1. Ngera uchul me a taem el dekiei er ngii a kmal ngodech er a ngii di el taem?

 A TAEM el dekiei er ngii a kmal ngodech er a ngii di el taem er a reksi. A Jehovah a mengudel er a kloul seked er a “bek el beluu, ma kebliil, ma bek el bedengir a re chad ma omelekoi” el ua lulemlaoch a Biblia. Te ua “mesisiich el beluu” el kuk betok er a eai el miliol el dmeu a rengrir el chad el tir a “mesiou er [a Dios] er a llomes ma klebesei.” (Ocholt 7:9, 15; Isaia 60:22) Ngar a reksi er a klechad, e ngkmal dirkak a ta el bo el uai tia ildisir a rechad el betik a rengrir er a Dios me a rekldemir el ua chelecha el taem.

2. Ngera el rolel a bltikerreng a desang er a rechad el tir a diak el sechelil a Dios? (Momes er a siasing er a uchelel a suobel.)

² Me nguaisei engdi Biblia a dirrek el ulemlaoch el kmo, chelecha el taem e a rechad el diak el sechelil a Dios a mo olecholt er a ngodech el rolel a bltikerreng, el ngii a bechelechelingaol el bltikerreng. A apostol el Paulus a milluches el kmo ngar er a uriul sils, e a rechad a di mo “betik a rengrir ra di tir, e nguibes a udoud” e “betik a rengrir ra tametereng el kuk ngaruchei ra le betik a rengrir ra Dios.” (2 Timothy 3:1-4, BT) Tia el rolel a bltikerreng a kuk ngodech er sel bltikerreng el mora Dios. A dolisiich aike el soad el tekoi a diak lerellii  a chad el mo dmeu a rengul, alta ngomdasu el kmo ngsebechel mo dmeu a rengul. Ngbai di mo uchul engdi mo melatk er a di ngii, e rulleterir a rechad el kmeed er ngii el mo meringel a klengar er tir.

3. Ngera kede mo mesaod er tia el suobel? E ngera uchul?

³ A apostol el Paulus a mle medengei el kmo a bechelechelingaol el bltikerreng a mo blekeradel er chelecha el taem, e mo kdekudel el kirir a Rekristiano. Me ngulemeklatk er tir el mo ‘mengeroid er tir’er a rechad el olecholt er a bechelechelingaol el bltikerreng. (2 Timothy 3:5) Engdi ngdiak el sebeched el mengeroid er kid er a rokui el uaisei el chad. Me ngkired el mekerang me bo el sebeched el omekerreu er kid er a omerellir a rechad el iliuekl er kid, e dolemolem el meruul soal a Jehovah, el ngii a Dios er a bltikerreng? Me bo desa klekakerous er sel bltikerreng el soal a Dios a bo dobang me sel bltikerreng el losaod er ngii a 2 Timothy 3:2-4. E seikid e ngmo sebeched el merriter er kid, e mesa el kmo ngmekera dolecholt er sel bltikerreng el ngii a rullid el kmal mo dmeu a rengud.

4. Ngera me ngdiak a kngtil a le ngar er ngii a telkib el bltkil a rengud el kired?

⁴ A Paulus a milluches el kmo: “Ar chad a mo betik a rengrir ra di tir.” Engdi tia ngbelkul a kmo ngmekngit a bo lebetik a rengud er a di kid? Ngdiak, e le Jehovah a rirellid el mo uaisei. A Jesus a dilu el kmo: “Bo le betik a rengum er a ngar bita er kau el ua le betik a rengum er kau.” (Markus 12:31) Ngkmal diak el sebeched el mo betik a rengud er a rebebil a lsekum e ngdiak lebetik a rengud er a di kid. A Biblia a dirrek el mengelechel er kid el kmo: “A re sechal a kirir el mo betik a rengrir er a re becherir el di ua le betik a rengrir er a di bedengir. A chad el betik a rengul er a bechil a di ngii el betik a rengul er ngii. Ng diak a chad el di ngii louketui er a bedengel. Ng bai omeka er ngii e mengedmokl er ngii.” (Efesus 5:28, 29) Me ngkmal bleketakl el kmo ngkirel el ngar er ngii a telkib el bltkil a rengud el kired.

