1. Ngua ngera uldesuir a rebetok el blak a rengrir el mesiungel a Dios, el klengit a uchul?

A APOSTOL el Paulus a milluches el kmo: “Kele kkol chebuul el chad!” (Rom 7:24) Chelecha el taem, e te kmal betok a reblak a rengrir el mesiungel a Dios el mo mechitechut a rengrir e meringel a uldesuir el di ua Paulus. E ngera uchul? E le kede rokui el mludiukes er a klengit e diak demecherrungel a uchul me alta e ngsoad el oldeu er a rengul a Jehovah engdi ngmeringel el doruul er ngii el tekoi. Me a lebebil e ngmo mekngit a rengud sel bo lak lsebeched lodeuir a rengul. A rebebil el Kristiano el rirebet er a oberaod el klengit a mo omdasu el kmo a Jehovah a kmal diak lsebechel lousubes er tir.

2. (a) Ngmekerang a Psalm 34:22 e ochotii el kmo ngdiak el kirir a remesiungel a Dios el melemolem el mekngit a ukltkir? (b) Ngera kede mo mesuub er tia el suobel? (Momes er a baks el “ Suobel el Desuub el Kirel a Dmolech el Belkul a Tekoi”)

² A Bades a oterekokl a rengud el kmo a lsekum kede osiik osebechakl er a Jehovah, e ngdiak el kirel el di melemolem el mekngit a ukltked. (Monguiu er a Psalm 34:22.) Engdi ngera belkul a tekoi el osiik osebechakl er a Jehovah? Ngkired el mekerang a lsekum ngsoad a Jehovah a bo lechubechub el kired e lousubes er kid? Ngsebeched el  metik a nger er aika el ker lokiu sel dosuub er a rolel e ngmeketmokl a tekoi er a chelsel aike el beluu er a osebechakl er a Israel er a irechar. E tia el tekoi a sebeched el metik er ngii er a Llach er a telbiil, el ngii a mlutechei er sera Pentekost er a rak er a 33. Engdi tia el Llach a mla er a Jehovah el mei. Me ngokiu a rokui el tekoi el meketmokl er a chelsel aike el beluu er a osebechakl, e kede suubii a osengel a Jehovah el kirel a klengit, me a remo er a klengit, me tirke el obult er a kngterir. Me a kot e bo desuubii sel uchul me a Israel a mla er ngii a beluu er a osebechakl er ngii, me sel rolel e ngmeketmokl a tekoi er a chelsel.

3. Ngkirir a rechad er a Israel el mo mekerang er a chad el ulemekoad?

³ A Jehovah a omes er a kodellel a chad el oberaod el tekoi. Me a lsekum a chad er a Israel a mekodir a ta er a chad, e ngike el sechal el kot el kmeed el chedal ngike el mlad el okedongall el “ngikel melaitechei er a koadelchad,” a kirel mekodir ngike el ulemekoad. (Ulecherangel 35:19) Tiaikid a rolel e ngmo sebechel kokedir a klengar er ngike el chad el lulekodir el dimlak a telemellel. Me sel kot el rechedel el mad ngike el ulemekoad, e seikid e ngmelemolem a Beluu er a Nglat el klikiid me a lechub e ngchedaol. A Jehovah a milengelechel el kmo: “Lak mo ngikiongel er a beluu el mkiei er ngii” loeak sel bo mchelsechusem er a rsechel a chad el mokodir.​—Ulecherangel 35:33, 34.

4. Ngera mo duubech a lsekum a chad er a Israel a dimlak el durengul el mekodir a ta er a chad?

⁴ Engdi ngera mo duubech a lsekum a chad er a Israel a dimlak el durengul el mekodir a ta er a chad? Alta e tia el kodall a mle accident el tekoi, engdi ngike el ulemekoad a dirk chelsechusem er a rsechel a dimlak a telemellel el chad. (Genesis 9:5) Me ngokiu tiang, e a Jehovah a melekoi el kmo ngkirel mocholt a klechubechub. Me ngike el dimlak el durengul lomekoad a sebechel chemiis er ngike el melaitechei el mora a ta er aike el elolem el beluu er osebechakl. Me sel lekengei er ngii el mo kiei er sel beluu, e ngmo mukerreu. Engdi ngkirel melemolem el kiei er sel beluu er osebechakl el mo lmuut er a lemad ngike el ngarbab el prist.​—Ulecherangel 35:15, 28.

5. Ngmekerang a tekoi el meketmokl el kirel a beluu er osebechakl e ngosukid el mo ungil medengelii a Jehovah?

⁵ Me a oterekeklel a tekoi el kirel aike el beluu er osebechakl a dimlak el uldesuir a rechad e ngbai uldesuel a Jehovah. Ngdilu er a Josua el kmo: “Mdu er a re chad er a Israel el kmo, ‘Mtuk a mo beluu er osebechakl.’” (Josua 20:1, 2, 7, 8) A Jehovah tilbir el kmo aika el beluu a kirel el mo  ileakl. Me ngokiu tiakid el rolel e ngsebeched el suub a lmuut el betok el kirel a Jehovah. El ua tiang, ngsebechel el ngosukid el mo ungil medengelii a klechubechub er a Jehovah. E dirrek el osisecheklid er a rolel e ngsebeched el nguu a osebechakl er a Jehovah er chelecha el taem.

