AK MILECHELL er a rak er a 1923 er a Hemsworth, el beluu el ngar er a Yorkshire, England. Ngmla er ngii a klou el ochedak el Bob. Sera el etiu a rekik, e a demmam a ngilai a bebil el babier el mesaod a rolel e a klsuul klechelid a mla mengeuid er a rechad. A demmam a kmal mlo mechas a rengul er aike el lulenguiu. Ngmle chetil a blekerdelir a remengeteklel a klechelid el olisechakl er a ta er a tekoi e kuk mo meruul er a ta er a tekoi. A uriul er a sesei el rak, e a Bob Atkinson a mlei er a blimam e orrael a rekodo er a ta er aike el cheldechedechal a Brother Rutherford. Aki miltebengii el kmo tia el cheldecheduch a mla er a osisiu el cheldebechel el ultebedii a babier el lechiliuii a Demak. A demak me a delak a milengemedaol er a Brother Atkinson el me omengur el obengkemam er a bek el kebesengei me bo longer a betok el kermam el kirel a Biblia. Ngmilengemedaol er kemam el mo er a miting el ngar er a blil a odam el telkib el cheroid. Aki ulemuchel el mo er a miting er a bek el taem, e seikid e ngmilteketek a kekerei el ongdibel er a Hemsworth. E seikid e a zone servant (chelechang e ngokedongall el odam el oldingel a ongdibel) me a re pioneer el mla er aike el kmeed el ongdibel a ulemengur el obengkemam. Tirka el rudam me a rudos a kmal mle ungil el ocholt el mei er ngak.

Ngar seikid el taem, e a telungalek er kemam a ulemuchel el lousiobai. Engdi Demak a dilu er a ochedak el kmo, “A lsekum e ngsoam el mo pioneer, e ngmo diak dousiobai.” Me a Bob a kilengei, e chilitii a blil e mlo pioneer er sera el 21 a rekil. A uriul er a eru el rak er a 16 a rekik, e ak dirrek el mlo pioneer. Sel sebadong me a sandei e a kuureor lobengterir a rebebil, engdi ngoumesingd el di ngak el tang sel kot el mo er a ongeim el ureor. A kuusbech a phonograph me a testimony card, el ngii a kekerei el card el llechukl a beot el omesodel a klumech er a Biblia er ngii. A Jehovah ulemekngeltengat er ngak el mlo er ngii a rechad el kusuub a Biblia lobengterir el mlo olengeriakl. Te betok el milsuub a Biblia er ngii el telungalek a mlei er a klemerang. E a ongingil el rak, e ak miltutk el mo special pioneer lobengkel a Mary Henshall. Aki mlodurech el mo er a territory el diak a ongdibel el oureor er ngii el ngar er a beluu er a Cheshire.

Ngar er a Ongeru el Mekemedil a Beluulechad, e a redil a mle kirir el meruul a ureor el ngii a olengeseu er a mekemad. A rebebil el mengeteklel a klechelid a mla er  ngii a llemeltir el diak lebo er a mekemad me aki ulemdasu el kmo, ngdirrek el ngar er ngii a llemeltam le kemam el special pioneer. Engdi a kort a dimlak lekengei me ak mlo kelebus el 31 el klebesei. A ongingil el rak er a lebo el 19 a rekik, e ngmle kirek el mo er a kort el eru el taem e le ukltkek a dimlak lebechikak el mo olengeseu er a mekemad. Me nguaisei, engdi ngmlo eru el taem el lebechikak a rulab a dereder me ak merael. Me ngokiu a tekoi el dilubech, e ak mle medengei el kmo a chedaol reng a ullengeseu er ngak, e a Jehovah a rirellak el mo mesisiich.​—Isaia 41:10, 13.