5. Ngmekera omosaod er a chad el imis el betik a rengul er a di ngii?

⁵ Sel bltikerreng el losaod er ngii a 2 Timothy 3:2, a diak el tabesul, e ngbai bechelechelingaol. Me a lsekum a chad a imis el betik a rengul er a di ngii, e ngbai di omdasu er a di ngii el mo engelakl er sel kirel. (Monguiu er a Rom 12:3.) Ngdiak lolatk er a rebebil, e a tekoi sel bo lemekngit, e ngoltelechakl er a rebebil. A ta er a remerriter er a Biblia a omekesiu er a chouaisei el chad el mora charm el hedgehog el di ngii el mengimetemet er ngii el ua btuu, me ngsebechel el di mengeald er ngii lousbech a bsechel, e di olecholt a techedel el mora rechad. Me a chouaisei el chad a diak el mera el dmeu a rengul.

6. Ngmo uchul a ngera el klungiaol sel lebetik a rengud er a Dios?

⁶ A rebebil el chellimosk er a Biblia a oumera el kmo, a Paulus a ulemuchel el mesaod er a chad el betik a rengul er a di ngii, e le ngomuchel aike el mekngit el blekeradel el blo losaod er a uriul. Me ngdi osisiu, sel bltikerreng el Dios a soal a bo dobang a omekeroul a ungil blekeradel el ua deurreng, budech, kllourreng, blekokeuii el reng, ungilreng, blakerreng, delemedemekerreng, me a ulserechakl el reng. (Galatia 5:22, 23) A ta er a milluches er a psalm a kmo: “Ngdmeu a rengrir a rechad el ou Dios er a Jehovah.” (Psalm 144:15, NW) A Jehovah a dmeu a rengul el Dios, me  a rechedal a dirrek el dmeu a rengrir. Ngdmeu a rengrir e le te merous el mora rebebil, el diak el uai tirke el imis el betik a rengrir er a di tir me te di omdasu el kirel aike el sebechir el ngmai e merekong.​—Rellir 20:35.

7. Ngera el ker a sebechel ngosukid el mo tirterii a bltkil a rengud el mora Dios?

⁷ Kede mekerang e mo medengei el kmo a bltkil a rengud er a di kid a mla mo mesisiich er a bltkil a rengud el mora Dios? Molebedebek er tia el ungil el uleklatk el kmo: “Lak moruul a ngii di le ngerang el mengaiuechit er a re chad, ma lechub e ng di somiu a lechat er kemiu a re chad e bai moba klengariourreng el di blechoel el omdasu er a re bebil er a re chad el kmo te kuk ungil er kemiu. E bo le beiusech a medemiu el omes a ikel mo klungiolel a ta ma tang er a delongeliu e lak di momdasu er a di kemiu.” (Filipi 2:3, 4) Ngsebeched el di kid loker el kmo: ‘Ngak, a kultaut er tia el ulekrael? Ngak ak melasem el meruul aike el tekoi el Dios a soal a kuruul? Ngak a kusiik a bek el rolel e mo olengeseu er a rebebil el ngar er a ongdibel me a dirrek sel kuldingel a obliil?’ Ngdiak el blechoel el beot a dongoit a temed me a klisiched el meruul aikang, e le nglocha mo kired el meringel loureor, e kongei el chemoit a bebil er aike el tekoi el soad el meruul. Engdi ngdiak a ngii di el ngerang el sebechel el rullid el mo dmeu a rengud el ua sel dodengei el kmo ngike el Merreder er a eanged me a chutem a kmal dmeu a rengul er kid!

8. Ngera te mla remuul a rebebil el Kristiano e le ngbltkil a rengrir el mora Dios a uchul?

⁸ Tir el betik a rengrir er a Dios e sorir el menglou er a omesiungir a uchul me a rebebil el Kristiano a mla mechei a urerir el sebechel el rulleterir el mo merau. A Ericka el toktang a millilt el mo pioneer er a bai lultaut a osengel er a tekoi er a ukeruul. Ngii me a bechil a mlo er ngii a techellir el mo mesiou el ngar a bebil el beluu me ngkmo: “A betok el tekoi el dilubech er a klengar er kemam er a taem el ki molengeseu el omerk er  a klumech el ousbech a ngodech el omelekoi, el uldimukl er a kmes el klausechelei er kemam me a rebebil, a mera el mla rullii a klengar kemam el mo ungil. A Ericka a dirk toktang, engdi ngousbech er a klou el temel me a klisichel el olisechakl er a rechad el kirel a Jehovah, e dirrek lolengeseu er a rudam me a rudos er ngii. Ngmelekoi el kmo tiang a kmal uchul a “budech er a rengul me a uldesuel.”

