1. Uchei er a lemad a apostol Petrus, e ngmlukreng el mo mekerang?

 APOSTOL Petrus a mle medengei el kmo ngdi kmedung e ngmo mad. Ngika mla mo betok el rak el leblak a rengul el mesiou er a Jehovah. Ngulebengkel a Jesus el omerk er a klumech, e ulemuchel er a ureor er a berkel a klumech el mora rediak el chad er a Chijudea, e a uriul e ngmlo ta er a chedal a governing body. Me nguaisei, engdi ngdirk mle betok a ureor el kirel meruul. Ngar er a bekord el 62-64 C.E. e ngmlukreng el mo meluches er a babier er a Kot me a Ongerung el Petrus. Ngmle omeltkel el kmo aika el babier bo lolengeseu er a Rekristiano er a uriul er a kodellel.—2 Pe. 1:​12-15.

2. Ngera uchul me te kmal luluusbech aike el babier el leliluches a Petrus?

² Petrus a liluches aika el babilengel er a taem el rekldemel er a klemerang a mle “chuarm a bek el bedengel a ringel.” (1 Pe. 1:6) A remekngit el chad a mlo melasem lolsiseb a klsuul el osisechakl me a diak el klikiid el omeruul er a chelsel ongdibel. (2 Pe. 2:​1, 2, 14) A Rekristiano el kiliei er a Jerusalem a mle medengei el kmo ngdi kmedung e ngmei a “ulebongel er a rokui el tekoi,” el mats a mo metemall me a beluu a bo lenguu a resoldau er a Rom. (1 Pe. 4:7) A babilengel a Petrus a ulterekokl el ngilsuterir a Rekristiano el mo medengei aike el sebechir el meruul el outekangel a ringel el lechelebangel me aike el dirk merael el mei. b

3. Ngera uchul me ngungil dorriter a mlukreng el babilengel a Petrus?

³ A Petrus a milluches aika el babilengel el mora Rekristiano er a irechar me nguaisei engdi Jehovah uldak aika el babier er a Tekingel. Me ngsebeched el melai a klubeled er ngii. (Rom 15:4) Kid el kiei er a beluulechad el melisiich a diak el klikiid el omeruul, a uchul me kede dirrek el mo chobangel a tekoi el rullii el mo meringel er kid a mesiou er a Jehovah. Me a lmuut kung, ngdi kmedung  e kede mo chobengelii a kloul ringel el lmuut el meringel er sel ulebongel el mlora rechad er a Chijudea. Kede metik a meklou a ultutelel el uleklatk er aika el teblo el babilengel a Petrus. Tia mo ngosukid el mo kltmokl el kirel a sils er a Jehovah, e mo diak demedakt er a rechad, e mekurulii a mesisiich el bltikerreng er a delongeled. Aika el uleklatk a dirrek el ngosuterir a remechuodel el mo ungil msang a delebechel aike el lousbech.

4. Ngua losaod a 2 Petrus 3:​3, 4, ngngera sebechel rullii el mo ouedikel a klaumerang er kid?

⁴ Kede iliuekl er a rechad el diak a klaumerang er tir er a ulaoch er a Biblia. A rumtok a locha mo mededenguul er kid e le ngmla mo betok el rak el dolekoi el kmo a ulebongel a kmedang. A rebebil a kmo ngkmal diak lemei a ulebongel. (Monguiu er a 2 Petrus 3:​3, 4.) A lsekum kede remenges aika el tekoi er a chad er a blai, chad er a ureor, me a lechub e ngchedad e ngsebechel mo ouedikel a klaumerang er kid. A Petrus ouchais er a mo ngosukid.

