1. Ngera ungil turrekong el sebeched el meruul er ngii sel bo demechudelang?

SEL dorael el mo mechudelang e kede locha mo bekikl el kmo ngmo el mo diak dusbechall er a Jehovah el uai sera dekekerei el chad. Me alta nglocha mera el dikea demesisiich el ua ngar er a mong, engdi ngdirk sebeched el lousbech a klemedengei me a experience er kid el olengeseu er a remekekerei me bo el sebechir el meruul a betok er a cheldebechelel a Jehovah. Ngdi ua lolekoi a ta el odam el meketeketa er a losiou el mechuodel, “Sera bo lak el sebechek el meruul a betok el ua ngar er a mong e le ngak el chudelang, e ngmle dmeu a renguk le te mla er ngii a remekekerei el odam el mle sebechir el mo meruul aika el ureor.”

2. Ngera kede mo mesaod er tia el suobel?

² A uleak uchei el suobel a milsaod a klungiaol el bo lengai a remekekerei sel lolekeed er tir er a remeklou. Ngar tia el suobel e kede mo mesa el kmo ngmekera blekeradel el ua klengariourreng, tabesul el uldasu, omereng el saul, me a blekeruraurreng e ngosuterir a remechudelang el mo oureor lobengterir a remekekerei, el ngii a mo uchul a klengeltengat el mora ongdibel el rokir.

3. A doltirakl er a Filipi 2:3, 4, e ngngera klengariourreng? E mekera tia el blekeradel e ngosuir a Kristiano?

³ A remeklou a kirir el moba klengariourreng a lsekum e ngsorir el olengeseu er a remekekerei. A ngariou a rengul el chad a omes er a rebebil el kmo te kuk ungil er ngii. (Monguiu er a Filipi 2:3, 4.) A remeklou el tir a ngariou a rengrir a mtebengii el kmo ngbetok a rolel e ngsebeched el kutmeklii a ngerachel el oltirakl er a Bades. Me ngdiak longerechir er a rechad el mo meruul a tekoi el ua lurruul er a ngar er a mong. (Oli. 7:10) Malta ngkmal betok a ungil experience er tir el sebechel  ngosuir a telecheroll er chelecha el taem, engdi te mtebengii el kmo a “blekeradel er tia el beluulechad a mengedengodech” me ngkirir el mesuub a beches el rolel a doruul a tekoi.​—1 Ko. 7:31, NW.

4. Te mekera re circuit overseer e olecholt er a osisiu el uldasu el lullebang a re Levait er a irechar?

⁴ A rengariou a rengrir el meklou el chad a mtebengii el kmo sel lorael el mo chuodel e ngmo diak el sebechir el meruul a betok el ua ngar er a mong. Ka molatk er a re circuit overseer. Sel bo lokeuid a rekrir e ngmengodech a assignment er tir. Tia sebechel mo omelsemai el mo er tir, e le te locha kmal mengreos er tia el techall el mesiou er a rudam er tir. Ngkmal sorir tia el assignment er tir e kmal dirk sorir el meruul er ngii. Me nguaisei engdi te mtebengii el kmo, ngungil loruul er tia el ureor a remekekerei. Te oba osisiu el uldasu el luleba rechad er a Levait er a irechar, el tir a mlo merek er a ngerechelir er a chedaol tento sel bo lokeim a rekrir. A deurreng er tirka el mechudelang el Levait a dimlak lultuil er a ngerachel el lullab. Tirka mle blak a rengrir el meruul aike el sebechir e dirrek el ullengeseu er a remekekerei el kutmokl a ngerechelir. (Ule. 8:25, 26) Alta te mla mo diak losiou a betok el ongdibel tirka el mle circuit overeer engdi te mera el klengeltengat el mo er a ongdibel el losiou er ngii er chelechang.

