1. Ngera ngrullii el mora rebebil sel lemesuld a ngklel a betik er a rengrir?

NGNGAR ngii a betik er a rengum el mla mesuld a ngklel er a ongdibel? Tia uchul a klou el klengiterreng! A odos el Hilda a melekoi el kmo: “Sera lemad a bechik el ki ble bechiil el 41 el rak e a kulemdasu el kmo ngdiak a ringel el mo uai ngii. * Engdi ngkmal diak a ringel el mo mekesiur er a ngelekek el sechal a lechitii a ongdibel me a bechil me a rengelekel!”

2-3. A doltirakl er a Psalm 78:40, 41, e ngua ngera uldesuel a Jehovah sel lechitii a ta er a mesiungel?

² Ka di molatk er a kngtil a rengul a Jehovah er sel taem el chedal a telungalek er ngii er a eanged a chilitii! (Jud. 6) E molatk er a kngtil a rengul er a lomes er a rechedal el chad er a Israel el mlo tela el taem el di lomtok er ngii. (Monguiu er a Psalm 78:40, 41.) Bo modengei el kmo ngdirrek el kmal tomellii a rengul a Jehovah sel lechitii a betik er a rengum. Ngkmal ungil medengelii a ringel el omchelebangel er ngii. Ngmo oba klechubechub me a blekokuii el melisiich e olengeseu er kau.

³ Ngar tia el suobel e kede mo mesaod aike el sebeched el meruul el mo nguu a ngelsuil a Jehovah sel bo dechebangel er a chouaitia el blekeradel. Kede dirrek el mo mesaod aike el sebeched el meruul el mo olengeseu er tirke el ngar er a ongdibel el chelebangel er tia el tekoi. Engdi kot, e me bo dosaod er a diak el melemalt el uldasu el kired el mengeroid er kid er ngii.

4. Ngmo uangera uldesuir a ruungalek sel lechitii a Jehovah a ngelekir?

⁴ A ngalek sel ngiltii el mo cheroid er a Jehovah e a rechedam me a chedil a blechoel el mo omdasu el kmo ngdimlak el rruul aike el rokui el sebechir el mo ngosuterir a rengelekir el melemolem el mesiou er a Jehovah. A uriul er a lemesuld a ngklel a ngelekel a odam el Luke e ngdilu el kmo: “Ak mlo omdasu el kmo ngkngtik. Ngmlo er ngii a mekngit el berrusek el kirel. A lebebil  e ak di lmangel e kmal mo meringel a uluk.” A odos el Elizabeth el mlo chelebangel er a osisiu el blekeradel a kmo: “Ngak, ak mle mekngit el chedil? Ak mlo omdasu el kmo ngdimlak krellii a ngerechelek el chedil el dolemii a klemerang er a rengul a ngelekek.”

5. Ngkngtil techang a lsekum a chad choitii a Jehovah?

⁵ Ngdiak el kired lobes el kmo a Jehovah mla msa derta er kid a ilmeklel el melilt. Tia belkul a kmo ngsebeched el melilt el mo olengesenges er ngii me a lechub e ngdiak. A rebebil ngeasek el mle mekngit a ulekurulir a ngileltii el mo mesiou er a Jehovah e kmal blak a rengrir el mesiou er ngii. A rebebil a mlukeroul el rechad er a blirir a kmal mle blak a rengrir lolengeseu er tir el mo betik a rengrir er a Jehovah, engdi te ngileltii el mo cheroid er a klemerang er a be leklou el chad. Me a derta er kid a di ngii el melilt el mo mesiou er a Jehovah. (Jos. 24:15) Me kemiu el rengelekiu a mla ngiltii el mo cheroid er a klemerang a kmal diak el kiriu el mo omdasu el kmo ngkemiu a uchul me te mlo meruul el uaisei!

6. Ngsebechel mo uangera uldesuel a ngalek sel ngiltii a chad er a blil el mo diak losiou er a Jehovah?

⁶ A lebebil e a chedam me a lechub e ngchedil a choitii a klemerang me a telungalek er ngii. (Psa. 27:10) Tia sebechel kmal tomall a rengrir a rengalek el tir a kmal sorir e mengull er a rechad er a blirir. A Esther el demal a milsuld a ngklel a kmo: “Ak mle blechoel el di lmangel e le ak mlo mtebengii el kmo ngika dimlak di loberius el mo cheroid er a klemerang e ngdirrek el ngileltii el mo diak losiou er a Jehovah. Ngkmal betik a renguk er a demak me sera lemesuld a ngklel e ak di mle blechoel el bekikl el kirel. Tia mlo uchul me ngmlo er ngii a panic attacks er ngak.”

