1, 2. Ngera me sel kmes el deleuill er a Jonathan me a David a kmal ungil el kerebai el kirel a blakerreng?

 A JONATHAN a ulterekokl el kmal mlo mechas a rengul er a blekengel a ngeasek el David. A David a mla mekodir a Goliath e nguu a bdelul el mo er medal a demal a Jonathan er a Saul el King er a Israel. (1 Sa. 17:57) Me a Jonathan a mle ungil el medengei el kmo a Dios a ulebengkel a David, me seikid el taem e ngii me a David a “mocha omak er a diak a dertel klausechelei” er tir el terung. (1 Sa. 18:1-3) Me a Jonathan a millemolem el blak a rengul el mo er a David el mo lmuut er a kodellel.

² Me a Jonathan a mle blak a rengul el mo er a David, alta e a Jehovah a mla ngiltii a David el mo ongingil el king er a Israel el diak el Jonathan. Me sera bo lolasem a Saul el omekoad er a David, e a Jonathan a kmal mlo suebek a rengul er a sechelil. Ngmle medengei el kmo a David a mla er a ked er a Hores, me ngmlong el mo melisiich er ngii me lolemolem el  ultuil er a Jehovah. Ngdilu er a David el kmo: “Lak ke medakt. A demak er a Saul a diak el sebechel el tomellau. Ng medengei el kmo kau a mo king er a Israel e ngak a mo ongingim.”​—1 Sa. 23:16, 17.

3. Ngera mle kot el klou a ultutelel er a rengul a Jonathan, e kede mekerang e medengei? (Momes er a siasing er a uchelel a suobel.)

³ A rechad el rokui a kmal sorir a rechad el blak a rengrir. Engdi kid, ngdi soad a Jonathan e le ngii el mle blak a rengul el mo er a David? Ngdiak leuaisei, a blakerreng er ngii el mo er a Dios a mle kot el klou a ultutelel er a klengar er ngii. Tiaikid sel mle uchul me ngdimlak lemechechei e bai kmal mle blak a rengul el mo er a David, alta e a David a mla mengilt el mo king. Ngdirrek el millisiich er a David el mo ultuil er a Jehovah el kirel a ngeso. Me tir el terung a millemolem el blak a rengrir el mo er a Jehovah me a delongelir el terung, e lilemelemii a telbilir el kmo: “A RUBAK bo lomtebechel el kmo kau me ngak, ma ruldidellel a rseched a mo oltaut er a mesisiich el telbiil el de rirellii.”​—1 Sa. 20:42.

4. (a) Ngera rullid el mo dmeu a rengud er a klengar er kid? (b) Ngera kede mo mesaod er tia el suobel?

⁴ Kid me ngdirrek el kired el mo blak a rengud el mo er a rechad er a blid, me a resechelid, me a dirrek el rudam me a rudos er kid er a ongdibel. (1 Th. 2:10, 11) Engdi sel kot el klou a ultutelel, a blakerreng er kid el rokui el mo er a Jehovah, e le ngii a milskid a klengar er kid! (Och. 4:11) Me sel leblak a rengud el mo er Ngii e ngkmal mo dmeu a rengud er a klengar er kid. Engdi tia el blakerreng er kid a kirel el melemolem el mo lmuut er sel taem el bo dechelebangel a ringel. Me ngar tia el suobel e kede mo mesaod er a rolel e a kerebil a Jonathan a ngosukid el melemolem el blak a rengud el mo er a Jehovah er a (1) taem el domdasu el kmo a rulab a dereder a diak lerredemelel a omengull er kid, me a (2) taem el dolilt el kmo ngmo blak a rengud el mo er techang, me a (3) taem el odam a mo cheleuid me a lechub e ngmekngit a omerellel el bedul kid, me a (4) taem el bo lemeringel er kid el oltaut er a telbiil el bla derellii.

5. Ngera me ngkmal mle meringel er a rechad er a Israel el mo blak a rengrir el mo er a Dios er a temel a omengederederel a Saul?

