1-2. Ngera uchul me ngungil el dosuub er a cheldecheduch er a Samson?

 NGERA ke mo melatk sel mrengesii a ngakl el Samson? Ke locha mo melatk er a chad el kmal mle mesisiich. E mera el uaisei. Engdi Samson a mlo mekngit el melilt, el ngii a mlo uchul a klou el ringel el mo er ngii. Me nguaisei, engdi a Jehovah a ulemes aike el rokui el leriruul a Samson el ngar omesiungel el mo er ngii. E lilia er a Tekingel a kerebil a Samson el mo uchul a klungioled.

² A Jehovah uluusbech er a Samson el meruul a meklou el tekoi el olengeseu er a rengellitel el chedal el rechad er a Israel. Betok el dart el rak er uriul er a lemad, e a apostol Paulus a mlukreng er a Jehovah el luchesii a ngklel a Samson el mo uldimukl er tirke el chad el ulechotii a klou el klaumerang. (Heb. 11:​32-34) A kerebil a Samson a sebechel melisiich er kid. Ngika mle ultuil er a Jehovah, mo lmuut er a chelsel a kmal meringel el blekeradel. Ngar tia el suobel e kede mo mesaod aike el sebeched el suub er a Samson me a rolel a kerebil a sebechel smisichid.

3. Ngera el ngerachel a lengiluu a Samson?

³ Sera lemechell a Samson, e a rechad er a Filistia mle merreder er a renged er a Israel, e kmal ulemekcharm er tir. (Men. 13:1) Te kmal mle chuarm a rechad er a Israel er a omengederederir. Me a Jehovah ngileltii a Samson el mo “mesebechakl er a Israel er a re chad er a Filistia.” (Men. 13:5) Tia kmal mle meringel el ngerachel! Me a Samson a mle kirel el ultuil er a Jehovah el mo kutmeklii a ngerechelel.

4. Ngmilekera Jehovah e ngosuir a Samson el mo mimokl er a rechad er a Filistia? (Mengeteklel 15:​14-16)

⁴ Molatk er a kerebil a Samson el uluumera el ulsirs er a Jehovah  me a ngeso el Jehovah ulemsang. A ta el taem e a resoldau er a Filistia mlora Lehi el ngar er a Juda el mo melai er a Samson. A rechad er a Juda mle medakt er tir me te ngiluu a Samson el mesterir. Me a rechedal a Samson a lilechet a chimal lolab a eru el beches el ekil e ngiluu el mo mesterir a rechad er a Filistia. (Men. 15:​9-13) Me nguaisei, engdi “Reng er a RUBAK a rirellii el mo mesisiich” me a Samson a di mle ngii el lemoched aika el lechet. E seikid a Samson a miltik er a “chiuesel a ngerel a donkey” me ngsilseuii e nguu el mekodeterir a re 1,000 el chad er a Filistia!—Monguiu er a Mengeteklel 15:​14-16.

5. Ngmilekera Samson e ochotii el kmo nguluumera el ulsirs er a Jehovah?

⁵ Ngera uchul me a Samson uluusbech er a chiuesel a ngerel a donkey? Tia kmal mle ngodech el klekedall el luluusbech er ngii! A Samson a ulterekokl el mle medengei el kmo a klisichel a mle ultuil er a Jehovah el diak el klekedall el luluusbech er ngii. Chochoi, ngika el blak a rengul el mesiungel a Jehovah uluusbech er sel mla er ngii, el mo meruul er a soal a Jehovah. Me ngii el uluumerang el ulsirs er a Jehovah a uchul me a Jehovah ulemekngeltengat er ngii e rirellii el mo mesisiich.

6. Ngera ta er a tekoi el sebeched el suubii er a cheldecheduch er a Samson?

⁶ Kid me ngdirrek el sebechel a Jehovah el smisichid el mo kutmokl a ngerecheled, mo lmuut er aike el domdasu el kmo ngmeringel er kid a kutmokl. A Dios a sebechel ngosukid er a rolel el dimlak dolatk el kmo ngmo uaisei. Moumerang el kmo a Jehovah el ngike el silsichii a Samson, a dirrek el mo ngosukau el meruul er a soal sel moumera el ulsirs er ngii el mo olengeseu er kau.—Osi. 16:3.

