1, 2. Ngar er a ulebengelel a ongeuid el ues el lilsang a Sekaria, e a Rechijudea te chilebangel er a ngera el blekeradel er a Jerusalem?

ME NGAR er a ulebengelel a ues el lilsang a Sekaria, e ngkmal mle betok el tekoi a lolatk el kirel. Nglocha mlo mesisiich el okiu a telbilel a Jehovah el mo mengelebus er a remechebirukel el chad. Engdi ngdirkak lemengodech a tekoi. A rebetok a millemolem el meruul a mekngit me a diak el melemalt el omeruul me a uchul a okedecherul a templo er a Jerusalem a dirkak lemeteketek Ngera me a Rechijudea a di mle mereched el choitii a ureor el Jehovah a milsterir? Te liluut el mo er a Jerusalem el di mo meruul a klengar er tir el mo ungil?

² A Sekaria a mle ungil medengei el kmo a Rechijudea el liluut el mo er a Jerusalem a tirke el milengull er a Jehovah. Tir tirke el ‘meltuchel er a reng er a Dios’ el mechei blirir me a siobai er tir er a Babilon. (Esra 1:2, 3, 5) Te chilitii a basio el ble lungil el medengelii, e mo er a beluu el betok er tir a kmal dirkak a ta lebo er ngii.  A lluut er a okedecherul a templo er a Jehovah a kmal mle klou a ultutelel el mo er tirke el Rechijudea el kilengei el mo merael er a kengaol el omerael el bekord el 1,000 mael (1,600 kilometer) el okiu a meringel el rael.

3, 4. Ngera el omelsemai a blo lechelebangel er ngii a Rechijudea?

³ Ka mkora melatk er sel kemanget el omerael el ngar er a Babilon el mo er a Jerusalem. A rechad a mle klou a temir el melatk e mesaod el kirel a delengcheklir er a ngar mederir. A remechudelang a uluuchais er tir er a mle klebekelel a Jerusalem me a templo er ngii. (Esra 3:12) Nglocha mo uangera uldesuem er a omkot el mesa Jerusalem a lsekum ke mla er a omerael lobengterir? Ke locha mo mekngit a rengum a lsekum ke mesa mla metemall el blai el mla medekedek er a chudel me a mla mongkangk el cheotelel a beluu el meklou a blsibs el mla er ngii a selers me a tebekebok er ngii? Ke locha ulemekesiu aike el telemall el cheotelel a beluu el mo er a klou el mesisiich el cheotelel a Babilon. Engdi a Rechijudea a dimlak lebo el mechitechut a rengrir. E ngera me ngdimlak? E le ngokiu sel kemanget el omerollir, e a Jehovah a millisiich e omekerreu er tir. Me sera lebo er a Jerusalem, e te tileketekii a olengetongel er sel mla er ngii a templo er ngii, e mocha omuchel el melenget el mo er a Jehovah er a bek el sils. (Esra 3:1, 2) Te kmal uleba klou el blakerreng e mle kltmokl el mo oureor. Me ngsebeched el mesa el kmo, ngdimlak a ngii di el ngerang el sebechel el mengitechut er tir.

⁴ Me nguldimukl er a lluut el meteketek a templo, e a Rechijudea a mle kirir el lmuut el toketek a belurir me a blirir. Ngmle kirir el melalem a sersir me bo el sebechel el mo er ngii a kall el mo er a telungalek er tir. (Esra 2:70) A klungel a ureor el mle kirir el meruul er ngii a locha kmal mle klou. Me ngdi mle mereched, e a recherrouir a mlei el me melasem el merrob er tir. Tia el ultok a mla er ngii el bekord el 15 el rak, e a cherengel a taem e a Rechijudea mlo mechitechut a rengrir. (Esra 4:1-4) A ta er a omelsemai a mlo er ngii er a rak er a 522, er sel taem el king er a Persia ultebedii a tekingel el kmo a rokui el blai er a Jerusalem a mo meterob el diak loleketek. Me ngsebeched el mesa el kmo, a beluu a kmal diak el sebechel el lmuut el meteketek.​—Esra 4:21-24.

5. Ngmilekera Jehovah e ngosuterir a rechedal?

⁵ A Jehovah a mle medengei el kmo, a rechedal a uluusbech a klisiich me a blekeu. Ngmilsa Sekaria a ulebongel el ues el mo oterekokl a rengrir a rechad el kmo, Ngbetik a rengul er tir e mereng a sulir er a omesiungir el mo er ngii. Ngtilbir el mo omekerreu er tir a lsekum te lmuut el mo meruul er sel ureor el lebilsterir. A Jehovah a milsaod el kirel a lluut er a okedecherul a templo el kmo: “Tia mo ua isei a lsekum ng mo blak a rengmiu el olengesenges a ikel bla ledu RUBAK el Dios er kemiu.”​—Sekaria 6:15.