⁵ A Jonathan me a rechad er a Israel a mle chelebangel er a kmal meringel el blekeradel. A demal a Jonathan el King el Saul a dikea lolengesenges, me a Jehovah a ultngeklii. (1 Sa. 15:17-23) Me nguaisei, engdi a Dios a milecherei me ngmelemolem el mengedereder el betok el rak. Me ngkmal mlo meringel er a rechad el melemolem el blak a rengrir el mo er a Dios, e le ngellitel el king er tir a dengchokl er a “kingall er omerreder el le kildmeklii a RUBAK” e di meruul a mekngit el tekoi.​—1 Kr. 29:23.

6. Kede mekerang e medengei el kmo a Jonathan a millemolem el blak a rengul el mo er a Jehovah?

⁶ A Jonathan a millemolem el blak a rengul el mo er a Jehovah. Ka molatk a tekoi el leriruul er a uriul er a bo lak lolengesenges er a Dios a Saul. (1 Sa. 13:13, 14) Sel taem e a klou el urrurt er a resoldau er a Filistia a mlei el ngar er a 30,000 el kuruma el oumekemad er a rechad er a Israel. E a Saul a di mle 600 a resoldau er ngii, e di ngii me a Jonathan a ngar er ngii a klekedellir er a mekemad. Engdi a Jonathan a kmal dimlak lemedakt, e le ngmlo melatk a tekingel a profet el Samuel el kmo: “A Dios a mla rullii a mesisiich el telbiil, me ng diak bo le chitemiu.” (1 Sa. 12:22) Me ngdilu er a ta er a resoldau el kmo: “Ng diak a sebechel torebengii [a Jehovah] me lak le rellid el mo mesisiich er a mekemad ma klsai er kid me ng diak le terebengii.” Me ngmirrael ngii me ngika el soldau el mo oumekemad er a rebetok el soldau er a Filistia, e milekodeterir a rebekord el 20 er tir. A Jonathan a uluumerang er a Jehovah me ngulemekngeltengat er ngii. Ngmlo er ngii a klou el desiu me a rechad er a Filistia a kmal mlo medakt, me ngdi mle tir el mo kakoad e kaimekmad me a rechad er a Israel a mlo mesisiich er tir.​—1 Sa. 13:5, 15, 22; 14:1, 2, 6, 14, 15, 20.

7. Ngmle ua ngera omerellel a Jonathan el mo er a demal?

⁷ Me alta e a Saul a di millemolem el diak lolengesenges  er a Jehovah, engdi a Jonathan a di ullengesenges er ngii a lsekum ngmo kirel. El ua tiang, ngulebengkel a demal el oumekemad el mesebechakl er a rechedal a Jehovah.​—1 Sa. 31:1, 2.

8, 9. Ngera me ngkired el olecholt a omengull el mo er a rulab a dereder?

⁸ Me kid a di ua Jonathan el sebechel el mo blak a rengud el mo er a Jehovah el okiu sel dolengesenges a llechul a kabelment er a beluad a lsekum ngmo kired. A Jehovah a omechei aika el omerreder me ngmengedereder er kid, e Ngii a soal a dolecholt a omengull er kid el mo er tir. (Monguiu er a Rom 13:1, 2.) Tiaikid a uchul me ngkired el olengesenges er a rechad er a kabelment, alta e ngchebirukel a omerellir me kede omdasu el kmo ngdiak lerredemelel a nguu a omengull er kid. Ngdirrek el kired el olecholt a omengull el mo er tirke el rokui el Jehovah a mla mesterir a llemeltir el mengedereder.​—1 Ko. 11:3; Heb. 13:17.

⁹ A Olga el odos er kid el ngar er a South America a ulechotii a blakerreng er ngii el mo er a Jehovah el okiu sel lolecholt er a omengull el mo er a bechil el kmal mekngit a omerellel el mo er ngii. ^[1] A lebebil e ngika el bechil a mo lmuk e diak longedecheduch er ngii, me a lechub e ngdmu mekngit el tekoi el mo er ngii e le ngii el ta er a Sioning er a Jehovah. Ngdirrek el dmu er ngii el kmo ngmo ngoititerir a rengelekel e merael. Engdi a Olga a dimlak a ta el lomtechei a mekngit el omerellel, e ngbai kmal mle ungil el bechiil el redil. Ngmilsilek a bilel, e meruul a kelel, me a lmuut el bebil er a tekoi el kirir a rechedal. (Rom 12:17) E sel lebo er ngii a techellel e ngobengkel a bechil el mo oldingel er a rechedal me a resechelil. Ngmlo er ngii a taem e ngmlo soal a bechil el mo er a ta er a beluu el mo er a kemeldillel a demal. Me ngkiltmeklii e ulebengkel el mong, me ngmla er rikl er a ikelesia e mengiil er a bechil el mo merek. Me a uriul er a betok el rak e ngmlo ungil a omerellel a bechil, e le Olga el mle klou a rengul e mle blechoel el olecholt a omengull el mo er ngii. Me chelechang e ngbai melisiich er ngii el mo er a miting e oltak er ngii el mong, e a lebebil e ngobengkel el mo er a miting.​—1 Pe. 3:1.