7. Ngera ochotii el kmo ngkmal klou a ultutelel a domes el bedul a Jehovah el kirel a ulekrael?

⁷ A rebetok er a rudam me a rudos er kid el teloi er a ureor el omekedechor a basio el kirel omengull a mla ochotii el kmo te oumera el ulsirs er a Jehovah. A ngar er a mong e a rudam a mle blechoel el design e omekedechor a Blil a Ongdibel me a lmuut el bebil er omekedecheraol. Me nguaisei engdi omerollel a taem e ngkmal mla mo klou aike el lousbech  a cheldebechel me ngkirir el adjust. Tirka el odam el ulemekrael er a ureor ulsiik a ulekrael er a Jehovah e millasem a beches el rolel, el ua omechar a basio e renovate. A Robert, el aika el mereko el dirk mlo merek el rak e ngmle teloi er a betok el ureor el omekedechor el meliuekl er a beluulechad el rokir a kmo: “A uchelel e tia el tekoi a mle meringel er a rebebil e le ngkmal mle ngodech er a rolel e aki mla oureor el betok el rak. Engdi rudam a kilengei er tia el omelodech e mla obeketakl el kmo a Jehovah omekngeltengat er ngii.” Tia di ta er a olechotel a rolel e a Jehovah omekrael er a rechedal el mo oltaut er a soal. Ngkirel el kuk mo chuib a taem e a derta er kid a di ngii el oker, ‘Ngak, a kusiik er a ulekrael er a Jehovah e kongei el meruul omelodech me lsebechek el mesiou er ngii el ngar sel kot lungil el rolel?’

8. A ta el taem el lesal kmal mo meched a rengul a Samson, e ngmilekerang?

⁸ Ke locha medengei a mengasireng el tekoi el leriruul a Samson. Ngika di mle ngii el tang e odelecheklii a laion e a uriul e ngmilekodeterir a re 30 el chad er a Askelon el mats er a Filistia. (Men. 14:​5, 6, 19) A Samson a mle medengei el kmo ngdiak el sebechel remuul aika el tekoi a lemlak lolengeseu er ngii a Jehovah. Tia desang er sel taem el lesal kmal mo meched a rengul er a uriul er a lokodeterir a re 1,000 el chad er a Filistia. Ngmilekerang? Ngdimlak di lengii el mo osiik a ralm, e ngbai ulemekedong el mora Jehovah lolengit a ngeso.—Men. 15:18.

9. Ngmilekera Jehovah el kirel a nglunguchel a Samson lolengit a ngeso? (Mengeteklel 15:19)

⁹ Jehovah ulenger er a ongtil a Samson er a lebsang a ralm loeak a mengasireng el rolel. A Samson er a lolim er ngii e ng “mlo oisab el mesisiich.” (Monguiu er a Mengeteklel 15:19.) Tia el beches el madedok er a Jehovah dirk mla er ngii er a betok el rak er uriul er sel taem el profet el Samuel a mlukreng el mo meluches er a babier er a Mengeteklel. A rechad er a Israel el ulemes er tia el madedok a locha mluklatk el kmo a reblak a rengrir el mesiungel a Dios a sebechir lultuil er ngii sel lebo er ngii a lousbech.

10. Ngera kired el meruul me denguu a ngelsuil a Jehovah? (Dirrek el momes er a siasing.)

¹⁰ Kid me ngdirrek el kired lomes el bedul a Jehovah el kirel a ngeso, a lengar ngii a duch er kid me a lechub e kede mla remuul a betok el ngar er a omesiunged el mo er ngii. Ngkirel moriou a rengud e kongei el kmo, ngdi sebeched el remuul aike el longit er kid a Jehovah a lsekum kede mo ultuil er ngii. Ngua Samson el mlo mesisiich er a lolim er sel ralm el lebilsang a Jehovah, kid me kede dirrek el mo mesisiich sel dousbech aike el rokui lomeskid a Jehovah lolengeseu er kid el melemolem loba blakerreng el mo er ngii.—Mt. 11:28.

