1, 2. Ngera el tekoi a mo oldak er kid el ngar er a ileakl el rolel er a rak er a 2018, e ngera uchul? (Momes er a siasing er a uchelel a suobel.)

 NGAR er a March 31, 2018, e a rebetok el miliol el chad el meliuekl er a beluulechad a mora chedaol belsoil el ngii a tekoi el di ta el lengar er ngii er a chelsel a ta el rak. A uriul er a lengelt a sils, e a Resioning er a Jehovah me a rekuk bebil a mo dmak e melatk er a olubet el tengetengel a Jesus el kiltmeklii el kired. E a bek el rak, e a Chedaol Belsoil er a kodellel a Kristus a oldak er a rechad el okiu a mengasireng el rolel el diak a ngii di el tekoi er tia el chutem el sebechel mo mekesiur.

² A Jehovah me a Jesus a ulterekokl el kmal dmeu a rengrir sel lesterir a rebetok el miliol el chad el mei er a Chedaol Belsoil er a bek el blsechel el meliuekl er a beluulechad. A Biblia a mesaod el kirel a “kloul seked; [el] dimlak a chad el sebechel el mechur a ildisir el rokui! Te chad er a bek el beluu, ma kebliil, ma bek el bedengir a re chad ma omelekoi” el oldiu el kmo: A “osobel a mlar a Dios er kid el mei, el ngii a dengchokl er a kingall, e dirrek el mlar a Ngelekel a Sib  el mei!” (Ocholt 7:9, 10) Ngkmal lungil el tekoi el bek el rak er a temel a Chedaol Belsoil, e a rebetok el chad a mengebkall er a Jehovah me a Jesus el kirel aike el rokui el ungil tekoi el bla leruul!

3. Ngera el ker a bo longer tia el suobel?

³ Ngar tia el suobel, e ke mo medengei a nger er aika el eua el ker el kmo: (1) Ngmekera kungetmokl er ngak el kirel a Chedaol Belsoil me bo el sebechek el ngmai a klungiolek er ngii? (2) Ngokiu a ngera el rolel e a Chedaol Belsoil a olengeseu er a rechedal a Dios el mo oba kltarreng? (3) Ngera sebechek el rullii el mo melisiich er a kltarreng er a delongelir a rechedal a Dios? (4) Ngmo er ngii a ulebongel el Chedaol Belsoil? A leuaisei, e ngoingerang?

4. Ngera me ngkmal klou a ultutelel el debo er a Chedaol Belsoil?

⁴ Ngera me ngkmal klou a ultutelel el debo er a Chedaol Belsoil? A ta er a uchul me kede mora miting a rolel a omengull er kid el mora Jehovah. Ngsebechel el mo ulterekokl a rengud el kmo, a Jehovah me a Jesus a omes er a derta er kid el melasem er a tkurrebab el sebeched el mora Chedaol Belsoil er a bek el rak. Ngkmal soad a Jehovah me a Jesus a lesekid el mora Chedaol Belsoil alta e a lebebil er a taem e ngdiak el sebeched el mong. Me a omerelled sel lochotii el kmo aika el miting a kmal meklou a ultutelel el tekoi er a klengar er kid, e kede msang a Jehovah a ta er a uchul me ngdi mechei a ngkled er a “babier er medal.” E tia el babier a dirrek lokedongall el “babier er a klengar” el ngar er ngii a ngklir tirke el rokui el Jehovah a soal el mo omesterir a diak a ulebengelel el klengar.​—Malakai 3:16; Ocholt 20:15, BT.

5. Ngar er aike el sandei er a uchei er a Chedaol Belsoil, e ke mekera e mo ungil merriter er kau el kmo ke “ungil el oltirakl a cho moumeral tekoi”?

