1, 2. Ngera te millatk er ngii a rechapostol er a uriul er a lebo er a eanged a Jesus?

A RECHAPOSTOL er a Jesus a dilechor er a Rois er Olib e ulemes er a Jesus el mengai el mo er a eanged e a eabed a milertii. (Rellir 1:9, 10) Ngar er a chelsel a 2 el rak, e a Jesus a ullisechakl e millisiich e ulemekrael er tir. Engdi chelechang e ngmla mo dibus. Me te mo mekerang?

² Me a uchei er a lebo er a eanged a Jesus, e ngdilu er a rultirakl er ngii el kmo: “Kom mo ochotek er a Jerusalem, ma Judea el rokir, ma Samaria, el mo lmuut er a bek el beluu er a beluulchad.” (Rellir 1:8) Ngmekerang e sebechir el rullii tia el lureor? A Jesus a tilbir el kmo, a chedaol reng er a Dios a mo olengeseu er tir. (Rellir 1:5) Engdi ngtecha mo omekrael er tir e mengederoder er a ureor er a berkel a klumech er a beluulechad el rokir? A rechapostol a mle medengei el kmo, a Jehovah a uluusbech er a rechad el omekrael er a rechad er a Israel er a irechar. Me te locha millatk el kmo, a Jehovah a mo tutkii a beches el chad el mo omekrael.

3. (a) Ngera el klou a ultutelel el omelilt a lurruul er ngii a rechapostol er a uriul er a lebo er a eanged a Jesus? (b) Ngera el ker a bo donger er tia el suobel?

 ³ Me a uriul er a lebo er a eanged a Jesus, e a redisaiplo er ngii a milenguiu a Bades, e ulengit a ngesou er a Jehovah, e ngileltii a Mathias el mo mtechir a Judas Iskariot el ngii a mo 12 el apostol. (Rellir 1:15-26) Ngera uchul me tia el uldasu a kmal mle klou a ultutelel el mo er tir me a Jehovah? A redisaiplo a miltebengii el kmo ngkirel el ngar er ngii a 12 el apostol. * (Momes er a footnote.) A Jesus a millilt er a rechapostol e ullisechakl er tir er a kmal klou a ultutelel el ngerachel er a delongelir a rechedal a Dios. Ngera tia el ngerachel, e milekera Jehovah me a Jesus e kutmeklterir el kirel tiang? Ngera el osisiu el tekoi a ngar er ngii er chelecha el taem? E mekera ‘dolatk er a re mengetekled’ el ngar er a delongeled el ileakl a “blak a rengul e mellomes a rengul el mesiou”?​—Hebru 13:7; Mateus 24:45.

4. Ngera mle ngerechelir a rechapostol me a rebebil el odam el mla er a Jerusalem?

⁴ A rechapostol a ulemuchel el lomekrael er a Rekristiano er a Pentekost er a rak er a 33. A Biblia a mesaod el kmo a, “Petrus a mocha dechor ngii ma re truich ma tang” e olisechakl a klemera el tekoi el kirel a osobel el mo er a klou el seked. (Rellir 2:14, 15) Te betok el chad el mla er tia el klou el seked a mlo Kristiano. A uriul er tiang, e tirke el mlo Kristiano a “mle blak a rengrir el mesuub osisecheklir a re apostol.” (Rellir 2:42) A rechapostol a uluungerachel a udoud er a ongdibel. (Rellir 4:34, 35) Te dirrek el ullisechakl er a rechedal a Dios e milluluuch el kirir el kmo: “Kemam bo ki di mkirel a nglunguuch ma chomesiou lolisechakl a Tekoi.” (Rellir 6:4, BT) Te dirrek el uleldurech er a rengar ngii a duch er tir el Kristiano el mo omerk a klumech er aike el beches el basio. (Rellir 8:14, 15) E a uriul, e a rebebil el rengellitel el odam a mlo oureor el lobengterir a rechapostol el mo omekrael a ongdibel. Me a chelechad er a ruungerachel a ulemesterir a ulekrael el mo er a rokui el ongdibel.​—Rellir 15:2.

5, 6. (a) Ngmilekera chelechad er a ruungerachel e mlongeseu el okiu a chedaol reng? (b) Te milekera rechanghel e olengeseu er a chelechad er a ruungerachel? (c) Ngmilekera Tekingel a Dios e ullengeseu er a chelechad er a ruungerachel?

