1, 2. (a) Kede mekerang e mo medengei el kmo a rechad a sebechir el mo sechelil a Dios? (b) Ngera kede mo mesaod er tia el suobel?

 KEDE rokui el ousbech er a bltikerreng el omuchel er sel taem el demechell el mo lmuut er a kodelled. A rechad a ousbech er a kmes e ngar er ngii a bltikerreng er ngii el klausechelei, el diak di el tekoi er a ultoir. Engdi sel kot el ngarbab el bltikerreng el dousbech er ngii, a ngar er a Jehovah el mei. A rebetok el chad a omdasu el kmo ngdiak el sebechel el mo er ngii a kmes el deleuill er kid me a Dios, e le ngikang a diak el sebechel el meues e dirrek el olab a bek el klisiich. Engdi tiang a diak lemera el tekoi!

² Ngokiu a Biblia e kede mo medengei el kmo te ngar er ngii a rechad el mlo sechelil a Dios. Me ngungil a doukerebai er tir. E ngerang? E le deleuill er kid el obengkel a Dios a kot el klou a ultutelel el tekoi el kirel el ngar er ngii er a klengar er kid. Me bo dosaod er a kerebil a Abraham. (Monguiu er a Jakobus 2:23.) Ngmilekerang e mo sechelil a Dios? Ngsel klaumerang er ngii a uchul, e a Biblia a mesaod er a Abraham el kmo, ng “demerir tirkel rokui el oumerang.”  (Rom 4:11) Me sel dosaod el kirel, e di lekau el melebedebek el kmo, ‘Ngmekerang a kuukerebai er a klaumerang er a Abraham e kukesengii a deleuill er ngak me a Jehovah?’

3, 4. (a) Mosaod er a klou el omelsemai er a klaumerang er a Abraham. (b) Ngera uchul me a Abraham a kilengei el mo melenget er a Isak?

³ Ka di molatk er a Abraham el bekord el 125 a rekil el mekekokil el merael el olengasech er a rois. ^[1] A ngelekel el Isak el bekord el 25 a rekil a merael el okiuellel el mengol a idungel, e a Abraham a oba oles me a ongemlel a ngau. Me tiang a ulterekokl el kmal mle meringel el omerael er a klengar er a Abraham, el diak el cheluodel a uchul, e le ngkmal dirk mle mesisiich a bedengel. Tiang a kmal mle meringel er ngii, e le Jehovah a mle soal a bo lolenget er ngika el ngelekel!​—Gen. 22:1-8.

⁴ Tiang a locha sel kot el klou el omelsemai er a klaumerang er a Abraham. A rebebil a kmo a Dios a kmal mekngit a tekingel el mengerechir er ngii el mo melenget er a ngelekel. E a rebebil a kmo a Abraham a di mle beot er ngii el meruul er tia el tekoi e le ngdimlak lebetik a rengul er a ngelekel. A rechad a melekoi el uaisei e le ngdiak a klaumerang er tir, e dirrek el diak lodengei el kmo ngera mera el klaumerang me sel rolel a loureor a klaumerang er a chad. (1 Ko. 2:14-16) Engdi a Abraham a dimlak di lerrau a rengul e lolengesenges er a Dios. Ngbai ullengesenges e le nguleba mera el klaumerang. Ngmle ungil el medengei el kmo a Jehovah a diak longerechir er ngii er a tekoi el mo uchul a telemellel. Ngdirrek el mle ulterekokl a rengul el kmo, a lolengesenges e ngulterekokl a Jehovah el mo omekngeltengat er ngii me a ngelekel. Me ngmilekerang a Abraham e mo mesisiich a klaumerang er ngii? Ngulekiu a klemedengei er ngii me a tekoi el dilubech er a klengar er ngii.

5. Ngmilekerang a Abraham e mesuub el kirel a Jehovah, e mlo ua ngera uldesuel el okiu a klemedengei er ngii?

⁵ A klemedengei er ngii. A Abraham a mlukeroul er a beluu er a Ur. A rechad er ngii el beluu a milengull a klsuul el chelid, me a demal me ngdirrek el milengull aika el chelid. (Jos. 24:2) Me ngmilekerang a Abraham e mo medengelii a Jehovah? A Biblia a ouchais el kmo a ngelekel a Noah el Sem a mle chedal a Abraham, e ngikang a kiliei el mo lmuut er a taem el Abraham a mlo bekord el 150 a rekil. A Sem a kmal mle mesisiich a klaumerang er ngii, me nglocha mle blechoel el mesaod er a Jehovah er a delongelir a rechedal. Me alta ngdiak dungil el medengelii a rolel, engdi nglocha mle sebechel a Abraham el mesuub el kirel a Jehovah el okiu tiaikid el rolel. Me a tekoi el lesiluub a Abraham a rirellii el mo betik a rengul er a Jehovah, e a klemedengei er ngii a ngilsuir el mekurulii a klaumerang er ngii.

