1. Ngmle uangerang a uldesuel a Petrus el kirel a mengasireng el rolel e ngkilsokes a ngikel?

 A PETRUS a milengesokes el ta el kesus e di dimlak a cheldil. A Jesus a dilu er ngii el kmo: “Mnguu a bos el oikal mor a dmolech, e kau ma re kldemem motengel a uuked el nguu a telekesokes.” (Lk. 5:4) A Petrus a locha ulemdasu el kmo ngdiak a ngera el bo lekesokes engdi ngdi ultirakl a tekingel. A uuked a mlo soal mesodel er a ildisel a ngikel. Ngkmal mlo ‘mechas a rengul’ a Petrus me a rubengkel er a lutebengii el kmo a Jesus a mla rullii a mengasireng el tekoi. Me a Petrus a dilu el kmo: “Rubak, bo mcheroid er ngak, e ngak a mui ra klengit el chad.” (Lk. 5:​6-9, BT) Ngika dimlak lomdasu el kmo ngrredemelel a obengkel a Jesus.

2. Ngera uchul me ngmo ngosukid a dolatk er a kerebil a Petrus?

² Ngmle melemalt a Petrus er a lolekoi el kmo ng “mui ra klengit el chad.” A Bades ochotii el kmo a lebebil e ngmlo dmung e remuul a tekoi el blo louuchel a rengul er ngii er uriul. Kau, a lebebil e ke mo feel el ua Petrus? Ke dirrek el oldechelakl er a meringel el blekerdelem me a lechub e ngchelitechetum? A leuaisei, e ngsebechel mechelaod a rengum sel mosuub el kirel a Petrus. E ngerang? Molatk er tiang: A Jehovah mle sebechel diak loluches a chelitechetul a Petrus er a Biblia. Engdi nglilecha er a Biblia me lsebeched el ngmai a klubeled er ngii. (2 Ti. 3:​16, 17) Sel dosuub el kirel ngika el chad el mla er ngii a chelitechetul e ulemelechesiu a tekoi el domelechesiu, e ngsebechel el help er kid el mo mesa el kmo a Jehovah diak el expect er kid el mo perfect. E ngbai soal a doutekangel e dolemolem el melasem alta ngngar ngii a chelitechetud.

3. Ngera uchul me ngkired el melemolem el melasem?

 ³ Ngera uchul me ngkired el melemolem el melasem? Ngar ngii a tekoi el kmo, A dolemolem el practice e kede mo meduch er ngii. El ua tiang: A chad er a ongngak a locha mengoit a betok el rak el mesuub el mo meduch lousbech er a klekedall er a ongngak. Chelsel ngii el betok el rak e nglocha mo remuul a betok el cheleuid engdi a lolemolem el practice e ng improve. Mo lmuut er a bo le semmong er ngii me ngdirk mo remuul a cheleuid a lebebil er a taem. Engdi ngkmal diak el give up. Ngmelemolem loureor er ngii. Ngdi osisiu, mo lmuut me a bo de feel el kmo kede mla mo mesisiich er a chelitechetud me kede locha dirk mo rullii a cheleuid. Engdi kede di melemolem loureor er ngii. Kid el rokui el di mo dmung me a lechub e kede remuul a tekoi el bo douuchel a rengud er ngii er uriul, engdi ngkmal diak dekengei el give up e le Jehovah mo melemolem el olengeseu er kid el mo mesisiich er ngii. (1 Pe. 5:10) Me dosaod er a kerebil a Petrus el uluutekangel. A klechubechub lulechotii a Jesus el mo er ngii alta ngmla er ngii a chelitechetul a sebechel ngosukid el melemolem el mesiou er a Jehovah.

4. Ngera ngdilu Petrus el kirel er a Lukas 5:​5-10 (BT), e milekera Jesus e olterekokl er a rengul?

⁴ A Bades a diak losaod er a uchul me a Petrus a dilu el kmo ng “mui ra klengit el chad” me a lechub e losaod a klengit el lullatk. (Monguiu er a Lukas 5:​5-10, BT. b) Ngika locha riruul a bebil el kmal oberaod el cheleuid. A Jesus a miltebengii a dektel a Petrus, e le ngii el locha dimlak lungil a uldesuel kirel. Engdi ngdirrek el mle medengei el kmo a Petrus a sebechel melemolem el loba blakerreng. Me ngdilu er a Petrus el kmo “lak medakt.” A klaumerang er a Jesus er a Petrus a kmal klou a lerirellii el mo er ngii. A uriul e a Petrus me a ta er ngii er a Andreas a chilitii a siobai er tir er omenged e mlo oltirakl er a Mesias, el ngii el omelilt a mlo uchul a betok el klengeltengat.—Mk. 1:​16-18.

