1. Ngera el meringel el blekeradel a lebla er ngii a Joas, Usia, me a Josia?

 IMAGINE er kau el dirk ngalek me a lechub e ke ngeasek e mocha king er a rechedal a Dios! Ngmekera obo mousbech er a klisiich el bla mnguu? A Biblia mesaod el kirir a rebebil mekekerei el chad el mlo king er a Juda. El ua tiang, a Joas a mlo king er a le 7 a rekil, Usia mle 16 a rekil, e a Josia mle 8 a rekil. Ka molatk er a berraod el ble le feel er ngii! Me nguaisei, alta te mle chellungel er a klou el berraod engdi te mlongeseu el mo mesisiich omelsemai el blo lechebangel, e riruul a betok lungil el tekoi.

2. Ngera uchul me ngkired el mesuub el kirel a Joas, Usia, me a Josia?

² Kid a diak de king me a lechub e de kuin engdi ngbetok a sebeched el suub er tirka el tedei. Te mirruul a ungil omelilt, engdi te dirrek el mlo remuul a mekngit el omelilt. Kede mo suubii er tir a uchul me ngkired el melilt er a rungil el friends, e kirel melemolem el ngariou a rengud, e blechoel losiik er a Jehovah.

3. Ngera ngmirruul a King Joas el kirel aike el ulekrael el lebilsang a Ngarbab el Prist Jehoiada?

³ Moukerebai er a ungil omelilt er a Joas. A Joas a di mle kekerei e ngmad a demal. Me a Ngarbab el Prist Jehoiada a ulemekeroul e olisechakl er ngii el ua lengelekel. A Joas ulerrenges a ulekrael lulemsang a Jehoiada. Tiakid a uchul me a Joas a ngileltii el mo mesiou er a Jehovah e olengeseu er a rechad el mo meruul uaisei. Ngdirrek el mlo omekbeches er a templo er a Jehovah.—2 Kr. 24:​1, 2, 4, 13, 14.

4. Ngera el klungiaol a dengai sel bo lebetik a rengud er a llechul a Jehovah e doltirakl? (Osisechakl 2:​1, 10-12)

⁴ A lsekum te olisechakl er kau el mo betik a rengum er a Jehovah e mo kiei el oltirakl a llechul, e te omeskau a kmal mekreos el sengk. (Monguiu er a Osisechakl 2:​1, 10-12.) A ruungalek a sebechir el provide a training el ngar er a kakerous el  rolel. Molatk er a rolel e a demal a odos el Katya a ngilsuir el mo ungil melilt. Sel lorader er ngii er a skuul er a bek el sils e ngblechoel el mesaod er a days text lobengkel. A Katya kmo, “A tekoi el ki mulsaod a ngilsukak el handle aike el meringel el situation el duubech er seikid el sils.” Engdi ngkuk mekerang a lsekum aike el ulekrael lomeskau a rechad er a blim a ua lolemall er a freedom er kau? Ngera sebechel ngosukau el mo oltirakl a ulekrael er tir? Odos el Anastasia melatk er a rolel e a rechad er a blil a milengoit a taem el louchais er ngii a uchul me te meruul a rules. Ngkmo, “Tia ngilsukak el mo understand el kmo te dimlak loruul a rules el melasem el control er ngak, e ngbai te protect er ngak e le ngbetik a rengrir er ngak.”

5. Omerellem ngera ngrullii el mora Jehovah me a rechad er a blim? (Osisechakl 22:6; 23:​15, 24, 25)

⁵ Sel moltaut a ulekrael er a Bades el lomeskau a rechad er a blim e ke rulleterir el mo dmeu a rengrir. E a ngaruchei er ngii, ke rullii a Dios el mo dmeu a rengul e mekurulii a mesisiich el deleuill er kau lobengkel. (Monguiu er a Osisechakl 22:6; 23:​15, 24, 25.) Tia ngdiak lebeskau a ungil uchul me ngsoam loukerebai er a Joas er a lekekerei?

6. A Joas ngmlo orrenges er a rua techang, e ngera dilubech? (2 Kronika 24:​17, 18)

⁶ Mngai a klubelem er a mekngit el omelilt er a Joas. Sera er a lemad a Jehoiada, e a Joas a mlo melilt er a remekngit el friends. (Monguiu er a 2 Kronika 24:​17, 18.) Ngmillilt lorrenges er a remengeteklel a Israel el tir a dimlak lebetik a rengrir er a Jehovah. Ke locha mo kmo, a Joas a mle kirel mengeroid er ngii er tirka el meruul a mekngit. (Osi. 1:10) Me nguaisei, engdi ngbai ullerrenges a mekngit el ulekrael er tir. E a lolasem el omeklemalt er ngii a ta er ngii er a Sekaria, e ngmilekodir. (2 Kr. 24:​20, 21; Mt. 23:35) Tia kmal mle mekngit el omeruul! A Joas a mle ungil a klengar er ngii er a uchelel engdi ngika uriul e ngmlo omtok a mera el omengull e omekoad er a rechad. A remesiungel a milekodir. (2 Kr. 24:​22-25) Ngulterekokl el kmal mlo ngodech a klengar er ngii omko ngmillemolem lorrenges er a Jehovah me tirke el betik a rengrir er a Jehovah! Ngera el suobel a soam el ngmai er tia el kerebai er a Biblia?

