1. Ngera me a Resioning er a Jehovah a dmeu a rengrir el chad? (Momes er a siasing er a uchelel a suobel.)

 A RESIONING ER A JEHOVAH a dmeu a rengrir el chad. A bek el taem el bo lekldibel el ngar er a miting me a meklou el ongdibel me a lechub e te dmak el milil, e te chadecheduch e dmak el kaderroakl. Ngera uchul me ngdmeu a rengrir? E le tir el medengelii a Jehovah, el ngii a “dmeu a rengul el Dios.” Te mesiou er ngii e melasem el oukerebai er ngii. (1 Timothy 1:11, NW; Psalm 16:11) A Jehovah a Ngike el Uchul a deurreng me ngsoal a bo ledeu a rengud, e dirrek el meskid a betok luchul me ngsebeched el oldeu a rengud.​—Duteronomi 12:7; Olisechakl 3:12, 13.

2, 3. (a) Ngera belkul a bo ledeu a rengud? (b) Ngera me ngsebechel mo meringel er kid el mo dmeu a rengud?

² E kau, ngdmeu a rengum? A bo ledeu a rengud e ngbelkul a kmo ngungil a rengud el kired, e ungilbesul er a rengud er aike el ngar ngii er kid me a lechub e ngkmal dmeu a rengud. A Biblia a meketeklii el kmo tirke el mukngeltengat er a Jehovah a sebechel mera el mo dmeu a rengrir. Engdi ngera uchul me ngsebechel mo meringel er kid el mo dmeu a rengud el ngar tia el beluulechad er chelechang?

³ Ngsebechel mo diak ledeu a rengud sel bo decharm er a meringel  el blekeradel, el ua sel lemad a betik er a rengud me a lechub e ngmesuld a ngklel, me a lechub sel lemedort a chebechiieled, me a lechub e ngmo diak doureor. Ngdirrek el sebechel mo diak ledeu a rengud a lsekum ngdiak a budech er a chelsel a blid e le rechad el di blechoel kakoad, me a dirrek el rechad er a urered me a lechub tirke el dedak el skuul a melenguul er kid, me a lechub e kede modechelakl me a lechub e kede mora kelebus e le kid el mesiou er a Jehovah. Me a lechub e a bedenged a di merael mo mechitechut, e mo er ngii a meringel el sechered, me a lechub e kede mo smecher er a ringelel a uldasu. Engdi lak mobes el kmo a Jesus Kristus el “ngike el dmeu a rengul e di ngii el tang el Merreder,” a kmal mle soal mengelaod er a rechad e meruul er tir el mo dmeu a rengrir. (1 Timothy 6:15, NW; Mateus 11:28-30) Ngar sel Cheldecheduch el Ngar er a Rois, e a Jesus a milsaod a bebil blekeradel el sebechel ngosukid el mo dmeu a rengud alta e ngmo er ngii a betok el mondai e le kid el kiei er tia el beluulechad er a Satan.

4, 5. Ngera sebechel rullid el mo dmeu a rengud e melemolem el dmeu a rengud?

⁴ A kot el tekoi el ledillii a Jesus a kmal klou a ultutelel. Ngdilu el kmo: “Ngdmeu a rengrir tirke el kerekikl er a tekoi er a klereng er tir, e le Rengedel a eanged a kloklir.” (Mateus 5:3, NW) Me a lsekum kede kerekikl er a tekoi er a klereng er kid, e ngolechotel a kmo ngkired el mo medengelii a Dios e dirrek el ousbech a ngelsuil me a ulekrael er ngii. Me ngmekera doruul er tiang? Ngokiu sel dosuub er a Biblia, e dolengesenges er a Dios, e derellii a omengull er kid el mo er ngii el mo kot el klou a ultutelel el tekoi er a klengar er kid. Sel doruul aika el tekoi e ngrullid el mo dmeu a rengud. Me a klaumerang er kid el kmo a telbilel a Dios a kmal di kmedung el mo tmaut a lmuut el mo mesisiich. Me sel “dolatk er ngii el sils er a deurreng” el debetik er ngii er a Biblia a mo melisiich er kid.​—Titus 2:13.