5. Ngera el klengeltengat a lengilai a Petrus er a bo lemesisiich er a dektel e lekengei el mo oltirakl er a Jesus?

⁵ A Petrus a mle betok a ungil experience er ngii el obengkel a Kristus. Ngmilsa Jesus el omekungil er a resmecher, oltobed er a remekngit el chelid er a rechad, e olekiis er a rulekoad. c (Mt. 8:​14-17; Mk. 5:​37, 41, 42) Ngdirrek el milsa er a ues a Jesus el ngar er a deruchellel el King er a Rengedel a Dios, el tekoi el locha kmal dimlak lobes er ngii. (Mk. 9:​1-8; 2 Pe. 1:​16-18) Nguaisei a Petrus a miles a tekoi  el locha dimlak leues a lemlak bo loltirakl er a Jesus. Ngulterekokl el kmal mle dmeu a rengul el dimlak lebechei a mekngit el uldesuel el kirel me blo luchul e ngdiak lengai aika el klengeltengat.

6. A Petrus ngdi mle mereched el mo mesisiich er a chelitechetul? Mosaod.

⁶ Me alta Petrus a miles e remenges aika el tekoi, engdi ngdirk uleldechelakl a chelitechetul. Molatk a bebil lochotel. A Jesus er a louchais el kmo ngmo chuarm e mad el loltirakl a ulaoch er a Biblia, e a Petrus a mlo olekebai er ngii. (Mk. 8:​31-33, BT) E mlo betok el taem el Petrus me tirke el bebil er a apostol a mlo kaititekangel el kmo ngtecha er tir a kot el ngarbab. (Mk. 9:​33, 34) E ngar sel kesus er uchei er a lemad a Jesus, a Petrus a kilemdii a dingal a chad. (Jn. 18:10) Tia el osisiu el kesus, e a dektel er a rechad a uchul me ngmle edei el taem el ledu el kmo ngdiak lodengelii a sechelil er a Jesus. (Mk. 14:​66-72) Tia uchul me ngkmal lilangel.—Mt. 26:75.

7. Ngera el techall a lengiluu a Petrus er a uriul er a lebekiis a Jesus?

⁷ A Jesus a dimlak lechitii ngika el apostol er ngii el kmal mlo mechitechut a rengul. A uriul er a lebekiis er a kodall e ngmilsa Petrus a techellel el mo oterekeklii a bltkil a rengul er ngii. A Jesus a ulengit er a Petrus el mo mesiou el mengkerengel a sib er ngii. (Jn. 21:​15-17) A Petrus a mlo kltmokl el meruul aike el ledilu er ngii. Ngika mla er a Jerusalem er a sils er a Pentekost e mle ta er tirke el kot el mlucheluch er a chedaol reng.

8. Ngera el oberaod el cheleuid a lerirellii a Petrus er a Antiok?

⁸ Ngmo lmuut er a uriul er a bo lengellitel el Kristiano a Petrus, me ngdirk uleldechelakl a chelitechetul. A Petrus a mla er sei er a 36 C.E. er a lemucheluch er a chedaol reng a Kornelius el chad er a Chisentael. Tia ulechotii el kmo a “Dios a diak longetukel rar chad” me a Rechisentael a sebechir el mo chedal a ongdibel er a Rekristiano. (Rel. 10:​34, 44, 45, BT) Me a uriul er tiang e a Petrus a mlo sebechel el omengur lobengterir a Rechisentael, el tekoi el uchei e ngkmal dimlak lekengei el meruul er ngii. (Gal. 2:12) Me nguaisei engdi a rebebil er a Rekristiano el chad er a Chijudea ulemdasu el kmo a Rechijudea me a Rechisentael a diak el kirir el dmak el omengur. Me sera lebora Antiok a rebebil lulemdasu el uaisei, e a Petrus a mlo diak lomengur lobengterir a rudam el chad er a Chisentael. Ngika locha dimlak el soal melibas er a Rekristiano el chad er a Chijudea. A apostol Paulus er a lesa tia el omerellel a Petrus e ngdi mla er mederir a rechad e sumecheklii. (Gal. 2:​13, 14) Me alta Petrus a rirellii tia el cheleuid, ngmillemolem el merael el bedul luchei. Ngera ngilsuir?

