1-2. Ngmekera Olisechakl 11:6, NW e mesaod el kirel a berkel a ungil chais er a Renged?

NGAR er a bebil er a beluu, e a rechad a kmal semeriar sel lerengesii a ungil chais. Ngtekoi el kmal meketeketang el longiil er ngii! E ngar er a kuk bebil er a beluu e ngdiak a kmal klemeriarreng el kirel a Dios me a Biblia. E a rechad er a beluu el mkiei er ngii? Me ngar er a chelsel a ngii di el blekeradel, e a Jehovah a soal a dolemolem el omerk el mo er sel taem el ledu el kmo ngmla mo merek a ureor.

² A Jehovah a mla oterekeklii a taem el ureor er a berkel a klumech a mo merek e “ng mochu er ngii a ulebongel er a beluulchad.” (Mt. 24:14, 36) Me chelecha el dongiil, e ngmekera dolengesenges er a tekoi el kmo, “molemolem el oureor”? *​—Monguiu er a Olisechakl 11:6, NW. *

3. Ngera kede mo mesaod er tia el suobel?

³ Sel mlo merek el suobel a milsaod a eua el tekoi el kired el meruul me bo dungil el “mengesokes er a re chad.” (Mt. 4:19) Tia el suobel a mo mesaod a edei el rolel e kede smisichii a rengud el di melemolem el omerk alta kede mo chelebangel a ringel. Kede mo suubii a uchul me ngklou a ultutelel a (1) dolemolem el lultaut a osenged (2) doba kllourreng, e (3) dolemolem el melisiich a klaumerang er kid.

4. Ngera me ngkirel ultaut a osenged er a ureor el Jehovah mla meskid?

⁴ A Jesus a ulemlaoch a blekeradel el mo olengchelel a uriul sils el sebechel el osengketerir a rultirakl er ngii me ngdiak el  rekir a ureor er a berkel a klumech. Me ngdilu er a redisaiplo er ngii ‘me di longkar.’ (Mt. 24:42) Chelecha el taem e kede chelebangel a osisiu el tekoi el milengesang er a rechad er a taem er a Noah me te dimlak lomtab a uleklatk el luluuchais. (Mt. 24:37-39; 2 Pe. 2:5) Sei a uchul me ngsoad el mo ultaut a osenged er a ureor el Jehovah mla meskid.

5. Ngmekera Rellir 1:6-8 e mesaod er a klungel a ureor er a berkel a klumech?

⁵ Ngkmal kirel ultaut a osenged er a ureor er a berkel a klumech er a Renged er chelecha el taem. A Jesus a ulemlaoch el kmo a uriul er a kodellel e tia el ureor a mo oberk e melemolem el kemanget el taem. (Jn. 14:12) Sera lemad, e a rebebil er a redisaiplo er ngii a liluut el mo chad er a omenged. Me a uriul er a okisel, e ngulekiu a mengasireng el rolel e mesterir a betok el chelderir. Nguluusbech er tia el taem el omeketakl er ngii el kmo a ngerechelir el mengesokes er a rechad a kot el klou a ultutelel el tekoi el kirir el meruul er ngii. (Jn. 21:15-17) Me a uchei er a lebo er a eanged e ngdilu er tir el kmo a ureor el lebiluchelii a mo oberk el mora ike el beluu el ngar er a ikrel a Israel. (Monguiu er a Rellir 1:6-8.) A betok el rak er a uriul, e ngmilsa apostol Johanes a ues el olecholt a mo duubech er a “sils er a Rubak.” * Me a ta er a mengasireng el ues el lilsang: A anghel el oba “diak a ulebengelel klumech er a Ungil Chais” el ouchais er ngii el mora “bek el bedengir a re chad, ma kebliil, ma omelekoi, ma beluu.” (Och. 1:10; 14:6) Me ngbleketakl el kmo, ngmoktek er a Jehovah el bo deteloi er tia el ureor er a berkel a klumech el mo er sel taem el bo el merek.

