1, 2. (a) Msodii a uchul me a techolb a oberaod el tekoi. (b) A chad el mo metecholb, ngkirel el mo ulterekokl a rengul er a ngerang, e ngera uchul?

 ME KAU, ke ta er a ngeasek el mla mo soam el mo metecholb? A leuaisei, e ke oba kmal ileakl el techall el diak a mo mekesiur. A techolb a oberaod el tekoi el ua dulsaod er ngii er sel mlo merek el suobel. E tiang a ochotii el mo er a rechad el kmo, ke mla rullii a telbilem el mo er a Jehovah el soam el mo mesiou er ngii el mo cherechar, e a omerellem el soam el meruul a soal a kot el klou a ultutelel er a klengar er kau. Me tiang a kmal ileakl el telbiil el mo er a Dios, me ngkirem el mo metecholb er sel taem el bla bo lultebechel a uldesuem, e bla bo el soam el mo metecholb, e dirrek el mla mo ungil el medengelii a belkul a detibir er a rengud el mo er a Dios.

² Me alta e ke omdasu el kmo, ngdirkak bo mkltmokl el mo metecholb. Me a lechub e ke mla mo kltmokl engdi a rechad er a blim a omdasu el kmo, ngdirk kirem el telkib el mengiil me lebo er ngii a klou el klemedengei er kau er a klengar. Me ke mo mekerang? Lak bo lemechitechut a rengum, e bai mousbech er a techellem er  chelechang el olengeriakl er a omesiungem me bo el sebechem el mo rredemelel a mo metecholb. Me ngar er ngii a edei el tekoi el sebechem el melatk, el (1) a klaumerang er kau, me a (2) a omerellem, me a (3) a omereng el saul er kau.

3, 4. Ngera sebechir a rengeasek el suub er a omerellel a Timothy?

³ Ngera uldesuem el kirel aika el ker el kmo: Ngera uchul me a kuumerang el kmo ngar er ngii a Dios? Ngera me ngulterekokl a renguk el kmo a Biblia a babilengel a Dios? Ngera me ngkirek el olengesenges a llechul a Dios er a bai kultirakl a omerellir a rechad er tia el beluulechad? Aika el ker a sebechel el ngosukau el “mo medengelii a rengul a Dios er a kmo ng ngera ungil, ma ngera odeuir a rengul, ma ngera kmal cherrungel el ungil.” (Rom 12:2) Ngera uchul me ngkirem el oltaut er tia el bades?

⁴ A omerellel a Timothy a sebechel el ngosukau. Ngmle ungil medengelii a Tekingel a Dios e le delal me a delal el mechas a ullisechakl er ngii. Me nguaisei, engdi a Paulus a dilu er ngii el kmo: “Bo mesisiich el ngar a ikel bla msuub el msal oumerang.” (2 Ti. 3:14, 15) Me a Timothy a mle ulterekokl a rengul el kmo ngmla metik er a klemerang. Ngkilengei er ngii, el diak el delal me a delal el mechas a uchul, ngbai ngii el mlo sebechel el mesuub e mlo oumerang a tekoi el lesiluub.​—Monguiu er a Rom 12:1.

5, 6. Ngera me ngklou a ultutelel el kirem el mo melatk er sel uchul me ke oumerang er a Dios er sel taem el dirk mkekerei?

⁵ E kau a kuk mekerang? Alta ngmla mo betok el rak er a obo modengelii a klemerang. A lsekum nguaisei, e molasem el rullii a turrekong er kau el mo melatk er sel uchul me ke oumerang. Tiang a mo smisichii a klaumerang er kau e ngosukau el mo meduch el melilt a ungil el tekoi, alta ke mo chelebangel a orimel me a lechub e nguldasu er tia el beluulechad me a lechub e ngkuk di uldesuem.

⁶ Me a lsekum ke mo blechoel el omdasu el uaisei sel dirk mkekerei, e ngmo sebechem el onger a kerrir a resechelim el ua ikang: ‘Ke mekera e medengei el kmo ngmera el ngar er ngii a Dios? A lsekum a Dios a betik a rengul er kid, e ngera me ngomechei a ringel me ngmelemolem? Ngmekerang e sebechel a Dios el di mla ngar er ngii er a uchelel?’ Sel mungil kltmokl, e ngdiak bo lerrau a rengum er aika el ker, e ngbai rullau el mo soam el lmuut el mo kerekikl el mesuub er a Biblia.

