1-2. Ngngera el klungiaol a dengai lekid el ulebeob el mo metik er a lmuut el klou el deurreng sel dorous er a bai dolai?

 A JEHOVAH er a lomeob er kid a rechad e ngmilebid el mo metik er a lmuut el klou el deurreng sel dorous er a bai dolai. (Rel. 20:35) Me tiang ngbelkul a kmo ngdiak debetik a deurreng sel dolai? Ngdiak, kede mla chormii el kmo ngmo dmeu a rengud sel denguu a sengk el mlara chad. Me nguaisei engdi kede mo melechesuar er a lmuut el klou el deurreng sel dorous. E mo uchul a klungioled le Jehovah a milebid el uaisei. E ngerang?

² A Jehovah el milebid el uaisei a uchul me ngngar ngii a klisiched er a deuil a rengud. Ngsebeched el kilungii a deurreng er kid loeak sel dosiik a techall el mo merous. Tiang ngdiak el sal lungil rolel e kede ulebeob?—Psa. 139:14.

3. Ngera uchul me ngsebeched el mesaod er a Jehovah el kmo ng “dmeu a rengul el Dios”?

³ A Bades olterekokl a rengud el kmo a omerous a meskid a deurreng, e tiakid a uchul me a Biblia mesaod er a Jehovah el kmo ng “dmeu a rengul el Dios.” (1 Ti. 1:​11, NW) Ngii ngike el mle kot el merous e ngike el merous el ngaruchei er a ngii di el chad. Ngua lolekoi a apostol Paulus, “ngii a uchul e kede outeliil, e mengitengtik e ngar ngii a klengar er kid.” (Rel. 17:28) Chochoi, “a bek el ungil e cherrungel sengk” a mlara Jehovah.—Jak. 1:17.

4. Ngera mo ngosukid el metik er a deurreng?

⁴ Kid el rokui a locha soad el mo nguu a lmuut el klou el deurreng el mei loeak sel dorous. Ngsebeched el meruul el uaisei loeak sel doukerebai er a blekeruraurreng er a Jehovah. (Efe. 5:1) Ngar tia el suobel e kede mo mesuub el kirel tia el kmal lungil blekerdelel, me aike el sebeched el meruul a lsekum kede  feel el kmo a rebebil a diak loba omereng el saul el kirel aike el doruul el mo er tir. Tia mo odbechid el mo melemolem el merous e mo dmeu a rengud el merous.

MOUKEREBAI ER A BLEKERURAURRENG ER A JEHOVAH

5. Ngera bebil er a tekoi el lomeskid a Jehovah?

⁵ Ngera bebil er a rolel e a Jehovah olecholt er a blekeruraurreng? Molatk a di kesai er ngii. Jehovah omeskid aike el dousbech er a bedenged. Alta ngdiak lebeot a klengar er kid me nguaisei, ngoeak a Jehovah e ngngar ngii aike el dousbech. El ua tiang, ngii a uchul me ngngar ngii a keled, biled, me a delengchekled. (Psa. 4:8; Mt. 6:​31-33; 1 Ti. 6:​6-8) A Jehovah ngdi omes er ngii el ngerachel a uchul me ngomeskid aike el dousbech er a bedenged? Ngdiak! Ngera uchul me ngmeruul el uaisei?

6. Ngera kede suub er a Mateus 6:​25, 26?

⁶ A Jehovah omeskid aike el dousbech er a bedenged lengii el betik a rengul er kid. Molatk a tekingel a Jesus el debetik er a Mateus 6:​25, 26. (Monguiu.) A Jesus uluusbech a example er a suebek el charm e kmo: “Ng diak lolalem a dellomel, el ka longudel a kall el mo melecha er a blil.” Engdi momtab ongingil tekingel: “A Demmiu el ngar er a eanged omekerreu er tir.” Chelecha e ngoker a Jesus el kmo: “Kemiu ng diak mkuk ngarbab er a suebek el charm?” Ngera point? A Jehovah omes er a remengull er ngii el lmuut el mekreos er a charm. Me a lsekum a Jehovah omekerreu a charm e ngkmal sebechel mo ulterekokl a rengud el kmo ngmo meskid aike el dousbech! Ngdi ua betik a rengul chedam, a Jehovah mesiou er a telungalek er ngii el bltkil a rengul el mo tir a uchul.—Psa. 145:16; Mt. 6:32.

