1, 2. Ngmilekerang a David e ochotii a blakerreng er ngii el mo er a Dios? (Momes er a siasing er a uchelel a suobel.)

 A SAUL me a re 3,000 el soldau er ngii a ulsiik er a David er a ked er a Juda el sorir el omekoad er ngii. Engdi a ta er a kesus e a David me a rechedal a miltik er a basio el lemechiuaiu er ngii a Saul me a resoldau er ngii. Me a David me a Abisai a milekekoketerir el merael er a delongelir a resoldau el mo metik er a Saul. Me a Abisai a milengululau er a David el kmo: “Me bechikak me kdibsechii el dmelii er a chutem; ng di tal kulebisech el diak bo le erung.” Engdi a David a dimlak lekengei me lokodir a Saul, e bai dilu el kmo: “Lak le bo chimam er ngii, ele RUBAK a ulterekokl el mo melsii ngikel odersii a chimal el mor a ngellitel el king er ngii. . . . A RUBAK a olekebai er ngak el diak le bo chimak er a mlechilt er a RUBAK.”​—1 Sa. 26:8-12.

² A David a mle ungil el medengei el kmo ngera kirel el meruul me lolemolem el blak a rengul el mo er a Jehovah. Ngmle medengei el kmo ngkirel el mengull er a Saul e diak lomdasu el mo melemall er ngii. E ngera uchul? E le Dios a ngileltii a Saul el mo king er a Israel. Me chelecha el taem er kid a di ua irechar, el Jehovah a mengerechir er a rokui el mesiungel  el mo blak a rengrir el mo er Ngii, e dirrek el mo olecholt a omengull el mo er tirke el bla letetketerir el mo oungerachel.​—Monguiu er a Mika 6:8.

3. Ngmle ua ngera blakerreng er a Abisai el bedul a David?

³ A Abisai a uleba omengull el bedul a David, e le ngmle medengei el kmo a Dios a mla ngiltii el mo ongingil el king. Engdi a uriul er a bo leking, e a David a rirebet er a oberaod el klengit. Ngmlo bad el obengkel a bechil a Uria, e dmu er a Joab me lenguu a Uria el loia er a medal a mekemad me lokodir. (2 Sa. 11:2-4, 14, 15; 1 Kr. 2:16) A Joab a ta er a Abisai, me a Abisai a locha rirenges aika el tekoi el leriruul a David, engdi ngdi millemolem el oba omengull el bedul ngii. Me a lmuut el tang, a Abisai a mle ta er a mengeteklel a urrurt, me ngdirrek el mle sebechel el ousbech er tia el deruchellel e di ngii el rullii el mo king, engdi ngdimlak loruul el uaisei. Ngbai millemolem el mesiou er a David e omekerreu er ngii er a recheraro.​—2 Sa. 10:10; 20:6; 21:15-17.

4. (a) Ngmilekerang a David e ochotii a blakerreng er ngii el mo er a Dios? (b) Ngera el kerebai a bo dosaod?

⁴ A David a mle blak a rengul el mo er a Jehovah er a klengar er ngii. Sera dirk lekekerei el buik e ngmilsebechakl er a ngklel a Jehovah me a rechad er a Israel er a lokodir a Goliath. (1 Sa. 17:23, 26, 48-51) Me a uriul er a lebo el king a David e lerebet er a klengit, e a profet el Nathan a mle kirel el mellach er ngii. Me nguluuchel er a rengul e ulebult er a kngtil. (2 Sa. 12:1-5, 13) E sera lechudelang e ngchiludel a betok el mekreos el klalo el kirel a okedecherul a templo er a Jehovah. (1 Kr. 29:1-5) Me ngbleketakl el kmo a David a riruul a oberaod el klengit, engdi ngdimlak a ta el bo lak leblak a rengul el mo er a Dios. (Psa. 51:4, 10; 86:2) Me ngar tia el suobel e kede mo mesaod a kerebai er a David me a rebebil el kiliei er sel taem, e dirrek el mo suubii sel rolel e kede melemolem el blak a rengud el mo er a Jehovah el kuk ngaruchei er a ngii di el chad. Kede dirrek el mo mesaod a bebil el blekeradel el sebechel el ngosukid el meruul er tia el tekoi.

5. Ngera kede suubii er a cheleuid el omerellel a Abisai?

⁵ Sel taem el Abisai a mlo soal el omekoad er a Saul, e ngullecholt er a blakerreng er ngii el mo er a David. Engdi a David a mle medengei el kmo ngklengit a lsekum te melemall er a “ngellitel el king” er a Jehovah. (1 Sa. 26:8-11) Me kede nguu a klubeled er tia el tekoi. Sel bo lekired el melilt er a kmo ngmo blak a rengud el mo er techang, e ngkired el melatk a omellach er a Biblia el melutk er a blekeradel el dechelebangel er ngii.

