1. Ngera el ungil tekoi a sebechel a olubet el tenget el kutmokl el kired?

A OLUBET el tengetengel a Jesus a mlo uchul a betok el klengeltengat. El ua tiang, a olubet a mlo uchul e ngmlo sebechir a rokui el ngelekel a Adam el betik a rengrir er a llemalt el mo chedal a telungalek er a Dios er a ta er a klebesei. Ngdirrek el sebeched el omes el beduluchei el kirel a taem el bo ledeu a rengud el kiei el diak a ulebengelel. Ngdirrek el ngar er ngii a lmuut el betok el meklou a ultutelel el tekoi el ngar er a eanged me a chutem el mo meketmokl el okiu tia el olubet el tenget.​—Hebru 1:8, 9.

2. (a) Ngera el meklou a ultutelel el tekoi el kirel a eanged me a chutem a mle uldimukl er a nglunguchel a Jesus? (Momes er a siasing er a uchelel a suobel.) (b) Ngera kede mo mesaod er tia el suobel?

² Ngar er a bekord el eru el rak er a uchei er a lemad a Jesus, e ngullisechakl er a redisaiplo er ngii el meluluuch el kmo: “Demmam el ngar a eanged: Bo le modanges a chedaol ngklem; a Rengedem le mei; bo le motaut a soam er a beluulchad el ua ingii er a eanged.” (Mateus 6:9, 10) Me chelechang e kede mo mesa el kmo ngmekerang a olubet el tenget e sebechel kobkellii a ngklel a Jehovah, me sel omengederederel a Rengedel a Dios, e dirrek el mo kutmokl a soal.

3. Ngera ngomtechei er ngii a ngklel a Jehovah? E milekera Satan er a lolemall a chisel ngii el ngakl?

³ A kot el uchul, e a Jesus a milluluuch me lemodanges a ngklel a Jehovah, me a lechub e le mechedaol. A ngklel a Jehovah a omtechei er ngii el ochotii el kmo, ngdi ngii el tang a Jehovah. Ngkot el mesisiich e melemalt el Dios er a eanged me a chutem. E a Jesus a ulemekedong er ngii el “Chedaol Chedam.” (Johanes 17:11) Me a Jehovah a chedaol a uchul me a rokui el tekoi el loruul me a ngii di el llach el loruul a di chedaol. Engdi ngar er a chelsel a sers er a Eden e a Satan a milengeuid a tekoi el ua loukerrekeriil er a llemeltel a Dios el meruul a llechul el kirir a rechad. Me ngulumulak el kirel a Jehovah, e dirrek el mlo omtok er a ngklel a Dios me a lechub e ngmelemall a chisel.​—Genesis 3:1-5.

4. Ngmilekerang a omerellel a Jesus e ochotii el kmo a ngklel a Dios a chedaol?

⁴ Engdi Jesus a kmal mle betik a rengul er a ngklel a Jehovah me ngmlo er a tkurrebab el klisichel el mengebkall er ngii el ngakl. (Johanes 17:25, 26) Me ngmilekerang? Ngulekiu a omerellel me a osisecheklel, e ngii el Jesus a ngilsuterir a rechad el mo medengei el kmo a llechul a Jehovah a melemalt me a rokui el tekoi el soal a doruul a di mo uchul a klungioled. (Monguiu er a Psalm 40:8-10.) Me ngmo lmuut er sel taem el Satan a ulemekcharm er ngii el mo lmuut er a kodellel, me a Jesus a di millemolem el blak a rengul el mo er a Jehovah. Me ngulechotii el kmo, ngsebechel a cherrungel el chad el mo cherrungel el olengesenges er a Jehovah.

5. Kede mekerang e rullii a ngklel a Jehovah el mo chedaol?

⁵ Kede mekerang e ochotii el kmo, ngbetik a rengud er a ngklel a Jehovah? Ngokiu a omerelled, e a Jehovah a dirrek el mengerechir er kid el mo chedaol. (Monguiu er a 1 Petrus 1:15, 16.) E tiang a belkul a kmo, ngdi ngii el tang a kired el mengull er ngii e olengesenges er ngii el oba rengud el rokir. Ngmo lmuut er sel taem el demodechelakl, me kid a di kired el melemolem el kiei el oltirakl er a rolel el bla losisecheklid er ngii a Jehovah. Me sel dekiei el oltirakl a llechul a Jehovah, e kede mo kobkellii ngii el ngakl. (Mateus 5:14-16) Kede dirrek el mo meketeklii el kmo a llechul a kot el ungil, e a Satan a ngike el bulak. Kid a diak demecherrungel me kede dirrek el mo remuul a cheleuid. Engdi sel bo leuaisei, e ngkired el ouuchel er a rengud, e olengit a klausubes, e mo diak doruul a ngii di el tekoi el mo uchul a otuub el mo er a ngklel a Jehovah.​—Psalm 79:9.

