1, 2. (a) Ngera el budech a sebeched el nguu er chelechang? (b) Ngera me ngdiak el sebeched el nguu a cherrungel el budech er chelechang? (Momes er a siasing er a uchelel a suobel.)

KEDE rokui el soad a bo el budech a klengar er kid, e dirrek el soad el mo mimokl er a sebekreng. Tiaikid a uchul me kede kmal mereng a sulel a Jehovah el ngii a meskid “a budech er a Dios.” Tia el budech a chelellakl el uldesued el ngii a sebechel omekerreu er kid er a ngii di el mekngit luldasu. (Filipi 4:6, 7) Me kid el mla tongetengii a klengar er kid el mo er a Jehovah a uchul, me ngdirrek el “budech a delongeled kid ma Dios.” Tiang a belkul a kmo, ngar er ngii a ungil deleuill er kid el obengkel.​—Rom 5:1.

² Me nguaisei, engdi ngdirkak bo el temel er a Dios el rullii a cherrungel el budech er tia el chutem. Me kid a kiei er a ulebongel er a beluulechad, me ngkmal betok a mondai el sebechel rullid el mo suebek a rengud. Kede dirrek el kiei el iliuekl er a remekngit a omerellir  el chad. (2 Timothy 3:1-4) Ngdirrek el kired el oumekemad el omtok er a Satan, me a klsuul losisechakl el ngii a melisiich. (2 Korinth 10:4, 5) Engdi sel kot el ngaruchei el uchul a sebekreng er kid a sel bo lomtok er kid a rechedad el tir a diak losiou er a Jehovah. A rebebil a locha mo melenguul er a klaumerang er kid, me a lechub e te oltelechakl er kid el kmo kede mla mo uchul a klekakeakl er a chelsel a telungalek. Te dirrek el locha mo melekoi el kmo ngmo diak dechedal a telungalek er tir, a lsekum kede di melemolem el mesiou er a Jehovah. Me ngkirel mo uangera uldesued el kirel a ultekengir a rechedal a telungalek er kid? E kede mekerang e melemolem el meruul a budech sel leduubech chouaika el tekoi?

3, 4. (a) Ngera ngmo rullii a osisecheklel a Jesus? (b) Ngoingerang e ngmo meringel er a rechad loltirakl er a Jesus?

³ A Jesus a mle ungil medengei el kmo, ngdiak el rokui el chad a mo kongei a osisecheklel. Ngdirrek el mle medengei el kmo a redisaiplo er ngii a mo ousbech er a blekeu e le rebebil a mo omtok er tir. Tia el ultok a sebechel mo uchul a telemellel a budech er a telungalek er tir. Me a Jesus a dilu el kmo: “Lak momdasu el kmo ak uleba budech el mer a beluulchad. Ng dimlak kmei el oba budech, e ak bai mlei el oba saider. Ak mlei ma re ngalek el sechal bo lomtok er a re demerir, ma re ngalek el redil bo lomtok er a re derrir, ma re buchelsechal bo lomtok er a re derrir a re becherir; a re mo kot el mekngit el cherrouel a tal chad a re chad er a blil.”​—Mateus 10:34-36.

⁴ Me ngera mle belkul a tekingel a Jesus er a ledu el kmo, ‘Lak momdasu el kmo ak uleba budech el mei’? Ngmle soal a rechad a bo lodengei el kmo, te mo chuarm a lsekum te mo disaiplo er ngii. Engdi a moktek er a Jesus a mlei el me olisechakl er a klemerang el kirel a Dios, el dimlak lemei el mo omii a telungalek. (Johanes 18:37) Engdi a redisaiplo er ngii a mle kirir el mo medengei el kmo ngdiak lebeot el tekoi a bo loltirakl er ngii, e ileakl a lsekum tirke el kmeed el sechelirir me a lechub a telungalek er tir a diak lekengei er a klemerang.

5. Ngera el tekoi a blo lechelebangel er ngii a rultirakl er a Jesus?

⁵ A Jesus a dilu el kmo, a ultok er a telungalek a ta er a tekoi el tirke el oltirakl er ngii a kirir el kongei el mo outekangel er ngii. (Mateus 10:38) Me a lsekum a redisaiplo er ngii a sorir el mo oldeu er a rengul a Jesus, e ngkirir el mo outekangel a omelenguul er a telungalek er tir me a lechub e te oltngakl er tir. Engdi te bai ngilai a lmuut el betok er aike el lurriid.​—Monguiu er a Markus 10:29, 30.