6. Ngmekera dolemolem el ultaut a osenged er a ureor er a berkel a klumech?

⁶ Ngsebeched el melemolem el ultaut a osenged er a ureor er a berkel a klumech a lsekum kede omtab aike el rokui el loruul a Jehovah el  olengeseu er kid. El ua tiang, ngomeskid a kmal betok el kall er a klereng lokiu a babier el mla motobed, audio me a video recordings, me a broadcast el ngar er a Internet. Ka molatk er tiang: A website er kid a mesaod a tekoi el ngar er a kuk betok er a 1,000 el omelekoi! (Mt. 24:45-47) Malta beluulechad er chelechang a blii el balatiks, klechelid, me a tekoi er a keizai a uchul, engdi a rebetok er a eai el miliol el mesiungel a Dios er a beluulechad el rokir a oba kltarreng. El ua tiang, sera Friday, el April 19, 2019, e a Resioning el meliuekl er a beluulechad a mlo dmak e mesaod er a bades er sel sils. E seikid el kesus e a re 20,919,041 el chad a mlo dmak el mengedaol er a Chedaol Belsoil er a kodellel a Jesus. Me sel dolatk er a ileakl el techall el dobang el sebeched el mesa e mo teloi er tia el mengasireng el tekoi, e ngkmal mo soad el di ultaut a osenged er a berkel a klumech.

7. Ngmekera kerebil a Jesus e ngosukid el melemolem el ultaut a osenged?

⁷ A lmuut el ta er a rolel e ngsebeched el melemolem el ultaut a osenged er a berkel a klumech a okiu sel doltirakl er a kerebil a Jesus. Ngdimlak el bechei a ngii di el ngerang me longesang er ngii el ouchais a klemerang. (Jn. 18:37) Ngdimlak lemekesuseu er sel taem el Satan a mle soal lomsa “rokui el rengedel a beluulchad ma bek el klebkellel,” e dimlak lemechetikaik er sel taem el rebebil a mle sorir el meruul er ngii el mo king. (Mt. 4:8, 9; Jn. 6:15) Ngdimlak lemesim er a ngibes er a ilteet e dimlak bo lemechitechut a rengul er a mesisiich el ultok. (Lk. 9:58; Jn. 8:59) Me sel bo dechelebangel a omeasem er a klaumerang er kid, e ngsebeched el melemolem el ultaut a osenged sel dolatk er a omellach er a apostol Paulus. Ngmilengelechel er a Rekristiano el mo oltirakl er a kerebil a Jesus me ‘lak bo le mechitechut e le kekere rengrir’!​—Heb. 12:3, BT.

8. Ngera kllourreng, e ngera uchul me kede kmal lousbech er ngii er chelechang?

⁸ A kllourreng a sel duch er kid el sebeched el chelellakl el mengiil er a tekoi el mengodech. Me kede ousbech er a kllourreng el mengiil er a ulebengelel a mekngit el blekeradel me a lechub e ngotutel a tekoi el doureng er ngii. A profet Habakuk a uluureng er a ulebengelel a mekngit el bekeu el omeruul er a Juda. (Hab. 1:2) A redisaiplo er a Jesus a uluureng okmo Renged a “di kmedul mei” e mesterir a ilmokl er a ultok er a Rom. (Lk. 19:11) Kid me kede oureng er sel sils el Rengedel a Dios a mo okngemed a chelebirukel e kutmeklii a beches e melemalt el beluulechad. (2 Pe. 3:13) Me nguaisei, engdi ngkired el oba kllourreng el mengiil er a telutk el temel a Jehovah. Ka molebedebek a bebil rolel e a Jehovah a olisechakl er kid el mo oba kllourreng.

9. Ngera bebil er a olechotel a kllourreng er a Jehovah?

⁹ A Jehovah a kot el ungil kerebai er a kllourreng. Ngmilsa Noah a taem el mo meleketek er a arhe e “omerk ra llemalt.” (2 Pe. 2:5, BT; 1 Pe. 3:20) Ngulerrenges er a Abraham er a di loker er ngii el kirel a telbilel el mo olekngemed er a rechad er a mekngit el mats er a Sodom me a Gomora. (Gen. 18:20-33) A Jehovah a dirrek el kmal ullecholt er a kllourreng el bedul a renged er a Israel el dimlak loba blakerreng el mo er ngii. (Neh. 9:30, 31) Kede mesa olechotel a kllourreng er Ngii er chelecha el taem sel lebesterir tirke el mukrael el mo er ngii, a taem el mo “obult el mo imikr a kngterir.” (2 Pe. 3:9; Jn. 6:44; 1 Ti. 2:3, 4) Me a kerebil a Jehovah a meskid a ungil uchul e ngkired el oba kllourreng sel dolemolem el omerk e dolisechakl. A Jehovah a dirrek el osisecheklid el kirel a kllourreng loeak a okesiu el ngar er a Tekingel.