11. Ngmekera sebeched el mui el nguu a ngelsuil a Jehovah? Mosaod.

¹¹ Molatk er a kerebil a Aleksey, el ta er a odam er kid er a Russia el outekangel a meringel el odechelakl. Ngera mla ngosuir me ngmelemolem el mesisiich er a chelsel a kmal meringel el blekeradel? Ngii me a bechil a ngar ngii a ungil schedule er tir er omengull me a omesubel a Biblia. Ngkmo: “Ak melasem el melemolem el meruul er a omesubek el di ngak el tang e menguiu er a Biblia er ngak er a bek el sils. Bek el tutau, e ngak me a bechik a dmak el mesaod er a days text e dmak el meluluuch el mora Jehovah.” Tiang ngera ngosisecheklii er kid? Ngdiak el soad el mo ultuil er kid e ngbai kired el mo ultuil er a Jehovah. Ngmekera doruul er tiang? Sel deteketekii a klaumerang er kid loeak a ungil schedule er kid  el mesuub er a Biblia el di kid el tang, meluluuch, miting, me a berkel a klumech. Seikid a Jehovah mo omekngeltengat aike el doruul el mesiou er ngii. Ngika silsichii a Samson, e kmal sebechel el smisichid.

12. Ngera el mekngit el omelilt a lerirellii a Samson, e tiang ngmekera e ngodech er aike el uleak uchei el uai ngii?

¹² A Samson a uaikid el dimlak el cherrungel, me ngngar ngii aike el taem el blo lemekngit el melilt. A ta el omelilt el lerirellii a mlo uchul a klou el telemall. Ngmlo chuib a taem el losiou el mengeteklel a beluu, e mocha “soal a Delila el dil el ngar a dellas er a Sorek.” (Men. 16:4) Uchei e a Samson a mle telbiil el mo bechil a redil er a Filistia, me nguaisei engdi “RUBAK a milengetikaik” er a Samson el mo meruul er tia el tekoi me lebo er ngii a techellel el oldechelakl er a rechad er a Filistia. Uriul e a Samson a mlo bad er a blil a oteruul el dil er a Gasa er a Filistia. Ngar tiakid el taem e a Jehovah silsichii a Samson me ngmiladel a chesmerel a siseball er a beluu me ngmlo mechitechut osebecheklel a beluu. (Men. 14:​1-4; 16:​1-3, NW) Engdi a tekoi el mlo obengkel a Delila a mle ngodech el teletael e le ngika locha mle chad er a Israel.

13. Ngmilekera Delila e otungii a Samson er a mekngit el blekeradel?

¹³ A Delila kilengei er a klou el udoud er a rechad er a Filistia el mo oterur a Samson er tir. A Samson ngkmal mle soal a Delila me ngdimlak lutebengii a tekoi el loruul er ngii a Delila? Ngdiak dodengei, me nguaisei engdi a Delila di millemolem el orrimel er ngii el mo ouchais er a uchul me ngkmal mesisiich, me a ulebongel e a Samson uluuchais er ngii. Ngklengiterreng e le Samson a di mle ngii lotungii er a blekeradel, el mlo uchul e ngoridii a klisichel e oridii a kengei er a Jehovah el telkib el taem.—Men. 16:​16-20.

14. Ngera dilubech el mora Samson lengii el uluumerang er a Delila?

 ¹⁴ A Samson a mlo chobangel a kmal meringel el tekoi le ngii el uluumerang er a Delila er a bai loumerang er a Jehovah. A rechad er a Filistia mildechemii e kmit a medal. Ngmlo kelebus er a Gasa, el uchei ngtilemall a siseball er tia el beluu engdi chelechang e ngmengsous er ongsekikl. E te mocha omekrur er ngii. A rechad er a Filistia mlo kldibel el mengedaol e melenget el mora klsuul chedrir er a Dagon el ua lekong ngngii a uchul me te mildechemii a Samson. Te ngiluu a Samson er a kelebus el mei er tia el ungil klebesei er tir el “melumk er ngii.”—Men. 16:​21-25.

15. Ngmilekera Samson e lmuut lochotii el kmo ngoumera el ulsirs er a Jehovah? (Mengeteklel 16:​28-30, NW) (Momes er a siasing er a medal tia el babier.)

¹⁵ A Samson a rirellii a kmal oberaod el cheleuid engdi ngdimlak le give up. Ngulsiik a techall el mo oldechelakl er a rechad er a Filistia, el ngerechelel er a Dios. (Monguiu er a Mengeteklel 16:​28-30, NW. b) A Samson ullengit er a Jehovah el kmo: “Bechikak me kulaitechei er a rechad er a Filistia.” Me a Dios ulenger er a ongtil a Samson e liluut el msang a ileakl el klisiich. Me a Samson a milekodeterir a lmuut el betok el chad er a Filistia er tiakid el taem er aike el uleak uchei.