⁵ Ngkired el melemolem el melisiich er a deleuill er kid me a Jehovah a lsekum ngsoad el mo dmeu a rengud er a chelsel a ngii di el blekeradel. A apostol el Paulus a milluches el kmo: “Moldeu a rengmiu el di blechoel el ngar a Rubak. Ak lmuut el dmu el kmo, moldeu a rengmiu!” (Filipi 4:4) Me a lsoad el mo kmeed el sechelil a Jehovah, e ngkired el melai er a llomeserreng el mla er Ngii. A Tekingel a Dios a kmo: “Ngdmeu a rengul ngike el chad el metik er a llomeserreng, me ngike el chad el nguu a sekutaberreng. Ngkerrekar er a klengar el mo er tirke el nguu, e tirke el urrekodel er ngii a okedongall el dmeu a rengrir.”​—Osisechakl 3:13, 18, NW.

6. Ngera dirrek el kired el meruul me lolemolem el dmeu a rengud?

⁶ Ngkmal klou a ultutelel el kired el melemolem el oltaut er a klengar er kid aike el tekoi el desuub er a Biblia me bo el sebeched el melemolem el dmeu a rengud. A Jesus a millisiich er a klungel a ultutelel tiang er sera ledu el kmo: “Ngdmeu a rengmiu a lsekum ko medengei aika el tekoi e meruul.” (Johanes 13:17, NW; monguiu er a Jakobus 1:25.) Tiang a klou a ultutelel a lsekum ngsoad el lmuut el smisichii a tekoi  er a klereng er kid e bo lolemolem el dmeu a rengud. Engdi ngmekera e mo dmeu a rengud a lsekum ngkmal betok a tekoi el sebechel melemall er tia el deurreng er kid? Me bo dosaod er a ongingil el tekoi el ledilu Jesus el ngar sel Cheldecheduch el Ngar er a Rois.

7. Ngoeak a ngera el rolel e tirke el mekngit a rengrir a mo dmeu a rengrir?

⁷ “Ngdmeu a rengrir tirke el ngar er a klengiterreng, e le te mo mechelaod.” (Mateus 5:4, NW) Kede locha mo melatk el kmo, ‘Ngmekera sebechir tirke el ngar er a klengiterreng el mo dmeu a rengrir?’ A Jesus a dimlak losaod el kirir a rokui el chad el ngar er a klengiterreng. A rebetok el mekngit el chad a ngar er a klengiterreng me a lechub e ngmekngit a rengrir e le te chuarm er a mondai er aika el “uriul sils” el ngii a “blsechel a ringel.” (2 Timothy 3:1, BT) Engdi te di omdasu el di kirir e diak lomdasu el kirel a Jehovah, me ngdiak lomak a kmes el deleuill er tir lobengkel, e dirrek el diak lsebechir el mo dmeu a rengrir. A Jesus a bai millekoi el kirir tirke el kerekikl el kirel a tekoi er a klereng er tir. Ngmekngit a rengrir e le te omes el kmo a rebetok el chad a oltngakl er a Dios me a lechub e te kiei el diak loltirakl a soal a Dios. Te dirrek el medengei el kmo te ngar er a klengit, e omes a betok el mekngit el tekoi el dubechang er tia el beluulechad. Me a Jehovah a medengelterir tirka el mera el ngar er a klengiterreng, e mengelaod er tir lokiu a Tekingel e mesterir a deurreng me a klengar.​—Monguiu er a Esekiel 5:11; 9:4.

8. Ngoeak a ngera el rolel e a delemedemek el reng a ngosukau el mo dmeu a rengum?

⁸ “Ngdmeu a rengrir a remedemedemek a rengrir, e le te mo oudiukes er a beluulechad.” (Mateus 5:5, NW) Ngoeak a ngera el rolel e a delemedemek el reng a ngosukau el mo dmeu a rengum? A rebetok el chad a kmal mekngit a blekerdelir e meringel a tekingir, el ngii a sebechel mo uchul a betok el mondai. Engdi sel lesubii a klemerang, e te ngmodech a blekerdelir e mo oubail er ngike el “beches el chad.” Me chelechang e te olecholt a “reng ra klechubechub, ma blekokuii, ma klengariou, ma delemedemek, ma kllourreng.” (Kolose 3:9-12, BT) Tiaikid a uchul me ngbudech a rengrir, e ngar ngii a ungil deleuill er tir me a rebebil, e dirrek el dmeu a rengrir. Ngdirrek a Tekingel a Dios a tibir el kmo te mo “oudiukes er a beluulechad.”​—Psalm 37:8-10, 29.