7. Ngera uldesuel a Jehovah el kirel a ngeasek el chad er a blil a mla mesuld a ngklel?

⁷ Kemiu el ngeasek, ngkmal mekngit a rengmam el kiriu a lsekum a ta er a chad er a blimiu a mla mesuld a ngklel. Bo modengei el kmo a Jehovah a kmal medengelii a ringel el omchelebangel er ngii. Ngkmal betik a rengul er kau e kmal mengreos er a blakerreng er kau el mo er ngii. A rudam me a rudos er kau me te dirrek el uaisei a uldesuir el kirem. Bo modengei el kmo ngdiak el kau a uchul a mekngit el omelilt er a rechad er a blim. Ngua dulsaod er a uchei, a Jehovah mla msa derta er kid a ilmeklel el melilt. A derta el telecholb el chedal a kirir el mengol a “oberaod el telechellir.”​—Gal. 6:5.

8. Ngera sebechir a rechedal a milsuld a ngklel el meruul er chelecha el longiil er ngii el lmuut el mei? (Dirrek el momes er a baks el “ Mluut el Mei er a Jehovah.”)

⁸ Sel bo lak losiou er a Jehovah a betik er a rengum e nguaisei el omeltkem a kmo a ta er a klebesei e nglmuut el mei er a klemerang. Me ngera sebechem el meruul er ngii er chelecha el mongiil er ngii el lmuut el mei? Moruul aike el rokui el sebechem el melisiich er a klaumerang er kau. Sel moruul el uaisei e ke kutmeklii a ungil kerebai el kirir a rechedal a telungalek er kau me a dirrek el ngike el milsuld a ngklel. Ngdirrek el smisichii a rengum el mo outekangel er a ringel el mchelebangel er ngii. Ka me dosaod a bebil tekoi el sebechem el meruul.

9. Ngoeak a ngera el rolel e ngsebechem el nguu a klisiich er a Jehovah? (Dirrek el momes er a baks el “ Bades el Sebechel Mengelaod er Kau Sel Lechitii a Jehovah Betik er a Rengum.”)

⁹ Moruul aike el rokui el sebechem el mo melisiich er a klaumerang er kau. Ngkmal klou a  ultutelel el molisiich er kau me a rechedal a telungalek er kau. Ngmekera omoruul el uaisei? Ngoeak sel bo le blekerdelem el menguiu er a Biblia e molebedebek aike el monguiu e mora miting. A Joanna el demal me a sister er ngii a mla choitii a klemerang a melekoi el kmo: “Ngmo chelellakl a renguk sel kunguiu el kirel a Abigail, Esther, Job, Josef, me a Jesus. A ungil kerebai er tir a omekeek er a uldesuek er a ungil uldasu el ngii a mesumech er a renguk. Ak dirrek el mla metik el kmo aike el original songs er kid a dirrek el kmal melisiich.”

10. Ngmekera Psalm 32:6-8 e ngosukid el mo outekangel a kngtil a rengud?

¹⁰ Mouchais er a Jehovah aike el rokui el ngar er a rengum. Sel bo lemekngit a rengum e lak meterob el meluluuch el mo er ngii. Molengit er ngii me lengesukau el mo omes a tekoi el uai ngii e ‘losisecheklau er a rael el kirem el merael er ngii.’ (Monguiu er a Psalm 32:6-8.) Nguaisei el locha kmal meringel er kau oltobed aike el ngar er a rengum el mora Jehovah. Engdi modengei el kmo a Jehovah kmal lungil medengelii a ringel el omchelebangel er ngii. Ngkmal betik a rengul er kau e kmal soal omouchais er ngii aike el rokui el ngar er a rengum.​—Exo. 34:6; Psa. 62:7, 8.

11. A doltirakl er a Hebru 12:11, e ngera uchul me ngkired el oltirakl er a omesmechokl er a Jehovah? (Dirrek el momes er a baks el “ A Omesuld el Ngakl Ochotii a Bltkil a Rengul a Jehovah el Mei er Kid.”)

¹¹ Moltirakl a tekoi el miltib. A omesuld el ngakl a tekoi el bla leketmeklii a Jehovah. A omesmechokl er ngii a oeak a bltikerreng e mo uchul a klungiolir a rokui el chad luldimukl er ngike el milsuld a ngklel. (Monguiu er a Hebru 12:11.) A rebebil el ngar er a ongdibel a locha mo melekoi el kmo ngdiak el melemalt el remechuodel a millilt el mo mesuld er a ngklel a chad. Engdi lak mobes el kmo tirka el chad a locha diak losaod aike el mekngit el kirel ngika el milsuld a ngklel. Ngkmal diak dodengei a rokui el  tekoi el dilubech. Me ngolechotel a llomeserreng a bo doumerang el kmo a remechuodel a mle kerekikl loltirakl aike el rokui el ledu Biblia e uluukerrekeriil el “kirel a RUBAK.”​—2 Kr. 19:6.