⁵ A rekot el Kristiano er a irechar a mle medengei el kmo, a Jehovah a ulemekrael er a chelechad er a ruungerachel el okiu a Jesus. Ngmilekerang e mlo ulterekokl a uldesuir? A kot, e a chelechad er a ruungerachel a mlongeseu el okiu a chedaol reng. (Johanes 16:13) A rokui el ngellitel el Kristiano a ngiluu a ngesou el okiu a chedaol reng, e ileakl a rechapostol me a rudam el ngar er a Jerusalem el uluungerachel a ureor a dirrek el ngiluu a ngesou el okiu a chedaol reng. El ua tiang, ngar er a rak er a 49, e a chedaol reng a ulemekrael er a  chelechad er a ruungerachel el mo meruul a omelilt er tir el kirel a botk. A rokui el ongdibel a uleltirakl er tia el ulekrael, me te “mengal mlo mesisiich el oumerang e mle bek el sils el lorael el mo betok.”(Rellir 16:4, 5) Ngar sel babier el mlo er aike el ongdibel el kirel a botk, e ngsebeched el mesa el kmo a chelechad er a ruungerachel a mlongeseu el okiu a chedaol reng me te ulecholt er a bltikerreng me a klaumerang.​—Rellir 15:11, 25-29; Galatia 5:22, 23.

⁶ A ongerung, e a rechanghel a ullengeseu er a chelechad er a ruungerachel. El ua tiang, a anghel a dilu er a Kornelius el mo osiik er a apostol el Petrus. Me a uriul er a losaod er a klemerang a Petrus el mo er a Kornelius me a rechedal, e a chedaol reng a mlo er tir alta e tirka el chad a dirkak lobotk. A Kornelius el chad er a Chisentael a mle kot el chad el diak leblotk el mlo Kristiano. Me sera lerrenges a rechapostol me a rebebil el odam el kirel tiang, e ngmlo dmeu a rengrir e milengemedaol er tir el mei er a ongdibel er a Rekristiano. (Rellir 11:13-18)Me ngar er tiang, e kede mesang el kmo a rechanghel a ullengeseu er a berkel a klumech el ulemekrael er ngii a chelechad er a ruungerachel. (Rellir 5:19, 20) A ongedei, e a Tekingel a Dios a ulemekrael er a chelechad er a ruungerachel, e tirka el chad a uluusbech a Bades el olengeseu er tir sel loruul a meklou a ultutelel el omelilt el kirel a klaumerang er a Rekristiano, me a dirrek sel lomekrael a ongdibel.​—Rellir 1:20-22; 15:15-20.

7. Ngera uchul me ngsebeched el melekoi el kmo a Jesus a ulemekrael er a rekot el Kristiano?

⁷ Me alta chelechad er a ruungerachel a mla er ngii a klisichir er a ongdibel, engdi a derta el tir a mle medengei el kmo a Jesus Kristus a Mengeteklir. Kede mekerang e medengelii tiang? A apostol el Paulus a dilu el kmo a Kristus ngike el melutk “er a re bebil el mo apostol.” Ngdirrek el dilu el kmo a Kristus a ‘bdelul’ me a lechub e Ngmengeteklel a ongdibel. (Efesus 4:11, 15) Te dimlak el kengei el mlokedong el apostol e te bai rokui el di okedongall el Kristiano. (Rellir 11:26) A Paulus a mle medengei el kmo, ngklou a ultutelel a loltirakl er a osisechakl el mlengai er a Biblia el mla er a rechapostol me a rebebil el chad el tir a ulemekrael. A Paulus a dirrek el dilu el kmo: “E ngdi soak a cho bo modenge el kmo a bderrir a re bek el chad a Kristus.” Tia el tekoi a uldimukl er a rokui el chedal a chelechad er a ruungerachel. Me a Paulus a dirrek el dilu el kmo: “A bdelul a Kristus a Dios.” (1 Korinth 11:2, 3) Me ngkmal bleketakl el kmo, a Jehovah a tiltkii a Ngelekel el Jesus Kristus el mo omekrael er a ongdibel.

8, 9. Ngera mle klou a ultutelel el ngerechelel a Brother Russell?

⁸ Ngulemuchel er a rak er a 1870, e a Charles Taze Russell me a rebebil el sechelil a ulemuchel el melasem el mo mesiou er a Dios el oltirakl er a Biblia, e dirrek el ullengeseu er a rebebil el mo meruul er a osisiu el tekoi. Te dirrek el ullengeseu er a rechad el melekoi a ngodech el omelekoi. Me ngmlo er ngii a Zion’s Watch Tower Tract Society er a rak er a 1884, e a Brother Russell a mlo president. * (Momes er a footnote.) Ngkmal mle kerekikl el mesuub er a Biblia, e dimlak el medakt el ouchais er a rebebil el kmo, a osisecheklel a klechelid el ua Trinidad me a klengar er a chad el diak lengemed a diak el ngar er a Biblia. Ngsilubii el kmo a luut er a Kristus a diak lemeues el “dimerkmo le mei a ulebengelel a omerrederir  ” el kirel a rokui el renged er a rak er a 1914. (Lukas 21:24) A Brother Russell a uluusbech a temel me a klisichel me a ududel el mo olisechakl aika el klemera el tekoi el mo er a rebebil. Me ngkmal bleketakl el kmo, a Jehovah me a Jesus a uluusbech er a Brother Russell el mo omekrael er a klou a ultutelel el taem er a reksi.