⁵ Ngar er aike el sandei er a uchei er a Chedaol Belsoil, e ngsebeched el mengoit a temed el meluluuch e mo ungil el melatk el kirel a klisichel a deleuill er kid me a Jehovah. (Monguiu er a 2 Korinth 13:5.) A apostol el Paulus a dilu er a Rekristiano el kmo: “Ka bo mungil el merriter er kemiu e mosekemiu el kmo kom ungil el oltirakl a cho moumeral tekoi?” Ngmekera doruul er tiang? Ngsebeched el di kid loker er kid el kmo: ‘Ngak, ak mera el oumerang el kmo tiaikid a di ta el cheldebechel el Jehovah a mla ngiltii el mo meruul a soal? Ngak, ak meruul er sel sebechek el mo omerk er a klumech e olisechakl er a ungil chais? A omerellek ngochotii el kmo ak mera el oumerang el kmo kede kiei er a taem er a uriul sils, me a ulebengelel a omengederederel a Satan a kmal kmedang? A klaumerang er ngak er a Jehovah me a Jesus ngmesisiich el ua sera kumuchel el mesiou er a Jehovah?’ (Mateus 24:14; 2 Timothy 3:1; Hebru 3:14) Sel dolatk el kirel a nger er aika el ker e ngosukid el mo ungil “merriter” er kid.

6. (a) Ngera di ta el rolel e ngmo sebeched el nguu a diak a ulebengelel el klengar? (b) Ngmilekera ta er a remechuodel er a longetmokl er ngii el kirel a Chedaol Belsoil er a bek el rak, e mekera sebechem el mo meruul er a osisiu el tekoi?

⁶ A ta er a rolel e ngsebechem el kutmeklau el kirel a Chedaol Belsoil, a oeak sel monguiu e momtab aike el suobel el mesaod er a uchul me a Chedaol Belsoil a kmal kloul a ultutelel. (Monguiu  er a Johanes 3:16; 17:3.) A di ta el rolel e ngmo sebeched el nguu a diak a ulebengelel el klengar a okiu sel bo dodengelii a Jehovah, e bo doumerang er a Ngelekel el Jesus. Me a dongetmokl er kid el kirel a Chedaol Belsoil, e ngsebeched el melilt aike el suobel el sebechel el ngosukid mo kmeed er tir. E tiaikid a lurruul er ngii a ta el odam el mla mo kemanget el taem el losiou el ta er a remechuodel. Ngar a chelsel a betok el rak, e ngmilengudel a suobel er a Ongkerongel el mesaod er a Chedaol Belsoil, me sel bltkil a rengul a Jehovah me a Jesus el lulechotii el kired. Me aike el sandei er a uchei er a Chedaol Belsoil, e nglmuut el menguiu aike el suobel e melebedebek er a uchul me tia el tekoi a kmal klou a ultutelel. E sel lebetik a bebil el suobel e nglmuut el dochel er aike el bla lechudel. Ngdirrek el menguiu e dmolech el melebedebek el kirel aike el mla meketmokl el omengiuel a Biblia el kirel a Chedaol Belsoil. Me ngmelekoi el kmo sel loruul aika el rokui, e nglmuut el suub a beches el tekoi er a bek el rak. E sel kot el klou a ultutelel, a omesubel a mengal rullii el mo betik a rengul er a Jehovah me a Jesus. Me sel mosuub lokiu tiaikid el rolel, e ngdirrek el mengal mo betik a rengum er a Jehovah me a Jesus. Ke dirrek el lmuut el mo oba omereng el saul el kirel aike el bla leruul, e mo ngmai a lmuut el betok el klungiolem er a Chedaol Belsoil.

7. (a) Ngerang ngmiluluuch a Jesus el kirel er sel kesus er a kot el Chedaol Belsoil er a Rubak? (b) Ngera ochotii el kmo a Jehovah a ulenger er a nglunguchel a Jesus?

⁷ Sel kesus er a kot el Chedaol Belsoil er a Rubak, e a nglunguchel a Jesus a kmal mle ileakl. Ngmiluluuch el kirel sel ileakl el kltarreng el mla er ngii er a delongelel ngii me a Demal. Ngdirrek el milluluuch el kmo, bo lsebechir a rokui el disaiplo er ngii el mo oba tia el osisiu el kltarreng. (Monguiu er a Johanes 17:20, 21.) A Jehovah a ulterekokl el ulenger er sel nglunguchel a Ngelekel. Me a Resioning er a Jehovah a oba kltarreng er a bek el taem sel ledak el ngar a Chedaol Belsoil. Ngar seikid el sils, e a rebetok el miliol el chad er a kakerous el beluu, el kakerous a chiro er a bedengir a mo dmak el meliuekl er a beluulechad e ochotii a klaumerang er tir el kmo a Jehovah a ulderchii a Ngelekel el mei. Ngar a bebil el beluu, e ngdiak el blechoel a rechad er a kakerous el beluu el mo dmak el ngar a miting, e a lsekum e te mo dmak, e a rebebil omdasu el kmo ngdiak lungil. Engdi Jehovah me a Jesus a diak el uaisei a uldesuir. Te omes er a kltarreng el dobang er a temel a Chedaol Belsoil el kmal klebokel.