6. Alta e ngklou a ultutelel el bo leblak a rengud el mo er a rechedad me a resechelid, engdi ngera el tekoi a kired el mo kerekikl er ngii?

⁶ Kid a ulebeob el sebechel el mo blak a rengud el bedul a chad el betik er a rengud el ua sechelid me a lechub e ngchad er a blid. Engdi kid el diak demecherrungel a uchul me ngsebechel a uldesued el mo cheleuid. (Jer. 17:9) Me a lsekum a betik er a rengud a ruebet er a klengit e mo ikrii a Jehovah, e ngkmal kired el melatk el kmo, ngbai klou a ultutelel el bo leblak a rengud el mo er a Jehovah el ngaruchei er a ngii di el chad.​—Monguiu er a Mateus 22:37.

7. Ngmilekerang a ta el odos e melemolem el blak a rengul el mo er a Jehovah er a chelsel a chetituokel el blekeradel?

⁷ Me a lsekum a ta er a chedam a mesuld a ngklel, e kau a sebechem el melemolem el ochotii el kmo ngblak a rengum el mo er a Jehovah. El ua tiang, a delal a Anne el milsuld a ngklel a uluudengua el mo er a Anne el soal el mo oldingel er ngii. ^[1] Ngdilu er a Anne el kmo ngkmal mekngit a rengul, e le telungalek er ngii a diak lekengei el mengedecheduch er ngii. Me a Anne a kmal mlo mekngit a rengul er a delal, me ngdilu er ngii el kmo ngmo luchesii a babilengel el mo er ngii. Me a Anne a mlo kerekikl el melatk a omellach er a Biblia er a uchei er a loluches er a babilengel. (1 Ko. 5:11; 2 Jn. 9-11) Me ngar er a babilengel e ngmle ungil el smodii el kmo ngii a chilitii a telungalek er ngii er sera lerebet er a klengit e lak lekengei el obult er a mekngit el omerellel. Ngdirrek el dilu er ngii el kmo, a di ta el rolel e ngsebechel el lmuut el mo dmeu a rengul a sel lluut el mo er a Jehovah.​—Jak. 4:8.

8. Ngera el blekeradel a ngosukid el mo melemolem el blak a rengud el mo er a Dios?

 ⁸ A reblak a rengrir el mesiungel a Dios er a taem er a David a dirrek el mle ngariou a rengrir, e ungil a omerellir, e uleba blekeu. Me bo dosaod aika el blekeradel el ngosukid el melemolem el blak a rengud el mo er a Jehovah.

9. Ngera me a Abner a millasem el omekoad er a David?

⁹ A Jonathan el ngelekel a Saul me a merreder er a resoldau er a Israel el Abner a ulemes er a David er a loba bdelul a Goliath el mo er a King el Saul. Me a Jonathan a mlo sechelil a David e millemolem el blak a rengul el mo er ngii. (1 Sa. 17:57–18:3) E a Abner a dimlak, ngbai uriul e ngmlo olengeseu er a Saul, el ngii a mle soal el omekoad er a David. (1 Sa. 26:1-5; Psa. 54:3) A Jonathan me a Abner a dul mle medengei el kmo a Dios a soal a David a bo longingil el king er a Israel. Engdi a uriul er a lemad a Saul, e a Abner a dimlak lekengei el olengeseu er a David. Ngbai millasem el meruul er a ngelekel a Saul el Isboseth el mo king. E a uriul e ngii el Abner a locha mle soal el mo king a uchul me ngmlo bad el obengkel a ta er tirke el mle bechil a King el Saul. (2 Sa. 2:8-10; 3:6-11) Ngera me ngkmal mle kakerous a uldesuel a Jonathan me a Abner el bedul a David? E le Jonathan a mle blak a rengul el mo er a Jehovah e dirrek el mle ngariou a rengul, engdi a Abner a dimlak.

10. Ngera me a Absalom a dimlak leblak a rengul el mo er a Dios?

¹⁰ A Absalom el ngelekel a King el David a dimlak leblak a rengul el mo er a Dios e le ngmle kedidai a rengul. Ngmle soal el mo king me “ngiluu a tar a kuruma ma bebil er a uos, ma re 50 el soldau el remurt er medal.” (2 Sa. 15:1) Ngdirrek el milengesuseu er a rebetok el chad er a Israel el mo olengeseu er ngii. Me a lmuut el tang, ngmillasem el omekoad er a demal, alta ngmle ungil el medengei el kmo a Jehovah a tiltkii a David el mo king er a Israel.​—2 Sa. 15:13, 14; 17:1-4.

