NGERA sel kot el ungil el sils er a klengar er kau? Ngsel sils er a obo bechiil me a lechub e ngtaem er a omochellii a ketengem? Me a lechub e ngsel sils er a bo metecholb? Tiaikid a locha sel kot el klou a ultutelel el sils er a klengar er kau el uchul a klou el deuil a rengum. Seikid el sils e a rudam me a rudos er kau a dirrek el mle dmeu a rengrir el omes er kau el ochotii el kmo, ngbetik a rengum er a Dios er a rengum me a uldesuem me a klisichem el rokir!​—Mk. 12:30.

Me seikid el taem el me er chelechang e ke locha mla melechesuar a klou el deurreng er a omesiungem el mo er a Jehovah. Me nguaisei, engdi a rebebil a mla mo diak el sal dmeu a rengrir el ua ngar er a mong. Ngera me nguaisei? Ngera uchul me ngsebeched el melemolem el dmeu a rengud el mesiou er a Jehovah?

A klumech er a Renged a uchul a klou el deurreng. E ngera uchul me nguaisei? E le Jehovah a tibir el kmo tia el Renged a mo okngemedii tia el mekngit el beluulechad, e rullii tia el chutem el mo baradis. A Sefania 1:14 a kmo: “A kloul sils er a RUBAK a kmedang, ng kmal kmeed me ng di mereched el mei.” Me nguaisei, engdi a lsekum kede mla mengiil el kmal betok el rak e dirkak lemei, e ngsebechel el mo mechitechut a rengud e mo diak el blak a rengud er a omesiunged.​—Osi. 13:12.

Sel dongoit a taem el obengterir a rudam me a rudos er kid, e ngosukid el mo dmeu a rengud er a omesiunged. Me a ungil el omerellir a rechedal a Jehovah a sebechel el rullid el mo soad el mo teloi er a mera el omengull. (1 Pe. 2:12) A leuaisei, e kede mo mekerang a lsekum a odam me a lechub e ngodos er kid a nguu a omellach er a ongdibel e le ngdimlak lolengesenges a llechul a Dios? Sel ledubech a chouaika el tekoi, e ngsebechir a rebebil el mesibas e mo mechitechut a rengrir.

Tia el beluulechad el di melisiich a tekoi er a kerruul a dirrek el sebechel el mengitechut a rengud, e le ngrullid el mo omdasu el kmo kede ousbech a betok el klalo el diak demera el ousbech. Me lak dobes a tekingel a Jesus el kmo: “Ng diak a chad el sebechel el mo sibrir a re terul mastang; ng mo chetil a tang e mo soal ngikel kuk tang; ng mo blak a rengul er a tang e mo mengemikr er ngikel tang. Ng diak el sebechiu el di tang e mesiou er a Dios ma udoud.” (Mt. 6:24) Me ngdiak el sebeched el mesiou er a Jehovah el oba deurreng, e a osisiu el taem e ngdi soad el korekerengii tia el beluulechad.

Sel lebetik a rengud er a Jehovah, e a llechul a diak lomekberaod er kid. (1 Jn. 5:3) A Jesus a dilu el kmo: “Mer ngak, kemiu el rokui el chorma er oberaod el chelungel, e ak mo meskemiu a ulengull. Mnguu ongelungel er ngak el cholngii, e mosuub er ngak, ele ngak a medemedemek e ngariou a renguk; me kom mo metik er a ulengelliu. Sel ongelungel el bo kumeskemiu a beot, me sel chelungel el bo kumatk er ngii er kemiu a kebekakl.” (Mt. 11:28-30) Me a klengar er a mera el Kristiano a kmal ungil e uchul a klou el deurreng. Me bo dosaod a edei el uchul me a omesiunged el mo er a Jehovah a uchul a deuil a rengud.​—Hab. 3:18.

Kede mesiou er a “dmeu a rengul el Dios” el ngii a milskid a klengar er kid. (1 Ti. 1:11, NW; Rel. 17:28) Kid a ngar e outeliil, e le Dios a milebid. Tiaikid a uchul me ngsoad el melemolem el mesiou er ngii el oba deurreng, alta ngmla mo betok el rak er a demetecholb.

Ka molatk er a odam er kid er a Héctor, el milsiou el odam el oldingel a ongdibel el 40 el rak. Chelechang e ngmla mo chuodel, engdi ngdirk mesiou er a Jehovah el oba deurreng. (Psa. 92:12-14) A bechil a kmal smecher, me a Héctor a dikea lsebechel el mengoit er a klou el temel el kirel a omesiungel, engdi ngdirkak bo lemechitechut a rengul. Ngdmu el kmo: “Ngkmal mekngit a renguk el omes er a bechik el di merael el mo mechitechut, e dirrek el diak el beot er ngak el omekerreu er ngii, engdi ngdirkak kuridii a deurreng er ngak sel kuruul er a omesiungek el mo er a Dios. Me ngak el medengei el kmo ak blsel a Jehovah, el ngii a ulemeob er a rechad el ngar er ngii a uchul, me ngkmal betik a renguk er ngii e soak el mesiou er ngii. Ak dirrek el meruul aike el sebechek el omerk er a klumech e blechoel el melatk er a Rengedel, me ngsebechek el melemolem el dmeu a renguk.”