7-9. Mosaod er a rolel e a study guide er a babier el “What Does the Bible Really Teach?” a sebechel el lmuut el smisichii a klaumerang er kau.

⁷ Sel mkerekikl el mesuub el di kau el tang, e ngrullau el mo ulterekokl a rengum e mo ungil el onger a ker, e dirrek el smisichii a klaumerang er kau. (Rel. 17:11) Ngar er ngii a betok el babilenged el sebechel el ngosukau. Te betok a mla metik er ngii el kmo sel losuub er a brochure el The Origin of Life​—Five Questions Worth Asking me a babier el Is There a Creator Who Cares About You? e ngkmal ngosuterir. Ngdirrek a rebetok el ngeasek a kmal sorir aike el study guide er a “What Does the Bible Really Teach?” el ngar er a jw.org. Aika sebechem el metik er a BIBLE TEACHINGS. A derta er aika el suobel a mileketmokl el sebechel el ngosukau el lmuut el smisichii a klaumerang er kau er a tekoi el losaod er ngii a Biblia.

⁸ Me kau a mesuub er a Biblia me ke locha mla mo medengei a nger er a bebil el ker el debetik er aike el study guide. Engdi a ker a kmo, kau ke mera el oumerang aika el nger er kau? Aika el study guide a ngosukau el mo kerekikl el melatk a kakerous el bades, e dirrek el melisiich er kau el mo lmuches aike el tekoi el uchul me ke oumerang. Tiang a ngosukau el mo meduch  el smodii a klaumerang er kau el mo er a rechad. Aika el study guide el ngar er a Internet a sebechem el ousbech er sel temem el mesuub el di kau el tang me lluut el smisichii a klaumerang er kau.

⁹ Ngkirel el mo ulterekokl a rengum el kmo tiang a klemerang. Tiang a ngosukau el mo kltmokl el kirel a techolb. A ta el ngeasek el odos a dilu el kmo: “Uchei er a ktibir er a renguk el mo metecholb, e ak milsuub er a Biblia e mlo medengei el kmo tiang a mera el klechelid. Me ngbek el sils el di loleketek tia el klaumerang er ngak.”

10. Ngera me ngsebeched el omdasu el kmo a klaumerang er a telecholb el Kristiano a kirel el mocholt el okiu a omerellel?

¹⁰ A Biblia a kmo: “A di doumerang e lak omeruul el obengkel, e ng di ua lak doumerang.” (Jak. 2:17) Me a mesisiich el klaumerang er kau a kirel el mocholt el okiu a omerellem. Me a Biblia a mesaod el kmo, ngkired el mo oba “chedaol blekeradel ma chomeluu ra Dios.”​—2 Pe. 3:11, BT.

11. Msodii a belkul a bo el “chedaol” a omerelled.

¹¹ Ngera belkul a bo doba “chedaol blekeradel”? A lsekum ngchedaol a omerellem e ke klikiid el chad. El ua tiang, ngsebechem el lmatk a tekoi el dilubech er a chelsel aika el mereko el elolem el buil el ochotii el kmo, ke mla mo meduch el kutukel a ungil me a mekngit? (Heb. 5:14) Ngsebechem el lotkii a taem el dimlak mkengei el mekesuseu me a lechub e ke mlorimel er a resechelim? Sel mngar er a skuul, e ngungil a omerellem? Ke melemolem el blak a rengum el mo er a Jehovah me a lechub e ke di melasem el mo ua resechelim me bo lak lolenguul er kau? (1 Pe. 4:3, 4) Nguaisei, ngdiak a ta er kid el cherrungel, me a lebebil er a taem e a chad el mla mesiou er a Jehovah el kemanget el taem a mo merur me a lechub e ngmeringel er ngii el olisechakl er a rechad. Engdi a chad el mla tibir a rengul el mo er a Dios a dmeu a rengul el ta er a Resioning er a Jehovah me ngklikiid a omerellel.