12. Ngera lungil tekoi a dilubech el mora rebebil le tir luleltirakl er a omesmechokl er a Jehovah?

¹² Sel bo moltirakl er a omelilt er a remechuodel el mesuld er a ngklel a betik er a rengum e ke mo ngosuir el lmuut el mei er a Jehovah. A Elizabeth el dulsaod er ngii er a uchei a melekoi el kmo: “Ngkmal mle meringel er kemam el diak ki mongedecheduch er a ngelekam el sechal, engdi sera lluut el mei er a klemerang e ngdilu el kmo ngmle rredemelel a mesuld a ngklel. Cherengel a taem e ngmlo oba omereng el saul el kirel a tekoi el lesiluub. Me ak suubii el kmo a omesmechokl er a Jehovah blechoel el melemalt.” A bechil er a Mark a kmo: “Uriul e a ngelekam a dilu el kmo ngmle soal el lmuut el mei er a klemerang e le kemam el mlo diak ki mongedecheduch er ngii e ki mongoit a taem el obengkel. Ngkmal dmeu a rengmam e le Jehovah ngilsukemam el mo oba blekongesenges.”

13. Ngera sebechel ngosukau loutekangel a ringelel a rengum?

¹³ Mongedecheduch er a resechelim el tir a medengelii a tekoi el omchelebangel er ngii. Mongoit a taem lobengterir a rudam me a rudos el mesisiich a klaumerang er tir, el tir a sebechir el ngosukau el mo melemolem loba ungil uldasu. (Osi. 12:25; 17:17) A Joanna el dulsaod er ngii er a uchei a melekoi el kmo: “Ak mera el ulemdasu el kmo ngdi ngak el tang a chellungel er tiang. Engdi sera kungedecheduch er a rechad el kuluumerang er tir e te ngilsukak el outekangel.” Engdi ke mo mekerang a lsekum te ngar ngii a rechad er a ongdibel el mo melekoi a tekoi el rullau el menga el mo mekngit a rengum?

14. Ngera uchul me ngkired el ‘mo ulserechakl a rengud, e mo kausubes’?

¹⁴ Moba kllourreng el bedul a rudam me a rudos er kau. Ngdiak el rokui el chad a mo melekoi a melemalt el tekoi. (Jak. 3:2) Kede rokui el diak demecherrungel me lak bo lemechas a rengum a lsekum te dmu tekoi el ngii a locha kmal mo tomellii a rengum. Molatk er a omengelechel er a Paulus el kmo: “Bo lulserechakl a rengmiu, e bo mkausubes a mlo mekngit er a delongeliu, a le bor ngii a ultutakl el kirel a tar a re chad.” (Kol. 3:13) A ta el odos el chedal a milsuld a ngklel a kmo: “A Jehovah mla ngosukak el mo ousubes er a rudam el tir a millasem el meruul a llemalt er a diak el melemalt el rolel.” Ngera sebechel a ongdibel el meruul el olengeseu er tirke el blak a rengrir el chedal ngike el milsuld a ngklel?

15. Ngera sebeched el meruul lolengeseu er tirke el chedal a chad el dirk milsuld a ngklel?

¹⁵ Moutkeu er a reblak a rengrir el chedal ngike el milsuld a ngklel. A odos el Miriam a kmo ngkmal mle bekikl el mora miting er a uriul er a lemesuld a ngklel ochedal. Ngmelekoi el kmo: “Ak mle medakt el kmo ngera te mo dmu rechad el mei er ngak. Engdi te mla er ngii a rungil sechelei el tir a dirrek el mle mekngit a rengrir el uai ngak engdi te dimlak louketui er a ochedak.  Ak mera el mereng a sulir e le te milengol er tia el klengiterreng lobengkek.” A lmuut el ta er a odos a melekoi el kmo: “A uriul er a lemesuld a ngklel a ngelekam el sechal e a rebebil a mlei el me mengelaod er kemam. Te ngar ngii a dilu el kmo te diak lodengei el kmo te mo dmu el mo ngerang. Te lilangel lobengkek e milluches el mei er ngak. Aika el omerellir a kmal ngilsukak!”