6, 7. Ngera dilubech el mo er a Abraham, el millisiich er a klaumerang er ngii?

⁶ A tekoi el dilubech. Ngera dilubech el mo er a Abraham, el millisiich er a klaumerang er ngii? A rebebil a kmo, a uldesued a rullid el mo remuul a tekoi el dolatk. A Abraham a kmal mlo soal a tekoi el lesiluub el kirel a Jehovah, el uchul me ngmlo oba klou el omengull el mo er ngika el “Kot el Ngarbab el Dios, el rirellii a eanged ma chutem.” (Gen. 14:22) Me a Biblia a mesaod er tia el tekoi el ‘omeluu ra Dios.’ (Heb. 5:7, BT) Me a lsekum ngsoad el olekes er a deleuill er kid me a Dios e ngkmal kired el mo meluu er ngii. (Psa. 25:14) Me tia el omeluu er a Abraham a rirellii el mo soal el olengesenges er a Jehovah.

⁷ A Dios a dilu er a Abraham me a Sara me letobed er a belurir er a Ur, e lolukl el mo kiei er a ngodech el beluu. Tirkang a mechudelang, e mocha kirir el kiei er a tento el mo lmuut er a kodellir. Me alta e a Abraham a mle medengei el kmo te mo chelebangel a kdekudel el  blekeradel, engdi ngtilbir el mo melemolem el olengesenges er a Jehovah. Me tiaikid a uchul me a Dios a ulemekngeltengat e ulemekerreu er ngii. El ua tiang, ngar er aike el eru el taem el Sara a mlengai el mo cheroid er ngii, me ngii bo locherur a kodall, e ngulekiu a mengasireng el tekoi e a Jehovah a ulemekerreu er tir el terung me ngdimlak lemetemall. (Gen. 12:10-20; 20:2-7, 10-12, 17, 18) Me aika el tekoi a liluut el smisichii a klaumerang er a Abraham.

8. Ngkired el mekerang me bo el sebeched el mekurulii a klemedengei er kid er a Jehovah e mesa chimal el olengeseu er kid?

⁸ Me kid, ngsebeched el mo kmeed el sechelil a Jehovah? Ngkmal sebeched! Kede di ua Abraham el kired el mesuub el mo medengelii a Jehovah. Me sel donguiu er a Biblia e kede mekurulii a klemedengei er kid er Ngii, e dirrek el mesuub el kirel a tekoi el dilubech er a irechar. Ngbetok a tekoi el sebeched el suub er chelechang, el kuk betok er aike el ble lodengei a Abraham. (Dan. 12:4; Rom 11:33) A Biblia a mui er a klemedengei el kirel a Dios el ngika el “rirellii a eanged ma chutem.” Me a tekoi el desuub a rullid el mo betik a rengud er ngii, e mo oba klou el omengull el bedul ngii. E aika el eru el tekoi a rullid el mo soad el olengesenges er ngii. Me sel bo dolengesenges er ngii, e ngmo sebeched el mesa chimal a Jehovah el omekerreu e omekngeltengat er kid. Me a blakerreng er kid el mesiou er Ngii a mo uchul a budech me a deuil a rengud. (Psa. 34:8; Osi. 10:22) Me a cherengel a taem el dosuub el kirel a Jehovah e mesa chimal el olengeseu er kid, e ngmo mesisiich a deleuill er kid el obengkel.

9, 10. (a) A kmes el deleuill er a rechad, ngousbech er a ngera el mo melisiich er ngii? (b) Ngera ochotii el kmo a Abraham a milengreos e melisiich er a deleuill er ngii el obengkel a Jehovah?

⁹ A kmes el klausechelei er a rechad a di ua mekreos el klalo. (Monguiu er a Osisechakl 17:17.) Engdi ngdiak el ua meringel el chad el bekai el di kirel el besiich. Ngbai ua klebokel el bung el ousbech a ralm me a chad el kerekikl el omekerreu er ngii el mo lmuut er a bo lomung. Me a Abraham a uaisei el kmal mle kerekikl el omekerreu er a kmes el deleuill er ngii el obengkel a Jehovah. Me ngmilekerang er a loruul er tiang?