Ak mlo medengelii a Arthur Matthews er a 1946. Ngikang a mle kelebus el edei el buil e le ngii el dimlak el kengei el mo er a mekemad. Ngmlo obengkel a obekul er a Dennis el ngii a special pioneer er a Hemsworth er a uriul er a letobed er a kelebus. A demerir a ulsisecheklterir el kirel a Jehovah er a ledirk kekerei, e mlo metecholb er a lengeasek. A uriul er a ledak el pioneer, e a Dennis a mlodurech el mo er a Ireland me a Arthur a di mlo ngii el tang. A demak me a delak a kmal mlo mechas a rengrir er a blekerdelel ngika el kmal meringel el oureor el pioneer. Me te milengemedaol er ngii el me kiei el obengkemam. Me sel bo kuldingel, e ngak me a Arthur a blechoel el kongei el melib a belatong er a uriul er a blengur. Me a uriul e aki ulemuchel el keluches el terung. Ngar er a rak er a 1948, e a Arthur a mlo kirel el mo kelebus el edei el buil. Aki mlo bechiil er a January 1949, e a turrekong er kemam a mo melemolem el ngar er a mui el taem el omesiou el mo rsel sebecham. Aki mle kerekikl er a chitel a udoud, e ousbech a ulengellam el mo mengereker el oeak sel ki mongib a rodech. Me ngokiu a klengeltengat er a Jehovah e ngmlo sebecham el melemolem el pioneer.

Telkib el taem er a uriul er a ta el rak, e aki mlodurech el kot e aki mlo er a Armagh e a uriul e aki mlo er a Newry er a beluu er a Northern Ireland, el oumesingd el chad er ngii a Katolik. Ngkmal mle klou a omengetukel er a klechelid er ngii me ngmle kiram el mo kerekikl e ungil omdasu sel ki momerk a klumech. Ngmla er ngii a miting er kemam er a blil a ta el odam me a odos el 10 el mael (16 kilometer) a cherridel er a blimam, e bekord el teai a me er a miting. Me a lebebil, e aki kiei el ta el kesus el di bad er a ulaol, e oldeu a rengmam er a klou el blengur er a ongingil el sils. Me ngkmal uchul a deurreng sel dodengei el kmo chelechang, e te ngar er ngii a rebetok el Sioning el ngar sel basio.

A ochedak me a bechil er a Lottie a milsiou el special pioneer er a Northern Ireland, e ngar er a 1952 e kemam el teuang a mlo er a ileakl el eru el sils el ongdibel er a Belfast. A ta er a odam a kmal kilengei er kemam el mo kiei el obengkel, me kemam el teuang a kiliei er a blil el obengkel a Pryce Hughes el milsiou er a obis er a Resioning er a Jehovah er a Britain. Ngmla er ngii a ta el kesus, e aki milsaod er a beches el booklet el dai er ngii a kmo, God’s Way Is Love el ileakl el mileketmokl el mo er a rechad er a Ireland. A Brother Hughes a milsaod el kmo, ngkmal meringel a domerk er a klumech el mo er a Rekatolik er a Irish Republic. A rudam a mlorimel el tuobed er aike el basio el lekiliei er ngii, e a reprist a ulerrimel er a rechad el mo oldechelakl er a rudam. A Pryce a kmo, “Kede ousbech er a rubekel el ngar er ngii a mlirir el mo teloi er a ileakl el ureor el mo merous er a booklet er a beluu er rokir.” * (Momes er a footnote.) Me seikid e aki dilu el kmo, “Aki Mo Meruul er Ngii!”

 A chimo el basio el re pioneer a mle sebechir el kiei er ngii er a Dublin a mle blil a Ma Rutland el ngii a blak a rengul el odos el mla mesiou er a Jehovah el betok el rak. Me kemam me aki dirrek el mlo kiei er ngii el telkib el taem, e ulterau a bebil el kloklam. E a uriul, e kemam el teuang a ngilasech er a otobai me a sidecar er a Bob el mo osiik a mlai. Aki miltik er a mlai el bla lousbech er ngii a rechad el dirk ungil, e ullengit er ngike el ulterau er ngii me lodureklii el mei er kemam e le ngdimlak a ta er kemam el meduch el omekall. A Arthur a uluusbech er a klou el taem er seikid el kesus el dengchokl er a bet el leko change a kia er a mlai. Me a bocha letutau el lolasem el omekall er ngii el mlai el tuobed er a blil a mlai, e a missionari el Mildred Willett (el ngii a uriul e ngmlo bechil a John Barr) a mlei. Ngikang a mle meduch el omekall, me ngullengeseu er kemam el mesuub el mo omekall. Me a uriul er tiang e aki mle kltmokl el merael.