12. Ngera belkul a bo doba “chomeluu ra Dios”? E kirel el mo ua ngera uldesued el kirel?

¹² Ngera belkul a bo doba “chomeluu ra Dios”? Tiang a uldimukl er aike el tekoi el doruul er a chelsel a ongdibel el ua sel debo er a miting me a lechub e kede mo oldingel. Ngdirrek el uldimukl er a tekoi el doruul sel lak a rechad el mesekid el ua nglunguched el mo er a Jehovah me a dirrek el omesubed el di kid el tang. Me a chad el mla tibir a rengul el mo er a Jehovah a diak lomes aika el tekoi el ua berraod. Ngbai ua uldesuel a King el David el dilu el kmo: “Dios er ngak, ng kmal soak el meruul a tekingem! Ak sichedekl osisecheklem er a renguk.”​—Psa. 40:8.

13, 14. Ngera sebechel el ngosukau el mo oltaut a turrekong er kau? Te mekerang a rebebil el ngeasek e mla ngmai a klungiolir er tiang?

¹³ Ngar er a 308 me a 309 el llel a babier el Questions Young People Ask​—Answers That Work, Volume 2, e ngar er ngii a worksheet el sebechel el ngosukau el remuul a turrekong er kau. Ngsebechem el ousbech er ngii el lmuches a nger er kau er a chouaika el ker el kmo: “Ke mekerang e meketeklii a nglunguchem? Me a nglunguchem, ngochotii el kmo ngkmes a deleuill er kau me a Jehovah?” “Ngera bebil el tekoi el moruul sel mosuub el di kau el tang?” “Ke mo oldingel a obliil alta e a rechad er a blim a diak lebong?” Ngar er ngii a basio er a chelsel tia el worksheet el sebechem el lmuches a turrekong er kau el kirel aika el tekoi.

¹⁴ A rebetok el ngeasek el melatk el mo metecholb a medengei el kmo tia el worksheet a kmal klou a ultutelel. A ta el odos el Tilda a dilu el kmo: “Ak liluches a turrekong er ngak er a chelsel tia el worksheet. Me sera bo el sebechek el otaut aike el rokui el turrekong er ngak er a  uriul er a ta el rak, e ak mlo kltmokl el mo metecholb.” A ngeasek el odam el Patrick a dirrek el mirruul er a osisiu el tekoi. Ngdmu el kmo: “Ngmle ulterekokl a renguk er a turrekong er ngak, engdi sera kuluches aika el tekoi er tia el babier e ngrirellak el lmuut el mo blak a renguk el oltaut.”

15. Msodii a uchul me a telbilel a rengul a chad a kirel el di ultuil er ngii.

¹⁵ A ta er a ker el ngar tia el worksheet a kmo: “Kau ke mo mesiou er a Jehovah alta e a rechad er a blim me a resechelim a mo diak losiou er ngii?” A chad a kirel el mla mo er ngii a deleuill er ngii me a Jehovah er a uchei er a bo letibir a rengul e bo lemetecholb. Me a tekoi el loruul el mo er a Jehovah, a diak el lultuil er a rechad er a blil me a lechub e ngii di el chad. Me a blakerreng er kau er a omesiungem me a klikiid el omerellem a ochotii el kmo ngulterekokl a rengum el kmo ke mla metik er a klemerang, e soam el olengesenges a llechul a Dios. Seikid e ke mocha rredemelel a mo metecholb.

16, 17. (a) Ngera sel rullii a chad el mo Kristiano? (b) Mosaod er a okesiu el kirel a omereng el saul er kid er a olubet el tenget.

