1-2. Ngera uchul me a remesiungel a Dios a dmeu a rengrir? (Jakobus 1:​22-25, BT)

 A JEHOVAH me a Ngelekel a sorir a bo ledeu a rengud. Ngike el milluches er a Psalm 119:2 (NW) a kmo: “Ngdmeu a rengrir tirke el oltaut a tekingel, el osiik er ngii el oba rengrir el rokir.” Me a lmuut kung, a Jesus a dilu el kmo: “Ngdmeu a rengrir tirke el rongesii a tekingel a Dios e mo oltirakl!”—Lk. 11:​28, NW.

² A remesiungel a Jehovah a dmeu a rengrir el chad. E ngerang? Ngkmal betok a uchul engdi ta er a klou a ultutelel el luchul a kid el menguiu er a Tekingel a Dios, e mora tkurrebab el klisiched el oltaut aike el dosuub.—Monguiu er a Jakobus 1:​22-25, BT. a

3. Ngmekera mo uchul a klungioled sel doltaut aike el donguiu er a Tekingel a Dios?

³ Ngbetok a klungiaol el dengai sel bo “[dechad] er chotutel a Tekoi.” El ua tiang, sel doltaut aike el dosuub er a Tekingel a Dios, e kede odeuir a rengul a Jehovah, e tiang a meskid a deurreng. (Oli. 12:13) Sel doltaut aike el dosuub er a mlukreng el Tekingel a Dios e ngmo ungil a klengar er a telungalek er kid me kid a toketek a mesisiich el deleuill er kid me a rechedal ongdibel. Tia ulterekokl el mla duubech er a chelsel a klengar er kau. Kede dirrek el mochib er aike el betok el mondai el bo lechebangel tirke el diak loltirakl a llechul a Jehovah. Kede kmal kongei a tekingel a King David, el uriul er a longitakl el mesaod a llechul me a kerrekerilel a Jehovah e ngmilengitakl el kmo: “Ngak a nguu omeksullek a kulengesenges.”—Psa. 19:​7-11.

4. Ngera uchul me ngdiak lebeot a bo dechad er otutel a Tekingel a Dios?

 ⁴ Me nguaisei engdi ngdiak leblechoel beot a donguiu e doltaut aike el dosuub er a Tekingel a Dios. Kede kmal mechesang er a klengar me ngkired el kutmeklii a temed el mo menguiu e mesuub er a Biblia me bo dodengelii a soal a Jehovah a doruul er ngii. Mada me de review a bebil el ngeso er a uldasu el sebechel ngosukid el mo menguiu er a Biblia er a bek el sils. Kede dirrek el mo merriter aike el sebechel ngosukid el mo melebedebek aike el donguiu e mo mesaod a rolel e ngsebeched el loltaut aike el dosuub er a chelsel a klengar er kid.

MKETMEKLII A TEMEM EL MENGUIU ER A TEKINGEL A DIOS

5. Ngera el ngerachel a locha nguu a klou er a temed?

⁵ Ruumesingd el chedal a Jehovah a kmal mechesang. Kede mengoit er a klou el taem el meruul a ngerecheled er a Biblia. El ua tiang, betok er kid a oureor el mesiou er kid me a telungalek er kid. (1 Ti. 5:8) A rebetok el Kristiano omekerreu er a resmecher me a lechub e te mechudelang el chederir. E kid el rokui ousbech el take care er a health er kid e tia ousbech a taem. Me a lmuut kung, ngdiak di dolab aika el ngerachel ngdirrek el ngar ngii a ngerecheled er a ongdibel. A ta er a klou a ultutelel el ngerachel el dobang a omerk er a klumech. Me kau el locha kmal betok a ngerechelem, ngmekera sebechem el metik er a taem el mo menguiu er a Biblia er kau er a bek el sils, e melebedebek aike el monguiu, e oltaut?