7. Ngera ta er a rolel e ngsebeched loukerebai er a blekeruraurreng er a Jehovah? (Dirrek el momes er a siasing.)

⁷ Ngdi ua Jehovah, a bltkil a rengud el mora rebebil a uchul me ngdirrek el sebeched lomesterir aike el lousbech. El ua tiang, kau, ke medengelii a kldemem er a klemerang el lousbech a kall me a lechub e ngbail? A Jehovah sebechel lousbech er kau el mo ngosuir. A rechedal a Jehovah tokuni el lodengelterir a rechad el kmo te kot el bekururau sel leduubech a tellemall er a beluu. El ua tiang, sera temel a COVID-19 pandemic e a rudam me a rudos a mle share a kall, bail, me a lmuut el bebil lobengterir tirke el luluusbech. A rebetok a dirrek el millenget el mora ureor el meketmokl er a beluulechad el rokir. Aika ullengeseu er a rudam me a rudos el meliuekl er a beluulechad el rokir. Te kmal uleltaut er a Hebru 13:16: “Lak  mobes el meruul a ungil e morous a ikel ngar ngii er kemiu, ele Dios a dmeu a rengul er choua isel tenget.”

8. Ngoeak a ngera el rolel e kede melai a klungioled er a klisichel a Jehovah? (Filipi 2:13)

⁸ Jehovah omeskid a klisiich. A Jehovah kmal dmeu a rengul el share er a diak lemetuk el klisichel el mora reblak a rengrir el mesiungel. (Monguiu er a Filipi 2:13.) Ngmla ta el moluluuch lolengit er a Jehovah me lengesukau el mo mesisiich er a mengesuseu er kau me a lechub ngmeringel el blekeradel? Me a lechub e ke milluluuch lolengit er a klisiich lotekur a ta el sils. Sera lemonger a nglunguchem lolengit er a klisiich e kulterekokl el kilengei a tekingel a apostol Paulus el milluches el kmo: “Ngngar ngii a klisichek el meruul a rokui el tekoi loeak a klisichel ngike el omeskak a klisiich.”—Fil. 4:​13, NW.

9. Ngmekera sebeched el loukerebai er a Jehovah el bekururau lousbech er a klisichel? (Dirrek el momes er a siasing.)

⁹ Alta ngdiak demecherrungel engdi ngdirk sebeched el loukerebai er a Jehovah el bekururau lousbech er a klisichel. Ngdiak el sebeched el msa klisiched er a rebebil engdi ngsebeched lousbech er ngii el kirir. El ua tiang, ngsebeched el meruul a errands me a lechub e ngureor er a blai el kirel a Kristiano el chudelang me a lechub e ngsmecher. A lsebechel e ngsebeched el volunteer el clean e maintain er a Blil a Ongdibel. A dousbech a klisiched el ngar er aika el rolel a mo uchul a klungiolir a remengull er a Jehovah.

10. Ngmekera sebeched lousbech er a klisichel a tekinged el mo klungiolir a rebebil?

¹⁰ Lak mobes el kmo a tekingem a dirrek el ngar ngii a klisichel. Ngsebechem lotkii a chad el mo nguu omelisiich omchat er ngii el mera el ngar er a rengum? Ke medengelii a chad lousbech ongelaod? Ngsebechem el mo odngelii, oudengua el mo er ngii, me a lechub e ke send er a card, email, me a lechub e ng text el mo er ngii. Lak msal bekikl a tekingem. A kesai el tekoi el mera el mlara rengum a locha sel kmal lousbech er ngii a kldemem el mo melemolem el loba blakerreng er a lmuut el ta er a sils me a lechub e ngmo oba positive el uldasu el kirel a blekeradel el lengar er a chelsel.—Osi. 12:25; Efe. 4:​29, BT.

11. Ngmekera Jehovah lousbech er a llomeserreng er ngii?

¹¹ Jehovah omeskid a llomeserreng. A disaiplo el Jakobus a milluches el kmo: “Lsekum ngngarngii ra delongeliu a ngesonges a llemesel a rengul, e bo lolengit ra Dios el ngikel ka le mekreos ma ka loungeroel e mesterir a rokuil chad, me le nguu.” (Jak. 1:​5, BT) Ngua lochotii tia el bades a Jehovah diak longreos er a llomeserreng er ngii. Ngbekururau e share er  ngii el mora rebebil. Mutebengii el dirrek el kmo a Jehovah sel lomeskid a llomeserreng e ngdiak “loungeroel.” Ngkmal diak lerellid el mo feel bad lolengit a ulekrael er ngii. Ngbai mengelechel er kid el mo osiik er a llomeserreng er ngii.—Osi. 2:​1-6.

