KE MO mekerang a lsekum ngsoam el mo medengei el kmo ngtela el klok? Ke locha mo omes er a klok e mesa el kmo ngta el sikang me a okedei el bung el mla imiit er a sueleb. Me ngera ke mo dmung a lsekum a sechelim a oker er kau el kmo, “Ngtela el klok?”

Tia di mo ultuil er a basio el mkiei er ngii. El ua tiang, ke locha mo dmu el kmo, “Ngmla mo 1:30” me a lechub e “Ngmla mo 13:30.” Ngar er a bebil el basio e ke locha mo dmu el kmo, “Ngtedobech er a eru el klok,” el belkul a kmo okedei el bung er a uchei er a eru el klok.

Te milekera rechad er a taem er a Biblia e mo medengei el kmo ngtela el klok? Tirka dirrek el mle betok a rolel a losaod a taem. Aike el Bades el tekoi er a Hebru a ousbech a tekoi el ua tutau me a “sueleb” me a “kebesengei.” (Genesis 8:11; 19:27; 43:16; 1 King 18:26) Engdi lebebil er a taem e a Biblia a ousbech a ulterekokl el tekoi.

Ngar er a Israel er a irechar, e ngmle blechoel el ngar ngii a remengkar el ileakl sel leklebesei. A rechad er a Israel a milingii a klebesei el mo edei el bliongel el omekedong el kmo ngtaem er a omengkar. El ua tiang, ngar er a Mengeteklel 7:19, e kede menguiu el kirel a ta er a temel a omengkar el “sueleb er a klebesei.” Me sel taem er a lemechell a Jesus, e a rechad er a Judea a milingii a klebesei el mo eua el temel a omengkar el ua lurruul a rechad er a Grik me a Rom.

Ngar er aike el Ebangkelio e ngmesaod aika el temel a omengkar el betok el taem. El ua tiang, “ngar er a delongelel edei ma elolem el klok er a mochu tutau,” e a Jesus a mirrael er a bebul a daob el mora bos el lebla er ngii a redisaiplo er ngii. (Mateus 14:25) E a Jesus a dirrek el milengedecheduch el ousbech a okesiu el kmo: “Bo modengelii a ta er a tekoi el kmo, a rubak er a blai a lodengei el kmo a merechorech a mei er a oingera el taem e ngdi mekar e diak lebecherei me bo el siseb er a blil.”​—Mateus 24:43, NW.

A Jesus a milsaod aika el eua el temel a omengkar er a louchais el mora redisaiplo er ngii el mo klekar e le ngdiak a ‘medengelii el kmo a rubak ra blai ngmei er choingerang, ngkebesengei, ngmetuda klebesei, ngmerresnga malk, ngobnge llomes.’ (Markus 13:35, BT) A kot el temel a omengkar a ‘kebesengei,’ el omuchel er a ngeltel a sils el mora bekord el etiu el klok er a klebesei. E a ongeru el temel a ‘metuda klebesei’ el omuchel er a bekord el etiu el klok er a klebesei el mo sueleb er a klebesei. E a ongedei el temel a ‘merresnga malk’ el omuchel er a sueleb er a klebesei el mora bekord el edei el klok er a tutau. Tia locha sel taem el lorros a malk er sel kesus el Jesus a mludechem. (Markus 14:72) E a ongeua el temel a sel ‘lobnge llomes’ el omuchel er a bekord el edei el klok er a tutau el mo ngmasech a sils.

Me alta rechad er seikid el taem a dimlak a klok er tir el uaika el dolab er chelechang engdi ngmla er ngii a rolel a losaod a taem.