5. Ngera sebechel ngosukid el mo melemalt osenged el kirel a temel a okngemedel tia el mekngit el blekeradel? (2 Petrus 3:​8, 9)

⁵ A rebebil a locha mo omdasu el kmo a Jehovah kmal meoud el olekngemed er tia el mekngit el blekeradel. A tekingel a Petrus a ngosukid le ngomeklatk er kid el kmo a osengel a Jehovah er a taem a ngodech er a rechad. (Monguiu er a 2 Petrus 3:​8, 9.) A ta el telael el rak er osengel a Jehovah a di ua ta el sils. Jehovah a klou a rengul le ngdiak el soal a ngii di el chad a lengemed. Me nguaisei, engdi sel lemei a sils er ngii e tia el blekeradel a mo nguemed. Ngmera el ileakl a techall el dobang er chelechang lousbech er a taem el medechel el omerk el mora rechad er a rokui el renged.

6. Ngmekera e mo “blak a [rengud] lorreched” er a sils er a Jehovah? (2 Petrus 3:​11, 12, BT)

⁶ A Petrus a mengelechel er kid el mo “blak a [rengud] lorreched” er a sils er a Jehovah. (Monguiu er a 2 Petrus 3:​11, 12, BT. c) Ngmekera doruul er tiang? Bek el sils e ngsoad el melasem el melebedebek a klengeltengat el mo er ngii er a beches el blekeradel. Imagine er kau el outeliil er a clean el eolt, mengang a kall lungil er a bedenged, e outkeu er a rebetik er a rengum el mla mekiis er a kodall, e olisechakl er a rechad el kiliei er a irechar el kirel a otutel a ulaoch er a Biblia. Omelebedebeked er aika el tekoi a mo ngosukid me kede kltmokl el kirel tiakid el taem e rullid me ngdiak bo doumededenger er a taem el dekiei er ngii. Sel ‘dodengei’ a mo duubech er a ngar medad, e ngdiak de ‘metuchakl’ er a rechad lolisechakl a klsuul losisechakl.—2 Pe. 3:17.

7. Ngera ngsebechel rullii el mei er kid a dakt er a rechad?

⁷ Kede medengei el kmo a sils er a Jehovah kmal kmedang a uchul me kede mora tkurrebab el sebeched el omerk er a ungil chais el mora rechad. Me nguaisei engdi ngngar er a chelsel a bebil blekeradel e kede locha medakt el mengedecheduch. E ngerang? E le kede mo medakt a uldesuir a rechad. Tiakid a dilubech el mora Petrus. Sel kesus er a lenguu a Jesus el mora kerrekeriil, e a Petrus a mle medakt el louchais el kmo ngta er a disaiplo er a Jesus e mle edei el taem el ledu el kmo ngdiak lodengelii. (Mt. 26:​69-75) Uriul e ngika el osisiu el apostol a mle sebechel ulterekokl a rengul el melekoi el kmo: “Me lako medakd er tir a lorrouk, ma kele louedikel ku rengmiu.” (1 Pe. 3:​14, BT) Tekingel a Petrus olterekokl a rengud el kmo ngsebeched el mo mesisiich er a dekted er a rechad.

8. Ngera sebechel ngosukid el mo mesisiich er a dekted er a rechad? (1 Petrus 3:15)

⁸ Ngera sebechel ngosukid el mo mesisiich er  a dekted er a rechad? A Petrus a kmo: “Mongull er a Kristus er a rengmiu el kmo ng Rubak.” (Monguiu er a 1 Petrus 3:15.) Ngsebeched el melebedebek er a deruchall me a klisiich el lobang a Rubak e King er kid el Kristus Jesus. A lsekum e ngmo er ngii a techall el sebechem el share er a ungil chais er a chad engdi ke medakt, e molatk er a King er kid. Em imagine er ngii el ngar er a eanged el mengedereder e iliuekl er a rediak el mochur el anghel. E molatk el kmo ngolab a “rokui el klisiich er omerreder er a eanged ma beluulchad” me ngii a “mo [obengkem] el di blechoel el mo lmuut er a ulebongel er a beluulchad.” (Mt. 28:​18-20) A Petrus a mengelechel er kid el “[mo] blechoel el di kldmokl” el mesebechakl er a klaumerang er kid. Kau, ngsoam el omerk er a klumech er a urerem, skulem, me a lechub e ngkuk ta er a basio? Di luchei e molatk er a rolel e ngsebechem el meruul er ngii, e mketmokl aike el bo molekoi. Moluluuch lolengit er a blekeu, e moumerang el kmo a Jehovah mo ngosukau el mo mesisiich er a dektem er a rechad.—Rel. 4:29.