10. Ngmilekerang a Jonathan e mo ulterekokl a rengul er a chad el bo loba blakerreng el mo er ngii?

¹⁰ Sel taem el Saul a mlo soal el omekoad er a David, e a Jonathan a mlo chelebangel er a meringel  el omelilt. Ngmle soal el blak a rengul el mo er a demal, engdi ngdirrek el mle soal el mo blak a rengul el mo er a David. Ngmle medengei el kmo a Dios a ulemekerreu er a David el diak el Saul, me ngileltii el mo blak a rengul el mo er a David. Me ngdilu er ngii me lebertii, e dirrek el silodii el mo er a Saul sel uchul me ngkirel el mecherei a David me ngmerael.​—Monguiu er a 1 Samuel 19:1-6.

11, 12. Ngera me a bltkil a rengud el mo er a Dios a ngosukid el mo blak a rengud el bedul Ngii?

¹¹ A Alice el odos er kid er a Australia a dirrek el mlo kirel el melilt er ngike el bo leblak a rengul el mo er ngii. Sel taem er a losuub, e nguluuchais er a rechad er a blil aike el tekoi el lesuub. Ngdilu er tir el kmo ngdiak longedaol er a Kurismas, e silodii a uchul me ngdiak el teloi er tir el meruul er ngii. Me a kot el uchul e ngdimlak el sorir a rechad er a blil, e a uriul e ngkmal mlo kesib a rengrir er ngii, e le te mlo omdasu el kmo ngdikea lebetik a rengul er tir. Me a delal a dilu er ngii el kmo ngkmal diak el soal el lmuut el omes er ngii. Me a Alice a dmu el kmo: “Ngkmal mlo imis el mekngit a renguk e le ngkmal betik a renguk er a rechad er a blik. Engdi ak tilbir el kmo a Jehovah me a Jesus a kirir el mo kot er a renguk, me ak mlo metecholb er sera lebo er ngii a ta er a klou el ongdibel.”​—Mt. 10:37.

¹² Ngdirrek el diak el kired el nguu a team er kid me a skuul me a lechub e ngbeluad el mo er uchei er a blakerreng er kid el mo er a Jehovah. A Henry a kmal mle soal el ousekool a chess el omtechei er a skulel, e mle soal el mo nguu a championship el kirel a skulel. Engdi ngii el uluusekool a chess er a bek el sebadong me a sandei a uchul me ngmlo diak a temel el oldingel e mo er a miting. A Henry a mlo melechesuar el kmo, ngmla nguu a skulel el mo er uchei er a blakerreng er ngii el mo er a Dios, me ngtilbir el mo diak el chedal a chess team er a skuul.​—Mt. 6:33.

13. Ngmekera blakerreng er kid el mo er a Dios e ngosukid el sumechokl a mondai er a telungalek er kid?

¹³ Ngdiak el lebeot el tekoi el bo leblak a rengud el mo er a derta el chad er a telungalek er kid. A Ken a kmo: “Ngmle soak el mo oldingel er a delak e nguu el me kiei er a blimam a lebebil er a taem, e le ngkmal mla mo chuodel. Engdi ngii me a bechik a kmal diak el sebechir el dmak.” Ngdirrek el dilu el kmo: “Ngdiak el sebechek el odeuir a rengul a tang, e lak temellii a rengul a tang.” Me a Ken a millatk a ulekrael er a Biblia el kirel tia el blekeradel, e mlo medengei el kmo ngkirel el mo blak a rengul el mo er a bechil el kot. Me ngmlo meduch el sumecheklii tia el tekoi me ngmlo ungil a rengul a bechil. Ngdirrek el silodii el mo er ngii sel uchul me ngkirel el mo ungil a omerellel el mo er a delal, e mlo smodii el mo er a delal sel uchul me ngkirel el mo ungil a omerellel el mo er a bechil.​—Monguiu er a Genesis 2:24; 1 Korinth 13:4, 5.