6. (a) Ngmilekera omuchel sel ongeai el ues el lilsang a Sekaria? (Momes er a siasing er a uchelel a suobel.) (b) Ngera me ngmle kakerous a chiro er aika el uos?

⁶ A ongeai, el sel ulebongel el ues el lilsang a Sekaria a locha kot el melisiich el ues er aike el rokui. (Monguiu er a Sekaria 6:1-3.) Ka molasem el melatk el kmo ngerang ngmilsang a Sekaria. A “delongelel a teblol rois” el rruul er a brons a tilobed er ngii a uos el mengurs a kleua el kuruma. Aika el uos a mle kakerous a chiro er ngii el luchul me ngsebechel el di ngar cheroid e ngmedangch tirke el ulemekall aika el uos. A Sekaria a uleker el kmo: “A ika ng ngera belkul el kuruma?” (Sekaria 6:4) E kid me ngdirrek el soad el mo medengei e le tia el ues a ngar er ngii a lerellii er kid.

7, 8. (a) Ngera ngomtechei er ngii aika el teblo el rois? (b) Ngera me aika el rois a rruul er a brons?

 ⁷ Ngar er a Biblia, e a rois a sebechel el omtechei a renged me a lechub e ngkabelment. Aike el rois el Sekaria a miles a osisiu ngii me aike el teblo el rois el donguiu el kirel el ngar er a ulochel a Daniel. A ta er aika el rois a omtechei er a diak a ulebengelel el omengederederel a Jehovah er a eanged me a chutem, e sel kuk tang a omtechei er a Renged el Jesus a King er ngii. (Daniel 2:35, 45) Ngar er a ulebengelel a rak er a 1914, er sel taem el leblo el King a Jesus, e aika el teblo el rois a dimla er ngii, e dirrek el ngar er ngii a ileakl el ngerechelel el mo oltaut a moktek er a Dios el kirel a chutem.

⁸ Ngera me aika el rois a rruul er a brons? A brons a kot el klou a ultutelel e mengeldoech el deel. Seikid a uchul me a Jehovah a millekoi er a rechad er a Israel el mo ousbech a brons sel lomekedechor er a chedaol tento me a dirrek el templo er a Jerusalem er a uriul. (Exodus 27:1-3; 1 King 7:13-16) Me aika el rois el rruul er a brons a uchul me ngmelisiich er a ungil el tekoi er a llemeltel a omengederederel a Jehovah er a eanged, me a chutem me a Renged el longedereder er ngii a Mesias el ngii a mo rulleterir a rechad el mo melechesuar a ulekerreu, e mo oldeu a rengrir er a betok el klengeltengat.

9. Te rua techa ulemekall aike el kuruma, e ngera ngerechelir?

⁹ Aike el kuruma me tirke el ulemekall ngomtechei er a ngerang? Tirke el ulemekall a rechanghel, el locha kakerous el cheldebechel er a rechanghel. (Monguiu er a Sekaria 6:5-8, NW.) * (Momes er a footnote.) Te tuobed “er medal a Rubak er a beluulchad el rokir” el loba ileakl el ngerachel. Te mlodurech el mo er a ulterekokl el basio el mo omekerreu er a rechedal a Dios, el ileakl er a “Babilonia er a diluches.” Me ngokiu tia el ues, e a Jehovah a subedeterir a rechedal el kmo, ngkmal diak el lluut el mechititerir me bo lesibai er a Babilon. Me ka di molatk er a rolel tiang a longelaod er tirke el milleketek er a templo er a temel a Sekaria! Te mle medengei el kmo, a recherrouir a kmal diak el sebechir el mo merrob er tir.

10. Ngmekera ulochel a Sekaria el kirel a kuruma me tirke el omekall e ngosukid er chelechang?

¹⁰ Chelechang, e a Jehovah a dirk ousbech er a rechanghel er ngii el mo omekerreu e melisiich er a rechedal. (Malakai 3:6; Hebru 1:7, 14) Me ngulemuchel er a 1919 er sel taem el rechedal a Jehovah a mlo diak el blebaol er a Kloul Babilon, e a recherrouir a melasem er a tkurrebab el sebechir me ngdiak el lolemolem er a mera el omengull el mukeroul e lorael el mo klou. (Ocholt 18:4) Engdi ngdirkak el bo el sebechir el meruul el uaisei, e le rechanghel a omekerreu er a cheldebechelel a Jehovah, me ngdiak el kired el mo medakt el kmo a rechedal a Jehovah a lmuut el mo blebaol el mo er a klsuul klechelid. (Psalm 34:7) Kede bai mo melemolem el mo oldeu a rengud e mechesang el oureor el mengull er a Jehovah. A ulochel a Sekaria a ngosukid el mo ungil medengei el kmo, kede selebechakl el okiu aika el teblo el rois.