6. Ngera el tekoi a diak el kired lobes sel bo lomtok er kid a rechedad?

⁶ Ngmo lmuut er a taem el omtok er kid a telungalek er kid e le kid el mengull er a Jehovah, me kid a di melemolem el betik a rengud er tir. Ngdiak el kired lobes el kmo a bltkil a rengud el mo er a Dios me a Kristus, a kirel el mo ruchei er a bltkil a rengud el mo er a ngii di el chad. (Mateus 10:37) Ngdirrek el diak dobes el kmo a Satan a sebechel el ousbech er a bltkil a rengud el mo er a telungalek er kid el mo uchul, e ngmo diak leblak a rengud el mo er a Jehovah. Mada me bo dosaod a bebil el meringel el blekeradel, me sel rolel e ngsebeched el mo outekangel.

7. Ngkirel mo uangera uldesuem el kirel a blekeradel el mngar er ngii a lsekum a bechim a diak losiou er a Jehovah?

⁷ A Biblia a mengelechel er kid el kmo a chad el mo bechiil a “mo metik a rengelel a klechad,” me a lechub e ngmondai. (1 Korinth 7:28) Me a lsekum ke bechil a chad el diak losiou er a Jehovah, e tiang a sebechel el mo uchul a betok el ringelel a uldasu me a sebekreng er a chelsel a chebechiielem.  Me nguaisei, engdi ngklou a ultutelel el kirem el mo omes er a blekeradel el mngar er ngii el ua osengel a Jehovah. Ngii a dmu el kmo, ngdiak el sebeched el mo cheroid me a lechub e dorort er a chebechiieled e le bechid el diak losiou er a Jehovah. (1 Korinth 7:12-16) Me a lsekum a bechim el sechal a diak losiou er a Jehovah, e diak lolisiich er a mera el omengull, me kau a dirk kirem lolecholt a omengull el bedul ngii e le ngii a bdelul a telungalek er kau. Me a lsekum a bechim el redil a diak losiou er a Jehovah, me kau a dirk kirem el mo betik a rengum er ngii e mo ungil lomekerreu er ngii.​—Efesus 5:22, 23, 28, 29.

8. Ngera el ker a kirem el melatk a lsekum a bechim a meskau a telkelel a omengull er kau?

⁸ Ke mo mekerang a lsekum a bechim a meskau a telkelel a temem el mengull er a Jehovah? A bechil a ta el odos er kid a dilu er ngii el kmo, ngar ngii a ulterekokl el temel el sebechel el mo oldingel. Me a lsekum ke chelebangel er a osisiu el tekoi, e di lekau loker el kmo: ‘A bechik, ngmerrob er ngak me ngdiak lsebechek el mengull er a Jehovah? E a lsekum e ngdiak, e ngak ngsebechek el meruul aike el soal a bechik?’ A lsekum ke mo oba tabesul el uldasu, e ngulterekokl el mo kesai a mondai er a chebechiielem.​—Filipi 4:5.

9. Te mekerang a Rekristiano e osisecheklterir a rengelekir el mo oba omengull el mo er a demerir me a lechub e ngderrir el diak loumerang?

⁹ Ngsebechel mo meringel el molisechakl er a rengelekem a lsekum a bechim a diak losiou er a Jehovah. El ua tiang, ngkirem el olisechakl er a rengelekem el mo olengesenges er a llach el ngar er a Biblia el kmo: “Mongull er a demam ma delam.” (Efesus 6:1-3) Engdi ke mo mekerang a lsekum a bechim a diak loltirakl a ulekrael er a Biblia? Ngsebechem el mo ungil kerebai el kirir a rengelekem sel mochotii a omengull er kau el mo er a bechim. Molatk aike el ungil blekerdelel, e mouchais er ngii el bechim el kmo, ke mereng a sulel el kirel a ungil tekoi el loruul. Lak mngar mederir a rengelekem e molekoi a mekngit el mo er ngii. Bai molasem el mo ungil smodii el kmo, a derta el chad a ngar ngii a llemeltel el melilt el mo mesiou er a Jehovah me a lechub e ngdiak. Me a lsekum ke osisecheklterir a rengelekem el mo oba omengull el mo er a diak loumerang el demerir me a lechub e ngderrir, e a ungil kerebai er tir a locha sebechel rullii a bechim el mo semeriar el mesuub el kirel a Jehovah.