8. A Jehovah ngmilsang a Esekiel a ngera el klumech?

⁸ Kid el chedal a Jehovah a diak lemechas a rengud er tia el rolel a kltarreng er a delongeled. A Jehovah a ulemlaoch el kirel tia el kltarreng er sel klemechel el mora Esekiel. Ngdilu er a Esekiel me lengai a teblo el rechelel a kerrekar, el tang a mora “Renged er a Juda” e a tang a mora “Renged er a Israel,” el odak me di bo el chimong. (Monguiu er a Esekiel 37:15-17.) A “Questions From Readers” el ngar a The Watchtower er a July 2016 a mesaod el kmo: “Ngokiu a profet el Esekiel, e a Jehovah a ulemlaoch el kmo a rechedal a lmuut el mora Beluu er a Nglat, me te lmuut el mo dmak el ua ta el renged. Tia el ulaoch a dirrek el uluuchais el kmo tirke el mengull er a Dios er a taem uriul el sils, a mo dmak el ua ta el cheldebechel.”

9. Ngmekera desa sel kltarreng el lulemlaoch el kirel a Esekiel er a bek el rak er a temel a Chedaol Belsoil?

⁹ Ngar a uchelel a rak er a 1919, e a Jehovah a ulemuchel el mengederoder e oldak er a rengellitel. Tirkang a mle ua kerrekar el melutk el kirel a “Renged er a Juda.” Me seikid e te betok er tirke el oba omelatk el mo kiei er a chutem el diak a ulebengelel a mlo teloi er a rengellitel, e  tirkang a ua kerrekar er a “Renged er a Israel.” A Jehovah tilbir el mo oldak aika el teblo el rechelel a kerrekar “el di mo teluong” el ngar a chimal. (Esekiel 37:19) Ngrirelleterir a rengellitel me tirke el “kuk bebil . . . el sib” el mo “tal delebechel.” (Johanes 10:16; Sekaria 8:23) Chelecha el taem, e aika el eru el cheldebechel a oba kltarreng e dmak el mesiou er a Jehovah. Ngdirrek el di tang a King er tir el Jesus Kristus, el ngar er a ulochel a Esekiel e ngokedongall el ‘mesiungel [a Dios] el David.’ (Esekiel 37:24, 25) A bek el rak er a temel a Chedaol Belsoil el bo dedak el mo melatk er a kodellel a Jesus, e kede mesa tia el kltarreng er a delongelel aika el eru el cheldebechel el ua lulemlaoch a Esekiel. Engdi ngera sebechel a derta er kid el remuul me bo domekerreu e dolisiich er a kltarreng er a rechedal a Dios?

10. Ngmekera dolisiich er a kltarreng er a delongelir a rechedal a Dios?

¹⁰ Ngera sel kot el rolel e ngsebeched el melisiich er a kltarreng er a delongelir a rechedal a Dios? Ngokiu sel bo leblak a rengud lolecholt er a klengariourreng. A Jesus er a lengar er a chutem, e ngdilu er a redisaiplo er ngii el kmo ngkmal kirir el mo ngariou a rengrir. (Mateus 23:12) A rechad er tia el beluulechad a blechoel lomdasu el kmo ngkuk meklou a ultutelir er a rebebil. Engdi a lsekum e ngariou a rengud, e kede mo olecholt er a omengull el bedul a rudam er kid el tir a omekerreu er a ongdibel, e dirrek el mo olengesenges a ulekrael el lomeskid. E seikid e a ongdibel a sebechel el mo er ngii a kltarreng  er a chelsel. E a kot el klou a ultutelel a lsekum kede melemolem el oba klengariourreng, e kede mo odeuir a rengul a Dios, e le ngii a “omtok er a re ngarbab a rengrir, e ungil a tekingel er a re ngariou a rengrir.”​—1 Petrus 5:5.