16. Ngmekera ongdibel e sebechel melemolem el lolengeseu er a rechedal a chad el milsuld a ngklel?

¹⁶ Molemolem el olengeseu e molisiich er a reblak a rengrir el chedal a telungalek er ngike el milsuld a ngklel. Tiakid sel taem el kmal lousbech er a bltkil a rengmiu me a omelisiich er kemiu. (Heb. 10:24, 25) Te ngar ngii a rechedal a telungalek er a remilsuld a ngklir el mlo omelechesiu el kmo a rebebil el ngar er a ongdibel a diak longedecheduch er tir me a lechub e longoit a taem el obengterir el ua le tir me te dirrek el milsuld a ngklir. Lak becherei tia el tekoi me leduubech! A rengelekir a reseluld a ngklir a kmal ousbech er kid el mo chemat e melisiich er tir. A Maria el bechil a milsuld a ngklel e chilitii a telungalek er tir a kmo: “A rebebil a mlei er a blik e meruul a kall e olengeseu er ngak el mesuub lobengterir a rengelekek. Te ulemelechesiu er a ringel el kchebangel er ngii e lilangel el obengkek. Te milsebechakl er ngak er aike el taem el rechad a millekoi a diak el klemerang el tekoi el kirek. Te kmal silsichak!”​—Rom 12:13, 15.

17. Ngera sebechir a remechuodel el meruul el mengelaod er tirke el chuarm er a klengiterreng?

¹⁷ Remechuodel, mosiik a bek el techall el mo melisiich er tirka el blak a rengrir el chedal a telungalek. Ngar ngii a ileakl el ngerecheliu el mengelaod er tir. (1 Th. 5:14) Mongedecheduch er tir er a uchei me a uriul er a miting el melisiich er tir. Moldingel er tir er a blirir e moluluuch lobengterir. Moureor lobengterir er a odingel me a lechub e molengit er tir el mo teloi er a omengull el telungalek er kemiu. A remechuodel a kirir lolecholt a blekokuii me a bltikerreng e dirrek el mengoit a taem el obengterir a rechedal a Jehovah el ngar er a klengiterreng.​—1 Th. 2:7, 8.

18. A doltirakl er a 2 Petrus 3:9, e ngngera soal a Dios el kirir tirke el mla choitii?

¹⁸ A Jehovah “diak el soal a ngii di le chad a leriid, e bai soal a rokui el chad a lobult el mo  imikr a kngterir.” (Monguiu er a 2 Petrus 3:9.) Alta chad a rullii oberaod el klengit engdi a klengar er ngii a dirk mekreos er osengel a Jehovah. Molatk er a ngarbab el char el lekilkedir. Ngika kilengei er a betik er a rengul Ngelekel me ngtongetengii a klengar er ngii el olubet el kirir a rechad el ngar er a klengit. A Jehovah oba bltikerreng el melasem el olengeseu er tirka el mla choitii me lluut el mei er ngii. Ngoba omelatk el kmo te lmuut el mei er ngii el ua desa er a okesiu er a Jesus el kirel a ririid el ngalek. (Lk. 15:11-32) A rebetok el chilitii a klemerang a liluut el mei er a Jehovah. A rudam me a rudos a kmal mle dmeu a rengrir loutkeu er tir el lmuut el mei. A Elizabeth el dulsaod er ngii er a uchei a kmal mle dmeu a rengul er a lluut el mei er a klemerang a ngelekel. Ngmelebedebek er tia el taem e melekoi el kmo, “Ak kmal oba omereng el saul el kirir tirke el millisiich el ngak me lak kuridii a omeltkek el kmo ngmo lmuut el mei.”

19. Ngera uchul me ngsebeched el oumera el ulsirs er a Jehovah?

¹⁹ Ngkmal sebeched el oumera el ulsirs er a Jehovah. Ngkmal diak bo ledu er kid el mo meruul a tekoi el mo uchul a telemelled. Ngika chubechub e bekokuii el Chedam el kmal betik a rengul er tirke el rokui el betik a rengrir er ngii e mengull er ngii. Bo lulterekokl a rengum el kmo a Jehovah a kmal diak bo lechitau sel bo mchebangel a ringel. (Heb. 13:5, 6) A Mark el dulsaod er ngii er a uchei a kmo, “A Jehovah a kmal diak bo lechitid e kmal diak lecheroid er kid sel bo dechebangel a ringel.” A Jehovah a mo melemolem lomeskau a “klou el klisiich.” (2 Ko. 4:7) Nguaisei, ngkmal sebechem el lomelemii a blakerreng er kau el mo er ngii e melemolem el oba omelatk el kmo a betik er a rengum el mla choitii a Jehovah a mo lmuut el mei.