9. Oingera el taem e a Petrus a mlo diak lolecholt er a bltikerreng? (Dirrek el momes er a siasing.)

⁹ Petrus a silubii el mo meduch lolecholt er a bltikerreng. Ngmla er sei er a ledu Jesus el kmo: “Bo mkaubltikerreng. Ng kiriu el kaubltikerreng el ua ngak a kuubltikerreng el ekor kemiu.” (Jn. 13:34) Me nguaisei engdi a Petrus a uriul e ngdimlak el kengei el omengur lobengterir a rudam me a rudos er ngii el chad er a Chisentael.  Apostol Paulus a millekoi el kmo tia el tekoi lurruul er ngii a Petrus a ‘cheleblad’ el tekoi. (Gal. 2:​11-14) A Petrus a kilengei er tia el omesmechokl e ngilai a klubelel er ngii. Ngar er aika el teblo el babilengel e ngmillisiich er a klungel a ultutelel a lak di bo lebetik a rengud er a rudam me a rudos er kid, ngdirrek el kired el olecholt er ngii el bltikerreng.

10. Ngera ngosukid el mo “oba diak a cheleblad er ngii el bltikerreng”? (1 Petrus 1:​22, BT)

¹⁰ A Petrus a dilu el kmo ngkired el mo “oba diak a cheleblad er ngii el bltikerreng” el mora rekldemed er a klemerang. (Monguiu er a 1 Petrus 1:​22, BT. d) Kede mo oba tia el bltikerreng sel ‘debekongesenges ra klemerang.’ Tia el klemerang a uldimukl er ngii a “Dios a diak longetukel rar chad.” (Rel. 10:​34, 35, BT) Ngdiak el sebeched el kmo kede olengesenges er a llach er a Jesus el kirel a bltikerreng, a lsekum kede di olecholt er a bltikerreng el mora rebebil el chedal ongdibel e a rekuk bebil a diak. Nguaisei el kede locha ua Jesus el close er a rebebil el chad er a ongdibel er a rekuk bebil. (Jn. 13:23; 20:2) Engdi Petrus omeklatk er kid el kmo ngkired el mo oba “bltikerreng ra klaodam,” el belkul a kmo kede mo betik a rengud er a rokui el odam me a odos.—1 Pe. 2:17.

11. Ngera belkul a bo le “mekeald a [rengud] el kaubltikerreng”?

¹¹ Petrus a millisiich er kid el mo “mekeald a [rengud] el kaubltikerreng.” Sel domes er a bades e a belkul a tekingel el “mekeald” loubltikerreng a kmo, kede mo betik a rengud er a chad el mo lmuut me a lemeringel er kid olecholt er a bltikerreng el mo er ngii. El ua tiang, kede mo mekerang a lsekum a odam a kingtir a rengud? A blekerdeled a locha diak bo dolecholt a bltikerreng e ngbai mo soad el melaitechei. Engdi a Petrus a silubii er a Jesus el kmo tia el blekeradel a diak lodeuir a rengul a Dios. (Jn. 18:​10, 11) A Petrus a milluches el kmo: “Lak momtechei a mekngit el oba mekngit el ka momtechei a mekngit el omelekoi el oba mekngit el omelekoi; bai momekngeltengat.” (1 Pe. 3:9) Sel bo moba mekeald el bltikerreng e ngrullau el mo ungil omerellem e melatk er a rechad, mo lmuut er tirke el mla kingtir a rengum.