11. Ngmekera sel dolatk el kirel a blauang me a bilong el dousbech er a Chedaol Belsoil e ngosukid el mo melisiich er a kltarreng?

¹¹ Ngera ongeru el rolel e ngsebeched el melisiich er a kltarreng? Ngokiu sel bo dungil el melebedebek el kirel a mera el belkul a blauang me a bilong. Ngsebeched el meruul er tiang er a uchei er a Chedaol Belsoil, el ileakl er seikid el kesus. (1 Korinth 11:23-25) A diak a omkukel el blauang a omtechei er a cherrungel el bedengel a Jesus el tilengetengii. E a bekerkard el bilong a omtechei er a rsechel. Engdi ngkired el meruul a lmuut el betok er a di dodengei a beot el omesodel aika el tekoi. Lak dobes el kmo a olubet el tengetengel a Jesus a uldimukl er a eru el ngarbab el olechotel a bltikerreng. A Jehovah milskid a Ngelekel, e a Jesus a kilengei el tongetengii a klengar er ngii el kired. Me sel dolatk el kirel a bltkil a rengrir, e ngrullid el mo betik a rengud er tir. E sel bltikerreng er kid el rokui el dobang el mora Jehovah a smisichii a kltarreng er a delongeled.

12. Ngmilekera Jesus e meketeklii el kmo a Jehovah a soal a dousubes er a rebebil er sel cheldechedechal el kirel a king me a remesiungel?

¹² Ngera ongedei el rolel e ngsebeched el melisiich er a kltarreng? Ngokiu sel dousubes er a rebebil el mera el ngar a rengud. Sel doruul el uaisei, e kede ochotii el kmo kede oba omereng el saul e le Jehovah a sebechel lousubes a kngtid el okiu a tengetengel a Jesus. A Jesus a milsaod er a ta er a cheldecheduch el kirel a king me a remesiungel el ulechotii a uchul me ngklou a ultutelel el kired el ousubes. Monguiu er a Mateus 18:23-34, e di lekau loker el kau el kmo: ‘Ngak ak semeriar el mo oltaut aike el losisecheklel a Jesus? Ngak a kuba kllourreng me a ungil uldasu el kirir a rudam me a rudos er ngak? Ngak ak kltmokl el mo ousubes er tirke el tilemellii a renguk?’ Ngmera el tekoi, a bebil el klengit a lmuut el oberaod er a bebil, e a kuk bebil a meringel er kid el diak demecherrungel el chad el mo ousubes. Engdi cheldechedechal a Jesus a osisecheklid el kmo ngera soal a Jehovah a bo doruul. (Monguiu er a Mateus 18:35.) A Jesus a mileketeklii el kmo, a Jehovah a diak lousubes er kid a lsekum e ngdiak dousubes er a rudam er kid el mera el mla ouuchel a rengrir. Tiang a tekoi el kired el mo ungil el melatk er ngii. A dolisiich er tia el mekreos el kltarreng el dobang, e ngkmal kired lousubes er a rebebil el ua lullisechakl er kid a Jesus.

13. Ngmekera dolisiich er a kltarreng sel dolemolem er a budech er a delongeled kid me a rebebil?

¹³ Sel dousubes er a rebebil, e kede meleketek er a budech er a delongeled kid me a rudam me a rudos er kid. A apostol el Paulus a millekoi el kmo, ngkired el meringel loureor me bo el sebeched el melemolem er a kltarreng me a budech er a delongeled. (Efesus 4:3) Me ngar sel taem er a Chedaol Belsoil, el ileakl sel kesus, e bo mungil el melebedebek a omerellem el mora rebebil. E di lekau loker er kau el kmo: ‘Ngbleketakl el mo er tirke el medengelkak el kmo, ngdiak kulemolem er a ngesechel a renguk el mo er tirke el tomellii a renguk? Ngsebechir a rechad el mesa el kmo, ak melasem el meruul a budech e melisiich er a kltarreng?’ Aikang a kmal meklou a ultutelel el ker el kired el melatk.

14. Ngmekera sebeched el ochotii el kmo, kede ‘olecholt a bltikerreng er kid el outekangel a rengud er a blekerdelel a ta ma tang’?