6. Ngera me a Jehovah a omes er kid el ua melemalt el chad alta e ngdiak demecherrungel?

⁶ A lsekum kede oumerang er a olubet el tenget e a Jehovah a mo ousubes a kngtid alta e kede ngellitel me a lechub e kede ta er tirke el “kuk bebil el sib.” Ngkmal kongei er tirke el tuib a rengrir el mo mengull er ngii me te mo mesiungel. Me ngomekedong er a rengellitel el Kristiano el ua melemalt el ngelekel, e omekedong er a “kuk bebil el sib” el ua melemalt el sechelil. (Johanes 10:16; Rom 5:1, 2; Jakobus 2:21-25) Me ngdi osisiu, chelecha el taem e a olubet el tenget a meskid a techelled el mo omak er a ungil deleuill er kid lobengkel ngika el Demad, e dirrek el mo kobkellii a ngklel.

7. Ngera el klengeltengat a mo er ngii el okiu a olubet el tenget?

⁷ Ngar sel nglunguchel a Jesus e ngdilu el kmo: “A Rengedem le mei.” Me ngmekerang a olubet el tenget e ngar ngii a lerellii er a Rengedel a Dios? A Rengedel a Dios me a lechub e ngkabelment a meteketek el okiu a Jesus me a 144,000 el mlengilt er a delongelir a rechad. E tia el olubet a kutmeklii a techall el mo sebechir tirka el di chad el mo mekiis er a kodall e mo er a eanged. (Ocholt 5:9, 10; 14:1) Te mo king e prist, e dirrek el mo obengkel a Jesus el mengedereder er a  chutem el ta el telael el rak. Me ngar seikid el taem e a Jehovah a mo ousbech er a Rengedel el rullii tia el chutem el mo baradis, e dirrek el ngosuterir a rokui el chad el mo cherrungel. Me a remesiungel a Jehovah el ngar er a eanged me a chutem a mo chimo el telungalek. (Ocholt 5:13; 20:6) E a Jesus a mo mekodir a Satan e okngemed aike el rokui el mondai el ngii el Satan a uchul.​—Genesis 3:15.

8. (a) Ngmilekera Jesus e ngosuterir a redisaiplo er ngii el mo medengelii a klungel a ultutelel a Rengedel a Dios? (b)  E kid a mekera dolengeseu er a ureor el kirel a Renged er chelechang?

⁸ A Jesus a ngilsuterir a redisaiplo er ngii el mo medengelii a klungel a ultutelel a Rengedel a Dios. Ngmilekerang? Uriul er a lemetecholb, e ngulemuchel “el olisechakl er a Ungil Chais er a Rengedel a Dios” er aike el beluu el leblo er ngii. (Lukas 4:43) Ngdirrek el dilu er a redisaiplo er ngii me te mo ouchais el kirel “el mo lmuut er a bek el beluu er a beluulchad.” (Rellir 1:6-8) E chelecha el taem, e ngokiu a berkel a klumech el kirel a Renged, e ngmo er ngii a techellir a rechad el mesuub el kirel a olubet el tenget e mo chederedall er cheungel a Rengedel a Dios. Me kid a dirrek el ochotii a blakerreng er kid el kirel tia el Renged el okiu sel dolengeseu er a rengellitel el mo omerk er a klumech er a ungil chais er a beluulechad.​—Mateus 24:14; 25:40.

9. Ngera me ngulterekokl a rengud el kmo a Jehovah a mo otutii a moktek er ngii el kirir a rechad?

⁹ Ngera mle belkul a tekingel a Jesus er a ledu el kmo: “Bo le motaut a soam”? A Jehovah sel ledelii a tekingel, e ngulterekokl el mo otutii. (Isaia 55:11) Me a ultekengel a Satan a kmal diak el sebechel el torebengii a Jehovah. Me ngera mle soal a Jehovah a lemeketmokl er tia el chutem? Ngkmal mle soal tia el chutem a bo lemui er a remecherrungel el ngelekel a Adam me a Eva. (Genesis 1:28) Me a lsekum a Adam me a Eva a mlad el dimlak a rengelekir, e sel moktek er a Dios el soal lomekeek er a beluulechad er a rengelekir a mo diak el sebechel el mo tmaut. Me a Jehovah a milechititerir me te mlo oungalek. Me tia el olubet el tenget a mesterir a techellir tirke el rokui el oumerang er ngii me ngmo sebechir el mo cherrungel, e mo kiei el diak a ulebengelel. A Jehovah a kmal betik a rengul er a rechad e kmal soal a bo lungil a klengar er tir, el ngii a dimla moktek er ngii er a uchelel.