12. Ngera techall el ngar ngii el sebeched el share a llomeserreng er kid?

¹² E kid? Ngsebeched loukerebai er a Jehovah e share er a llomeserreng er kid? (Psa. 32:8) A rechedal a Jehovah a betok a techellir el share aike el lodengei. El ua tiang, kede blechoel el train er a rebeches el lomerk er a klumech. A remechuodel oba kllourreng el lolengeseu er a re ministerial servant me a retelecholb el odam el mo meduch el meruul a assignment er tir er a ongdibel. E tirke el ngar ngii a experience er tir er a construction me a maintenance a olengeseu el train er tirke el diak me bo lsebeched el lousbech er tir el meruul a ureor er a blai lousbech a cheldebechel.

13. Sel de train er a rebebil, e ngmekera sebeched loukerebai er a rolel e a Jehovah share a llomeserreng er ngii?

¹³ Tirke el train er a rebebil a kirir el mo oukerebai er a rolel e a Jehovah share a llomeserreng er ngii. Lak mobes el kmo a Jehovah bekururau el share a llomeserreng er ngii. Ngdi osisiu, ngsoad el mimokl el share a klemedengei er kid me a experience er kid el mo er tirke el mesuub. Ngdiak el soad lorreked a klemedengei er kid le kede medakt el kmo ngike el mesuub a mo el replace er kid. Me a lechub e domdasu el kmo: ‘Ngdimlak a train er ngak! Becherei me di lengii el mesuub.’ Chouaitia el attitude a diak a basio er ngii er a delongelir a rechedal a Jehovah. Ngbai dmeu a rengud el diak di de share a klemedengei er kid kede dirrek el ‘odersid’ el mo er tirke el de train er tir. (1 Th. 2:8) Ngomeltked el kmo te “dirrek el sebechir el mo olisechakl er a re bebil.” (2 Ti. 2:​1, 2) A lsekum kede rokui el mo bekururau el share a llomeserreng er kid, e kid me a rebebil a lmuut el mo mellomes e dmeu a rengud.

A LSEKUM A RECHAD A UA LAK LOBA OMERENG EL SAUL

14. Te mekera ruumesingd el chad sel debekururau el mo er tir?

¹⁴ Sel debekururau tokubets el bedul a rudam me a rudos er kid, e te blechoel lochotii omereng el saul. Te locha mo send er a thank-you card me a lechub e te ochotii omereng el saul er tir el ngar er a lmuut el ta er a rolel. (Kol. 3:​15, BT) Sel dengai chouaika el olechotel omereng el saul e ngdochelir a deurreng er kid.

15. Ngera diak el kired lobes er ngii a lsekum a rebebil a diak lochotii omereng el saul?

¹⁵ Me nguaisei engdi te ngar ngii a rebebil el locha diak bo lochotii omereng el saul. Nglocha ngar ngii aike el taem el bo dousbech a temed, klisichel a bedenged, me a lechub e ngklokled engdi uriul e kede melechedech el kmo a chad ngomekerreu el kirel a tekoi el derirellii el mo er ngii. A lsekum e tia duubech, e ngmekera sebechel diak bo lemekngit a rengud me a lechub e bo lemedecherecher a rengud? Molatk er a Rellir 20:​35, el bades el lemlengai er ngii a suobel. A deurreng er kid el merous a diak el depend er a omerellir a rechad. Ngsebeched el melilt el mo oldeu er a rengud el merous alta rechad a diak lochotii omereng el saul. Ngmekera doruul er tiang? Molatk a bebil rolel.

16. Ngera kired el mo ulturk osenged er ngii sel dorous?

¹⁶ Bo lulturk osengem er a mo oukerebai er a Jehovah. Ngika omesterir a rechad a ungil, a lolecholt omereng el saul me a lak. (Mt. 5:​43-48) A Jehovah dirrek el tibir el kmo a dorous e ‘diak dousbech el kmo ngera kede mo nguu,’ e ngmo ‘klou chomeksaul el mei er kid.’ (Lk. 6:​35, BT) A olechotel omereng el saul a dirrek el luldimukl er a ‘ngera.’ A denguu me a lak  me a Jehovah mo mtechei aike el rokui el lungil el doruul lolengeseu er a rebebil le kid el ‘dmeu a rengud el merous.’—Osi. 19:17; 2 Ko. 9:​7, NW.