5. Ngera ke suub er a kerebil a Dan me a Katie?

⁵ Molatk er a kerebil a Dan el ngii a milsiou el circuit overseer el 23 el rak. Sera bo le 70 a rekil, e ngii me a bechil er a Katie a milengodech a  assignment er tir el mo special pioneer. Ngua ngera uldesuir el kirel tia el beches el assignment er tir? A Dan a kmo, ngmera el mechesang er chelechang! Ngmeruul a ngerechelel er a ongdibel, olengeseu er a rudam el mo ta er a remesiou er a ongdibel, e train er a rebebil el mo omerk er a klumech er a chelsel a city me a dirrek el blil a kelebus. Kemiu el mechudelang a omngar er a mui el taem me a lak, me kemiu a kmal betok a sebechiu el meruul lolengeseu er a rebebil. Oeak a ngera el rolel? Msubii el mo dmeu a rengmiu er a klengar er kemiu er chelechang, moruul a beches el turrekong, e bo el ulturk a osengiu er aike el sebechemiu el meruul e lak molatk aike el diak el sebechiu el meruul.

6. Ngera uchul me ngolechotel a llomeserreng a bo letabesul a uldesued? Momekesiu.

⁶ A chad el loba tabesul el uldasu a medengei a tekoi el sebechel otekau. (Osi. 11:2, NW) Ngii el tabesul a uldesuel a uchul e ngdiak bo loruul a tekoi el engelakl er aike el sebechel el remuul. Seikid a uchul e ngmelemolem el dmeu a rengul e meringel el oureor. Ngsebeched lomekesiu er a chad el tabesul a uldesuel el mora chad el omekall el lolengasech er a ngesachel. Ngika el chad a kirel change er a kia el mora low me bo lsebechel melemolem lomekall lolengasech. Me alta nglocha mo soro a mlai me nguaisei engdi ngdirk melemolem el merael el beduluchei. Ngdi osisiu, a chad el tabesul a uldesuel a medengelii sel taem el kirel “change er a kia er ngii el mora low” me bo lsebechel melemolem el mesiou er a Jehovah e olengeseu er a rebebil.​—Fil. 4:5.

7. Ngmilekera Barsilai e olecholt er a tabesul el uldasu?

⁷ Molatk er a Barsilai el ngii a mle okai a rekil er a lolengit er ngii a King David el mo chedal a ngarbab el kort er ngii. Ngika mle tabesul a uldesuel me ngmle kotouar er a ongtil a king. A Barsilai a mle medengei el kmo ngdiak el sebechel remuul a betok e le ngkmal chudelang me ngullengit me a kekerei el chad el Kimham me lebong lomtechei er ngii. (2 Sa. 19:35-37) A remechudelang lodam a di ua Barsilai el kmal dmeu a rengrir el mechititerir a remekekerei me te ngmai a techall er a omesiou.

8. Ngmilekera David e ochotii a tabesul el uldasu el kirel a okedecherul a templo?

⁸ King David me ngdirrek el kiltmeklii a ungil kerebai er a chad el olecholt er a tabesul el uldasu. Ngika kmal mle soal lomekedechor er a blil a Jehovah. Engdi a Jehovah er a lsbedii el kmo ngngelekel er a Salomon el diak el ngii a mo omekedechor er a blil, e a David a ultireklii a tekingel a Jehovah e mirruul aike el sebechel el mengetmokl el kirel a okedecherul a templo. (1 Kr. 17:4; 22:5) A David a dimlak bo lomdasu el kmo ngsebechel lungil kutmeklii tia el ngerachel er a Salomon el ngii a “ngeasek, e diak a klaodengei er ngii.” (1 Kr. 29:1) Ngika mle medengei el kmo okedecherul a templo a ultuil er a klengeltengat er a Jehovah el diak el rekil me a lechub e ngklemedengei er ngike el omekrael er a ureor. A remechudelang er chelecha el taem a oukerebai er a David el alta ngmla mengodech a ngerechelir, engdi te kmal dirk blak a rengrir er a omesiungir. Te dirrek el medengei el kmo a Jehovah mo omekngeltengat er a remekekerei el tir a meruul aike el ureor el lurruul.