¹⁰ A Abraham a millemolem el melisiich er a omeluu me a klaumerang er ngii er a Dios. El ua tiang, sera lorael el mo er a Kanaan ngii me a telungalek er ngii me a remesiungel, e ngmilecherei a Jehovah me ngomekrael er ngii er a bek el tekoi el lurruul, el meklou me a mekekerei el tekoi. A ta el rak er a uchei er a lemechell a Isak e a Abraham a mle 99 a rekil, e a Jehovah a dilu er ngii me ngmo omotk er a rokui el sechal er a telungalek er ngii. Me a Abraham, ngmle rrau a rengul er a tekingel a Jehovah, me a lechub e ngdi millasem el mesaod er ngii me bo lak loruul er tia el tekoi? Ngdiak, ngbai kmal uluumerang  e ullengesenges er a Jehovah er “seikid el sils.”​—Gen. 17:10-14, 23.

11. Ngera me a Abraham a mle suebek a rengul el kirel a beluu er a Sodom me a Gomora, e milekerang a Jehovah e ngosuir?

¹¹ A Abraham a mle blechoel el olengesenges er a Jehovah el mo lmuut er a mekekerei el tekoi, el uchul me ngmengal mlo kmes a deleuill er tir el terung. Ngmle beot er ngii el mesaod a ngii di el tekoi el mo er a Jehovah, el mo lmuut er aike el mle meringel tekoi el lullatk. El ua tiang, sera ledu Jehovah el kmo ngmo melemall aike el beluu er a Sodom me a Gomora, e a Abraham a mlo suebek a rengul. E ngerang? Ngmlo bekikl sel lolatk el kmo, a rungil el chad a mo mad el obengterir a remekngit. Nglocha mle suebek a rengul el kirel a ngelekel a ta er ngii er a Lot me a telungalek er ngii, el tir a kiliei er a Sodom. Me sel klaumerang er a Abraham el mo er a Jehovah el “ngikel oukerrekeriil er a beluulchad el rokir,” a uchul me nguluuchais er a Jehovah el kirel a sebekreng er ngii. Me a Jehovah a mle klou a rengul e ulechotii el kmo ngmle chubechubechad. Me ngmlo smodii el kmo, a uchei er a loukerrekeriil e ngmo osiik er a rungil el chad e mesebechakl er tir.​—Gen. 18:22-33.

12, 13. (a) Ngmilekerang a klemedengei me a tekoi el dilubech el mo er a Abraham e ngilsuir er a uriul? (b) Ngera ochotii el kmo a Abraham a uluumerang er a Jehovah?

¹² Me ngbleketakl el kmo a klemedengei me a tekoi el dilubech el mo er a Abraham a ngilsuir el lmuut el smisichii a deleuill er ngii me a Jehovah. Me sel taem el Jehovah a dilu er a Abraham me bo lolenget er a ngelekel, e ngmle ungil el medengei el kmo a Jehovah a klou a rengul, e chubechub, e sebeched el ultuil er ngii. Me ngmle ungil el medengei el kmo a Jehovah a kmal diak el sebechel el di mereched el mo mekngit a omerellel el Dios! E ngera me nguaisei?

¹³ Me a uchei er a bo lekebii a Abraham me a remesiungel e ngdilu el kmo: “Kom di ngar tiang kemiu ma donkey. Ngak me ngikal buik a mor sei maki meluluuch e sola e lmuut kul mei.” (Gen. 22:5) Me ngera mle belkul a tekingel a Abraham? Ngika ngmle medengei el kmo ngmo mad a Isak, engdi ngulumulak el kmo te lmuut el mei el terung? Ngdiak leuaisei, a Abraham a mle medengei el kmo a Jehovah a sebechel el lmuut el okisii a Isak er a kodall. (Monguiu er a Hebru 11:19.) Ngmle ungil el medengei el kmo a Jehovah a milsang a techellel el mo oungalek er a Isak, alta e ngii me a bechil a di dul mla mo mechuodel. (Heb. 11:11, 12, 18) Tiaikid el uldesuel a uchul me ngmle medengei el kmo, ngdiak a tekoi el diak el sebechel a Jehovah el rullii. Me alta e ngdimlak el sebechel el medengei aike el mo duubech er sel sils, engdi a klaumerang er ngii a ulterekeklii a rengul el kmo a telbilel a Jehovah el mo er ngii, a uchul me ngkirel el mo okisii a ngelekel er a kodall. Tiaikid a uchul me a Abraham a okedongall el “demerir tirkel rokui el oumerang”!