17. Ngmekera sebeched el melemolem loba melemalt el uldasu sel dorous? (Lukas 14:​12-14)

¹⁷ Omellach el ngosukid el mo melemalt osenged el kirel omerous a debetik er ngii er a Lukas 14:​12-14. (Monguiu.) Ngdiak el mekngit a domtechakl me a lechub e debekururau el mo er tirke el dirrek el sebechir el meruul el uaisei el mei er kid. Me nguaisei engdi ngmekerang a lsekum kede mtebengii el kmo kede merous lengii el omeltked el kmo lengar ngii a bo denguu er ngii? A leuaisei e ngsoad el meruul er a lullekoi er ngii a Jesus. Ngsebeched lomtechakl er a chad el dodengelii el kmo ngdiak el sebechel mo omtechakl er kid. Seikid e ngmo dmeu a rengud le kede oukerebai er a Jehovah. A lsekum kede mo meruul el mora rebebil e diak de expect a ngerang e ngmo blechoel el dmeu a rengud mo lmuut er aike el taem el bo lak lochotii omereng el saul.

18. Ngera mo ngosukid me ngdiak bo lemekngit a uldesued el kirir a rebebil?

¹⁸ Lak moukerrekeriil er a rechad. (1 Ko. 13:7) A lsekum a rechad a diak lochotii a omereng el saul e ngsebeched el di kid loker: ‘Te mera el diak loba omereng el saul, me a lechub e te kuk di ulebes el mereng a saul?’ Kele el locha ngar ngii a lmuut el bebil er a uchul me te dimlak lochotii omereng el saul. A rebebil a locha kmal oba omereng el saul engdi ngmeringel er tir a mesaod. Te locha merur el melai a ngeso tokubets a lsekum a ngar er a mong e ngtir tirke el ullengeseu er a rebebil. Alta ngdiak dodengelii a uchul me nguaisei, a bltkil a rengud el mora rudam me a rudos er kid a uchul me ngdiak bo lemekngit a uldesued el kirir e mo melemolem el loba deurreng el merous.—Efe. 4:2.

19-20. Ngera uchul me a kllourreng a kmal ngosukid sel dorous el mora rebebil? (Dirrek el momes er a siasing.)

¹⁹ Moba kllourreng. A mellomes a rengul King Salomon a milsaod el kirel a blekeruraurreng el kmo: “Mchoit a blauang er kau er a  daob, e a uriul er a betok el sils e ke mo metik.” (Oli. 11:1) Ngua lochotii tiang, a rebebil a locha mo ochotii omereng el saul er tir er a “uriul er a betok el sils.” Molatk er a ta el experience.

²⁰ Betok el rak er a mla me mong e a bechil a ta el circuit overseer a lilechesii a babier el mora dirk miltecholb el odos el melisiich er ngii el mo melemolem el loba blakerreng. Bekord el eai el rak er uriul e ngika el lodos a mle reply er ngii el kmo: “Ngkmal diak modengei engdi ngsoak louchais er kau er a rolel e ke mla ngosukak er aika el mereko el rak. Ngkmal mle ungil a tekingem engdi sel bades el muluusbech er ngii a kmal rirtechii a renguk e kmal dirkak kubes er ngii.” a Uriul er ngika el lodos a losaod a bebil er a omelsemai el blo lechebangel e ngdilu el kmo: “Ngar ngii aike el taem el kmal mlo soak el choitii a klemerang, chemoit a ngerechelek, e stob el mesiou er a Jehovah. Engdi sel bades el mlilechesii a mo oureor er a renguk e . . . ngosukak el melemolem. Chelsel aika el mereko el eai el rak e ngdiak a mla ngosukak el ua babilengem me a bades el blem share er ngii.” Ka di molatk er a deuil a rengul ngika el bechil a circuit overseer er a lenguu tia el babier er a “uriul er a betok el sils”! Kid me kede locha mo nguu olechotel omereng el saul er a kmal uriul er a derellii a ungil el mora chad.

21. Ngera uchul me ke mla rullii er a rengum el mo melemolem loukerebai er a blekeruraurreng er a Jehovah?

²¹ Ngua dulsaod er ngii, a Jehovah milebid er a ileakl el rolel. Alta ngmo dmeu a rengud sel lengar ngii a dengai, engdi kede mo omelechesiu er a lmuut el klou el deurreng sel dorous el mora rebebil. Ngmo ungil a uldesued el kired sel lebo lsebeched el ngosuir a kldemed er a klemerang. E mo dmeu a rengud sel lochotii omereng el saul. Me nguaisei a denguu olechotel omereng el saul me a lak, me ngsebechel mo dmeu a rengud e le kede medengei el kmo kede rirellii a melemalt el tekoi. Lak mobes el kmo a ngii di el tekoi el mrrous, a “[Jehovah] a sebechel el mo meskau a lmuut el betok.” (2 Kr. 25:9) Ngkmal diak el sebeched el remous a lmuut el betok er a Jehovah! E diak a deurreng el mo mekesiur sel lebeskid omeksulled a Jehovah. Mada derellii er a rengud el mo melemolem loukerebai er a bekururau el Demad el ngar er a eanged.