9. Ngmilekera chedal a Branch Committee e ochotii a tabesul el uldasu?

⁹ A odam el Shigeo a ungil kerebai er a chad el oba tabesul el uldasu. Sera 1976 er a le 30 a rekil e ngmiltutk el mo ta er a chedal a Branch Committee. Sera 2004 e ngmlo tebechelel a Branch Committee. A uriul e ngmlo mtebengii el kmo ngmla mo diak el mesisiich el ua ngar  er a mong me ngousbech er a kemanget el taem el meruul a ngerechelel. Ngmilluluuch el kirel e millatk er a uchul me ngungil a kekerei el odam a bo lenguu tia el ngerachel. Me alta Shigeo a mla mo diak le tebechelel a Branch Committee engdi ngdirk blak a rengul el chedal tia el committee. Me ngua desa er a kerebil a Barsilai, King David, me a Shigeo, a chad el ngariou a rengul e oba tabesul el uldasu a diak lomdasu el kmo a remekekerei el odam a kmal betok a dirk kirir el mesuub. Te bai omes a duch er tir. Ngdiak longaiuechit er tir, te bai omes er tir el kldemir er a ureor.​—Osi. 20:29.

10. Ngera el uldasu a loba remechudelang el kirir a remekekerei er a ongdibel?

¹⁰ A remechudelang a omes er a remekekerei el sengk el mlara Jehovah e kmal oba omereng el saul el kirir. Chelecha el dikea lemesisiich el ua ngar er a mong e te kmal oba omereng el saul el kirir tirke el mesisiich a bedengir el sebechir e dirrek el kongei el meruul a ureor e mesiou er a ongdibel.

11. Ngmekera Ruth 4:13-16 e ochotii el kmo ngmo uchul a klungiolir a remechudelang sel lekengei a ngelsuir a remekekerei?

¹¹ A Naomi a kmal ungil kerebai er a Biblia el kirel a chudelang el chad el oba omereng el saul el kirel a ngelsuil a kekerei er ngii. A kot e a Naomi a dilu er a buchelsechelengel er a Ruth me lluut el mora rechedal. Me nguaisei engdi Ruth er a di le soal lobengkel el mora Bethlehem e a Naomi a mle dmeu a rengul el kongei er a ngelsuil. (Rut. 1:7, 8, 18) Tia mlo uchul a klengeltengat el kirir el terung! (Monguiu er a Ruth 4:13-16.) A klengariourreng a ngosuterir a remeklou el mo oukerebai e a Naomi.

12. Ngmilekera apostol Paulus e ochotii a omereng el saul er ngii?

¹² A apostol Paulus a kmal uleba omereng el  saul el kirel a ngeso el lengilai er a rudam er ngii. El ua tiang, ngmirreng a sulir a rudam me a rudos er ngii er a Filipi er a ngelsurir. (Fil. 4:16) Ngdirrek el ulechotii a omereng el saul er ngii el kirel a Timothy. (Fil. 2:19-22) E mirreng a sulel a Dios el kirir tirke el mlo melisiich er ngii er a lengar er a omerollel el mora Rom el kelebus. (Rel. 28:15) A Paulus a mle mesisiich a bedengel el mirrael a kemanget el omerael el omerk er a klumech e melisiich a ongdibel. Me nguaisei, engdi ngmle ngariou a rengul el kongei a ngelsurir a rudam me a rudos er ngii.

13. Te mekera remeklou e ochotii a omereng el saul er tir el kirir a remekekerei?

¹³ Kemiu el meklou a sebechiu el ochotii a omereng el saul er kemiu er a remekekerei er a ongdibel el ngar er a betok el rolel. A lsekum e ngsorir lolengeseu er kemiu er a rolel a olidiuul, shopping, me a lechub e ngkuk bebil er a tekoi el mousbech e bo moba omereng el saul e mkengei a ngelsurir. Momes a ngelsurir el lolechotel a bltkil a rengul a Jehovah el leko er kemiu. Nglocha mo mechas a rengum er a beches el klausechelei el bom uak lobengterir. Bo blechoel lolengeseu er a rechad er a ongdibel el lmuut el mo kmeed er a Jehovah e mouchais er tir el kmo ngmera el dmeu a rengmiu el meseterir a remekekerei el menglou a omesiungir el olengeseu er a ongdibel. E mongoit a taem el louchais er tir a experience er kemiu. Sel moruul el uaisei e ko mochotii er a Jehovah a ‘omereng el saul’ er kemiu el kirir a remekekerei el ngii a ulemekrael er tir el mei er a ongdibel.​—Kol. 3:15, BT; Jn. 6:44; 1 Th. 5:18.