⁹ A Brother Russell a dimlak el soal a rechad a lebsa chetengakl. Ngar er a rak er a 1896, e ngii me a rebebil el ulebengkel a lilechesii a babilengir el mo er a rechad el lolecholt el kmo ngdiak el sorir a chetengakl. Ngdirrek el dimlak el sorir el mo meluchel a dui, e dimlak el sorir a ngii di el cheldebechel a bo lomngakl er a cheldebechellir el lousbech a ngklir. Me a uriul e ngdilu el kmo: “Tia diak el urerir a rechad.”

10. (a) Ngoingerang e a Jesus a tiltkii a “blak a rengul e mellomes a rengul el mesiou”? (b) Msodii a rolel e ngmlo bleketakl el kmo a Chelechad er a Ruungerachel a kuk ngodech er a Watch Tower Society.

¹⁰ Ngar er a rak er a 1919 er uriul er a edei el rak er a kodellel a Brother Russell, e a Jesus a tiltkii a “blak a rengul e mellomes a rengul el mesiou.” E ngera uchul? El mo omesterir a rultirakl el ngii a “kelir er sel belsechel.” (Mateus 24:45.) Ngmo lmuut er a uchelel aike el rak, e a kekerei el cheldellir a rengellitel el odam el ngar er a klou el obis er kid el ngar er a Brooklyn, New York, a omesterir a rultirakl er a Jesus a kall er a klereng. A tekoi el “chelechad er a ruungerachel” a ulemuchel el mo chemolt er a babilenged er a uriul er a rak er a 1940. Seikid el taem, e a chelechad er a ruungerachel a dilak el oureor tir me tirke el uluungerachel er a Watch Tower Bible and Tract Society. Me nguaisei, engdi ngar er a rak er a 1971, e ngmlo bleketakl el kmo a Chelechad er a Ruungerachel a mle ngodech er a Watch Tower Society, el ngii a uluungerachel er a tekoi er a llach. Me ngulemuchel er sei, e a rengellitel el odam a mle sebechir el mo chedal a Chelechad er a Ruungerachel el diak el Society directors. E a rudam el lolab a ngerachel el tir a rekuk bebil el sib a mla mesiou el loungerachel er a Cheldebecheled me a dirrek el bebil er a tekoi el lousbech a rechedal a Dios. Seikid e a Chelechad er a Ruungerachel a sebechir el di oungerachel el lomeskid a osisechakl me a ulekrael el ngar er a Biblia. (Johanes 10:16; Rellir 6:4) Ngar er a Ongkerongel er a July 1, 2013 e ngsmodii el kmo a “blak a rengul e mellomes a rengul el mesiou” a cheldellir a rengellitel el odam el toketekii a Chelechad er a Ruungerachel.

11. Te mekerang a rechedal a Chelechad er a Ruungerachel a lolilt el mo meruul a tekoi?

¹¹ A Chelechad er a Ruungerachel a meruul a kmal meklou a ultutelel el omelilt el ta el delebechel er a bek el sandei. Sel bo ledak el rokui el oumiting, e tiang a ngosuterir el mo ungil el chadecheduch e dmak el oureor el ngar er a kltarreng. (Osisechakl 20:18) Ngdiak a ngii di el chedal tia el Chelechad er a Ruungerachel el kuk klou a ultutelel er a rebebil el chedal tia el cheldebechel. Seikid a uchul me a bek el rak e ngkuk ngmengodech a odam el mo omekrael aike el temel a miting er tir. (1 Petrus 5:1) Tia el osisiu el tekoi a mo er tirke el derta el chedal aike el 6 el committee er a Chelechad er a Ruungerachel. Ngdiak a ngii di el chedal a  Chelechad er a Ruungerachel el mo omdasu el kmo, ngii a omekrael er a rudam er ngii. Te rokui el di mesiou e melai a kall er a klereng er a blak a rengul el mesiou, e dirrek el oltirakl a ulekrael.