10. A doltirakl er a Jakobus 5:7, 8, e ngera uchul me ngutebengall a kerebil a chad er a sers?

 ¹⁰ Monguiu er a Jakobus 5:7, 8. A kerebil a chad er a sers el lomekeroul a dellomel a osisecheklid el moba kllourreng. A bebil er a dellomel a di mereched el duubech. Me nguaisei, engdi oumesingd el dellomel, tokubets aike el ngar ngii a redechel, a ousbech er a kemanget el taem el mukeroul. A temir a rechad er a Israel el omekeroul a dellomel a mle bekord el elolem el buil. Me a chad er a sers a millalem a tane er a uriul er sel oeak uchei el blsechel a chull, el mlara melengel a October, e mlo meridm er a uriul er a oeak uriul el blsechel a chull, el mlara melengel a April. (Mk. 4:28) Me ngllomeserreng a doukerebai er a kllourreng er a chad er a sers. Me nguaisei, engdi tia diak lebeot el tekoi.

11. Ngmekera kllourreng e ngosukid er a omesiunged?

¹¹ A rediak lemecherrungel el chad a blechoel el sorir el mereched el mes a rsel a urerir. Engdi a lsoad a bo lungil a dbechel a dellemeled e ngkired el mengoit a taem el mengedmokl a sersed el mengiis, melalem, melaml, e dirrek el melubs. A omeruul el disaiplo me ngdi osisiu. Kede ousbech a taem el olengeseu er tirke el dolisechakl er tir el mo diak longetukel er a rechad e mo oubltikerreng. A kllourreng a mo ngosukid me ngdiak bo lemechitechut a rengud sel lak lorrenges er kid a rechad. Engdi lsekum a rebebil a kongei el orrenges, e ngdirk kired el mo oba kllourreng. Ngdiak el sebeched el oremelii a chad el mesuub el mo oumerang. A redisaiplo er a Jesus a mla er ngii a taem e te mle meoud el mo omtab a belkul a osisecheklel. (Jn. 14:9) Me lak dobes el kmo alta kede melalem e melubs, engdi a Dios a ngike el omekeroul.​—1 Ko. 3:6.

12. Ngmekera doba kllourreng sel domerk el mora rechedad el diak el Sioning?

¹² Ngsebechel mo meringel er kid el moba kllourreng sel domerk el mora rechedad el diak el Sioning. A omellach el ngar er a Olisechakl 3:7 a sebechel ngosukid. Ngkmo: Ngar  ngii a “belsechel el di deluk ma belsechel el dongedecheduch.” Me ngsebeched el di lmuk e a ungil blekerdeled a mo ochoted, me nguaisei engdi kede kerekikl a bek el techall el mo ouchais er a klemerang. (1 Pe. 3:1, 2) Me kede olecholt er a kllourreng el mora rokui el chad, el uldimukl er a telungalek er kid, sel domerk e dolisechakl el oba blakerreng.

13-14. Ngera bebil er a kerebai er a kllourreng el sebeched el oltirakl?

¹³ Ngsebeched el mesuub el kirel a kllourreng er a kerebai er a reblak a rengrir el chad er a Biblia me chelecha el taem. A Habakuk a uluureng er a ulebengelel a chelebirukel, engdi ngmle ulterekokl a rengul el melekoi el kmo: “Ak mo ngmasech er sel tebekebok er ngak er omengkar, e mengiil.” (Hab. 2:1) A apostol Paulus a mle soal “rokir” a omesiungel. Engdi nguleba kllourreng el mo “churrengelii a . . . berekel a Ebangkelio.”​—Rel. 20:24.

¹⁴ Ka molatk er a kerebai er a ta el obekel el tilobed er a Skuul er a Gilead e mlukngerachel el mo mesiou er a beluu el di mekesai a Resioning er ngii, el ruumesingd er a rechad er ngii a diak el Kristiano. Te di mle mekesai el chad a sorir el mesuub a Biblia. Tirke el ledilak el ngar er a Skuul er a Gilead el milsiou er a bebil el beluu a uluuchais er tir el kirir tirke el kmal ungil mesuub a Biblia lobengterir. Me nguaisei, engdi tirka el obekel a di millemolem el oba kllourreng lomerk er a klumech alta ruumesingd el chad er a territory a dimlak lorrenges. Me a eai el rak er a uriul, e ngmlo dmeu a rengrir el mesa ta er a mesuub a Biblia lobengterir el metecholb. Ngera ngosisecheklid aika el kerebai er a irechar me chelecha el taem? Tirka el blak a rengrir el chad a dimlak bo lemesaik a rengrir e bo lak lolemolem el oureor, me a Jehovah ulemekngeltengat er tir el kirel a kllourreng el lulechotii. Me bo ‘doltirakl a blekerdelir tirkei el di uluumerang e uleba kllourreng me te mlo ngma dikesir er a telbilel a Dios.’​—Heb. 6:10-12.