7. Te ngera ungil molilt er tir el mo friends er kau? (Dirrek el momes er a siasing.)

⁷ A ta er a tekoi el desuubii er a mekngit el omelilt er a Joas a kmo, ngkired el melilt er a re friends el tir a betik a rengrir er a Jehovah e sorir el lodeuir a rengul. A resechelid a diak di le tirke el ua meklunged. Lak mobes el kmo, a Joas a kmal mle kekerei er a sechelil er a Jehoiada. Molatk er a resechelim e di lekau el  oker: ‘Te olengeseu er ngak el melisiich er a klaumerang er ngak er a Jehovah? Te melisiich er ngak el mo kiei loltirakl a llechul a Dios? Sel longedecheduch e te mesaod el kirel a Jehovah me a klemerang er a tekingel? Te mengull a llechul a Jehovah? Te di ouchais er ngak aike el soak lorrenges, me a lechub ngngar ngii a blekengir el omeklemalt er ngak sel bo kuusbech er ngii?’ (Osi. 27:​5, 6, 17) A lsekum a resechelim a diak lebetik a rengrir er a Jehovah, e ngkmal diak mousbech er tir. Engdi a lsekum te ngar ngii a resechelim el betik a rengrir er a Jehovah, e lak mongoit er tir le te ungil kirem.—Osi. 13:20.

8. Ngera ungil dolatk sel dousbech a social media?

⁸ A social media a ungil rolel e ngsebechem el stay in touch lobengterir a resechelim me a telungalek er kau. Me nguaisei engdi te betok er a rechad ousbech er tiang el olechau osengir a rechad el mo er tir loeak a le post a siasing me a video er a tekoi el lomechar e loruul. A lsekum kousbech a social media e di lekau el oker: ‘Ngak, a kuusbech er ngii lolechau osengir a rechad el mei er ngak? A moktek er ngak ngmelisiich er a rebebil me a lechub ak meruul chisek? Ngak a kumechei a uldesuir a rechad el ngar er aikang me ngomekrael er a uldesuek, omelekingek, me a omerellek er a negative el rolel?’ A odam el Nathan Knorr el milsiou el ta er a chedal a Governing Body a milskid tia el advice el kmo: “Lak molasem el meruul a rengrir a rechad. Omuaisei e ngkmal diak bo mrellii a rengul a ngii di el chad. Omoruul er a rengul a Jehovah, e ke mo remuul a rengrir tirke el rokui el betik a rengrir er ngii.”

9. A Jehovah ngera ngngilsuir a Usia el mo kutmokl? (2 Kronika 26:​1-5)

⁹ Moukerebai er a ungil omelilt er a Usia. A Usia er a lengeasek e ngmle ngariou a rengul. Ngsiluubii el mo ‘meluu er a Dios.’ Me a Jehovah ulemekngeltengat er ngii er a klou el tedobech er aike el 68 el rak el lengar. (Monguiu er a 2 Kronika 26:​1-5.) Ngmlo mesisiich er a rebetok el cheraro er a renged e silbecheklii a Jerusalem. (2 Kr. 26:​6-15) A Usia ulterekokl el mle dmeu a rengul er aike el rokui el tekoi el Jehovah a ngilsuir el mo kutmokl.—Oli. 3:​12, 13.

10. Ngera dilubech el mora Usia?

¹⁰ Mngai a klubelem er a mekngit el omelilt er a Usia. A King Usia a mle smau el rechad a di oltirakl a tekingel. Me tiang ngrirellii el mo omdasu el kmo ngsebechel di meruul aike el soal? A ta er a klebesei e ngmlo soiseb er a templo er a Jehovah el mo melul ochod er a olengetongel, el ngii a tekoi el dimlak el sebechir a reking el meruul er ngii. (2 Kr. 26:​16-18) A Ngarbab el Prist Asaria a millasem el omeklemalt er ngii engdi Usia kmal ngilasech a rengul. Ngklengiterreng le Usia dimlak lemelemii a blakerreng er ngii el mora Jehovah e ulebals er a chebedes. (2 Kr. 26:​19-21) Ngulterekokl el kmal mlo ngodech a klengar er ngii omko ngmillemolem el ngariou a rengul! 