10. Te mekerang a Rekristiano el oungalek e osisecheklterir a rengelekir el mo betik a rengrir er a Jehovah?

 ¹⁰ A rebebil el diak loumerang el buch a locha mo sorir a rengelekir a loruul a tekoi el kirel a chedaol sils el lolisiich a klsuul klechelid, me a lechub e bo losuub a klsuul losisechakl. E a rebebil el bechiil el sechal a locha mo merrob er a Rekristiano el becherir me ngdiak lolisechakl er a rengelekir el lousbech er a Biblia. Engdi ngar a chelsel chouaika el blekeradel, e ngdirk sebechel a bechiil el redil el osisecheklterir a rengelekel er a klemerang. (Rellir 16:1; 2 Timothy 3:14, 15) El ua tiang, ngsebechel a bechiil el sechal el diak loumerang el dmu er a bechil me lak losuub a Biblia lobengterir a rengelekir, me a lechub e lobetiterir el mo er a miting. Me ngike el bechil a mengull er a uldesuel, engdi ngdirk sebechel el mengedecheduch er a rengelekel el kirel a klaumerang er ngii er a bek el techall. Ngokiu tiang, e ngsebechir a rengalek el mesuub el kirel a Jehovah me a llechul el kirel a ungil me a mekngit. (Rellir 4:19, 20) E a uriul, e a rengelekir a di mo tir el melilt el kmo te mo mesiou er a Jehovah me a lechub e ngdiak. * (Momes er a footnote.)​—Duteronomi 30:19, 20.

11. Ngera sebechel el mo uchul a mondai er kid me a rechedad el tir a diak losiou er a Jehovah?

¹¹ Sera domuchel el mesuub lobengterir a Resioning er a Jehovah, e nglocha dimlak douchais er a telungalek er kid. Engdi sera loleketek a klaumerang er kid, e kede mlo mtebengii el kmo ngkired el mesubed er tir el kmo ngsoad el mesiou er a Jehovah. (Markus 8:38) Me a blakerreng er kau el mo er a Dios a locha mla mo uchul a mondai er kau me a telungalek er kau. Me chelechang, e kede mo mesaod a tekoi el sebechem el meruul me lolemolem el ngar er ngii a budech er a delongeliu, e molemolem el blak a rengum el mo er a Jehovah.

12. Ngera me a rechedad a mo omtok er kid, engdi ngmekera e mo sebeched el ochotii er tir el kmo kede kerekikl el melatk a uldesuir?

¹² Molasem el mo ungil el medengei a uldesuir a rediak loumerang el chedam. Ngdmeu a rengud e le kid el mla mo medengelii a klemerang er a Biblia. Me nguaisei, engdi a rechedad a locha mo omdasu el kmo, kede mla mecheblad me a lechub kede mla mo chedal a kora ngodech el klechelid. Te dirrek el locha mo omdasu el kmo, ngdikea lebetik a rengud er tir e le ngmla mo diak deteloi er tir el mengedaol a chedaol sils er tia el beluulechad. Te dirrek el locha mo bekikl el kmo, ngar er ngii a mekngit el mo duubech el mei er kid er a uriul er a demad. Me ngkired el melasem el mo ungil el medengei a uldesuir, e kerekikl el orrenges er tir sel louchais a uldesuir me bo el sebeched el medengelii a uchul me ngsuebek a rengrir el kired. (Osisechakl 20:5) A apostol el Paulus a millasem el mo ungil medengei a uldesuir a “rokui el chad” me bo el sebechel el osisecheklterir er a ungil chais. Me a lsekum kede melasem el mo medengei a uldesuir a rechedad, e nglocha mo sebeched el mo medengelii a rolel e kede osisecheklterir el kirel a klemerang.​—1 Korinth 9:19-23.