6. Ngmekera sebechem el make sure el menguiu er a Biblia? (Dirrek el momes er a siasing.)

⁶ A omengiuel a Biblia ta er aike el “meklou a ultutelel el tekoi” er kid a Rekristiano, e kired el make sure el meruul er ngii. (Fil. 1:​10, NW) A kot el bliongel er a Psalm a melekoi er a dmeu a rengul el chad el kmo: “Ng . . . semeriar er a llechul a RUBAK, me ng mesuub er ngii er a llomes ma klebesei.” (Psa. 1:​1, 2, NW) Me ngbleketakl el kmo ngkired el mengoit a taem el menguiu. Oingerang a kot lungil taem el donguiu er a Biblia? Nglocha mo kakerous a nger er a rederta er kid. Sel klou a ultutelel a dengiltii a taem el ngii a mo ngosukid el mo  menguiu er a Biblia er a bek el sils. A odam el Victor a kmo: “Ngsoak el menguiu er a Biblia er ngak sel letutau. Alta ngmeringel er ngak a mekiis er a kmal dirk tutau, me nguaisei engdi tia sel taem el diak a mengesang er ngak. Ngklekar a uldesuek e beot er ngak a focus.” Tia locha dirrek el klemerang el kirem. Di lekau el oker, ‘Ngak, ngngera sel kot lungil taem el kirek, el mo menguiu er a Biblia?’

MOLATK AIKE EL MONGUIU

7-8. Ngera sebechel mo uchul me ngdiak dengai a klungioled er aike el donguiu? Momekesiu.

⁷ Sel donguiu e kede locha mo chemuiu a betok me nguaisei engdi nglocha diak el siseb. Ngmla ta el mchiuii a kmung ngerang e a kedeb el taem er uriul e ke mla obes a tekoi el mchiluiu? Tia mla duubech el mei er kid el rokui. Ngklengiterreng e le tia sebechel dirrek el duubech el mora omengiued er a Biblia. Kede locha mla rullii a turrekong er kid el mo menguiu a ileakl el ildisel a bliongel er a Biblia er a bek el sils. Ngmera el ungil tekoi. Ngkired el remuul a turrekong e mo oltaut. (1 Ko. 9:​26, BT) Me nguaisei a omengiuel a Biblia ungil rolel omomuchel engdi tia di uchelel. A lsoad el mui ngmai a klungioled er a Biblia e ngkired el meruul a lmuut el betok er a di menguiu er ngii.

⁸ Molatk er tia el okesiu: A ralm el ruebet el chull a kmal klou a ultutelel el kirel a dellomel. Engdi lsekum e ngkmal mo klou a chull er a chelsel a di kekedeb el taem e ngsebechel a chutem el mo delelualu a ralm er ngii. Sel leduubech tiang e ngkuk mla mo diak a klungiolel a chull. A chutem ousbech el mo nguim a ralm me lsebechel a dellomel el ngmai a klungiolel er ngii. Ngdi osisiu, ngdiak el soad el di mo orrechereched el menguiu me ngdiak el siseb a tekoi el donguiu.—Jak. 1:24.

9. Ngera ungil doruul er ngii a lsekum kede mtebengii el kmo kede di orrechereched sel donguiu er a Biblia?

⁹ Kau, ke metik el kmo ngngar ngii aike el taem el di bo morrechereched el menguiu er a Biblia? Ngera ungil moruul er ngii? Bom soro el menguiu. Molatk a tekoi el monguiu. Tia diak el meringel. Ngsebechem el komengetii a temem el mesuub me lebo er ngii a taem el molebedebek a omonguiu. Me a lechub e ke melilt el di menguiu a kesai el bades e ousbech  aike el taem el medechel el mo melatk a tekoi el mulenguiu. A Victor el dulsaod er ngii er a uchelel a kmo: “Ak rullii me ngdi kedeb omengiuek er a Biblia. E ngak el menguiu er a kmal dirk tutau a uchul me ngsebechek el melatk aike el kulenguiu el ta el sils.” Me ngsebechem el melilt a ildisel a soam el menguiu. A klou a ultutelel omsoro el menguiu me lsebechem el melatk aike el monguiu.—Psa. 119:97; momes er a baks el “ Ker el Ungil Dolatk.”