12. (a) Sel bo demera el kaubltikerreng e ngdirrek el ngosukid el mo mekerang? (b) Ngera soam el mo meruul er ngii, el ua desang er a video el Preserve the Precious Gift of Unity?

¹² Ngar sel kot el babilengel a Petrus e nguluusbech er a tekoi el “bo meral kaubltikerreng.” Chouaitia el bltikerreng a diak di ledekedek a bebil klengit, e ngbai dokedek a “betok el klengit.” (1 Pe. 4:8) Petrus a locha mlo melatk er a klausubes el Jesus ulsisecheklii er ngii er a betok el rak er uchei. Tiakid el taem e a Petrus a locha ulemdasu el kmo ngungil omerellel a lsekum ngmo ousubes er a odam er ngii el “euid” el taem. Engdi Jesus ulsisecheklii e osisecheklid el kmo ngkired el lousubes el “mo okeuid el euid el chachisois,” el belkul a kmo ngdiak a telkelel a dousubes. (Mt. 18:​21, 22) A lsekum e ngmeringel er kau oltaut er tia el tekingel, e lak bo lemechitechut a rengum! Rokui el mesiungel a Jehovah a diak lemecherrungel me ngngar ngii aike el taem el bo lemeringel er tir ousubes. Sel kot el klou a ultutelel el tekoi er chelechang a mo meruul aike el rokui el sebechem el mo ousubes er a odam er kau e rullii a budech lobengkel. e

13. Ngera rullii el mo meringel er a remechuodel a omekerreu er a rudam me a rudos er tir?

¹³ Petrus a locha kmal dimlak lobes aike el ledilu er ngii a Jesus er uriul er a lebekiis: “Momecheliu a chermek el sib.” (Jn. 21:16) A lsekum  ke ta er a remechuodel e ke medengei el kmo aika el tekingel a dirrek el melutk er kau. Engdi ngsebechel mo meringel er a mechuodel a metik er a taem el mo meruul er tia el kmal klou a ultutelel el ngerechelel. A remechuodel a kirir el kot e te omekerreu er a telungalek er tir er aike el lousbech er a bedengir, uldesuir, me a tekoi er a klereng er tir. Te blak a rengrir el lomerk er a klumech e mengetmokl e oltobed a part er tir er a miting, assembly, me a convention. A rebebil er tir a dirrek el chedal a Hospital Liaison Committee me a lechub e te olengeseu er a Local Design/Construction Department. Te mera el mechesang el chad a remechuodel!

14. Ngera mo ngosuterir a remechuodel el omekerreu er a delebechel? (1 Petrus 5:​1-4)

¹⁴ A Petrus a milengelechel er a remechuodel el kmo, “momekerreu er a delebechel el sib er a Dios.” (Monguiu er a 1 Petrus 5:​1-4.) A lsekum ke ta er a remechuodel e aki medengei el kmo ngbetik a rengum er a rudam me a rudos er kau e soam el omekerreu er tir. Me nguaisei engdi a lebebil er a taem e ke locha mo feel el kmo ke kmal mechesang me a lechub e ngkmal mesaul a bedengem me ngdiak el sebechem el rullii tia el ngerechelem. Ngera sebechem el meruul er ngii? Mouchais er a Jehovah aike el rokui el suebek a rengum er ngii. A Petrus a kmo: “Ngikel mesiou a kirel el mesiou el olab a klisichel el le bsa Dios.” (1 Pe. 4:11) A rudam me a rudos er kau a locha chelebangel a mondai el diak el sebechel mesmechokl er chelecha el taem. Engdi lak mobes el kmo, a “Bderrir a re Mengkerngel a sib” el Jesus Kristus, a sebechel ngosuterir lengelakl er aike el sebechem el remuul. Ngsebechel ngosuterir er chelechang me a chelsel a beches el blekeradel. A di lolengit er ngii a Dios er a remechuodel er chelechang a mo betik a rengrir er a rudam er tir, omekerreu er a rudam er tir, e mo “[ungil] el ocholt el mor a delebechel el sib.”