11. Ngera mo ochotii el kmo ngngariou a rengud me a lechub e ngdiak? (Dirrek el momes er a siasing.)

¹¹ A Usia er a loleketek a klisichel, e ngulebes el kmo a Jehovah a Uchul a klisichel me a iltetel. Me ngngera klubeled? Ngdiak el kired lobes el kmo a klengeltengat me a techall er omesiou el dolab a mlara Jehovah. Me ngdiak el soad el di kid el chemat er kid e ngbai kired el ngmai a rokui el chetengakl me a odanges el msa Jehovah el kirel aike el tekoi el sebeched el meruul. b (1 Ko. 4:7) Ngkirel el moriou a rengud e kongei el kmo ngdiak demecherrungel  me kede ousbech omesmechokl. A odam el 60 me a derengel a rekil a milluches el kmo: “Ak mla suubii el diak bo lekesib a renguk me a lechub e bo lemechitechut a renguk sel letab a cheleuid el omerellek a rebebil. E sel kngai a omesmechokl el klebelung el cheleuid el omerellek a uchul, e ak melasem el lmuut el melemolem el merael beduluchei.” Sel doluu er a Jehovah e lolemolem el ngariou a rengud, e ngmo ungil a klengar er kid.—Osi. 22:4.

12. Ngmilekera Josia e osiik er a Jehovah er a lengeasek? (2 Kronika 34:​1-3)

¹² Moukerebai er a ungil omelilt er a Josia. A Josia er a lomuchel losiik er a Jehovah e ngdirk mle ngeasek. Ngmle soal mesuub el kirel a Jehovah e mo meruul a soal. Me nguaisei engdi klengar er ngii a dimlak el beot. Ngmle kirel el mo dechor el kirel a mera el omengull er a taem el renged a mui er a klsuul el omengull. E mera el mirruul el uaisei! Uchei er a bo le 20 a rekil, e ngulemuchel loltobed er a klsuul omengull er a renged.—Monguiu er a 2 Kronika 34:​1-3.

13. A telbilel a reng el mora Jehovah, ngngera belkul er kau?

¹³ Ngmo lmuut me a omdirk mkekerei me kau a sebechem el ngiltii el mo oukerebai er a Josia loeak omosiik er a Jehovah e mosuub el kirel a blekerdelel. Tia mo odbechau el mo tibir a klengar er kau el mo er ngii. A telbilel a rengum ngngera ngmo rullii er a klengar er kau? A Luke el miltecholb er a le 14 a rekil a kmo, “Chelecha el mong, e ak mo rullii omesiungek el mora Jehovah el mo kot er a klengar er ngak e mo melasem el oldeu er a rengul.” (Mk. 12:30) Ngklengeltengat el mo er kau a lsekum e ngurungulem el dirrek el mo meruul el uaisei!

14. Mouchais a rolel e a rebebil ngeasek oukerebai er a King Josia.

¹⁴ Me kau el ngeasek el mesiungel a Jehovah, ngera el omelsemai a locha obo mchebangel? A Johan el miltecholb er a le 12 a rekil a mesaod el kirel orimel er a re classmate er ngii el mo ou vape. Ngnguu a klisiich el mo resist orimel er tir loeak sel di lengii el remind er ngii er a kngtil a vaping er a health er ngii me a deleuill er ngii me a Jehovah. A Rachel el miltecholb er a le 14 a rekil a mesaod er a tekoi el  ngosuir el outekangel a omelsemai el lechebangel er a skuul. Ngkmo: “Ak melasem el losiik a tekoi el ngii a remind er ngak er a Biblia me a Jehovah. El ua tiang, a tekoi el ki mosuub el mesaod a reksi a locha mo remind er ngak er a cheldecheduch me a lechub e ngulaoch er a Biblia. Me a lechub a cheldechedechak lobengkel a chad a rullak el mo melatk er a bades el sebechek el share er ngii lobengkel.” Omelsemai el bo mchebangel a locha ngodech er aike el blo lechebangel a King Josia, engdi ngsebechem el mo mellomes a rengum e oba blakerreng el lulebang. Omoutekangel a omelsemai er chelecha el mngeasek a mo ngosukau el outekangel a omelsemai el bo mchebangel sel morael el mo klou.

