 2:3, 4.

16. Sel dolecholt a klechubechub e ngmo uchul a ngera el klungioled?

¹⁶ A retoktang a mesaod el kmo sel dolecholt er a klechubechub e ngsmisichii a bedenged e dirrek lokesengii a deleuill er kid me a rebebil. Me sel mngesuterir tirke el chuarm, e ngmo dmeu a rengum, e mo er ngii a omeltkem, e mo diak msabisi, e dirrek el mo diak di lemekngit a uldesuem. Me ngmo uchul a klungiolem sel molecholt er a klechubechub. (Efesus 4:31, 32) Me a lsekum a bltikerreng er kid a rullid el mo olengeseu er a rechad, e ngmo ungil a ukltked e le kede medengei el kmo kede meruul a soal a Jehovah. Me a klechubechub a ngosukid el mo ungil bechiil, e mo ungil chedam me a chedil, e dirrek el mo ungil sechelei. Me a lmuut el tang, a rechad lolecholt er a klechubechub el mo er a rebebil a blechoel el mongeseu er sel taem el lousbech a ngeso.​—Monguiu er a Mateus 5:7; Lukas 6:38.

17. Ngera uchul me ngsoam el mo olecholt er a klechubechub?

¹⁷ Alta e a olechotel a klechubechub a mo uchul a klungioled, engdi sel ngaruchei el uchul me kede olecholt er a klechubechub, a soad loukerebai er a Jehovah, e dirrek el mengebkall er ngii. Ngii ngike el Uchelel a bltikerreng me a klechubechub. (Osisechakl 14:31) Ngmeskid a cherrungel el kerebai el kirel tia el blekeradel. Mada me debo er aike el rokui el sebeched el oukerebai er a Dios el okiu sel dolecholt er a klechubechub. Seikid e nglmuut el mo kmes a deleuill er kid me a rudam me a rudos er kid, e dirrek el mo ungil a deleuill er kid me a rechad el kiei el iliuekl er kid.​—Galatia 6:10; 1 Johanes 4:16.