9. (a) Ngera mle belkul a tekingel a Jesus er a ledu el kmo a remedemedemek a rengrir a mo “oudiukes er a beluulechad”? (b) Ngmekera e sebechir tirke el “songerenger e meched a rengrir er a llemalt” el mo dmeu a rengrir?

⁹ Ngera mle belkul a tekingel a Jesus er a ledu el kmo a remedemedemek a rengrir a mo “oudiukes er a beluulechad”? A rengellitel a mo oudiukes er tia el chutem sel bo longedereder er ngii el king e prist. (Ocholt 20:6) A rebetok el miliol el chad el diak loba omelatk el mo kiei er a eanged a mo nguu a dikesir er tia el chutem er sel taem el lenguu a kengei el mo kiei er a chelsel el mo cherechar. Te mo cherrungel e dirrek el budech e dmeu a rengrir. Tirkang a rechad el Jesus a milsaod er tir el kmo: “Ngdmeu a rengrir tirke el songerenger e meched a rengrir er a llemalt.” (Mateus 5:6, NW) Me a urungulir el kirel a llemalt a mo motaut er sel taem el Jehovah a mo okngemed a rokui el mekngit. (2 Petrus 3:13) Ngar er a chelsel a beches el beluulechad, e a remelemalt el chad a mo dmeu a rengrir, e diak el lluut el mo mekngit a rengrir el omerellir a remekngit el chad a uchul.​—Psalm 37:17.

10. Ngera belkul a bo dechubechubechad?

¹⁰ “Ngdmeu a rengrir a rechubechubechad, e le ngmo er tir a klechubechub.” (Mateus 5:7, NW) Me a bo dechubechubechad e ngbelkul a kmo ngmo ungil a omerelled e mo  oba delemedemek e mo chubechub, el olechotel a kmo kede chubteterir tirke el chuarm. Me nguaisei, engdi a klechubechub a diak di lungil uldasu e lemerekong. A Biblia a olisechakl el kmo a klechubechub a uldimukl er sel doruul a tekoi el olengeseu er a rebebil.

11. Ngera ngosisecheklid er ngii a okesiu el kirel ngike el ungil chad er a Samaria?

¹¹ Monguiu er a Lukas 10:30-37. A okesiu er a Jesus el kirel ngike el ungil chad er a Samaria a smodii a klebokel el belkul a tekoi el chubechubechad. Ngike el chad er a Samaria a kmal mlo chubur e mekngit a rengul er a chad el chuarm, e tiang a rirellii el mo soal lolengeseu er ngii. Me a uriul er a losaod er tia el okesiu a Jesus e ngdilu el kmo: “Bong e moruul er osisiu el tekoi.” Me ngungil a dolatk el kmo: ‘Ngak, ak meruul a osisiu el tekoi? Ngak, ak meruul a ungil tekoi el ua lurruul ngike el chad er a Samaria? Sel bo el chuarm a rebebil, e ngar ngii a sebechek el remuul el ngosuterir? El ua tiang, ngsebechek lolengeseu er a remechudela er a chelsel a ongdibel, me a remelakl dil me a lechub a rengalek el redemerir me a rederrir a diak losiou er a Jehovah? Ngsebechek el melisiich “rar mechitechut a rengrir” e mengelaod er tir?’​—1 Thesalonika 5:14, BT; Jakobus 1:27.

12. Ngera me ngmo dmeu a rengud sel dolecholt er a klechubechub?

¹² Ngera me ngmo dmeu a rengud sel dolecholt er a klechubechub? Sel dolecholt er a klechubechub el mora rechad, e kede merous, e a Jesus a dilu el kmo ngmo dmeu a rengud sel dorous. A lmuut el ta er a uchul a kmo, kede medengei el kmo kede oldeu er a rengul a Jehovah. (Rellir 20:35; monguiu er a Hebru 13:16.) A King el David a milsaod el kirel a chad el ullecholt er a klechubechub el kmo: “A Jehovah a mo mengkar er ngii e olsobel er a klengar er ngii. Ngmo okedongall el dmeu a rengul er tia el chutem.” (Psalm 41:1, 2, NW) Me a lsekum kede olecholt er a klechubechub el mora rechad, e kede dirrek el mo nguu a klechubechub er a Jehovah, e sebeched el mo dmeu a rengud el mo cherechar.​—Jakobus 2:13.

