AK MILECHELL er sera 1926 er a beluu er a Crooksville, Ohio, er a beluu er a Merikel. A demak me a delak a dimlak el chedal a klechelid, engdi te uleldurech er kemam el teai el ngelekir el mo er a ikelesia. Me ak mlo er a ikelesia er a Methodist. Me sera bo el 14 a rekik e ak ngiluu a nguked, e le ngdimlak chitii a ta el miting er a sandei el ta el rak.

Seikid el taem e a Margaret Walker el ta er a Sioning er a Jehovah e tonari er kemam a ulemuchel el me oldingel er a delak, e te dmak el mesaod er a Biblia. Me a ta er a taem e ngmlo soak el teloi er tir, engdi a delak a dimlak lekengei e le ngulemdasu el kmo ak mo mengesang er tir. Engdi ak di millemolem el orrenges er tir. Me a cherengel a taem e a Margaret a uleker er ngak el kmo, “Ke medengei el kmo a Dios a ngar er ngii a ngklel?” Me ak dilu el kmo, “A rokui el chad a medengei el kmo ng Dios a ngklel.” Me ngdilu el kmo, “Bo mnguu a Biblia er kau e momes er a Psalm 83:18.” Me ak mlo nguu e ulemes er ngii e mlo medengei el kmo a ngklel a Dios a Jehovah. Me ak rirurt el mo er a resechelik e dmu er tir el kmo, “Sel bo mrei e momes er a Psalm 83:18 er a Biblia er kemiu me bo modengelii a ngklel a Dios.” Me ngsebeched el melekoi el kmo, ak di mle mereched el mo omerk er a klumech.

 Ak ulemuchel el mesuub er a Biblia e mlo metecholb er sera 1941. E a uriul e ak mlo oungerachel er a book study er a ongdibel. Me ak millisiich er a delak me a rebebil er ngak el mei er a miting, me te rokui el mlo omais el mei. Engdi a demak a mle chetil.

Ngmirrael el mo betok a ngerechelek er a ongdibel, me ngmlo betok a babilengek er a ongdibel. Me a ta er a klebesei e a demak a ulemes aika el babier e dilu er ngak el kmo: “Ke mes aika el rokui el babier? Ngsoak a omngai el otobed er tia el blai me kau me ke merael el obengkel.” Me ak tilobed el mo kiei er a Zanesville, Ohio el di kmeed er a blik. Me ak ulemais el mo er a blik el mo melisiich er a rechad er a blik.

A demak a mlo melasem el merrob er a delak me lak lebo er a miting. A lebebil er a taem e ngar er a omerollel el mo er a miting, e a demak a ultireklii el mong e nguu el mei er a blai. Me a lebocha er a blai e ngtuobed er a bita el tuangel e lmuut el merael el mo er a miting. Me ak dilu er a delak el kmo: “Moutekangel, e ngdi telkib e ngmo mesaik el oltoir er kau.” Me a cherengel a taem e a demak a mlo diak lorrob er ngii me ngmlo sebechel el mimokl el ngar er a miting.

Me sera lomuchel a Skuul el Kirel a Urerel a Dios er a 1943, e ak ulemuchel el mo ngalek er a skuul. Me a ulekrael el kngilai a kmal ngilsukak el lmuut el mo ungil el mengedecheduch.

Sera 1944 el mle temel a Ongeru el Mekemedil a Beluulechad, e ak mlorimel el mo soldau. Me ak mlo er a Fort Hayes er a Columbus, Ohio, me te ngilikak el mo er a toktang e remuul a babilengek. Ak dirrek el dilu er tir el kmo ngdiak kengei el mo soldau. Me te milechikak me ak mo remei, engdi sesei el klebesei er a uriul e a bulis a mle er a blik e dmu el kmo, “Corwin Robison, ak me melai er kau el mo kelebus.”

Me a eru el sandei er a uriul e a judge a dmu er ngak el kmo: “A lsekum ngar er ngii a klisichek el melilt, e ke mo kelebus el mo er a kodellem. Ngar er ngii a soam el dmung?” Me ak dilu el kmo: “Kau el kuoll, ngak a rredemelel a mo minister, e le kumerk er a ungil chais er a Renged el mo er a bek el obliil.” * Me ngika el judge a dilu er a rechad er a jury el kmo: “Kemiu a diak mngar tiang el melilt el kmo ngika el chad ng minister me a lechub e ngdiak. Ngbai kiriu el melilt el kmo ngika ngkilengei el mo soldau me a lechub e ngdiak.” Me ngdi mle tedobech el sikang e a jury a kongei el kmo ak mekngit. Me a kelebsengek a mlo 5 el rak el ngar er a kelebus er a Ashland, Kentucky.