9. Ngera ngmesaod er ngii a Johanes 6:​68, 69 el kirel a blakerreng er a Petrus?

⁹ A Petrus a uleba blakerreng. Ngdimlak lebechei a ngii di el tekoi me lerellii me el give up. Ngulechotii tia el blakerreng er a ta el taem el Jesus a dillii a tekoi el mle meringel er a redisaiplo er ngii a understand er ngii. (Monguiu er a Johanes 6:​68, 69.) A rebetok a dimlak lolasem el mo medengei a belkul a tekingel a Jesus te bai mle stob el oltirakl er ngii. Engdi a Petrus a di millemolem loltirakl er a Jesus e le ngmiltebengii el kmo ngdi ta el ngii olab a “tekoi er a diak a ulebengelel klengar.”

10. Ngmilekera Jesus e ochotii a klaumerang er ngii er a Petrus? (Dirrek el momes er a siasing.)

¹⁰ A Jesus a dimlak lechitii a Petrus. Ngar sel ulebongel el kesus er ngii er tia el chutem, e a Jesus a mle medengei el kmo a Petrus me tirke el bebil er a rechapostol a mo choitii. Me nguaisei engdi Jesus uluumerang el kmo a Petrus a lmuut el mei e mo melemolem el oba blakerreng.  (Lk. 22:​31, 32) A Jesus a mle medengei el kmo a “rengul a chad a mesisiich, e ngdi klechad a mengitechut er ngii.” (Mk. 14:38) Sei a uchul me a Petrus er a lotngeklii e ngdimlak lechitii. A Jesus er a lebekiis er a kodall, e ngmlo duum er a Petrus. (Mk. 16:7; Lk. 24:34; 1 Ko. 15:5) Tia ulterekokl el kmal silsichii a rengul a Petrus!

11. Ngmilekera Jesus e olterekokl er a rengul a Petrus el kmo a Jehovah mo support er ngii?

¹¹ A Jesus ulterekokl er a rengul a Petrus el kmo a Jehovah mo support er ngii. Jesus er a lebekiis e ngliluut loeak a mengasireng el rolel e mesterir a chelderir. (Jn. 21:​4-6) Tiang a ulterekeklii a rengul a Petrus el kmo a Jehovah kmal sebechel msang aike el lousbech. Ngar tiaikid el taem e nglocha mlo lmatk a tekingel a Jesus el kmo, a Jehovah mo omesterir tirke el “losiik ra rengedel a Dios” aike el lousbech. (Mt. 6:​33, BT) Aikang el rokui a ngilsuir a Petrus el mo rullii a omesiungel el mo kot er a klengar er ngii, el diak el siobai er ngii er omenged. Ngmle bekeu el omerk er a sils er a Pentekost 33 C.E. e ngilsuterir a rebetok el telael el chad el mo kongei er a ungil chais. (Rel. 2:​14, 37-41) A uriul e ngngilsuterir a rechad er a Samaria me a Rechisentael el mo kongei er a Kristus. (Rel. 8:​14-17; 10:​44-48) Me a Jehovah uluusbech er a Petrus el ngar er a klou el rolel, el olengeseu er a rekakerous el chad el mei er a ongdibel.

12. Ngmekera kerebil a Petrus e ngosukid a lsekum ngmla mo kemanget el taem el di doldechelakl er a chelitechetud?

¹² A Jehovah sebechel ngosukid el melemolem el merael el beduluchei. Nglocha mo meringel er kid a melemolem, ileakl a lsekum ngmla mo kemanget el taem el di doldechelakl er a osisiu el chelitechetud. A lebebil e kede locha mo omdasu el kmo a chelitechetud a lmuut el meringel er aike lechilebangel a Petrus. Engdi Jehovah sebechel smisichid me ngdiak de give up. (Psa. 94:​17-19) El ua tiang, a ta el odam er a uchei er a bo lodengelii a klemerang e nguluusechelei er a resechal el betok el rak. Ngika ngildechii a klengar er ngii e mlo kiei loltirakl er a Biblia. Me nguaisei engdi ngngar ngii aike el taem el blo loldechelakl a mekngit el ngelbesel a rengul. Ngera ngilsuir? Ngkmo: “A Jehovah smisichid. Ngoeak a chedaol reng er ngii . . . , e ak mla suubii el kmo ngsebeched el [melemolem] el merael er a rolel a klemerang . . . A Jehovah mla ousbech er ngak, e melemolem el melisiich er ngak alta ngar ngii a chelitechetuk.”

13. Ngmekera sebeched loukerebai er a Petrus el ua losaod er ngii a Rellir 4:​13, 29, 31? (Dirrek el momes er a siasing.)