11. Ngera kede suubii er a blekerdelel a Abner me a Absalom me a Baruk?

¹¹ Me a chad el kedidai a rengul e soal el mo er ngii a klisichel el mengedereder a kmal meringel er ngii el mo blak a rengul el mo er a Dios. Me kid a betik a rengud er a Jehovah e dirrek el diak el soad el mo mekngit a omerelled e di mo melatk er a di kid el ua Abner me a Absalom. Engdi ngkmal kired el mo kerekikl, me lak bo doureng el mo betok a ududed me a lechub e dosiik a ngarbab el urered el uchul a chetengakl el me er kid. E le tia sebechel el tomellii a deleuill er kid me a Jehovah. Ngmlo er ngii a telkib el taem el Baruk el melechesel a Jeremia a mlo oureng a tekoi el dimlak er ngii, me ngmlo diak el deu a rengul el mesiou er a Dios. Me a Jehovah a dilu er ngii el kmo:  “Mesang, a ikel ktileketek a kulemall, ma ikel kdilalem a kumadel. Tia kuruul er ngii er a beluu el rokir. E kau, kosiik a ngarbab el tekoi el di ekor kau? Bai lak mosiik.” (Jer. 45:4, 5) Me a Baruk a kilengei er a uleklatk er a Jehovah. Me nguchul a llomeserreng a lsekum kede olengesenges er a Jehovah, e le ngdi kmedu el mo okngemedii tia el mekngit el beluulechad.

12. Msodii a uchul me ngdiak el sebeched el ungil el mesiou er a Dios a lsekum kede di melatk er a di kid.

¹² A Daniel el odam er kid el ngar er a Mexico, a mle kirel el melilt el kmo ngmo blak a rengul el mo er techang. E le ngmle soal el mo bechil a redil el diak longull er a Jehovah. Ngdmu el kmo: “Ak millemolem el meluches el mo er ngii el mo lmuut er a taem el kumuchel el pioneer.” Engdi ngmlo mtebengii el kmo ngkmal di melatk er a di ngii e le ngdi melemolem er a rengul. Ngdimlak leblak a rengul el mo er a Jehovah me ngmle kirel el mo ngariou a rengul. Me nguluuchais er tia el tekoi el mo er a ta er a remechuodel. Me ngdilu el kmo: “Ngika el odam a ngilsukak el mo medengei el kmo a lsekum ngsoak el mo blak a renguk el mo er a Dios, e ngkirek el mo diak kuluches el mo er ngika el redil. Me a uriul er a betok el nglunguchek me a kngtil a renguk, e ngmlo diak kuluches el mo er ngii. Me ngdi mle telkib e ngkmal mlo klou a deurreng er ngak er a omesiungek.” Me chelechang e a Daniel a mesiou el odam el oldingel a ongdibel e mla mo bechil a redil el betik a rengul er a Jehovah.

13. Ngmlekera Nathan e melemolem el blak a rengul el mo er a Dios me a David el mo lmuut er sera lerebet er a klengit a David?

¹³ Me a blakerreng er kid el mo er a Jehovah a ngosukid me ngsebeched el mo blak a rengud el mo er a rebebil e dirrek el ngosuterir. A profet el Nathan a millemolem el blak a rengul el mo er a Jehovah me a dirrek el David. Me a uriul er a David er a lenguu a bechil a ta er a chad e lokodir ngii el chad, e a Jehovah a ulderchii a Nathan el mo mellach er ngii. A Nathan a uleba blekeu e dirrek el ullengesenges er a Jehovah. Engdi ngdirrek el uleba llomeserreng e mlo ungil el mengedecheduch er a David. Ngmle soal el ngosuir el mo medengei el kmo ngkmal oberaod a tekoi el bla leruul, me nguluuchais er ngii el kirel a merau el chad el rirecherechii a di chimo el chermel a chebuul el chad el ngelekel a sib. Me sera lerengesii tia el cheldecheduch a David e ngkmal ngilasech a rengul er ngike el merau el chad. Me a Nathan a dilu el kmo: “Kau ingiil chad.” Me a David a mlo medengei el kmo ngmla mo er a klengit el omtok er a Jehovah.​—2 Sa. 12:1-7, 13.