Ak mle kelebus el eru el sandei er a Columbus, Ohio, e sel kot el sils e ak di kiliei er a chelsel a cell er ngak. Me ak milluluuch el mo er a Jehovah el kmo: “Ngdiak el sebechek el di kiei er a chelsel tiang el eim el rak. Mngesukak e ngkmal diak kudengei el kmo ak mo mekerang.”

A bo lekukuk e a remengkar a mei el lotebedak. Me ak mirrael el mo er a ta el metongakl e mekoar el chad, me ak dechor el obengkel el omes er a mado el mo bedul iikr. Me nguleker er ngak el kmo,  “Ngera me ke ngar tiang?” Me ak dilu el kmo, “Ngak a ta er a Sioning er a Jehovah.” Me ngdilu el kmo, “Chochoi? Me ngera me ke ngar tiang?” Me ak dilu el kmo, “A Resioning er a Jehovah a diak lekengei el mo er a mekemad el mo omekoad er a rechad.” Me ngdilu el kmo, “Te mengesimer er kau e le kau el diak momekoad er a rechad. Te dirrek el mengesimer er a rechad e le tir el omekoad er a rechad. Tiang ngdiak el sal ngodech el tekoi?” Me ak dilu el kmo, “Chochoi ngkmal ngodech el tekoi.”

Ngdilu er ngak el kmo, “Ak mle kelebus er a ta er a blil a kelebus el 15 el rak, e mlo sebechek el chemuiu a bebil el babilengiu.” Me sera ledu el uaisei, e ak milluluuch el kmo, “Jehovah, mrellii ngika el chad me bo lolengeseu er ngak.” Me ngdi mle seikid el taem e ngika el Paul a dilu er ngak el kmo: “A lsekum a ta er tirka el chad a omecheracheb er kau e ke di oldiu, e ak ngosukau.” Me a klemengetel a taem el kngar isei e ngdimlak a ta er tirke el 50 el kelebus el ulemecheracheb er ngak.

Sera kulukl el mo kelebus er a beluu er a Ashland, e ak miltik er a rebebil el rudam el di mla mo er isei. Me te ngilsukak ngak me a relmuut el bebil el odam el melemolem el kmeed er a Jehovah. Te milskemam a ngerechelam el menguiu a Biblia er a bek el sandei, e aki dirrek el mengetmokl a ker me a nger er kemam el mo er a miting el mle okedongall el Bible Bees. Tia el blil a kelebus a mle blechobech a bet er ngii el ulsirs er a kboub. Me ngmla er ngii a odam el uluungerachel er a territory er kemam. Ngdmu er ngak el kmo: “Robison, aikakid el bet a ngerechelem. Me aike el bet el moterekokl er kau, aikeikid a territory er kau. Me alii ngerechelem el sioning el mo er tirke el chad er a uchei er a lorael.” Tiaikid a mle rolel e aki mlo ungil el merkii a klumech er a chelsel a kelebus.

A Ongeru el Mekemedil a Beluulechad a mlo merek er a 1945, engdi ak millemolem el kelebus el telkib el taem. Ak mle bekikl el kirir a rechad er a blik e le demak a dilu el kmo, “A lsekum ngsebechek el odikau, e ngbeot er ngak el mesaod er tirke el bebil er kau.” Engdi sera ktobed er a kelebus e ngkmal mlo ungil a renguk el mesang a delak me a rebebil er ngak el ngar er a miting e a ta er tir a mla metecholb, alta te kmal chuarm er a omerellel a demak.

Me sera lomuchel a mekemad er a beluu er a Korea er a 1950, e ngmlo kirek el lmuut el mo er a Fort Hayes. Me ak mlo melai er a test e a uriul e a ta er a merreder er a resoldau a dilu el kmo, “Kau a ta er tirke el kmal mle ungil a teng er kau er a delongelir tirke el mdilak.” Me ak dilu el kmo, “Nguaisei, engdi ngdiak kengei el mo soldau.” Ak milsaod er a bades er a 2 Timothy 2:3 e dilu el kmo, “Ngak a mla  mo soldau er a Kristus.” Me ngliluk el telkib el taem e dmu er ngak el kmo, “Ngsebechem el merael.”

Telkib el taem er a uriul e ak mlo er a miting er a Bethel er a temel a klou el ongdibel er a beluu er a Cincinnati, Ohio. A Brother Milton Henschel a dilu el kmo, a Bethel a ousbech er a rudam el tir a sorir el oureor el kirel a Renged. Me ak mle apply el mong e te kilengei er ngak. Me ak ulemuchel el oureor er a Brooklyn er a August 1954, e ngak tia er a kusiou el ngar er a Bethel el me lmuut er chelechang.

Ak mle blechoel el mechesang er a betok el urerek er a Bethel. Ngmle betok el rak el kuureor el chad er a mesil el ngar er a printery me a obis, e dirrek el mirruul a lok. Ak dirrek el uluureor er aike el meklou el Blil a Ongdibel er a New York City.