16. Ngera sebeched el suubii er a cheleuid el omerellel a Samson?

¹⁶ Me alta Samson a mlo chormii a rsel a cheleuid el lerirellii, engdi ngdimlak el stob el melasem el meruul er a soal a Jehovah. Mo lmuut me a lsekum e kede rullii a cheleuid e mo ousbech omesmechokl me a lechub e kede oridii a ileakl el techall, e ngdiak el kired el give up. Lak mobes el kmo a Jehovah kmal diak el give up er kid. (Psa. 103:​8-10) Ngua Samson, alta kede mo remuul a cheleuid ngdirk sebeched el usbechall er a Jehovah.

17-18. Ngera kmal melisiich er kau er a kerebil a Michael? (Dirrek el momes er a siasing.)

¹⁷ Molatk er a kekerei el odam el Michael. Ngika kmal mle mechesang er a omesiungel el mora Jehovah, e milsiou el ministerial servant e regular pioneer. Engdi ngika mlo rullii a cheleuid luchul e ngurriid a ileakl el techall er omesiou er a chelsel ongdibel. Ngkmo: “A uchei er tiang ak kmal mle mechesang er a omesiungek el mora Jehovah. Me sera  leduubech tiang e ak mlo feel el kmo ngmla mo diak a ngerang el sebechek el meruul el ngar er a omesiungek el mora Jehovah. Ngdimlak kuumededenger el kmo a Jehovah mo choitak, engdi ak millatk el kmo a deleuill er ngak me ngii ngsebechel lmuut el mo uai a uchei, me ngak ngsebechek el lmuut el mo mesiou er a ongdibel el ua ngar er a mong.”

¹⁸ Me kede chemat er a Michael le ngdimlak el give up. Ngmelemolem el melekoi el kmo: “Ak mlo focus er a lmuut el meruul er a deleuill er ngak me a Jehovah loeak a kululuuch louchais er ngii aike el ngar er a renguk, e mesuub, e melebedebek.” Cherengel a taem e a Michael a liluut el mo er ngii a ileakl el ngerachel er a ongdibel lolab. Chelechang e ngmesiou el ta er a remechuodel e regular pioneer. Ngkmo: “A support me a omelisiich el kngilai, tokubets aike el mlara remechuodel, a ngilsukak el mo mtebengii el kmo a Jehovah kmal dirk betik a rengul er ngak. Me chelechang e ngsebechek el lmuut el mesiou er a chelsel ongdibel el klikiid a ukltkek. Tia el experience a mla osisecheklak el kmo a Jehovah ousubes er a ngii di el chad el mera el obult.” Ngsebechel mo ulterekokl a rengud el kmo a Jehovah a mo ousbech er kid e omekngeltengat er kid mo lmuut me a deruul a cheleuid, a lsekum e kede meruul aike el rokui el sebeched el sumecheklid e melemolem el oumera el ulsirs er ngii.—Psa. 86:5; Osi. 28:13.

19. Ngmekera kerebil a Samson e mla smisichau?

¹⁹ Ngar tia el suobel e kede mla smaod a bebil er a ileakl el tekoi el dilubech er a klengar er a Samson. Ngika dimlak el cherrungel engdi ngdimlak el give up el mesiou er a Jehovah, mo lmuut er a uriul er a lerellii a cheleuid lobengkel a Delila. Me a Jehovah dimlak el give up er ngii. A Dios a liluut lousbech er ngii er a ileakl el rolel. A Jehovah dirk omes er ngii el kmal ileakl a klaumerang er ngii, e rirellii el mo belsachel er tirke el blak a rengrir el chad el losaod er tir a 11 el bliongel er a Hebru. Ngkmal melisiich er kid sel dodengei el kmo kede mesiou er a betik a rengul el Demad el ngar er a eanged el kmal soal melisiich er kid, tokubets sel debo demechitechut! Me bo deua Samson e dolengit er a Jehovah el kmo: “A kullengit me mletkak, e msisichak.”—Men. 16:​28, NW.