14. Ngmilekera King David e ochotii a blekeruraurreng?

¹⁴ Kede mesa er a kerebil a King David a ta er a tekoi el kirir a remechudelang el olecholt er ngii. Ngkirir lolecholt er a blekeruraurreng. A David a tilenget a betok er a iltetel el kirel a okedecherul a templo. (1 Kr. 22:11-16; 29:3, 4) Ngika mirruul er tiang alta ngmle medengei el kmo a chetengakl el kirel a okedecherul a templo a mora ngelekel er a Salomon. Me sel bo lak a klisichel a bedenged lolengeseu a ureor el omekedechor, e ngdirk sebeched lolengeseu loeak a tengetenged. E sebeched lolengeseu er a remekekerei el ngmai a klungiolir er a experience er kid el mirruul er tia el ureor el betok el rak.

15. A Paulus ngmilsa Timothy a ngera el mekreos el tekoi?

¹⁵ Molatk er a kerebil a apostol Paulus el kirel a blekeruraurreng. Ngika ngiluu a Timothy el mo teloi er ngii er a le missionari e ulechotii a blekeruraurreng el mo er ngii. Ngulsisecheklii er a rolel a lomerk e lolisechakl. (Rel. 16:1-3) A training el Paulus a milsa Timothy a ngilsuir el mo meduch el lomerk e olisechakl er a ungil chais. (1 Ko. 4:17) A Timothy a ullab a tekoi el lengilai er a Paulus el dirrek el train er a rebebil.

16. Ngera uchul me a Shigeo a mle train er a rebebil?

¹⁶ A remechudelang er chelecha el taem a diak lebekikl el kmo, a le train er a remekekerei el mo meruul a tekoi el loruul er a ongdibel e ngmo diak a ultutelir. El ua tiang, a Shigeo el dulsaod er ngii er a uchei a mle train er a remekekerei el chedal a Branch Committee. Ngmirruul el uaisei lolengeseu er a ureor er a Renged er a beluu el losiou er ngii. Me sel taem er a bocha lak el sebechel mesiou el tebechelel tia el committee e a kekerei el odam el bla le train er ngii a mle sebechel el mtechir. A Shigeo a mla chedal a Branch Committee el 45 el rak e dirk melemolem el olab aike el bla lesuub el olengeseu er a remekekerei el odam. Te mera el klengeltengat el mei er a rechedal a Dios tirka el mechudelang!

17. El ua losaod a Lukas 6:38, ngera sebechir a remeklou el mesterir a rebebil?

 ¹⁷ Kemiu el mechudelang el odam me a odos a ngar lolechotel a kmo, a kot el lungil klengar a sel dosiou er a Jehovah loba klaumerang me a blakerreng. Ngoeak a kerebai er kemiu e ko mochotii el kmo ngmera el mo uchul a klungioled sel dosuub a omellach er a Biblia e doltaut er a klengar er kid. Ko medengei a rolel e ngmileketmokl a ureor er a ngar er a mong engdi ko mdirrek el mesa klungiolel a doltirakl a beches el rolel a doruul a tekoi. Kemiu el mechudelang el dirk miltecholb a dirrek el betok a rolel e ngsebechiu el olengeseu er a rebebil. Ngsebechiu louchais er a rebebil er a deurreng el bla mngai er chelecha el bla bo mosiu er a Jehovah er a cheluodel er kemiu. A remekekerei a kmal mo dmeu a rengrir el orrenges a experience er kemiu me a tekoi el bla msuub. A “bo bekerurau” louchais a tekoi el bla msuub er a klengar er kemiu el train er a rebebil e a Jehovah kmal mo omekngeltengat er kemiu.​—Monguiu er a Lukas 6:38.

18. Te mekera e kaingeseu a remeklou me a remekekerei?

¹⁸ Kemiu el meklou sel molekeed er kemiu er a remekekerei e ngmo sebechiu el kaingeseu. (Rom 1:12) A derta er kid a ngar ngii a sebechel meruul er ngii el olengeseu er a rebebil. A remeklou a ngar ngii a klemedengei me a experience er tir el bla lengai er a klengar er tir. A remekekerei a ngar ngii a klisichel a bedengir. A remekekerei me a remeklou sel ledak loureor el kaukledem e ngmo uchul a odanges el mora betik a rengul el Demad el ngar er a eanged. Te dirrek el klengeltengat el mora ongdibel.