14. Ngmekerang a ungil el omerellem e ochotii el kmo ngblak a rengum el mo er a Jehovah me a rechad?

¹⁴ A ungil el omeruul a sebechel el ngosukau me ke melemolem el blak a rengum el mo er a Jehovah e dirrek el mo blak a rengum el mo er a rechad. El  ua tiang, ke locha ungil el medengei el kmo a odam a mla ruebet er a oberaod el klengit. Engdi ngdirk soam el melemolem el blak a rengum el mo er ngii, e le ngikang a kmal sechelim me a lechub e ngchedam. Engdi ke medengei el kmo nglmuut el klou a ultutelel el kirel el mo blak a rengum el mo er a Jehovah. Me ke di ua Nathan el mo olengesenges er a Jehovah, engdi ngmo ungil a omerellem el mo er a odam. Me ke dmu er ngii el kmo ngkirel el mo olengit a ngeso er a remechuodel, e kirel el mereched el mong. Engdi a lsekum ngdiak lebong, e ngkirem el mo subedeterir a remechuodel. Me sel moruul el uaisei, e ke ochotii a blakerreng er kau el mo er a Jehovah. E a osisiu el taem e ngungil a omerellem el mo er a odam er kau, me ngmo sebechir a remechuodel el ngosuir me nglmuut el mo ungil a delongelel ngii me a Jehovah. E a remechuodel a mesmechokl er ngii el okiu a ungil e melemalt el rolel.​—Monguiu er a Levitikus 5:1; Galatia 6:1.

15, 16. Ngera me a Husai a uluusbech er a blekeu me bo leblak a rengul el mo er a Dios?

¹⁵ A Husai a mle ta er a kmal kmeed el sechelil a King el David. Me sel taem el rechad a mlo sorir el meruul er a Absalom el mo king, e ngmle kirel a Husai el mo oba blekeu me lolemolem el blak a rengul el mo er a David me a dirrek el Dios. Ngmle medengei el kmo a Absalom a merema er a Jerusalem ngii me a resoldau er ngii, e a David a mla chemiis. (2 Sa. 15:13; 16:15) Me ngmilekerang a Husai? Ngchilitii a David e mo olengeseu er a Absalom? Ngdimlak. Alta a David a kmal chudelang e a rebetok el chad a mle sorir el mekodir, engdi a Husai a millemolem el blak a rengul el mo er ngii, e le Jehovah a ngileltii a David el mo king. Me ngtilobed el merael el mo er a Rois er Olib el mo omes er a David.​—2 Sa. 15:30, 32.

¹⁶ A David a ullengit er a Husai me lebo er a Jerusalem e loruul er ngii el leko ngsechelil a Absalom, me bo lsebechel a Absalom el orrenges er ngii er a bai lorrenges er a Ahithofel. Me a Husai a uleba blekeu e kilengei el mo ocherur a kodall me ngmo sebechel el olengesenges er a David e melemolem el blak a rengul el mo er a Jehovah. A David a milluluuch el olengit er a Jehovah me lengesuir a Husai. Me a Jehovah a ngilsuir, e rirellii a Absalom el mo kongei er a uldesuel a Husai el diak el Ahithofel.​—2 Sa. 15:31; 17:14.

17. Ngera me kede ousbech er a blekeu el mo blak a rengud el mo er a Dios?

¹⁷ Kede ousbech er a blekeu me ngmo sebeched el melemolem el blak a rengud el olengesenges er a Jehovah, el diak di doruul a sorir a rechad er a blid me a rechad er a urered, me a lechub e te chad er a kabelment. Ka molatk er a Taro el chad er a Siabal. Sera lekekerei e ngmle blechoel el olengesenges er a demal me a delal. Ngmirruul el uaisei e le ngdiak el ngerachel, e ngbai bltkil a rengul el mo er tir me ngsoal el oldeu a rengrir. Me nguaisei, engdi sera bo lomuchel el mesuub el obengterir a Resioning er a Jehovah e ngmle sorir a bo lak losuub. Tiang a rirellii a Taro el kmal mo mekngit a rengul, me ngkmal mle meringel er ngii el ouchais er tir el kmo ngmla tibir a rengul el mo er a miting. Ngdmu el kmo: “Te kmal mle kesib a rengrir er ngak e dimlak lekengei er ngak el mo oldingel er tir er a blirir el kmal betok el rak. Me ak milluluuch el olengit a blekeu me ngmo sebechek el outekangel. Chelecha el taem e te mla mo telkib el chelellakl a rengrir me ngmla mo sebechek el mo oldingel er tir.”​—Monguiu er a Osisechakl 29:25.

18. Ngera ke mla suubii er tia el suobel?

¹⁸ Me kid me ngsebechel el mo blak a rengud el mo er a Jehovah el ua David me a Jonathan me a Nathan me a Husai, e tiang a mo uchul a klou el deuil a rengud. Ngkmal diak el soad el mo ua Abner me a Absalom el tir a dimlak leblak a rengrir. Ngmera el tekoi, ngdiak demecherrungel me kede mo remuul a cheleuid. Engdi ngsebeched el meketeklii el kmo kid a blak a rengud el mo er a Jehovah.