12. Ngera el ker a bo donger er ngii?

¹² A Chelechad er a Ruungerachel a diak el mecherrungel. Ngsebechir el remuul a cheleuid sel losaod er a Biblia me a lechub e lomekrael er a cheldebecheled. El ua tiang, a Watch Tower Publications Index a uldimukl er a omesodel a “Beliefs Clarified,” el ngii a mesaod er a omeldechel a uldesued er a Biblia el ulemuchel er a rak er a 1870. A Jesus a dimlak louchais er kid el kmo, a blak a rengul el mesiou a mo meskid a cherrungel el kall er a klereng. Me ngmekera donger er a keril a Jesus el kmo: “Ng techa ngikel blak a rengul e mellomes a rengul el mesiou?” (Mateus 24:45) Kede mekerang e mo medengei el kmo, a Chelechad  er a Ruungerachel a blak a rengul el mesiou? Me bo dosaod a 3 el osisiu el tekoi el ngilsuir a chelechad er a ruungerachel er a taem er a rechapostol.

13. Ngmilekera chedaol reng e olengeseu er a Chelechad er a Ruungerachel?

¹³ A Chelechad er a Ruungerachel a mlongeseu el okiu a chedaol reng. A chedaol reng a ullengeseu er a Chelechad er a Ruungerachel el mo ungil el medengelii a klemera el tekoi er a Biblia el dimlak el bleketakl er a uchelel. El ua tiang, ka molatk aike el tekoi el medung er a beliefs clarified el dulsaod er ngii er a uchei. Ngdimlak a chad el sebechel el mo ungil el medengei, e losaod a dmolech el tekoi er a Dios. (Monguiu er a 1 Korinth 2:10.) A Chelechad er a Ruungerachel a ulemdasu el ua apostol el Paulus el milluches el kmo: “Ma dongedecheduch a ikang e ngdiak dousbech a ikel tekoi el lolisechakl a llomeserreng rar chad, e kede bai ousbech a tekoi el lolisechakl a Reng ra Dios.” (1 Korinth 2:13, BT) Me a uriul er a betok el rak el kirel a klsuul osisechakl me a diak el bleketakl el ulekrael, e ngera uchul me ngmla meleketek a klemedengei er a Biblia el ulemuchel er a rak er a 1919? Ngulterekokl a rengud el kmo ngdi ta el Dios a ullengeseu el okiu a chedaol reng er Ngii!

14. A doltirakl er a Ocholt 14:6, 7, e te mekera rechanghel e olengeseu er a Chelechad er a Ruungerachel me a rechedal a Dios er Chelecha el taem?

¹⁴ A rechanghel a olengeseu er a Chelechad er a Ruungerachel. Tia el chelechad a kmal klou a ngerechelel el lomekrael er a kuk betok er a 8 el miliol el publisher el omerk er a klumech el meliuekl er a beluulechad. Ngera uchul me tia el ureor a sebechel el melemolem? E le rechanghel a olengeseu er tia el ureor. (Monguiu er a Ocholt 14:6, 7.) Ngar er a chelsel a betok el blekeradel, e a rechanghel a mla omekrael er a re publisher el mo er a chad el dirk milluluuch el olengit a ngesou er a Dios! * (Momes er a footnote.) A osisecheklel me a berkel a klumech a melemolem el meleketek, alta ngar er ngii a mesisiich el ultok el kirel a urered er a bebil er a beluu. E tiang a di mo sebechel el meketmokl lokiu a ngelsurir a rechanghel.

15. Ngmekera Chelechad er a Ruungerachel e kuk ngodech er a remengeteklel a klsuul klechelid? Mosaod.

¹⁵ A Tekingel a Dios a omekrael er a Chelechad er a Ruungerachel. (Monguiu er a Johanes 17:17.) Ka molatk er a tekoi el dilubech er a rak er a 1973. Sel Ongkerongel er a June 1 a uleker er a ker el kmo, “a chad el dirkak lemeterob el melamech a dekool, ngsebechel el mo metecholb me a lechub e ngdiak.” E a nger er ngii a milengai er a Biblia el kmo ngdiak el sebechel! A Ongkerongel a milsaod a bebil el bades, e silodii a uchul me a chad el dimlak el meterob el melamech a dekool a kirel el mesuld a ngklel. (1 Korinth 5:7; 2 Korinth 7:1) Ngmelekoi el kmo, tia el mesisiich el omellach a dimlak el lengar er a rechad el mei, e ngbai “mla er a Dios el ulecholt a uldesuel el okiu a Tekingel.” Ngdiak a ngii di el klechelid el kongei el mui el ultuil er a Tekingel a Dios el mo lmuut er a bo el meringel er a derta el chad er tia el klechelid el meruul. A dirk mlotobed el babier el ngar er tia el klechelid er a beluu er a Merikel a kmo: “A remengeteklel a klechelid a mla omekbeches a osisecheklir el mo oltirakl er a klaumerang, me a uldesuir a rechedal a klechelid er tir me a dirrek el chelsel tia el beluu.” Me nguaisei, engdi a Chelechad er a Ruungerachel a diak el mukrael el okiu aike el sorir a ruumesingd el chad. Ngbai mukrael el okiu a Tekingel a Dios, el meketeklii el kmo, a  Jehovah a ngike el mera el omekrael er a rechedal er chelecha el taem.

