NGAR er a ta el kekerei el beluu er a Gujarat, India, e a demal a John a miltecholb el ta er a Sioning er a Jehovah er aike el ulebongel el rak er a 1950. Engdi John me a reteim el rubekul me a ruchedal me a derrir a mle chad er a Katolik, e kmal mle chad er a klechelid. Me tiaikid a uchul me te kmal ulemtok er a klaumerang er a demerir.

A ta el taem, e a demal a John a ulengit er ngii el mo msa envelope el mo er a ta er a odam er a ongdibel. Engdi tiaikid el tutau, e a John a mildobech a chimal er a lolasem el melai er a dengebel a klou el deraimukang. Engdi ngdi mle soal el olengesenges er a demal me ngdi lilechetii a delobech el chimal loba mamed e merael el mo omechei er ngii el envelope.

Me a John er a lebo er isei el basio, e ngiluu ngii el envelope el msa bechil ngii el odam, e ngii a mle ta er a Sioning er a Jehovah. Ngmilsang a chimal a John el delobech me ngmle soal el ngosuir. Me ngultebedii a first-aid kit er ngii, e ngotechii ngii el telemall e mililii er a bandage, e rullii a imelel el tea. E a cherengel a taem el lengar sei a John, e ngmilengedecheduch er ngii el kirel a Biblia el ngar er a ungil rolel.

Me ngokiu a ungil omerellel ngika el odos, e a uldesuel a John el kirel a Resioning a ulemuchel el mengodech. Me nguleker er ngii a teblo el ker el kirel a klaumerang er a Resioning er a Jehovah el kirel aike el lekakerous er ngii tir me a Ikelesia er a Katolik. Nguleker a lsekum a Jesus a Dios me a Rekristiano el kirir el meluluuch el mo er a Maria. Ngika el odos a milsuub a tekoi er a Gujarati me ngmle sebechel el onger er a John el ngar er a omelekingel. Me ngulechotii er ngii a nger el ngar er a Biblia, e msa booklet el dai er ngii a kmo, “This Good News of the Kingdom.”

A uriul er a lechiuii a booklet a John, e ngmlo medengei el kmo aike el lulenguiu a mle klemerang. Me ngmlo er a prist er ngii e oker er ngii aike el eru el osisiu el ker. Me ngika el prist a kmal ngilasech a rengul e metechii a Biblia er ngii e oldiu el kmo: “Kau a mla mo Satan! Mochotii er ngak er a Biblia el kmo a Jesus a diak el Dios, e dirrek el mochotii er ngak a bades el dmu el kmo ngdiak el kired el mengull er a Maria. Mochotii er ngak!” Me a John a kmal mlo mechas a rengul er a omerellel ngika el prist me ngdmu er ngii el kmo, ngkmal diak el lluut el me er a ikelesia er a Katolik. E kmal dimlak a ta lebong!

A John a ulemuchel el mesuub lobengterir a Resioning, e kilengei er a klemerang, e mlo mesiou er a Jehovah. A cherengel a taem, e a rebebil el chedal a telungalek er ngii a mirruul er a osisiu el tekoi. A uriul er a bekord el 60 el rak, e a llechul sel delobech er a chimal a dirk omeklatk er ngii er a ungil el omerellel a Kristiano el millisiich er ngii el mo ousbech er a klengar er ngii el rokir el mesiou er a Jehovah.​—2 Korinth 6:4, 6.