11. Ngera me ngdiak el kired el mo medakt er sel taem el rechedal a Dios a mo modechelakl?

 ¹¹ Ngkmal di kmedung e a klisichel a balatiks er tia el beluulechad er a Satan a mo dmak e melasem el olekngemed er a rechedal a Dios. (Esekiel 38:2, 10-12; Daniel 11:40, 44, 45; Ocholt 19:19) Ngar er a ulochel a Esekiel, e kede mes aika el klisiich el mla dokedekii tia el chutem el ua eabed. Te ngar er a uos e merael el mei el loba ngasecherreng el mo oldechelakl er a rechedal a Dios. (Esekiel 38:15, 16) * (Momes er a footnote.) Me ngkired el mo medakt er tir? Ngdiak! Ngar er ngii a urrurt er a Jehovah el obengked. Sel taem er a kloul ringel, e a rechanghel er a Jehovah a mo omekerreu er a rechedal, e mo okngemedeterir tirke el omtok er a omengederederel a Jehovah. (2 Thesalonika 1:7, 8) Me ngmera el mo dmeu a rengud! Engdi ngtechang a mo mengetakl er a urrurt er a Jehovah el ngar er a eanged?

12, 13. (a) A Jehovah ngdilu er a Sekaria el mo meruul a ngerang? (b) Kede mekerang e medengei el kmo a chad el ngklel a Tiul a omtechei er a Jesus Kristus?

¹² Ngdi mle ta el Sekaria a miles aike el eai el ues. Ngdirrek el ngar er ngii a lerirellii el rebebil a mlo sebechir el mesang, e dirrek el smisicheterir tirke el liluut el mo meleketek er a templo er a Dios. (Monguiu er a Sekaria 6:9-12.) A Heldai me a Tobia me a Jedaia a mla er a Babilon el mei. A Jehovah a dilu er a Sekaria  el mo melai a silber me a kolt er tirka el chad, e ousbech el mo meruul a “krone.” (Sekaria 6:11) Me tia el krone, ngkirel el mo er a Kabernor el Serubabel el mla er a kebliil er a Juda e mle uldidellel a rsechel a David? Ngdiak. A Jehovah a dilu er a Sekaria el me loia krone er a bdelul a Ngarbab el Prist el Josua. E tiang a locha chilsir a rengul a ngii di el chad el ulemes.

¹³ Tia el omengedaol ngrirellii a Ngarbab el Prist el Josua el mo king? Ngdiak. A Josua a dimlak el uldidellel a rsechel a David, me ngdimlak el rredemelel a mo king. A omengedolel a olechotel a tekoi el mo duubech er a ngar medad el mo er a diak a ulebengelel el king e prist el okedongall el Tiul. A Biblia a mesaod el kmo, a Tiul a melutk er a Jesus Kristus.​—Isaia 11:1; Mateus 2:23.

14. El ua el King e Ngarbab el Prist, ngera el ureor a kirel meruul er ngii a Jesus?

¹⁴ A Jesus a King e Ngarbab el Prist. Ngmengetakl er a urrurt er a rechanghel er a Jehovah, e meringel loureor el meruul er a rechedal a Dios el mo melechesuar a ulekerreu er tia el mekngit el beluulechad. (Jeremia 23:5, 6) Ngkmal di kmedung, e a Kristus a mo mesisiich er aike el renged sel lolengeseu er a omengederederel a Dios e mesebechakl er a rechedal a Jehovah. (Ocholt 17:12-14; 19:11, 14, 15) Engdi uchei er tiakid el sils, e a Jesus me a lechub a Tiul a ngar er ngii a klou el ureor el kirel meruul er ngii.

15, 16. (a) Te mekerang a rechedal a Dios e mla meteketek e mekikiid er chelechang, e okiu techang? (b) Ngmo uangera tia el chutem er a uriul er a Omengederederel a Kristus el Ta el Telael el Rak?

¹⁵ El uldimukl er a le King e Ngarbab el Prist, e a Jesus a mlukngerachel el mo “mekedecherur a Templo” er a Jehovah. (Monguiu er a Sekaria 6:13.) Ngar er a rak er a 1919, e ngmirruul er tia el ureor er a omekedechor el oeak er sera relleterir a rechedal a Dios el mo mimokl er a orimel er a klsuul klechelid er a kloul Babilon. A Jesus a liluut el toketekii a ongdibel e tutkii a “blak a rengul e mellomes a rengul el mesiou.” Tia el cheldellir a rengellitel el rudam, a omekrael er tia el klou a ultutelel el ureor el mla meketmokl el ngar er tia el chutem el ngosukid el mo mesiou er a Jehovah. (Mateus 24:45) A Jesus a dirrek el mla mengikiid er a rechedal a Dios, e olengeseu er tir el mo mengull er a Jehovah el ngar er a klikiid el rolel.​—Malakai 3:1-3.