10. Momekesiu er a rolel e ngsebechem loltaut aike el mosuub. (1 Thesalonika 5:​17, 18)

¹⁰ Me a ngii di el taem el monguiu er a Biblia me a klungel a taem el moruul er ngii, e mosiik a rolel e ngsebechem el loltaut aike el monguiu. Sel monguiu er a Biblia e di lekau el oker, ‘Ngmekera sebechek el loltaut er ngii er chelechang me a lechub e ngngar medak el taem?’ Ka me dedu el kmo a omengiuem er a Biblia uldimukl er ngii a 1 Thesalonika 5:​17, 18. (Monguiu.) Uriul er a omchuiu aika el teblo el bades e ngsebechem el stob e melatk a ildisel a taem el moluluuch me a delechel a nglunguchem. Ngdirrek el sebechem el melatk aike el tekoi el moba omereng el saul el kirel. Ke locha melilt el mo oureng a sulel a Jehovah el kirel a kldei el tekoi. Ngdi sesei el bung el molatk aikang e ngosukau el mo omtab e oltaut aike el lolekoi a Tekingel a Dios. Molatk a klungiaol el bo mngai omoruul er tiang sel bek el taem el monguiu er a Biblia! Chochoi ke mo mukeroul el chad er otutel a Tekingel a Dios. Engdi ngkuk mekerang a lsekum ngkmal betok a kirem loureor el kirel?

MORUUL A TABESUL TURREKONG

11. Ngera me a lebebil e ke locha mo feel er a klou el berraod? Mouchais er a ta er a example.

¹¹ Sel monguiu er a Biblia e mosiik a rolel e ngsebechem loltaut a ulekrael er ngii, e nglocha ngar ngii aike el taem el kmal mo oberaod a rengum. Molatk er tiang: Omengiuem er a Biblia er chelecha el sils a locha ngar ngii a ulekrael el kirel a kmo, ngdiak el kirel ngar ngii a chetid me a soad el chad. (Jak. 2:​1-8) Ke mes a rolel e ngsebechel lmuut el mo ungil omerellem me ke melatk a meruul omelodech. Ngkmal ungil! E a kuk bo lekukuk e a omengiuem a melisiich er a klungel a ultutelel omutebechelii a ngerem. (Jak. 3:​1-12) Ke mtebengii el kmo ngngar ngii aike el taem el mo diak lungil a cheldechedecham. Me ke rullii er a rengum el kmo a cheldechedecham a mo positive e meleketek. E a omengiuem er a Biblia er a ongingil sils a kuk mesaod el kirel a mo kerekikl me ngdiak bo desechelil tia el beluulechad. (Jak. 4:​4-12) Ke mtebengar el kmo ngkirem el mo kerekikl a rolel ongelaod el molilt. Me a ongeua el sils e ke mla mo feel er a klou el berraod er a ildisel aika el tekoi el kirem el loureor er ngii.

12. Ngera uchul me ngdiak el kirel mo mechitechut a rengum a lsekum omengiuem er a Biblia ochotii el kmo ngkirem el meruul omelodech? (Dirrek el momes er a footnote.)

 ¹² A lsekum e ngngar ngii a bebil el tekoi el kirem el loureor el kirel e lak bo lemechitechut a rengum. Tia ochotii el kmo ngngariou a rengum e melemalt a moktek er a rengum. A chad el ngariou a rengul e honest sel lolatk el kirel, a menguiu er a Biblia losiik aike el kirel el loureor er ngii. b Lak mobes el kmo ngkired el melemolem el lomekbail er kid er “ngikel beches el chad.” (Kol. 3:​10, BT; momekesiu er a study note el “is being made new.”) Ngera mo ngosukau el mo melemolem el chad er a otutel a Tekingel a Dios?