14. Ngera el omelsemai a cho mchelebangel er chelecha el mosiou er a Jehovah, e mekerang a kerebil a Abraham e ngosukau?

 ¹⁴ Me chelechang e a Jehovah a diak longerechir er kid el mo melenget er a rengeleked, engdi ngsoal a bo dolengesenges a llechul. A lebebil er a taem e ngdiak dodengelii a uchul me ngar er ngii aika el llach, me ngmo meringel er kid el olengesenges. Me kau, nguaisei a uldesuem? El ua tiang, a rebebil a meringel er tir el omerk er a klumech e le te sekemerur me ngmeringel er tir el mengedecheduch er a rechad el diak lodengelterir. E a rekuk bebil a medakt el mo ngodech a omerellir er tirke el ledak el skuul me a lechub e te dmak el oureor. (Exo. 23:2; 1 Th. 2:2) Me a lsekum ngmo kirem el meruul er a meringel el tekoi, e molatk er a kerebil a Abraham el kirel a klaumerang me a blekeu. Me sel dolatk er a reblak a rengrir el sechal me a redil, e ngrullid el mo soad el mesuub a omerellir e dirrek el olekes er a klausechelei er kid me a Jehovah.​—Heb. 12:1, 2.

15. Kede mekerang e mo medengei el kmo a Abraham a dimlak louuchel er a rengul e le ngii el ullengesenges er a Jehovah?

¹⁵ Me a Abraham, nguluuchel er a rengul e le ngii el ullengesenges a llechul a Jehovah? A Biblia a mesaod el kmo a Abraham a “kmal mlo chuodel e mad.” (Gen. 25:8) Me ngmo lmuut er a bo el 175 a rekil me ngdirk ulemes er a klengar er ngii el mle ungil. E ngera uchul? E le sel kmes el klausechelei er ngii me a Jehovah a mle kot el klou a ultutelel el tekoi er a rengul. Me nguaisei, engdi tiang a dimlak lebelkul a kmo ngdikea urungulel el soal el mo melemolem el kiei er a ngar medal el klebesei.

16. Ngera el ungil el tekoi a bo loldeu a rengul er ngii a Abraham er a chelsel a Baradis?

¹⁶ A Biblia a mesaod el kmo, a Abraham a milengiil er “sel mats el dechor er chomekedecheraol, el luldesuii a Dios e mekedecherur.” (Heb. 11:10, BT) Me nguluumerang el kmo, ngmo er ngii a taem e ngmo mesa tia el “mats,” el ngii a Rengedel a Dios, el mengedereder er a beluulechad. Ka di molatk er a deuil a rengul el mo kiei er a chelsel a baradis el chutem, e lolemolem el olekes er a deleuill er ngii me a Dios. Ngkmal mo dmeu a rengul sel bo lodengei el kmo, a klaumerang er ngii a ngilsuterir a rebetok el mesiungel a Dios er a chelsel a betok el telael el rak! Ngdirrek el mo medengei el kmo, a tenget el mileketmokl er a Rois Moria a mle okesiul a lmuut el klou el tekoi. (Heb. 11:19) Me a ringel el blo lechelebangel er a longetmokl er ngii el mo melenget er a ngelekel er a Isak, a ngilsuterir a rebetok el miliol el mo medengelii a ringel el lechilebengelii a Jehovah, er a loderchii a Ngelekel el Jesus el mo tongetengii a klengar er ngii el kirir a rechad. (Jn. 3:16) Me a kerebil a Abraham a ngosukid el rokui el mo oba omereng el saul el kirel a olubet el tenget, el ngii a kot el klou el olechotel a bltikerreng el mileketmokl!

17. Ngera ke mla tibir el mo meruul er ngii, e ngera kede mo mesaod er a ongingil el suobel?

¹⁷ Mada me bo leblak a rengud el oukerebai er a klaumerang er a Abraham. Kede di uai ngii el kired el omekeroul er a klemedengei er kid er a Jehovah. Me sel dolemolem el mesuub el kirel a Jehovah e dolengesenges er ngii, e ngmo sebeched el mesang a rolel a lomekngeltengat e lomekerreu er kid. (Monguiu er a Hebru 6:10-12.) Me a Jehovah bo el Sechelid el mo cherechar! A ongingil el suobel e kede mo mesaod er a retedei el blak a rengrir el chad, el tir a mlo kmeed el sechelil a Dios.