13. Ngkirel mo uangera rolel a dongedecheduch er a rediak loumerang el chedad?

 ¹³ Mongedecheduch loba delemedemek. A Biblia a kmo: “Ma tekoi el tuobed er a ngeriu bo lungil a delecherul.” (Kolose 4:6) Tiang a diak el beot el tekoi, me ngsebeched el lolengit er a chedaol reng er a Jehovah me lengesukid el mo medemedemek e ungil mengedecheduch er a rechedad. Ngdiak el soad el melasem el di mengaititekangel er tir el kirel a klsuul el klaumerang er tir. A lsekum e ngmo mekngit a rengud er a tekoi el ledilung me a lechub e te riruul, e ngkired el mo oukerebai er a rechapostol. A Paulus a dilu el kmo: “A lolebeakl er kemam a re chad, e aki omekngeltengat er tir; ma loldechelakl er kemam, e aki di outekangel, ma lolekoi a mekngit el kiram a re chad, e aki melekoi a ungil er tir.”​—1 Korinth 4:12, 13.

14. Ngerang a klungiolel a ungil el omerelled?

¹⁴ Molemolem lolecholt a ungil omeruul. Ngera me tiang a klou a ultutelel? Alta e a ungil cheldechedechad a sebechel el lomelemii a budech er a delongeled kid me a rechedad, engdi a ungil el omerelled a lmuut el klou a klisichel. (Monguiu er a 1 Petrus 3:1, 2, 16.) Bechititerir a rechedal a telungalek er kau me lesa ungil kerebai er kau el kmo a Resioning er a Jehovah a ungil a chebechiielir, e ungil lomekerreu er a rengelekir, e kiei lokiu a omellach er a Biblia, e ngar er ngii a belkul a klengar er tir. Me alta e a rechedad a diak bo lekengei er a klemerang, engdi ngsebechel mo dmeu a rengud sel dodengei el kmo a ungil el omerelled a odeuir a rengul a Jehovah.

15. Kede mekerang e mo ungil el kutmeklid er a uchei me lak el duubech a klautoketok er a delongeled kid me a rechedad?

¹⁵ Bo mungil el kutmeklau er a uchei. Molatk er a blekeradel el sebechel el mo uchul a klautoketok er a delongelem kau me a rechedam, e molilt a tekoi el bo moruul. (Osisechakl 12:16, 23) Tiaikid a tekoi el lurruul er ngii a ta el odos er kid er a beluu er a Australia. A demal a bechil a kmal mle mesisiich el omtok er a klemerang me a lebebil er a taem e ngkmal mo kesib a rengul. Me a uchei er a lomekedong er ngii, e ngii me a bechil a olengit er a Jehovah me lengesuterir el mo diak el loba ngasecherreng sel longer er ngii. Te melatk a ungil el tekoi el sebechir el mo mesaod e kerekikl el diak bo lekemanget a cheldechedecherir el sebechel el mo uchul a klautoketok el kirel a klechelid. Te dirrek el oterekokl a klemengetel a taem el longedecheduch er ngii.

16. Ngmekerang e mo sebechem el mo mesisiich er a uldesuem el medakt el melemall a rengrir a rechedam?

¹⁶ Ngmera el tekoi, ngdiak el sebechem el oibngau er a rokui el kakebosech el uldesuir a rediak loumerang el chedam. Me sel lebo er ngii a mondai, e nglocha mo mekngit a rengum e le ngbetik a rengum er a rechedam e dirrek el soam el oldeu a rengrir. Engdi lak mobes el kmo, a blakerreng er kau el mo er a Jehovah a kmal kirel el mo mesisiich er sel bltikerreng er kau el mo er a telungalek er kau. Me sel taem el rechedam a mo melechesuar tia el uldesuem, e te mo medengelii a klungel a ultutelel a omesiungem el mo er a Jehovah. Ngkmal diak el sebechem lorrimel er a ngii di el chad el mo kongei er a klemerang. Engdi ngsebechem el ochotii a rolel e a blekongesenges er kau el mo er a Jehovah a mla ngosukau. E a Jehovah a omesterir a osisiu el techall el omeskid me bo el sebechir el melilt el mo mesiou er ngii.​—Isaia 48:17, 18.

17, 18. Ngera sebechel ngosukau a lsekum a ta er a chedal a telungalek er kau a mo cheroid er a Jehovah?