A uriul, e ngmle kiram el osiik a basio el ki bom kiei er ngii. A rudam a silebedemam el diak ki bom kiei er a trailer e le rumtok a sebechir el sosebii. Me aki ulsiik a blai engdi ngdimlak el sebecham el metik a tang. Me seikid el kesus, e kemam el teuang a mlo bad er a chelsel a mlai. Sera bo letutau, e a di mle chimo el sebecham el metik er ngii a trailer el rruul er a chim el di ngar er ngii a mekekerei el bunk bed er ngii. E tiaikid a mlo blimam. Ngkmal mechas a renguk e le ngdimlak a mondai er tia el trailer el ngar er a blil a ta er a chad er a sers el kmal mle ungil a omerellel. Aki blechoel el omerk er a klumech er a territory el mle 10 el mo er a 15 el mael el cheroid (16 el mo er a 24 kilometer) er a trailer. Me a uriul er a ki molukl el mo er a kuk ta er a basio, e aki blechoel el lmuut el mo omerk er a klumech el mo er a rechad el mla er sel basio el lebla er ngii a trailer er ngii.

Aki mlo oldingel a rokui el blai er a dimesungos er a Irish Republic el dimlak a kmal ultok er ngii. E rirous a kuk betok er a 20,000 el booklet, e uldurokl a ngklir tirke el semeriar el mo er a obis er a Resioning er a Jehovah er a Britain. Me ngkmal klou el klengeltengat el ngar er ngii a derdart el Sioning el ngar er a Ireland er chelechang!

A uriul er a sesei el rak, e aki mlodurech el mo er a dimes er a London. A uriul er a sesei el sandei, e a rudam el ngar er a obis er a Resioning er a Jehovah er a Britain a ulemekedong er a Arthur e ulengit er ngii el mo omuchel el oldingel a ongdibel er a ongingil el sils! Aki mlosisechakl er a di chelsel a ta el sandei e mlo oldingel er a Scotland, me a Arthur a dimlak a temel el mengetmokl el kirel a cheldechedechal. Engdi ngmle blechoel el kongei el mo meruul a ngii di el ngerachel er a omesiungel el mo er a Dios er a chelsel a ngii di el blekeradel. A kerebil a kmal silsichak. Ngkmal mle dmeu a rengmam er tia el ngerachel el mloterekokl er kemam el oldingel a ongdibel. A uriul er aki modurech el mo er a territory el diak a ongdibel el oureor er ngii, e ngmle klou el klengeltengat el mlo sebecham el ngar er a delongelir a rebetok el rudam me a rudos.

Sel taem er a lolengit er a Arthur el mo er a Skuul er a Gilead er a 1962, e aki mlo chelebangel er a klou el omelilt. Tia el skuul a di mla er ngii el teruich el buil, engdi ngdimlak el sebechek lobengkel e le ngdimlak lolengit er ngak el mong. Aki kilengei el kmo, ngmelemalt el taem el Arthur a kongei er tia el ongit. Engdi ngak el diak lebo er ngii a chedak a uchul me a obis er a Resioning er a Jehovah a uldureklak el mo er a Hemsworth el special pioneer. Me sel taem el Arthur a liluut el mei er a uriul er a ta el rak, e aki mlodurech el mo oldingel a ongdibel. E a territory er kemam a mle uldimukl er a Scotland, me a diluches er a England, me a Northern Ireland.

Ngar er a 1964, e a Arthur a mlodurech el mo mesiou er a obis er a Resioning er a Jehovah er a Irish Republic. A kot, e ak mle medakt el kirel a mo er a Bethel e le ngkmal mle dmeu a renguk el oureor el oldingel a ongdibel. Engdi chelecha el kumes el beduluriul, e ngkmal dmeu a renguk er a ileakl el techall el mlo mesiou el ngar er a Bethel. A kuumerang el kmo a lsekum ke kongei er a ngii di el ngerachel el moterekokl er kau el diak el soam el meruul er ngii, e a Jehovah a mo blechoel lomekngeltengat er kau. Ngar er a Bethel e ak mirruul a ureor er a obis, e mesuk a babier er a baks, e meruul a kall e mengetmokl. A lebebil er a taem, e aki dirrek el mo oldingel a ongdibel me ngmlo sebecham el mo medengelterir a rudam er a beluu el rokir. Ngdirrek el mlo sebecham el mesterir a rechad el ki mulsuub a Biblia lobengterir el olengeriakl er a klemerang, e melisiich er a mesisiich el deleongel er kemam lobengterir a rudam me a rudos er a Ireland. Me ngmera el uchul a klou el klengeltengat!