10. Ngmekera olubet el tenget e mo uchul a klungiolir a rulekoad?

¹⁰ E kuk mekerang tirke el betok el biliol el chad el mla mad e dimlak a techellir el mo medengelii a Jehovah? A Jehovah a kmal soal a rechad a lolemolem el ngar, me ngmo olekiis er tirke el ulekoad er a kodall. Me tia el olubet el tenget a dirrek el mesterir a techellir me te mo mekiis er a kodall. Seikid e ngmo sebechir el mesuub el kirel a Jehovah, e mo kiei el mo cherechar. (Rellir 24:15) A Jehovah a ngike el Uchul a klengar, me sel loluut a klengar er tirke el mla mad, e ngmo Demerir. (Psalm 36:9) Me ngar er a nglunguchel a Jesus e ngdilu el kmo, a Jehovah a “Demmam el ngar a eanged.” (Mateus 6:9) Me a Jehovah a mla msa Jesus a kmal klou a ultutelel el ngerechelel el mo olekiis er a rulekoad, a uchul me ngii el Jesus a dilu el kmo: “Ngak a okiis er a kodall e klengar.”​—Johanes 6:40, 44; 11:25.

11. A Dios, ngsoal a “kloul seked” a bo lokerang?

¹¹ A Jesus a dirrek el dilu el kmo: “Ngikel meruul a ikel soal a Dios ingikei a tar ngak e delak.” (Markus 3:35) Ngmoktek er a Dios el rechad er a rokui el renged me a kebliil er a rechad me a omelekoi a mo mesiou er ngii. E a Biblia a mesaod er tirka el chad el “kloul seked; [el] dimlak a chad el sebechel el mechur a ildisir el rokui!” Te oumerang er a olubet el tenget, e sorir el olengesenges er a Dios. Me te dmak el oldanges er ngii, e dmu el kmo: “Osobel a mlar a Dios er kid el mei, el ngii a dengchokl er a kingall, e dirrek  el mlar a Ngelekel a Sib el mei!”​—Ocholt 7:9, 10.

12. Me a doltirakl er a nglunguchel a Jesus, e ngera kede suubii el kirel a moktek er a Jehovah el kirir a rechad?

¹² Kede mla suub a kmal betok el kirel a Jehovah me a moktek er ngii el kirir a rechad el okiu sel nglunguchel a Jesus. A kot, e ngomeklatk er kid el kmo, ngkmal kired el mo mengebkall er a ngklel a Jehovah e oldanges er ngii. (Isaia 8:13) Me a olubet el tengetengel a Jesus a mo uchul a osobeled, e dirrek el mengebkall er a ngklel a Dios. E a mera er ngii, a belkul a ngklel a Jesus a kmo, a “Jehovah a Osobel.” E a ongerung, e a Jehovah a mo ousbech er a Rengedel el mo kutmokl aike el rokui el klungiaol el mo er ngii el okiu a olubet el tenget el kirir a rebekongesenges el chad. E a ongedei, e ngulterekokl a rengud el kmo, ngdiak a ngii di el tekoi el sebechel el torebengii a Jehovah me lak lotaut a soal.​—Psalm 135:6; Isaia 46:9, 10.

13. Ngera uchul me kede mo metecholb?

¹³ A ta er a klou a belkul el rolel e kede olecholt a omereng el saul er kid el kirel a olubet sel detibir a rengud el mo er ngii e bo demetecholb. Me ngokiu tia el rolel, e kede ochotii a klaumerang er kid el okiu a olubet el tenget, e dirrek el ochotii el kmo kede mla mo kloklel a Jehovah. (Rom 14:8) Me sel bo demetecholb, e kede olengit er a Jehovah “el kirel a klikiid el ukltkel a reng.” (1 Petrus 3:21) Me a nger er a Jehovah a bo dodengelii el okiu aike el ngelseuil el dengai el okiu a olubet. Me ngulterekokl a rengud el kmo ngmo meskid aike el rokui el bla letibir el mo meskid.​—Rom 8:32.