Ngkmal soak aike el prokuram er a Bethel el ua morning worship me a omesubel a Ongkerongel, e dirrek el oldingel el obengterir a rechad er a ongdibel. Me a chouaika el tekoi a kmal kirel a bek el telungalek el Sioning er a Jehovah el meruul er a bek el taem. E le lsekum a telungalek a dmak el mesaod er a bades er a bek el sils, e dmak el meruul er a omengull el telungalek er tir, e teloi aike el miting er a ongdibel, e dirrek el blak a rengrir el oldingel, e ngmo sebechir el melemolem el kmeed er a Jehovah.

Ngmla mo er ngii a rebetok el sechelik el ngar er a Bethel me a dirrek el ongdibel. A rebebil a mle ngellitel me te mla mo er a eanged. Me nguaisei, engdi a rokui el mesiungel a Jehovah a diak el cherrungel el uldimukl er tirke el ngar er a Bethel. Me a lsekum ngmo er ngii a mondai er ngak me a ta er a odam, e ak blechoel el melasem el meruul er a budech. Ak melatk er a bades er a Mateus 5:23, 24 me sel rolel a dosmechokl a mondai. Ngkmal diak lebeot el dedu el kmo “Ak mlo mekngit,” engdi aika el tekoi a sebechel el sumechokl a betok el mondai.

Chelechang e ngmla mo meringel er ngak el oldingel a obliil e le ak kmal chudelang, engdi ak dirk melemolem el meruul er a omesiungek. Ak milsuub e mlo meduch el melekoi a sesei el tekoi er a Sina, me ngkmal ungil a renguk el mengedecheduch er a rechad er a Sina el merael er a rael. A lebebil er a tutau e ngsebechek el remous a 30 el mo er a 40 el babier el mo er a resemeriar el chad.

 A ta er a klebesei e a kekerei el redil a mirrous a advertisement er a rodech el lolterau, me ak milsang a Ongkerongel me a Awake! el tekoi er a Sina. Me ngilai e dilu el kmo a ngklel a Katie. Me a uriul e sel ta el lesekak e ngmei me aki chadecheduch. Ak ulsisecheklii er a ngklel a rodech me a iasai el tekoi er a Merikel, me ngmilsuub el melekoi. Ak dirrek el milsaod a bades el mo er ngii, e ngii a kilengei el nguu a Biblia Olisechakl el babier. E a uriul er a sesei el sandei e ngmlo diak kisang.

Sesei el buil er a uriul e ak milsa babier a kuk ta er a redil el merous a advertisement. E a ongingil el sandei e ngulemeskak a dengua e dmu el kmo, “Mongedecheduch er a Sina.” Me ak dilu el kmo, “Ngdiak a ta el chad el ngar er a Sina el kudengelii.” E ngii a di ulerrimel er ngak, me ak ngiluu a dengua e dilu el kmo, “Alii ngak a Robison.” E a chad el ngar er a dengua a dilu el kmo, “Robby, ngak el Katie. Ak mla lmuut el mei er a Sina.” Me ak dilu el kmo, “Sina?” Me a Katie a dilu el kmo, “Ochoi, e Robby. Ke medengelii ngilecha el redil el milskau a dengua? Ngilecha merrengek. Kau a ulsisecheklak er a betok el ungil el tekoi. Me a kulengit me mosisecheklii er aike el mullisechakl er ngak er ngii.” Me ak dilu el kmo, “Ak kmal mo melasem e Katie. Ke kmal mesulang el ouchais er ngak er a omngar er ngii.” Me a uriul er a sesei el sandei e ngmlo ulebongel er ngak el mengedecheduch er a merrengel a Katie. Me alta ngdiak kudengei el kmo te kirel ker el teru el odos, engdi a kuureng el kmo te mesuub a lmuut el betok el kirel a Jehovah.

Me ngmla mo 73 el rak el kusiou er a Jehovah e kmal dmeu a renguk, e le Ngii a ngilsukak me ak millemolem el blak a renguk er sel taem er a dirk kelebus. A rebebil er ngak a dirrek el ouchais el kmo ak kmal millisiich er tir er sel taem el demak a ulemtok er ngak e dimlak bo lemechitechut a renguk. Me a cherengel a taem e a delak me a retelolem el bebil er ngak a mlo metecholb. A demak a dirrek el mlo diak el sal omtok e mlo sebechel el ngar er a bebil el miting er a uchei er a lemad.

Me a lsekum ngungilbesul er a rengul a Dios, e a rechedak me a resechelik el mla mad a sebechir el mo kiei er a beches el beluulechad. Ka di molatk er sel deurreng el bo dolechesuar sel dosiou er a Jehovah el mo cherechar el teloi er a rebetik er a rengud. *