14. Ngmle ua ngera omerellel a Saul el mo er a Jonathan?

¹⁴ A blakerreng er kid el mo er a Jehovah a sebechel el mo measem a lsekum a odam el olab a ngerachel er a ongdibel a mo mekngit a omerellel el bedul kid. A King el Saul el mle ngellitel er a Dios a kmal mle mekngit a omerellel el mo er a ngelekel. Ngdimlak lodengelii sel uchul me a Jonathan a kmal mle betik a rengul er a David. Me sera lolasem a Jonathan el olengeseu er a David, e a Saul a kmal ngilasech a rengul, e ulemekrur er a ngelekel er a delongelir a rebetok el chad. Engdi a Jonathan a di millemolem el oba omengull el bedul a demal. E a osisiu el taem e ngmillemolem el blak a rengul el mo er a Jehovah me a David, el ngii a bla lengiltii a Dios el mo ongingil el king er a Israel.​—1 Sa. 20:30-41.

15. Ngmo ua ngera blekerdeled a lsekum a odam a mo mekngit a omerellel el bedul kid?

¹⁵ Me ngar er a chelsel a ongdibel er chelechang, e a rudam el olab a ngerachel a melasem el mo tabesul a omerellir el mo er a rokui el chad. Engdi tirkang a diak lemecherrungel, me a lebebil e ngmo diak lungil el medengei el kmo ngera dilubech. (1 Sa. 1:13-17) Me a lsekum ngmo cheleuid a uldasu el kired me a lechub e ngmo mekngit a omeruul  el bedul kid, e lak bo lemechitechut a rengud e bai dolemolem el di blak a rengud el mo er a Jehovah.

16. Ngar er a chelsel a ngera el blekeradel e ngkired el ochotii a blakerreng er kid el mo er a Dios, e diak di dosiik a mo klungioled?

¹⁶ A Saul a kmal mle soal a Jonathan a bo el ongingil el king, el diak el David. (1 Sa. 20:31) Engdi a Jonathan a kmal mle betik a rengul e blak a rengul el mo er a Jehovah. Me ngdimlak a ta el bo lemechechei, e bai kmal mlo sechelil a David e lilemelemii a telbilel el mo er ngii. Me nguaisei, e le chad el betik a rengul e blak a rengul el mo er a Jehovah a “blechoel el oltaut a telbilel, e dirrek a lesal kmal mo meringel er ngii me ng di oltaut.” (Psa. 15:4) Me kid el blak a rengud el mo er a Jehovah a uchul me ngsoad el blechoel el oltaut a telbiled el bla deruul. Me a lsekum kede meruul a babilenged el kirel a siobai, e ngkired el mo oltaut aike el dekilengei el mo meruul el mo lmuut er a taem el bo lemeringel er kid el rullii. Me a lsekum ngmo er ngii a chetituokel er a chebechiieled, e ngkired el ochotii a bltkil a rengud el mo er a Jehovah e mo melemolem el blak a rengud el bedul a bechid.​—Monguiu er a Malakai 2:13-16.

17. Ngera ngmla ngosukau er ngii tia el suobel?

¹⁷ Me ngsoad el mo ua Jonathan el mle blak a rengul el mo er a Dios, el mo lmuut er a taem el lechillebangel a meringel el blekeradel. Mada me dolemolem el blak a rengud el mo er a rudam me a rudos er kid, el mo lmuut er a taem el letemellii a rengud. A bo deuaisei e kede odeuir a rengul a Jehovah, e tiang a mo uchul a klou el deurreng er kid. (Osi. 27:11) Ngulterekokl a rengud el kmo ngdi blechoel el meruul a tekoi el mo uchul a klungioled e dirrek el omekerreu er kid. Me ngar er a ongingil el suobel e kede mo mesuub el kirir a rebebil er a taem er a David el tir a millemolem el blak a rengrir, me a rebebil el dimlak leblak a rengrir.