13. Ngera ungil rolel e ngsebechem el loltaut aike el omsuub? (Dirrek el momes er a siasing.)

¹³ Mrellii chimong me a lechub e ngteblo el turrekong er a bai molasem el oltaut a rokui el tekoi el monguiu. (Osi. 11:​2, NW) Nglocha sebechem el melasem er tiang: Mlechesii a list er kau er a tekoi el kirem el loureor e mngiltii a chimong me a lechub e ngteblo er ngii el bo moureor er ngii el kot, e moureor er aike el bebil er a uriul. Me ngungil momuchel er ker?

14. Ngsebechem lomuchel el meruul er a ngera el turrekong?

¹⁴ Ke locha omuchel el meruul er a turrekong el beot er kau otutii. Me a lechub e ke ngiltii el mo oureor er a tekoi el kmal mousbech el lolengeriakl er ngii. Me sel bla mngiltii a turrekong er kau e moruul a research lousbech aika el babilenged, el ua Watch Tower Publications Index me a lechub e ng Research Guide for Jehovah’s Witnesses. Moluluuch el kirel a turrekong er kau e molengit er a Jehovah me ‘loureor er a rengum me bo le soam e le sebechem  el meruul a ikel soal.’ (Fil. 2:13) E molasem loltaut aika el bla msuub. Sel mrellii sel kot el turrekong er kau e nglocha mo odbechau el mo meruul er a lmuut el ta er a turrekong. Sel moureor el meruul er a ta er a omelodech me a lechub e komekeroul er a ta er a blekerdelir a Rekristiano, e ke locha mo metik el kmo ngmo beot er kau oureor a lmuut el bebil er a tekoi.

BECHEREI A TEKINGEL A DIOS ME ‘LOUREOR RA CHELSIU’

15. Te mekera rechedal a Jehovah e ngodech er a rebetok el menguiu er a Biblia? (1 Thesalonika 2:​13, BT)

¹⁵ A rebebil er a rechad a melekoi el kmo ngmla mo betok el taem el lechiuii a Biblia. Engdi tirkang, te mera el loumerang aike el lolisechakl a Biblia? Te oltaut aike el lolekoi me a lechub e te omechei er ngii me ngomekrael er a klengar er tir? Ngklengiterreng, e le ruumesingd er a rechad a diak leuaisei. Engdi rechedal a Jehovah kmal ngodech! Ngdi ua rekot el Kristiano, kede kongei er a Biblia el kmo “ngmeral tikingel a Dios.” Me a lmuut kung, kede mora tkurrebab el klisiched el lochotii el kmo a Tekingel a Dios a oureor er a chelsel a klengar er kid.—Monguiu er a 1 Thesalonika 2:​13, BT. c

16. Ngera sebechel ngosukid el mo chad er otutel a Tekingel a Dios?

¹⁶ Ngdiak leblechoel el beot a donguiu e doltaut a Tekingel a Dios. Nglocha meringel er kid a metik a taem el mo menguiu er ngii. Me a lechub e kede di orrechereched el menguiu er ngii me ngdiak dengai a betok er ngii. Me a lechub e kede mo feel er a klou el berraod er a betok el tekoi el kired el loureor el kirel. A ngii di el omelsemai el omchebangel er ngii a sebechem el mo mesisiich er ngii. Ngoeak a ngelsuil a Jehovah e ngsebechem el mo mesisiich er ngii. Me derellii er a rengud el mo kongei a ngelsuil a Jehovah e bo dechad er omeruul el diak dechad el di remenges e obes. Ngkmal ulterekokl el kmo a bo di donguiu er a Tekingel a Dios e doltaut er ngii er a klengar er kid me kid a menga el lmuut el mo dmeu a rengud.—Jak. 1:​25, BT.