¹⁴ Ngera ongeua el rolel e ngsebeched el melisiich er a kltarreng? Ngokiu sel doukerebai er a Jehovah el olecholt er a bltikerreng. (Johanes 4:8) Ngdiak el kired el melekoi el kmo, “Nglocha kirek el mo betik a renguk er a rudam, engdi ngdiak el belkul a kmo ngkirek el mo soak tir.” A lsekum kede omdasu el uaisei, e ngdiak doltirakl  a ulekrael er a Paulus el kmo, “molecholt a bltikerreng er kemiu el outekangel a rengmiu er a blekerdelel a ta ma tang.” (Efesus 4:2) Ngungil a dolatk el kmo, a Paulus a dimlak di ledu el kmo ngkired el ‘outekangel a rengud er a blekerdelel a ta ma tang’ e ngbai kired el meruul er ngii loba “bltikerreng.” Ngkmal ngar er ngii a klekakerous. Te kakerous el bedengir a rechad a ngar er a ongdibel er kid, e a Jehovah a mla kongei er tir. (Johanes 6:44) Me ngulterekokl el omes a betok el ungil luchul e ngbetik a rengul er tir. Me a lsekum a rudam me a rudos a rredemelel a nguu a bltkil a rengul a Dios, e ngmekerang e sebeched el melekoi el kmo te diak el rredemelel a bltikerreng er kid? Ngkired el kongei el mo betik a rengud er tir el oltirakl el sel rolel el soal a Jehovah.​—1 Johanes 4:20, 21.

15. Kede mekerang e medengei el kmo ngmo er ngii a ulebongel el Chedaol Belsoil?

¹⁵ Ngmo er ngii a temel a ulebongel el Chedaol Belsoil. Kede mekerang e medengei? A Paulus a dilu er a rengellitel el Kristiano el kmo sel longemedaol er a kodellel a Jesus er a bek el rak, e te “omerk er a chisel a kodellel a Rubak, el mo lmuut er a luut er ngii el mei.” (1 Korinth 11:26) Ngar er a ulochel el kirel a taem er a ulebongel, e a Jesus a dirrek el milsaod el kirel a “demiel.” Sera losaod el kirel a kloul ringel el kmedu el mei e ngdilu el kmo: “A olengchelel a Ngelekel a Chad a mo chemolt er a eanged; ma rokui el chad er a bek el beluu er a beluulchad a mo lmangel sel lesa Ngelekel a Chad el mermang el ngar a eabed el oba klisiich ma klou el klebkall. Sel klou el trombetang a mo melekoi, e ngii a mo odercheterir a re anghel er ngii el mor a ikel eual ulebengelel a beluulchad, me te mo chudelterir a re ngellitel el chedal er a bital beluulchad el mor a bitang.” (Mateus 24:29-31) A Jesus a mo “chudelterir a re ngellitel el chedal” sel lengititerir a rokui el ngellitel el Kristiano el dirk ngar er a chutem el mora eanged. Tiang a mo meketmokl er a uriul er a lomuchel a kloul ringel engdi ngmo er ngii er a uchei er a mekemedil a Armakedon. Ngar tia el mekemad, e a Jesus me tirke el 144,000 a mo oumekemad er a reking er a chutem e mo mesisiich er tir. (Ocholt 17:12-14) Me a ulebongel el Chedaol Belsoil a mo er ngii er a uchei er a lemei a Jesus el mo mengudel er a rengellitel.

16. Ngera me ke mla oterekeklii a rengum el mora Chedaol Belsoil er chelecha el rak?

¹⁶ Me moterekeklii a rengum e bo er a Chedaol Belsoil er a March 31, 2018, e molengit er a Jehovah me lengesukau el remuul aike el ngerechelem me bo el sebeched el rokui el chedal el melemolem loba kltarreng. (Monguiu er a Psalm 133:1.) Ngmo er ngii a taem, el debo er a ulebongel el Chedaol Belsoil. Me chelecha el mo lmuut er seikid el taem, e dolemolem el melisiich er tia el kltarreng el dobang er a bek el rak er a temel a Chedaol Belsoil el ngii a kmal mekreos el tekoi er a rengud.