13, 14. Ngera me ngklou a ultutelel el kirel mo ‘klikiid a rengud’?

¹³ A Jesus a dilu el kmo: “Ngdmeu a rengrir a reklikiid a rengrir, e le te mo mesa Dios.” (Mateus 5:8, NW) Me a bo leklikiid a rengud e ngkired el melemolem el bliochel a uldesued  me a rengud, me a lechub e kede mengikiid er ngii. Tiang a kmal klou a ultutelel a lsekum ngsoad a Jehovah a lekengei er a omengull er kid.​—Monguiu er a 2 Korinth 4:2; 1 Timothy 1:5.

¹⁴ Tirke el klikiid a rengrir a sebechel mo er ngii a ungil deleuill er tir lobengkel a Jehovah el ngii a dilu el kmo: “Ngdmeu a rengrir tirke el mesilek a mekemanget el ikrel a bilir.” (Ocholt 22:14, NW) Me ngera belkul a tekoi el kmo te “mesilek a mekemanget el ikrel a bilir”? Ngbelkul a kmo a Jehovah a omes er a rengellitel el Kristiano el klikiid, e mo mesterir a diak lengemed el klengar er tir el ngar er a eanged, e te dirrek el mo dmeu a rengrir el mo cherechar. E tirke el klou el seked el loba omelatk el mo kiei er tia el chutem a olechotel a kmo a Jehovah a kongei er tir el mo sechelil e le ngomes er tir el melemalt. E a Biblia a kmo “te sililek a bilir er a rsechel a Ngelekel a Sib me ng mlo becheleleu.”​—Ocholt 7:9, 13, 14.

15, 16. Ngoeak a ngera el rolel e a reklikiid a rengrir a mo “mesa Dios”?

¹⁵ A Jehovah a dilu el kmo: “Ng diak a chad el mesa medak e di chad.” (Exodus 33:20) Me ngmekera e sebechir a reklikiid a rengrir el “mesa Dios”? A tekoi er a Grik el moiuid el “mesa” a sebechel belkul a kmo kede melatk, e omtab, me a lechub e kede mo medengei. Me a bo ‘desa Dios’ a belkul a kmo kede mo ungil medengei a blekerdelel e mo betik a rengud er aika el blekerdelel. (Efesus 1:18) A Jesus a mle cherrungel loukerebai a blekerdelel a Dios, a uchul me ngmle sebechel dmu el kmo: “Ngikel mla mesekak a mla mesa Chedam.”​—Johanes 14:7-9.

¹⁶ Me a lmuut el tang, kede mo “mesa Dios” sel bo dechermii a rolel e ngolengeseu er kid er a chelsel a klengar er kid. (Job 42:5) Kede dirrek el mo ‘mes’ me a lechub e kede omtab aike el ungil tekoi el Jehovah a tibir el mo mesterir tirke el melemolem el kiei el klikiid e blak a rengrir el mo er ngii. E tirke el ngellitel a mera el mo mesa Jehovah sel lebekiis er a kodall e lebo er a eanged.​—1 Johanes 3:2.

17. Ngera me tirke el meruul a budech a dmeu a rengrir?

¹⁷ A ongingil, e a Jesus a dilu el kmo: “Ngdmeu a rengrir a remeruul a budech.” (Mateus 5:9, NW) Ngsebechel mo dmeu a rengud sel dolasem el meruul a budech lobengterir a rechad. A disaiplo el Jakobus a milluches el kmo: “Ma re chad er a budech sel lolalem a tane er a budech e te mo meridm er a llemalt.” (Jakobus 3:18) Me a lsekum ngmeringel er kau lobengkel a ta er a chad er a chelsel a ongdibel me a lechub a telungalek er kau, e molengit er a Jehovah me lengesukau el mo meruul a budech. Seikid e a Jehovah a mo meskau a chedaol reng er ngii el mo ngosukau el mo olecholt a blekerdelel a Kristiano, e kau a dirrek el mo dmeu a rengum. A Jesus a millisiich er a klungel a ultutelel a dolasem el meleketek er a budech er a ledu el kmo: “Me sel bochu er olengetongel el mo oldars er a tengetengem el mor a Dios, e a lsekum ke lotkii odam er kau el ngar ngii a mekngit er a rengul el kirem, e ke mechere tengetengem er  medal a olengetongel, e mereched el mo rullii a delongelem kau ma odam er kau, e sola e lmuut kung el mo oldars er a tengetengem el mor a Dios.”​—Mateus 5:23, 24.