 ¹³ Ngua bla dosaod, a Petrus a riruul oberaod el cheleuid lengii el mlo medakt er a rechad. Engdi ngmilluluuch el lolengit er a blekeu, me ngmlo sebechel loba blekeu el meruul a tekoi. (Monguiu er a Rellir 4:​13, 29, 31.) Kid me ngdirrek el sebeched el mo mesisiich er a dekted. Molatk er a Horst el kiliei er a Nazi Germany er a lekekerei el odam. Dektel a uchul me sel lengar er a skuul e ngmo melekoi el kmo “Heil Hitler!” A rechad er a blil a dimlak lecheklii te bai milluluuch lobengkel e olengit er a Jehovah me lebsang a blekeu. Me a Horst a mle sebechel mo mesisiich le rechad er a blil el ngilsuir me ngii a mlo ultuil er a Jehovah. A uriul e ngdilu el kmo: “A Jehovah a kmal dimlak a ta el lechitak.” d

14. Ngmekera sebechir a rungil klekar lolterekokl a rengrir tirke el mla mo mechitechut a rengrir?

¹⁴ Me a Jehovah me a Jesus a kmal diak bo lechitid. A Petrus er a lotngeklii a Jesus, e ngmlo kirel meruul er a klou a ultutelel el omelilt. Ngmo melemolem loltirakl er a Kristus me a lechub e ngdiak? A Jesus a milluluuch el mora Jehovah el kmo lak bo lemechitechut a klaumerang er a Petrus. Nguluuchais er a Petrus el kirel tia el nglunguchel e dilu er ngii el kmo ngoumerang el kmo ngmo smisicheterir a rudam er ngii er uriul. (Lk. 22:​31, 32) A Petrus er a blo lolatk aika el tekingel a Jesus e ngulterekokl el kmal millisiich er ngii! Sel bo el kired el meruul er a klou a ultutelel el omelilt, e a Jehovah locha mo olterekokl er a rengud e ngosukid el melemolem lousbech er a rungil klekar. (Efe. 4:​8, 11) A ta el odam el meketeketa el losiou el ta er a remechuodel a melasem el mengelaod er a rekldemel er a klemerang el ngar tia el rolel. Ngolengit er tirke el sorir el give up me lolatk er a rolel e a Jehovah ulemekrael er  tir el mei er a klemerang. E olterekokl a rengrir el kmo a diak lemengodech el bltikerreng er a Jehovah a uchul me ngdiak bo le give up er tir. Ngmelekoi el kmo, “Ak mla meseterir a rebetok el mle mechitechut a rengrir el melemolem el merael el beduluchei loeak a ngelsuil a Jehovah.”

15. Ngmekera kerebil a Petrus me a Horst e ochotii el kmo a Mateus 6:33 a klemerang?

¹⁵ Ngdi ua Jehovah el ulemsa Petrus me tirke el bebil er a rechapostol aike el lousbech, ngdirrek el mo meskid aike el dousbech sel denguu a omesiunged el mo kot er a klengar er kid. (Mt. 6:33) A Horst el dulsaod er ngii er a uchei a millatk el mo pioneer er a uriul er a Ongeru el Mekemad. Engdi ngika kmal mle chebuul me ngulemdasu el kmo ngdiak el sebechel di ngii el support er ngii e ngar er a mui el taem el omesiou. Me ngmo mekerang? Ngmle soal melasem er a Jehovah. Ngika uluusbech er sel ta el sandei el odngelel a circuit overseer el omerk er a klumech. Ngkmal mlo mechas a rengul e le ulebengelel tia el week e a circuit overseer uldersii a envelope er ngii e dimlak louchais el kmo ngmla er techang. Ngmla er ngii a enough ludoud er a chelsel el sebechel support er ngii e ng pioneer el sesei el buil. A Horst a ulemes er tiang el rolel e a Jehovah ulelterekokl er a rengul el kmo ngmo omekerreu er ngii. Me ngika ngiluu a Renged el mo kot er a klengar er ngii.—Mal. 3:10.

16. Ngera uchul me ngungil dosuub el kirel a kerebil a Petrus me aike el leliluches er a babilengel?

¹⁶ Ngulterekokl el kmal mle dmeu a rengul a Petrus le Jesus a dimlak bo lecheroid er ngii el ua lullengit er ngii. A Kristus a millemolem el train er a Petrus el mo blak a rengul apostol e mo ungil kerebai el kirir a Rekristiano. Ngbetok a desuub er a training el lengiluu. A Petrus a ouchais a lesiluub el ngar er aike el teblo el mlukreng el babilengel el mora ike el ongdibel er a taem er a rekot el Kristiano. A ongingil suobel a mo mesaod a bebil er a uleklatk el dengai er ngii el babier me a rolel a doltaut er chelecha el taem.