15. Ngera ngilsuir a Josia el mo blak a rengul mesiou er a Jehovah? (2 Kronika 34:​14, 18-21)

¹⁵ A King Josia er a bo leklou el chad e ngulemuchel er a ureor el omekbeches er a templo. Sera loruul er tia el ureor e te miltik er a “babier er a Llach er a RUBAK, sel Llach el Dios a ngiluu el msa Moses.” A king er a bo lodengei tekoi el llechukl er ngii e ngdi mle mereched el mo oltirakl. (Monguiu er a 2 Kronika 34:​14, 18-21.) Kau, ngsoam el mo blechoel el menguiu er a Biblia? A lsekum ke melasem el meruul er ngii er chelechang, e ke mla mo uangerang? Ke meluches aike el bades el sebechel ngosukau? A Luke el dulsaod er ngii er a uchei a meluches aike el tekoi el lebetik el kmal soal er a chelsel a journal er ngii. Omomdasu e a omoruul er a osisiu el tekoi ngsebechel ngosukau el lmatk a bades me a lechub e ng point el kmal soam? Sel lluut el mo klou a klemedengei er kau me a bltkil a rengum er a Biblia, e ngmengal mo soam el mesiou er a Jehovah. Ke mo ua King Josia el soam el oltaut a tekoi el ngar er a Tekingel a Dios.

16. Ngera uchul me a Josia rirellii a kmal klou el cheleuid, e ngera kede suub er ngii?

¹⁶ Mngai a klubelem er a mekngit el omelilt er a Josia. A Josia er a lebocha el 39 a rekil e ngrirellii a cheleuid el ngii a mlo uchul e ngoridii a klengar er ngii. Ngika mle ultuil er a di ngii e dimlak lolengit a ulekrael er a Jehovah.  (2 Kr. 35:​20-25) Ngngar ngii a desuubii er tiang. A deklou me a dekekerei me a lechub e ngmla mo kemanget el taem el dosuub er a Biblia me a lechub e ngdiak, me kid a kired el blechoel el osiik er a Jehovah. Tia uldimukl er ngii a mo blechoel el meluluuch losiik a ulekrael er ngii, mesuub er a Tekingel, e orrenges a advice er a remesisiich er a klemerang el Kristiano. E seikid e ngdiak bo deruul a meklou el cheleuid el omeruul e ngbai kmal mo dmeu a rengud.—Jak. 1:25.

17. Ngera kede suub er a retedei el king er a Juda?

¹⁷ Ngbetok a ungil techall er a taem er a klengeasek. A cheldecheduch el kirel a klengar er a Joas, Usia, me a Josia a ochotii el kmo a rengeasek a sebechir el ungil melilt e odeuir a rengul a Jehovah loeak a klengar er tir. Nguaisei, el tirka riruul a cheleuid el mlo uchul me a mekngit a dilubech. Engdi ngsebeched loukerebai aike el lungil lurruul e mengeroid er kid er aike el cheleuid el leriruul. E seikid e ngsebechel mo ungil, e deurreng a klengar er kau.

18. Ngera el kerebai er a Biblia ochotii el kmo ngsebechel mo ungil a klengar er kau? (Dirrek el momes er a siasing.)

¹⁸ Ngar ngii a lmuut el bebil er a cheldecheduch er a Biblia el kirir a rengeasek el ulekeed er tir er a Jehovah, e uleba kengei er ngii, e mlo ungil a klengar er tir. A David a ta er tir. Sera lekekerei e ngngileltii el mo dechor el kirel a Jehovah. A uriul e ngmlo ta er a blak a rengul el king. Nguaisei el ngar ngii aike el taem e ngmlo remuul a cheleuid, engdi Dios ulemes er ngii el kmo nguleba blakerreng. (1 Ki. 3:6; 9:​4, 5; 14:8) Ngsebechem el ngmai omelisiich sel mosuub el kirel a klengar me a blakerreng er a David. Me a lechub e ngsebechem el mesuub el kirel a Markus me a lechub e ng Timothy. Ke mo mesa el kmo te di mle mekekerei e mo mesiou er a Jehovah e uleba kengei er ngii er a klemengetel a klengar er tir el rokir, e mle ungil a klengar er tir.

19. Ngmekera e mo ungil a klengar er kau?

¹⁹ A rolel omousbech er a klengar er kau er chelechang a mo oterekeklii el kmo, ngmo ua ngera klengar er kau er a ngar medad. Kau el oumerang er a Jehovah el diak el llemesem, a mo rullii a Jehovah el mo omekrael a blekeklel ochim. (Osi. 20:24) Ngkmal sebechel mo ungil e happy a klengar er kau. Lak mobes el kmo, a Jehovah mengreos aike el moruul el kirel. Ngera lmuut el lungil rolel a klengar el ua sel mousbech er a klengar er kau el mesiou er a betik a rengul Demad el ngar er a eanged?