Ngdiak el kired el omdasu el kmo tirke el 70 el disaiplo el tir a dimlak lobengkel a Jesus er a leketmeklii a Chedaol Belsoil er a Rubak a urridii a kengei er ngii me a lechub e te chilitii. A Jesus a di mle soal lobengterir a rechapostol er ngii er tiakid el taem.

Ngika kilengei er a re 12 me a re 70. A Jesus a kot e ngmillilt er a re 12 er a rebetok el disaiplo er ngii el blo lomekedong er tir el rechapostol. (Lk. 6:​12-16) Ngmlara Galilea er a ‘lomekedong er a re truich ma terul obengkel’ e ‘oderecheterir el mo olisechakl er a Rengedel a Dios, e omekungil er a re smecher.’ (Lk. 9:​1-6) Uriul er a lengar er a Judea, e a Jesus a “ngililteterir ar kuk ngodech el okeuid, e odercheterir el derterung.” (Lk. 9:51; 10:​1, BT) Me a Jesus a mla er ngii a rekakerous el disaiplo er ngii er ker me ker el lomerk el kirel.

A rechad er a Chijudea el uriul e te mlo disaiplo er a Jesus a ulterekokl el dirk mirruul er a Baskua el mla er ngii er a bek el rak lobengterir a telungalek er tir. (Exo. 12:​6-11, 17-20) Sera lolekeda kodellel a Jesus e ngii me a rechapostol er ngii a mlora Jerusalem. Engdi ngika dimlak loleker er a rokui el disaiplo er ngii el mlara Judea, Galilea, me a Perea el mo dmak e meruul er a Baskua. A Jesus a di mle soal lobengterir a rechapostol er ngii er tiakid el taem. Ngdilu er tir el kmo: “Ak kmal di uluureng el mo omengur el obengkemiu er tial blengur er a Baskua er uchei er a bo kcharm!”—Lk. 22:15.

Ngmla er ngii a ungil luchul me ngmirruul el uaisei. A Jesus a mle kmedu el mo mad el “Ngelekel a Sib er a Dios el melubet a kngtil a beluulchad!” (Jn. 1:29) Tia mle kirel meketmokl er a Jerusalem e le tiakid a lebla er ngii e melenget el mora Dios. A kodellel a Jesus a mo uchul a lmuut el klou el ilmokl er a ngelekel a sib el lulengang er ngii a retelungalek el chad er a Israel er sel kesus er a letobed er a Ekipten. (1 Ko. 5:​7, 8) A tekoi el lerirellii a Jesus a uchul me a reteruich me a terung a mlo uchetemel a ongdibel er a Rekristiano. (Efe. 2:​20-22, NW) Me a lmuut kung a chedaol mats el Jerusalem a ngar ngii a “tacher ma teblol omekedecheraol el bad” er ngii el llechukl a “ngklir a re truich ma terul apostol er a Ngelekel a Sib.” (Och. 21:​10-14) Nguaisei, a reblak a rengrir el apostol a mla er ngii a klou el ultutelel el moktek er tir er a otutel a soal Dios. Tia uchul me a Jesus a mle soal tir a lobengkel er sel mlo ulebongel el Baskua me a Chedaol Belsoil er a Rubak el ulekiuellel.

Tirke el 70 me a relmuut el bebil er a disaiplo a dimlak lobengkel a Jesus el ngar tia el belsoil. Me nguaisei engdi tirke el rokui el disaiplo el ulechotii a blakerreng a mo ngmai a klungiaol loeak a Chedaol Belsoil er a Rubak el lekiltmeklii a Jesus. Tirka el rokui el disaiplo a cherengel a taem e te mo ngellitel el Kristiano e mo chedal a telbiil el renged el Jesus a uluuchais er a rechapostol el kirel er seikid el kesus.—Lk. 22:​29, 30, NW.