9. Ngera me a chad el nguibes er a udoud a diak lsebechel mo dmeu a rengul?

⁹ A Paulus a milluches el kmo a rechad a mo “nguibes a udoud.” A sesei el rak er a mla memong, e a ta el pioneer er a Ireland a milengedecheduch er a chad el kirel a Dios. E ngika el chad a milekengii a chidbengel e ngimors a bebil el udoud e dmu el kmo: “Ngkakid a dios er ngak!” Me alta e a rebetok el chad a diak el sebechir el mera el ouchais a uldesuir el kirel a udoud, engdi ngmera el uaisei a uldesuir. Ngbetik a rengrir er a udoud me aike el tekoi el sebechel el mechar. Engdi Biblia a mengelechel er kid el kmo: “Ngikel soal a udoud a diak bo lungil a rengul er a udoud, me ngikel soal a ilteet a diak bo lungilbesul er a rengul a ikel lolab.” (Olisechakl 5:10) A chad el nguibes er a udoud a dirkak bo lultebechel er a rengul er aike el ngar er ngii er ngii. Ngblechoel el soal a betok, e ousbech er a klengar er ngii el melasem el di mengereker, engdi tiang a di mo uchul e ngmo chuarm er a “betok el bedengel a ringel.”​—1 Timothy 6:9, 10.

10. Ngera ngmesaod a Biblia el kirel a ilteet me a chelebuul?

¹⁰ Kid el rokui a ousbech a udoud e le ngomekerreu er kid. (Olisechakl 7:12) Engdi ngsebechel mo dmeu a rengud a lsekum ngdi ngar er ngii a ungil ildisel a ududed el kirel aike el dousbech? Chochoi! (Monguiu er a Olisechakl 5:12.) A ngelekel a Jake el Agur a milluches el kmo: “Lak beskak a chelebuul e dirrek el lak beskak a ilteet. Di beskak a ikel kuusbech el kall.” Ngbeot er kid el mo medengelii a uchul me ngika el chad a dimlak el soal el kmal mo chebuul. Ngmelekoi el kmo ngdimlak el soal el mo mekesuseu el mo merechorech, e le omerechorech a di mo uchul a otuub el mora Dios. Engdi ngera me ngdimlak el soal el mo merau? Ngmilluches el kmo: “Me lak bo kmedinges e kuumededenger er kau el kmo, ‘Ng techa RUBAK?’” (Osisechakl 30:8, 9) Kulterekokl el medengelterir a rechad el di ultuil er a iltetir er a bai lultuil er a Dios.

11. Ngera ngmilsaod a Jesus el kirel a udoud?

¹¹ A chad el nguibes er a udoud a kmal diak el sebechel lodeuir a rengul a Dios. A Jesus a dilu el kmo: “Ng diak a chad el sebechel el mo sibrir a re terul mastang; ng mo chetil a tang e mo soal ngikel kuk tang; ng mo blak a rengul er a tang e mo mengemikr er ngikel tang. Ng diak el sebechiu el di tang e mesiou er a Dios ma udoud.” Ngdirrek el dilu el kmo: “Lak mongudel a mekreos el klalo el kiriu er tial beluulchad el le ngar ngii e ng mo chemert e meka er a metmut ma re merechorech a mo soiseb el ruchorech. Bai mongudel er a eanged el sel le ngar ngii e ng diak le meka er a metmut ma diak le chert, el ka re merechorech el mo soiseb el ruchorech.”​—Mateus 6:19, 20, 24.