A Jehovah a mla kutmeklii a olubet el tenget, el meskid a techall el mo dmeu a rengud er a klengar er kid. A Biblia a kmo: “Ele Dios a kmal mle betik a rengul er a beluulchad me ng milsa di tal Ngelekel, me tirkel rokui el mo oumera er a Ngelekel a Dios a diak le mad e bai mo ngar el diak a ulebengelel.” (Jn. 3:16) Nguaisei, sel dolecholt a klaumerang er kid er a olubet el tenget, e ngsebechel a kngtid el musubes e dekiei el mo cherechar. Me tia el mekreos el sengk el olechotel a klou el bltkil a rengul a Dios a rullid el mo mereng a sulel! Me a omereng el saul er kid a ngosukid el mo mesiou er Ngii el oba deurreng.

A odam er kid el Jesús el kiliei er a Mexico a dilu el kmo: “Ngkmal mle blak a renguk er a urerek. Me a lebebil er a taem e a kuureor er a tutau el mo klebesei el di udoud a uchul, el diak el merrederek a  orrimel er ngak. E a uriul e ak milsuub el kirel a Jehovah me sel omerellel el ulderchii a Ngelekel el me mad el kired. Ngkmal mlo soak el mesiou er Ngii. Me ak tilbir a renguk el mo mesiou er a Jehovah, e chilitii a urerek el mla mo 28 el rak el kuureor er ngii, e mlo mesiou el mui el taem.” Me sei a mlo uchelel a deurreng er ngii el mesiou er a Jehovah.

Ngklikiid a omerelled. Ngmle ua ngera klengar er kau er a uchei er a bo modengelii a Jehovah? A apostol el Paulus a ulemeklatk er a Rekristiano er a beluu er a Rom el kmo, a ngar er a mong e te “mle sibil a klengit,” engdi te mla mo “sibil a llemalt.” Me a klikiid el omerellir a mlo uchul e ngmle sebechir el omes el beduluchei el kirel a diak a ulebengelel el klengar. (Rom 6:17-22) Kid me kede dirrek el oltirakl a melemalt el llechul a Jehovah, me ngdiak decharm er a telemellel a deleboes el omeruul me a lmuut el bebil er a mekngit el omeruul. Me tiang a mera el uchul a klou el deurreng er kid!

Ka molatk er a Jaime el mle chad er a boxing e uluumerang el kmo kede mla er a mongkii el mei. Ngulemuchel el mei er a miting er kid e mlo medengei el kmo kede mera el oubltikerreng el mo er a rechad. Me ngullengit er a Jehovah me lengesuir el mo oumerang er Ngii, me bo lsebechel el choitii sel dimla klengar er ngii. Ngdmu el kmo: “A cherengel a taem e ak mlo medengei el kmo ngmera el ngar er ngii a Dios el ua betik a rengul el Chedam. Ak dirrek el mla ngmai a klungiolek er a melemalt el llechul a Jehovah. E le lsekum ngdimlak kngedechii a blekerdelek, e ak locha di ua tirke el mle sechelik el chad er a boxing el mla mad. Me a klengar er ngak el mesiou er a Jehovah a lmuut el ngaruchei el ungil er sel dimla klengar er ngak.”

Me ngkirel el mo ua ngera uldesued er chelecha el dongiil er a ulebongel er tia el beluulechad er a Satan? Lak dobes el kmo, kede meruul a soal a Dios e omes el beduluchei el kirel a diak a ulebengelel el klengar. Me “lak bo de mesaul el meruul a ungil, ele di dolemolem el meruul a ungil e kede mo meridm a le me belsechel.” (Gal. 6:8, 9) Bo dolemolem el outekangel, e dolasem el olecholt a blekeradel el dousbech el mo suobel er sel taem er a klou el ringel. A doruul el uaisei, e a Jehovah a mo ngosukid me ngmo sebeched el mesiou er ngii el oba deurreng.​—Jak. 1:2-4; Och. 7:9, 13, 14.

Ngulterekokl a rengud el kmo a Jehovah a mo omekngeltengat er kid el kirel a blakerreng er kid, e le ngungil el medengei a urered me a bltkil a rengud el mo er Ngii me tia el ngklel. Me a lsekum e kede melemolem el mesiou er ngii el oba deurreng, e kede mo ua David el dilu el kmo: “Ak di blechoel el medengei el kmo a RUBAK a obengkek; ng di kmeed, me ng diak a ngeral simesmengak. Isei e ng kmal meral dmeu a renguk, ele kdi blechoel el selebechakl.”​—Psa. 16:8, 9.