15. Ngmekera ta el mechuodel a lomekerreu er a delebechel? (Dirrek el momes er a siasing.)

¹⁵ A William el ta er a meketeketa el mechuodel a medengelii a klungel a ultutelel a de shepherd. Sera lomuchel a COVID-19 el pandemic e ngii me tirke el bebil er a remechuodel a mlo every week el kerekikl el contact er a rederta el chedal a group er tir. Ngmesaod er a uchul: “A rebetok er a rudam a di mle tir el tang el ngar er a keblirir me ngmle sebechir el di mereched el mo omdasu a negative el uldasu.” Sel lengar ngii a mondai er a odam me a lechub e ngodos, e a William a kerekikl el lorrenges me lsebechel mo  medengei el kmo ngngera ngsuebek a rengul er ngii me a ngera lousbech. E a uriul e ngosiik a ileakl el suobel me a lechub e ng video er a website er kid el lsebechel lousbech el melisiich er ngii. Ngkmo: “A rudam me a rudos er kid a kmal lousbech el de shepherd er tir er chelechang. Kede blak a rengud loureor el olengeseu er a rechad el mo medengelii a Jehovah, ngdirrek el kired el mo blak a rengud el omekerreu er a delebechel, lolengeseu er a resib er a Jehovah el melemolem el ngar er a klemerang.”

16. Ngera bebil er a rolel e ngsebeched loltaut aika el tekoi el bla desuub er a babilengel a Petrus?

¹⁶ Kede mla smaod a di bebil er a tekoi el sebeched el suub er aika el teblo el mlukreng el babilengel a Petrus. Ke locha mla mtebengii a tekoi el soam el mo oureor el kirel. El ua tiang, kau ngsoam el lmuut el mo betok el molebedebek aike el klengeltengat el mo er ngii er a beches el blekeradel? Ke mla rullii a turrekong er kau el omerk er a klumech er a ureor, skuul, me a lechub e ngkuk ta er a basio? Ke mla mes a rolel e ngsebechem lochotii a mekeald el bltikerreng el mora rudam me a rudos er kau? Remechuodel, ko mla rullii er a rengmiu el mo omekerreu er a resib er a Jehovah el lungil e mera el ngar er a rengmiu el meruul el uaisei? Omera el di mo kau el merriter er kau e ke locha mo metik el kmo, ngngar ngii a kirem el loureor er ngii. Me nguaisei, engdi lak bo lemechitechut a rengum. “A Rubak a bekokuii,” me ngmo ngosukau el oureor el kirel. (1 Pe. 2:3) Petrus olterekokl er a rengud el kmo: “A Dios . . . a mo churrengelii a training er kemiu. Ngmo mtebechelemiu, e mo smisichemiu, e mo dolemii a klengar er kemiu er a meduch el omekedecheraol.”—1 Pe. 5:​10, NW. 

17. Ngera mo duubech a lsekum kede melemolem el merael el beduluchei e mecherei a Jehovah me ng train er kid?

¹⁷ Petrus a mla er ngii a taem el ble le feel el kmo ngdiak el rredemelel obengkel a Ngelekel a Dios. (Lk. 5:8) Ngoeak a ngelsuil a Jehovah me a Jesus e a Petrus a mle sebechel melemolem loltirakl er a Kristus. Me a Petrus a ngiluu a “[siseb] er a diak a ulebengelel Rengedel a Rubak er kid e Osebeled el Jesus Kristus.” (2 Pe. 1:11) Ngmera el ileakl el nguked! A lsekum ke mo ua Petrus el melemolem el merael el beduluchei e mecherei a Jehovah me ng train er kau, e ke dirrek el mo nguu a nguked er a diak a ulebengelel el klengar. Ke mo nguu “cholsobel ra reng er kemiu el rodech ra kloumerang.”—1 Pe. 1:​9, BT.