Sel kot el international convention er a Ireland a mla er ngii er a Dublin er a 1965. * (Momes er a footnote.) Alta e ngmla er ngii a mesisiich el ultok, engdi tia el ongdibel a kmal mle ungil. A ildisir a rechad el mlong a 3,948, e a remiltecholb a 65. A 3,500 el chad el mlongit el mong a kiliei er a blirir a rechad er a Dublin. A derta er tirka el chad el oublai aika el blai a ngilai a babier er a omereng el saul, e mle ungil a rengrir er a ungil omerellir tirka el rudam. Ngkmal mle ungil el omelodech el kirir a rechad er a Ireland.

Ngar er a 1966 e a diluches me a dimes er a Ireland a mlo dmak el ngar cheungel a obis er a Resioning er a Jehovah er a Dublin. Tia el kltarreng a kmal mle ngodech er a tekoi el dilubech er a beluu, e le ngokiu a balatiks me a klechelid e a rechad a mle blii. Ngkmal mlo mechas a rengmam el mesterir a rebetok el Katolik el me er a klemerang, e dmak el mesiou er a Jehovah lobengterir a rudam er tir el mle Brodestant.

Ngar er a 2011, e a klengar er kemam a kmal milengodech er sel taem el obis er a Resioning er a Jehovah er a Britain me a Ireland a mlo dmak, e kemam a mlodurech el mo er a Bethel er a London. Ngar tiaikid el taem, e ak ulemuchel el mo bekikl el kirel a Arthur. Ngmle smecher er a rakt el Parkinson, e klou el klengiterreng e le ngar er a May 20, 2015, e a mle kldemek el 66 el rak a mlad.

Ngar er aika el mereko el rak, e ngkmal milecham a renguk, e mlo mechitechut e mekngit a renguk. A ngar er a mong, e a Arthur a di mle blechoel el ngar bita er ngak. Ak mera el di melatk er ngii! Engdi sel bom chelebangel aika el blekeradel, e ke mengal mo kmeed er a Jehovah. Ngmera el mo dmeu a renguk sel kudengei a klungel a bltkil a rengrir a rebebil el mo er a Arthur. Ak mla ngmai a babier el mla er a rudam me a rudos er a Ireland me a Britain me a dirrek el United States. Aika el babier el uldimukl a omelisiich el mla er a obekul a Arthur el Dennis me a bechil er a Mavis, me a reteru el ngelekir el redil el Ruth me a Judy a mla ngosukak er sel rolel el diak el sebechek el smodii.

A bades el kmal silsichak a Isaia 30:18 el melekoi el kmo: “Ngdi RUBAK a dirk mengiil el mo ungil a tekingel er kemiu sel bo le chebkemiu. Ng kldmokl el mo chubkemiu ele ng di blechoel el meruul a melemalt. A deurreng a mei sel moumeral ulsirs er a RUBAK.” Me ngkmal mengelaod er a renguk el mo medengei el kmo, a Jehovah a dirk mengiil loba kllourreng el mo sumechokl a rokui el mondai er kid, e meskid a ngerachel el bo doldeu a rengud er ngii er a beches el beluulechad er ngii.

Sel kulatk er a ngar a mong, e ngsebechek el mesa rolel er a lomekrael e lomekngeltengat a berkel a klumech a Jehovah er a Ireland! Ngkmal dmeu a renguk el ta er tirke el betok el ullengeseu er tia el ureor. E kmal klemera el tekoi el kmo, a doruul aike el longit er kid a Jehovah el mo meruul a blechoel el mo uchul a klengeltengat.