¹⁷ A lsekum a ta er a chedal a telungalek a mesuld a ngklel me a lechub engdi ngii el ngubetii a ngklel er a ongdibel, e ngsebechel el kmal mo meringel er kid, el di ua ringel el mo er ngii a lsekum a chad a oba oles el merus er kid. Ngmekerang e mo sebeched el outekangel er tia el ringel?

¹⁸ Di molemolem el mesiou er a Jehovah. Sel bo mchelebangel er chouaitia el ringel, e ngkirem el melemolem el melisiich er a klaumerang er kau. Monguiu er a Biblia er a bek el sils, e mongetmokl er kau e bo er a miting e molemolem el omerk er a klumech e moluluuch el mo er a Jehovah me lebeskau a klisichem el mo outekangel. (Jude 20, 21) Ngmekerang a lsekum ke meruul aika el rokui e a ringel a diak el bo lecheroid? Lak bo lemechitechut a rengum, di molemolem el mesiou er a Jehovah. E a cherengel a taem, e tiang a mo ngosukau el mo meduch el mtebechelii a uldesuem. Tiang a dilubech el mo er ngike el milluches er a Psalm 73. Ngar er a chelsel a klengar er ngii, e ngmlo er ngii a taem el kmal mlo meringel er ngii el mtebechelii a uldesuel. Engdi a omengull er ngii el mo er a Jehovah a ngilsuir el lmuut el mo melemalt a osengel el kirel tia el tekoi. (Psalm 73:16, 17) E tiang a sebechel el duubech lekor kau.

19. Ke mekera ochotii a omengull el mo er a rolel a lollach er a rechedal a Jehovah?

¹⁹ Molecholt a omengull el mo er a omellach er a Jehovah. A Dios a medengei el kmo a omellach er ngii a mo uchul a klungiolir a rokui el chad el uldimukl er tirke el mla mesuld a ngklir. Me alta e ngkmal meringel er kid el omes er a betik er a rengud el nguu a omellach, engdi tiang a sebechel el ngosuir el lmuut el mei er a Jehovah er a uriul. (Monguiu er a Hebru 12:11.) Me ngmo lmuut er sel taem, e ngkmal kired el olecholt a omengull er kid el mo er a ulekrael er a Jehovah el ‘diak bo dobengterir’ tirke el seluld a ngklir. (1 Korinth 5:11-13) Tiang a diak el beot el tekoi, engdi ngkmal kired el diak dongedecheduch er tir el okiu a dengua, me a text messages, me a babier, me a e-mail, me a lechub a social media.

20. Ngkired el melemolem el melatk el kirel a ngerang?

²⁰ Lak bo el mechitechut a rengum! A bltikerreng a “outekangel el diak le toched er a rokui el tekoi” me ngsebeched el melemolem el oba omelatk el kirel a luut er tirka el betik er a rengud el mo er a Jehovah. (1 Korinth 13:7) A lsekum ke mesa olechotel el kmo ngika el chedam a mla melodech a blekerdelel, e ngsebechem el meluluuch me luut el nguu a klisichel el okiu a Biblia, e lekengei er a okedongel a Jehovah el kmo: “Mluut el mer ngak.”​—Isaia 44:22.

21. Ke mo mekerang a lsekum a telungalek er kau a mo omtok er kau e lekau el oltirakl er a Jesus?

²¹ A Jesus a dilu el kmo, ngkmal kirel el mo betik a rengud er ngii el kuk ngaruchei er a bltkil a rengud el mo er a ngii di el chad. Ngmle ulterekokl a rengul el kmo a redisaiplo er ngii a mo oba blekeu, e melemolem el blak a rengrir el mo er ngii el mo lmuut er a taem el rechedal a telungalek er tir a mo omtok er tir. Me a lsekum a rechedal a telungalek er kau a omtok er kau e lekau el oltirakl er a Jesus, e bo multuil er a Jehovah. Molengit a ngeso er ngii me lengesukau el mo outekangel. (Isaia 41:10, 13) Bo ledeu a rengum e lekau el medengei el kmo a Jehovah me a Jesus a dmeu a rengrir er kau, e dirrek el mo meskau a omeksullem el kirel a blakerreng er kau.