15. Ngera ta er a rolel e a klaumerang a smisichii a rengud el mo omerk?

¹⁵ Kede oumerang er a klumech el domerk er ngii, me kede semeriar el ouchais er ngii el mora rechad. E oumerang a telbiil el debetik er a Tekingel a Dios. (Psa. 119:42; Isa. 40:8) Kede mla mes a otutel a ulaoch er a Biblia er a taem er kid. E mla meseterir a rechad el mo ungil a klengar er tir e le te oltaut a omellach er a Biblia. Aikang a rullid el lmuut el mo oumerang el kmo, a ungil chais er a Renged a kirir a rokui el chad el mo rongesii.

16. A doltirakl er a Psalm 46:1-3, e ngmekera klaumerang er kid er a Jehovah me a Jesus e smisichii a rengud el mo omerk?

¹⁶ Kede dirrek el oumerang er a Jehovah, el Ngike el Uchul tia el klumech el domerk er ngii, me a Jesus, el ngike el bla lebsa klisiich el mo mengedereder el King er a Rengedel. (Jn. 14:1) Me a ngii di el blekeradel el bo dechelebangel, e a Jehovah a mo omderungel er kid e klisiched. (Monguiu er a Psalm 46:1-3.) Ngdirrek el ulterekokl a rengud el kmo a Jesus a ngar er a eanged e omekrael er a ureor er a berkel a klumech lousbech er a klisiich me a dereder el bla lebsang a Jehovah.​—Mt. 28:18-20.

17. Mosaod er a ta el olechotel e ngkired el melemolem el omerk er a klumech.

¹⁷ A klaumerang a rullid el kmal mo ulterekokl a rengud el kmo a Jehovah a mo omekngeltengat er kid, e a lebebil er a taem e ngngar er a rolel el dimlak dolatk er ngii. (Oli. 11:6) El ua tiang, bek el sils e te betok el telael el chad a me engelakl a tebeled me a cart er kid. A chouaitia el rolel a berkel a klumech ngoureor? Ngkmal uaisei! A Omesiunged el Kirel a  Renged er a November 2014 a mesaod el kirel a ta el ngalek er a university el mle soal meluches er a essay el kirir a Resioning er a Jehovah. Ngdimlak el sebechel el metik er a Blil a Ongdibel, engdi ngmiltik er a ta er a tebeled el ngar er a campus er a skuul, e miltik a babier el sebechel lousbech. Cherengel a taem, e ngmlo metecholb e chelechang e ngmesiou el regular pioneer. A chouaika el experience a smisichid el mo melemolem el omerk e le ngochotii el kmo, te dirk ngar ngii a rechad el losiik er a klumech er a Renged.

18. Ngera me ngulterekokl a rengud el kmo a ureor er a berkel a klumech er a Renged a mo merek el oltirakl er sel temel a Jehovah?

¹⁸ Ngsebechel mo ulterekokl a rengud el kmo a ureor er a berkel a klumech er a Renged a mo merek er sel telutk el temel. Ka molatk er a tekoi el dilubech er a taem er a Noah. A Jehovah a mle medengelii a ungil taem. A bekord el 120 el rak er a uchei, e a Jehovah a ulterekeklii a taem el lebo er ngii a Ieleb. E a betok el rak er a uriul, e ngdilu er a Noah el mo meleketek er a arhe. Me a Noah a locha mle 40 me a lechub e ng 50 el rak el lolemolem el meringel el oureor. Me alta rechad a dimlak lorrenges er ngii, engdi ngdi millemolem el omerk er tia el luleklatk el mo er sel taem er a ledu Jehovah el kmo ngmla mo kirel lolsiseb a charm er a arhe. Me a “Dios a chilsmerii a chesimer” el oltirakl er a taem el letiltkii.​—Gen. 6:3; 7:1, 2, 16.

19. Ngera sebeched el omes el beduluchei el kirel a lsekum kede di melemolem el oureor?

¹⁹ Ngdi kmedung e a Jehovah a mo rokir tia el lureor er a berkel a klumech er a Renged, ngmo ‘chosmerii a chesimer’ er tia el beluulechad er a Satan, e kutmeklii a beches el beluulechad el mui er a llemalt. Me chelecha el dongiil er sel taem, e bo doukerebai er a Noah, Habakuk, me a rebebil el tir a di millemolem el loureor. Bo dolemolem lultaut osenged, e doba kllourreng, e dolemolem el melisiich er a klaumerang er kid er a Jehovah me a telbilel.