14. Ngera me a Jehovah a mengelechel er kid el mo betik a rengud er a rechad?

¹⁴ A rokui el tekoi el loruul a Jehovah a olechotel a bltikerreng er ngii, e ngii a kmal soal a rokui el mesiungel a bo loukerebai er ngii, e lekaubltikerreng er a dellongelir. (1 Johanes 4:8-11) Me sel bo lebetik a rengud er a rechad, e kede ochotii el kmo ngsoad el mo ngelekel a demad el ngar er a eanged. (Mateus 5:43-48) Me a eru el meklou a ultutelel el llach, a kot e ngkmo, bo lebetik a rengum er a Jehovah, e a ongerung, e bo lebetik a rengum er a rechad. (Mateus 22:37-40) Me a ta er a rolel e kede ochotii a bltikerreng el mo er a rechad a oeak sel dosisecheklterir el kirel a ungil chais el kirel a Rengedel a Dios. Me a lsekum kede olengesenges er a llechul a Jehovah el mo betik a rengud er a rechad, el ileakl a rudam er kid e a bltkil a rengud el mo er ngii a “mo mecherrungel.”​—1 Johanes 4:12, 20.

15. (a) Ngera el klengeltengat a dengai er a Jehovah er chelechang? (b) E ngera el klengeltengat a bo dengai er a uriul?

¹⁵ A Jehovah a oterekokl a rengud el kmo, kid el oumerang er a olubet el tenget a uchul me a kngtid a mo ‘musubes.’ (Monguiu er a Rellir 3:19-21.) Me ngua dulsaod er a uchei, a olubet el tenget a msa techellel a Jehovah me ngmerodel er a rebebil el chad el mo ngelekel e mo kiei er a eanged, e tirkang a rengellitel. (Rom 8:15-17) Ngdirrek lomekedong er tirke el “kuk bebil el sib” el mo chedal a telungalek er ngii el ngar tia el chutem. Me sel bo lemecherrungel, e ngmo er ngii a ulebongel el omelsemai. Me a lsekum te melemolem el blak a rengrir el mo er a Jehovah, e ngmo merodel er tir me te dirrek el mo ngelekel. (Rom 8:20, 21; Ocholt 20:7-9) A Jehovah a di blechoel el betik a rengul er a rengelekel el rokui. Me a olubet el tenget a mo melemolem el uchul a klengeltengat el diak a ulebengelel. (Hebru 9:12) Me a Jehovah a mla meskid a kmal mekreos el sengk, e diak el sebechel a ngii di el chad el nguu el choridii er kid.

16. Ngmekera olubet el tenget e ngosukid el mo mimokl?

¹⁶ A lsekum kede ouuchel er a rengud el kirel a kngtid, e ngkmal diak el sebechel a Diabelong el mo torebengid me bo lak dechedal a telungalek er a Jehovah. A Jesus a “di mle tal be ledum el me melubet” a kngtid. Me tia el olubet el tengetengel a mla churrengelii sel char el mle kirel el meketmokl. (Hebru 9:24-26) Me a Adam a mlo uchul a kodelled, engdi a tengetengel a Jesus a mo uchul a diak a ulebengelel el klengar er kid. Me tia el olubet el tenget a sebechel rullid el mo mimokl er tia el beluulechad er a Satan me a dakt el kirel a kodall.​—Hebru 2:14, 15.

17. Ngua ngera uldesuem el kirel a bltkil a rengul a Jehovah?

¹⁷ A telbilel a Dios a di blechoel el mo tmaut. Me a llechul el kirel a blebelel a diak el sebechel el mengodech, el di uai ngii el Jehovah el kmal diak el sebechel el mengodech. Ngkmal diak el sebechel el melemall a rengud. (Malakai 3:6) A Jehovah a meskid a lmuut el betok el diak di el sengk el kirel a klengar e lemerekong, e ngdirrek el meskid a bltkil a rengul. “E kid a medengei e oumerang er a bltikerreng er a Dios el mer kid. A Dios a bltikerreng.” (1 Johanes 4:16) Me a telbilel a di blechoel el mo tmaut. Ngdi kmedung e tia el chutem a mo baradis, me a rokui el chad el kiei er a chelsel a mo oukerebai er a Jehovah e mo kaubltikerreng el rokui. Seikid e a remesiungel el ngar er a eanged me a chutem a mo dmak e dmu el kmo: “A odanges, ma klebkall, ma llomeserreng, ma omerengelsaul, ma chetengakl, ma omengedereder, ma klisiich le bor a Dios er kid el mo cherechar! Amen!”​—Ocholt 7:12.