16. Ngera ta er a rolel e ngsebeched el melatk er a Chelechad er a Ruungerachel?

¹⁶ Monguiu er a Hebru 13:7. A Biblia a mesaod el kmo “molatk er a re mengetekliu.” Me a ta er a rolel a doruul er tiang a sel dolatk er a Chelechad er a Ruungerachel el ngar er a nglunguched. (Efesus 6:18) Ngkmal betok a ngerechelir el uldimukl er ngii sel lomeskid a kall er a klereng, e lomekrael er a ureor er a berkel a klumech el meliuekl er a beluulechad, e dirrek el lomekerreu a tenget el meketmokl el mo er a cheldebecheled. Seikid a uchul me te kmal ousbech er kid el meluluuch el kirir er a bek el sils!

17, 18. (a) Ngmekerang a doltirakl a ulekrael el mla er a Chelechad er a Ruungerachel? (b) Ngmekerang a ureor er a berkel a klumech e olengeseu er a Chelechad er a Ruungerachel me a Jesus?

¹⁷ Ngdirrek el sebeched el melatk er a Chelechad er a Ruungerachel el loeak sel doltirakl a ulekrael el lomeskid. Te omeskid a ulekrael el lokiu a babilenged me a miting me aike el temel a ta el sils el ongdibel me a meklou el ongdibel. Te dirrek el melutk er a rudam el mo oldingel a ongdibel, e tirke el odam a kuk mo melilt er a remo mechuodel er a ongdibel. Me sel lekerekikl tirka el odam el oltirakl aika el ulekrael, e te ochotii el kmo te melatk er a Chelechad er a Ruungerachel. E kid el rokui me kede olecholt a omengull er kid el mo er a Jesus el ngii a Mengetekled el loeak sel dolengesenges er tirka el chad el Jesus a ousbech er tir er chelecha el taem.​—Hebru 13:17.

¹⁸ A ta er a rolel e ngsebeched el melatk er a Chelechad er a Ruungerachel, a oeak sel debo er a tkurrebab el sebeched el omerk er a klumech. A Hebru 13:7, a mengelechel er a Rekristiano el mo oukerebai er a klaumerang er tirke el mengetekled. Tia el chelechad a mla ochotii a klaumerang er tir el loeak sel leblak a rengrir el lomerk, e lolengeseu er a ureor er a berkel a ungil chais. Me kid, kede olengeseu er tirka el odam er tia el kmal klou a ultutelel el ureor? A lsekum e kede meruul uaisei, e ngmo dmeu a rengud sel derengesii a Jesus el melekoi er kid el kmo: “Ser cho moruul a ikang el mor a tar tirkal ngar a kemrilamad el odam er ngak, e kom mirruul er ngii el kirek!”​—Mateus 25:34-40.

19. Ngera me ngkmal ulterekokl a rengum el mo oltirakl er a Jesus el ngii a Mengetekled?

¹⁹ A Jesus er a lebo er a eanged e ngdimlak el lechititerir a rultirakl er ngii. (Mateus 28:20) Ngmle medengei el kmo a chedaol reng, me a rechanghel, me a Tekingel a Dios, a ullengeseu er ngii el mengetakl er a rechad er a lengar er a chutem. Ngdirrek el lomsang a blak a rengul el mesiou a osisiu el ngesou er chelecha el taem. A Chelechad er a Ruungerachel a melemolem el ‘oltirakl er a Ngelekel a Sib’ el Jesus “el mor a ikel le bor ngii.” (Ocholt 14:4) Me a lsekum e kede oltirakl a ulekrael el mla er a Chelechad er a Ruungerachel, e kede oltirakl er a Mengetekled el Jesus. Ngkmal di kmedung e ngmo mengetakl er kid el mo er a diak a ulebengelel el klengar. (Ocholt 7:14-17) E kmal diak a ngii di el chad el sebechel el tibir tiang!