¹⁶ A Jesus me a re 144,000 el king e prist er ngii a mo mengedereder el kirel a ta el telael el rak. Ngar seikid el taem, e te mo olengeseu er a reblak a rengrir el chad el mo cherrungel. Me sel lecherrengelii tia el ureor tirka el king  e prist, engdi mo ta el mera el mengull er a Jehovah a mo ngar er tia el chutem. E seikid e a mera el omengull a mo meteketek!

17. Ngera el ongelaod a lebilsterir a Rechijudea a Jehovah, e ngmekerang a klemechel e ngar er ngii a lerellii el mo er tir?

¹⁷ Ngmilekera klemechel a Sekaria e ngar er ngii a lerirellii er a Rechijudea er seikid el taem? A Jehovah a tilbir el mo olengeseu e omekerreu er tir me bo el sebechir el toketekii a templo, e tiaikid el telbiil a milsterir a omelatk. Engdi te locha dirrek el millatk el kmo ngmekera sebechir a di mekesai el chad e remuul aike el betok el ureor. Me a Sekaria a millekoi er tir er a tekoi el sebechel mo uchul e te diak el medakt e loumededenger. Me nguldimukl er tirka el chad el ua Heldai me a Tobia me a Jedaia el mlo kirir el mo olengeseu er tir, e a Jehovah a dilu el kmo a rebetok el chad a dirrek el “me olengeseu el meruul er a Templo er a RUBAK.” (Monguiu er a Sekaria 6:15.) A Rechijudea a mle medengei el kmo a Jehovah a ullengeseu er a ureor. Me te uleba blekeu el lmuut el mo omekedechor er a templo, alta king er a Persia a tirrebengii a ureor. E tiang a ua rois el ngar er a rolir, engdi a Jehovah a di mle mereched el okngemedii. Me seikid, e a templo a milteketek er a rak er a 515 er a uchei er a Kristus. (Esra 6:22; Sekaria 4:6, 7) Me nguaisei, aike el tekingel a Jehovah a dirrek el mesaod er a tekoi el kmal klou a ultutelel, el ngii a meketmeklang er chelechang.

18. Ngmekera Sekaria 6:15 e motaut er chelechang?

¹⁸ Chelechang, e a remiliol el chad a mengull er a Jehovah. Ngdmeu a rengrir el msang a “ikel kot el ungil” er tir, el ua temir me a klisichir me a kloklir. Ngokiu tiang, e te olengeseu er a templo er a klereng er a Jehovah. (Osisechakl 3:9) E seikid, e ngsebechel mo ulterekokl a rengud el kmo, a Jehovah a a mengreos er tia el blakerreng er kid el olengeseu er ngii. Lak mobes el kmo a Heldai, me a Tobia, me a Jedaia a ngilai a silber me a kolt, e a Sekaria a rirellii el mo krone. A krone a mle ‘omeltkir’ er a tengetengir el mo er a mera el omengull. (Sekaria 6:14) Me a Jehovah a kmal diak lobes er a ureor el doruul er ngii, me a bltkil a rengud el mo er ngii.​—Hebru 6:10.

19. Ngmekerang aike el ues el lulemes a Sekaria e ngar er ngii a lerellii er kid?

¹⁹ Ngar er aika el uriul el sils, e a rechedal a Jehovah a mlo sebechir el meruul a meklou el ureor. E ngokiu a klengeltengat er a omengederederel a Jehovah me a Kristus e ngmlo sebechel. Ngmera el dmeu rengud el chedal tia el diak el mesim, e uchul a ulekerreu, e diak a ulebengelel el cheldebechel, e dirrek el medengei el kmo a moktek er a Jehovah el kirel a klikiid el omengull a mera el mo tmaut. Me molecholt a omereng el saul er a deruchellem er a delongelir a rechedal a Dios, e ‘molengesenges a ikel bla ledu RUBAK el Dios er kau.’ E seikid e ngmo sebechem el mukerreu el okiu a King e Ngarbab el Prist er kid me a rechanghel. Moruul a rokui el sebechem el mo olengeseu er a mera el omengull, e a Jehovah a mo melemolem el omekerreu er kau er tia el mekngit el beluulechad el diak a ulebengelel!