18, 19. Ngera me ngsebechir a Rekristiano el dmeu a rengrir alta e te modechelakl?

¹⁸ “Ngdmeu a rengmiu a loltuub er kemiu a rechad el kirek, el oldechelakl er kemiu e lolekoi a bek el blekeradel el mekngit el bedul kemiu el di klsuul.” Ngera mle belkul a tekingel a Jesus? Ngdirrek el dilu el kmo: “Moldeu, e lodeu a rengmiu, e ngklou el omeksaul el bo mnguu er a eanged, a reprofet el di mla chad er kemiu a dirrek el mlodechelakl.” (Mateus 5:11, 12, NW) Me sel taem er a lemodechelakl a rechapostol e lemuchelechel el mo diak lomerk, e te ‘tilobed er a blil Olbiil’ el “kmal mle dmeu a rengrir.” Ngdiak lebelkul a kmo ngmle dmeu a rengrir el modechelakl, e ngbai mle dmeu a rengrir “ele te miltik er tir el redemelel a mo chuarm er otuub el kirel a Jesus.”​—Rellir 5:41.

¹⁹ Chelecha el taem, e a rechedal a Jehovah a dirrek el outekangel el okiu a deurreng sel lemodechelakl el ngklel a Jesus a uchul. (Monguiu er a Jakobus 1:2-4.) Me kid a di ua tirke el apostol el diak lsoad el chuarm me a lechub e demodechelakl. Engdi a dolemolem el blak a rengud el mora Jehovah, e ngmo meskid a blekeu el dousbech er ngii el mo outekangel. Ka molatk er a Henryk Dornik me a ta er ngii. Ngar er a rak er a August 1944, e te mlodurokl el mora ta el concentration camp. Tirke el chad el ulemekcharm er tir a dilu el kmo: “Ngkmal diak a rolel e derelleterir el mo kongei el meruul a ngii di el tekoi. A odechelakl el mo er tir a bai di mo uchul a deurreng er tir.” A Henryk a milsaod el kmo: “Alta ngdimlak el soak el modechelakl el kirel a klaumerang er ngak, engdi sel bok chuarm er a ringel loba blekeu me a dmolech el omengull el kirel a blakerreng er ngak el mora Jehovah e ngmera el meskak a deurreng.” Ngdirrek el dilu el kmo: “Sel kblechoel meluluuch e ngrullak el mo kmeed er a Jehovah, e ngii a ochotii er ngak el kmo ngkot lungil el Ngelsuik.”

20. Ngera me ngdmeu a rengud el mesiou er a “dmeu a rengul el Dios”?

²⁰ Sel taem el Jehovah el ngii a “dmeu a rengul el Dios” a mo dmeu a rengul el kired, e ngsebechel el mo dmeu a rengud el mo lmuut er a taem el demodechelakl, me a lechub a telungalek er kid a mo omtok er kid, me a lechub e kede mo smecher me a lechub e kede mo chuodel. (1 Timothy 1:11, NW) Ngdirrek el sebechel mo dmeu a rengud e le Dios er kid “el diak lomulak,” a mla tibir el mo meskid a betok el ungil tekoi. (Titus 1:2) Me sel lotaut a telbilel a Jehovah, e kede mo obes aika el mondai el dechelebangel er chelechang. A mera er ngii, ngdiak el sebeched el mo ungil mtebengii a klebokel el klengar er a chelsel a Baradis me sel klungel a deurreng el bo dechermii er sel taem! Nguaisei, ngmo ‘ungilbesud el kiei el ngar a beluu el ungil a rengud er a cherrungel budech.’​—Psalm 37:11.