12. Ngmekera dekiei el omekbeot er a klengar er kid e ngosukid el mo mesiou er a Dios? Ka mosaod.

¹² Te betok el mesiungel a Jehovah a melasem el omekbeot er a klengar er tir. Te metik el kmo sel loruul el uaisei e ngmo er ngii a klou el temir el mesiou er a Jehovah, e dirrek el rulleterir el mengal mo dmeu a rengrir. A Jack el kiei er a Merikel a ulterur a blil me a siobai er ngii me bo el sebechel ngii me a bechil el mo pioneer. Ngmelekoi el kmo: “Ngkmal mle meringel er kemam el olterau er tia el klebokel el blimam me a chetemam el ngar er a ikrel a beluu.” Engdi ngmle betok el rak el be lrei el di checherd a rengul el mondai er a urerel a uchul. Me ngdmu el kmo: “A bechik el regular pioneer a mle blechoel el dmeu  a rengul me ngblechoel melekoi el kmo, ‘A merrederek a kot el ungil!’ Me chelecha el kusiou el pioneer, e ngak me a bechik a dul oureor el di mora Jehovah.”

13. Ngera sebechel ngosukid el mo merriter er a uldesued el kirel a udoud?

¹³ Sel bo dungil merriter er a uldesued el kirel a udoud, e ngkmal kirel el mo melemalt a uldesued, e di kid loker kid el kmo: ‘A rolel a klengar er ngak, ngochotii el kmo ak mera el oumerang aike el lolekoi a Biblia el kirel a udoud? A omengereker el udoud, ngkmal klou a ultutelel er ngak? Ngak a kumes a klalo el kuk meklou a ultutelel er a deleuill er ngak me a Jehovah me a dirrek el rechad? Ngak a kuumerang el kmo a Jehovah a mo meskak aike el kuusbech?’ Ngsebechel el mo ulterekokl a rengud el kmo a Dios a kmal diak a ta el bo letemall a rengrir tirke el oumerang er ngii!​—Mateus 6:33.

14. Ngerang a tabesul el uldesued el kirel a tametereng?

¹⁴ A Biblia a dirrek el ulemlaoch el kmo ngar er a uriul sils, e a rechad a di mo “betik a rengrir ra tametereng.” Kid a medengei el kmo ngdiak a kngtil a bo letabesul a uldesued el kired me a kirel a udoud, kede dirrek el medengei el kmo ngdiak a kngtil a doldeu a rengud er a klengar er kid el ngar a tabesul el rolel. A rebebil a oumera el kmo ngkmal diak el kirir el oldeu a rengrir, engdi Jehovah a kmal diak lekengei er tia el uldasu. A Biblia a melisiich er a reblak a rengrir el mesiungel a Dios el kmo: “Ka bong, mongang e molim me bo ledeu a rengum.”​—Olisechakl 9:7.

15. Ngera belkul a bo le ‘betik a rengud ra tametereng’?

¹⁵ A ongeru el Timothy 3:4 a mesaod el kirir tirke el betik a rengrir er a tametereng e diak lolatk er a Dios. Momtab er sel dimla belkul a bades, ngdiak el du el kmo a rechad a mo betik a rengrir er a tametereng el kuk ngaruchei er a Dios. E le tiang a mo belkul a kmo ngdirk ngar er ngii a telkib el bltkil a rengrir el mora Dios. Tia el bades a bai mesaod el kmo a ‘bltkil a rengrir a di mora tametereng el diak lebo er a Dios.’ A ta el chellimosk a milluches el kmo tia el bades “a diak el belkul a kmo ngar er ngii a bltkil a rengrir el mora Dios. Ngbai belkul a kmo ngkmal diak a ta el lebetik a rengrir er a Dios.” Tiang a kmal mesisiich el omengelechel el mora rechad el tir a betik a rengrir er a tametereng. A Biblia a omekesiu er a reuaisei el chad el ua tirke el mla “mechucheb” er a tametereng er a klengar.​—Lukas 8:14.

16, 17. Ngera el kerebai a lekiltmeklii a Jesus el kirel a osengel el mora tametereng?

¹⁶ A Jesus a ulechotii a belkul a bo letabesul a uldesued el kirel a tametereng. Ngmlo er a “merengel a chebechiil” me a “kloul blengur.” (Johanes 2:1-10; Lukas 5:29) Ngar tia el merengel a chebechiil, e ngmlo ngesonges a bilong, me a Jesus a rirellii a mengasireng el tekoi, el mileltii a ralm el mo bilong. E a kuk ta er a taem e a rechad a millekoi a mekngit el kirel a Jesus e le ngmilengang e melim, me ngmileketeklii el kmo, tirke el chad a dimlak el oba tabesul el uldasu.​—Lukas 7:33-36.