¹⁶ A ta er a klebesei, e a ta el chad el mle ungil el medengelii a Llach er a Moses a uleker er a Jesus el kmo: “Ngeral Llach a kot el ngarbab er ngii el rokui?” Me a Jesus a ulenger el kmo: “Bo le betik a rengum er a Rubak el Dios er kau er a rengum el rokir, ma klengar er kau el rokir, ma uldesuem el rokir.” (Mt. 22:35-37) Me a Jesus a milsaod er a bltikerreng el mo er a Jehovah el kmo, ngkirel el uchul me a chad a mo metecholb e mo Kristiano. A ta er a kot el ungil el rolel e ke smisichii a bltkil a rengum el mo er a Jehovah a sel mkerekikl el melatk er a olubet el tenget, el ngii a kot el ngarbab el sengk er a Dios el mo er a rechad. (Monguiu er a 2 Korinth 5:14, 15; 1 Johanes 4:9, 19.) Me sel moruul el uaisei, e ngrullau el mo oba omereng el saul el kirel tia el kot el ungil el sengk.

¹⁷ Ka molatk er tia el okesiu, oleko ke rosngang, e a ta er a chad a mei el osebelau. Ke mo er a blim e smuld a bedengem e di obes er ngika el chad el ngilsukau? Ngdiak, ke ulterekokl el kmal di oba omereng el saul el kirel a omerellel el ulsebelii a klengar er kau! Me ngdi osisiu, ngkired el oba omereng el saul el mo er a Jehovah me a Jesus el kirel a olubet el tenget. Kede belsir el kirel a klengar er kid, e le te ulsebelid er a klengit me a kodall. Me sel bltkil a rengrir el mei er kid a uchul me ngar er ngii a omeltked el mo kiei er a Baradis el chutem el mo cherechar!

18, 19. (a) Ngera me ngdiak el kirem el medakt el mo chedal a Jehovah? (b) Ngmekerang a omesiunged el mo er a Jehovah e rullii a klengar er kid el mo ungil?

 ¹⁸ Me kau, ke mereng a sulel a Jehovah el kirel aike el bla leruul el kirem? A leuaisei, e ngkmal melemalt el tekoi el bo mtibir a rengum e mo metecholb. Me a telbilel a rengum a telbiil el mrellii el mo er a Dios el kmo ke mo meruul a soal el mo cherechar. Me tiang, ngrullau el mo medakt el meruul er tia el telbiil? Ngdiak leuaisei, a Jehovah a kmal soal a kot el ungil el tekoi el kirem, me ngmo meskau a omeksullem e le kau el meruul a soal. (Heb. 11:6) Sel mtibir a rengum el mo er a Dios e bo metecholb, e a klengar er kau a diak lorael el mo mekngit, e ngbai merael el kmal mo ungil! A 24 a rekil el odam el miltecholb er a dirk el ngeasek a kmo: “Alta ngmla mo dmolech a klemedengei er ngak er a tekoi er chelecha el bla bo klou, engdi a telbilel a renguk el mo er a Jehovah er a dirk kekerei a kmal ulemekerreu er ngak er a tekoi er tia el beluulechad.”

¹⁹ A Jehovah a kmal soal a kot el ungil el tekoi el kirem. Engdi a Satan a kmal di melatk er a di ngii e kmal diak lomekerreu er kau. Me a omoltirakl er ngii e ngkmal diak bo luchul a klungiolem. Ngmekerang e meskau a tekoi el diak er ngii? Ngkmal diak a ungil chais el lolab e dirrek el kmal diak a omeltkel el kirel a ngar medad el klebesei. Ngdi sebechel el mo uchul a chelebulem e le ngdi seikid el tekoi a ngar er ngii er ngii!​—Och. 20:10.

20. Ngera el tekoi a sebechel a ngeasek el meruul me bo lekltmokl el mo tibir a rengul e mo metecholb? (Dirrek el momes er a baks el “ A Suobel el Sebechel el Ngosukau.”)

²⁰ Ke mo rullii a kot el ungil el omelilt sel mtibir a rengum el mo er a Jehovah. Me ke mla mo kltmokl el kirel tia el tekoi? A lsekum nguaisei, e lak medakt el meruul er a telbilem. Engdi a lsekum ke omdasu el kmo ngdirkak bo mkltmokl, e mousbech er tia el suobel el ngosukau el kirel. A Paulus a millisiich er a rudam er a Filipi me lolemolem el olengeriakl er a omesiungir. (Fil. 3:16) Me a lsekum ke oltirakl aika el ulekrael e ke di mereched el mo kltmokl el tongetengii a klengar er kau el mo er a Jehovah e mo metecholb.