¹⁷ Me nguaisei engdi Jesus a dimlak lenguu a tametereng el mo kot el klou a ultutelel el tekoi er a klengar er ngii. Ngbai ngiluu a Jehovah el mo kot er a klengar er ngii, e mirruul aike el rokui el sebechel el mo olengeseu er a rebebil. Ngkilengei el mo mad er a meringel el kodall er a  teluo el kerrekar el mo olsobel er a klechad. A Jesus a dilu er tirke el sorir el mo oltirakl er ngii el kmo: “Kom ngeltengat a loltuub er kemiu a re chad e loldechelakl er kemiu e lolekoi a bek el mekngit el blulak el kiriu ele uchul e kemiu el oltirakl er ngak. Bo lungil e ledeu a rengmiu, ele klou el omeksulliu a kldmokl er a eanged el kiriu. A re profet el mle chad er uche er kemiu a dirrek el ble le ua ise er tir.”​—Mateus 5:11, 12.

18. Ngera el ker a sebechel ngosukid el tirterii a delechel a bltkil a rengud el mora tametereng?

¹⁸ Ngera sebechel ngosukid el tirterii a delechel a bltkil a rengud el mora tametereng? Ngsebeched el di kid loker er kid el kmo: ‘A tekoi er a ongelaod nglmuut el ngaruchei er a uldesuek el kirel a miting me a odingel a obliil? Ngak ak kongei el mechei a bebil er aike el tekoi el soak el meruul, e le ngsoak el mesiou er a Dios? Sel kulilt a tekoi er a ongelaod, e ak melatk er a osengel a Jehovah el kirel a omelilt er ngak?’ Kid el betik a rengud er a Dios, e soad el odeuir a rengul a uchul me ngdiak di dekerekikl el mengeroid er kid er aike el tekoi el dodengei el kmo ngmekngit, e ngdirrek uldimukl er aike el tekoi el domdasu el kmo nglocha mo kingtir a rengul.​—Monguiu er a Mateus 22:37, 38.

19. Te rua techang a kmal diak el sebechir el mo dmeu a rengrir?

¹⁹ Ngmla mo 6,000 el rak el beluulechad er a Satan a di omekcharm er a rechad. Ngar er aika el uriul sils er tia el mekngit el beluulechad er a Satan, e tia el chutem a mo mui er a rechad el di betik a rengrir er a di tir, e nguibes er a udoud, e betik a rengrir er a tametereng. Te di melatk el kirel aike el sebechir el ngmai, e remuul aike el sorir el tekoi el mo kot el meklou a ultutelel er a klengar er tir. Engdi a reuaisei el chad a kmal diak el sebechir el mo dmeu a rengrir! A Biblia a kmo: “Ngeltengat ngikel chad el Dios er a Jakob a olengeseu er ngii, ngikel ultuil er a RUBAK el Dios er ngii.”​—Psalm 146:5.

20. Ngmekera bltkil a rengum el mora Dios, e rullau el mo dmeu a rengum?

²⁰ A remesiungel a Jehovah a mera el betik a rengrir er ngii, e bek el rak e te betok a mo medengelii, e dirrek el mo betik a rengrir er ngii. Tiang a ochotii el kmo a Rengedel a Dios a mengedereder, e kmal di kmedung e ngmo omeskid aike el klengeltengat el kmal diak el sebeched el lmatk! Me sel doruul aike el soal a Jehovah, e kede rullii el mo dmeu a rengul, e tiang a mo uchul a mera el deurreng er kid. Tirke el betik a rengrir er a Jehovah a mo dmeu a rengrir el diak a ulebengelel! Ngar er a ongingil el suobel, e kede mo mesaod a bebil el mekngit el blekeradel el mo er ngii lokiu a bechelechelingaol el bltikerreng. Kede dirrek el mo mesa rolel e aika el blekeradel a kuk ngodech er aike el ungil el blekerdelir a remesiungel a Jehovah.