6, 7. (a) Msodii a rolel e a remechuodel a oukerrekeriil er a chad el dimlak el durengul lomekoad. (Momes er a siasing er a uchelel a suobel.) (b) Ngera me nguchul a llomeserreng el kirel ngike el chiliis el mo mengedecheduch er a remechuodel?

⁶ A lsekum a ta er a chad er a Israel a dimlak el durengul e mekodir a ta er a chad, e ngkirel chemiis el mo er a beluu er osebechakl e dirrek el “smodii a blekerdelel” el mo er tirke el mechuodel el ngar a siseball er a beluu. E a remechuodel a kirir el kongei el nguu. (Josua 20:4) Sesei el taem er a uriul, e te lmuut el odureklii el mo mukerrekeriil er a remechuodel er sel beluu el lulekodir a chad er ngii. (Monguiu er a Ulecherangel 35:24, 25.) Me a lsekum a remechuodel er sel beluu a kongei el kmo ngdimlak el durengul, e seikid e te lmuut lolutii ngii el chad el mo er sel beluu er osebechakl.

⁷ Ngera me ngkirel ngike el chiliis el mo mengedecheduch er a remechuodel? E le remechuodel a ngerechelir el meruul er a ongdibel er a Israel me ngmelemolem el klikiid, e dirrek el ngosuir ngika el dimlak el durengul lomekoad me ngmo nguu a klungiolel er a klechubechub er a Jehovah. A ta el chellimosk el chad el mesuub el kirel a Biblia a milluches el kmo a lsekum ngika el chiliis el chad a diak lebo er a remechuodel, e ngsebechel mo okodall. Ngdirrek el dilu el kmo, ngika el chiliis el chad a mo mukngerachel el kirel a kodellel e le ngdimlak lolengesenges a tekoi el lulengelechel a Dios. Me ngika el dimlak el durengul lomekoad a kirel el mo olengit a ngeso, e nguu a kengei me bo lsebechel el melemolem el ngar. Me a lsekum e ngdiak lechiis el mo er a ta er aika el beluu er osebechakl, e ngike el kot el kmeed el chedal ngike el lulekodir a kmal ngar er ngii a llemeltel el mekodir.

8, 9. Ngera me ngkirel a Kristiano el ruebet er a oberaod el klengit el mo mengedecheduch er a remechuodel?

⁸ Chelecha el taem, e a Kristiano el ruebet er a oberaod el klengit a kmal kirel el mo er a remechuodel me ngsebechir el ngosuir el lmuut el sumechii a deleuill er ngii lobengkel a Jehovah. Ngera me tiang a kmal klou a ultutelel? A kot, e ngii el Jehovah a mla kutmokl a tekoi el lousbech a remechuodel sel loukerrekeriil el kirel a oberaod el klengit. (Jakobus 5:14-16) E a ongerung, e a remechuodel a mla mukngerachel el mo olengeseu er tirke el mora klengit me ngsebechir el lmuut el nguu a kengei er a Dios, e kerekikl me ngdiak el lluut el mo meruul er osisiu el klengit. (Galatia 6:1; Hebru 12:11) E a ongedei, e a remechuodel a mla mukngerachel e dirrek el mosisechakl el mo mengelaod er a remlo er a klengit, e dirrek el ngosuterir me ngmo diak el meringel a uldesuir e le mekngit a ukltkir. Me a Jehovah a omekedong er tirka el mechuodel el “ua omerotel er a eolt.” (Isaia 32:1, 2) Tia el mla meketmokl el tekoi a ta er a rolel e a Dios a ochotii a klechubechub er ngii el mei er kid.

⁹ A rebetok el mesiungel a Dios a kmal mlo mechelaod a rengrir er uriul er a bo lemerek el mengedecheduch er a remechuodel e lengai a ngeso er tir. El ua tiang, a ta lodam el Daniel a mlo er a oberaod el klengit, engdi ngmlo betok el buil el dimlak bo longedecheduch er a remechuodel. Me ngdmu el kmo: “Sesei el taem er a uriul, e ak mlo omdasu el kmo ngkmal dikea ngera el sebechir a remechuodel el ngosukak el kirel.” Me nguaisei, engdi ngdi mle blechoel el medakt a bo lodengei a rechad el kirel a klengit el loruul er ngii, me seikid e ngmlo omdasu el kmo ngkirel el meluluuch el olengit a klausubes er a Jehovah. E a uriul e ngmlo olengit a ngeso er a remechuodel. Me ngdmu el kmo: “Sel kumes el beduluriul, e ak kmal mle medakt el mo mengedecheduch er tir. Engdi uriul, e ngkmal di ua sel dedu el kmo a  chad a mla oietii a kmal oberaod el chelngelek.” Me a Daniel a liluut el mo sebechel mimokl el mengedecheduch er a Jehovah, e chelechang e ngklikiid a ukltkel, e dirk mlo ta er a odam el mesiou er a ongdibel.

10. Ngkirel el mekerang a lsekum ngsoal a chad el dimlak el durengul lomekoad el nguu a klausubes?

¹⁰ A lsekum ngike el dimlak el durengul lomekoad a soal a lemusubes a kngtil, e ngkmal kirel mereched el chemiis el mora kot el kmeed el beluu er osebechakl. (Monguiu er a Josua 20:4.) Ngsebechel el melemolem el ngar a lsekum e ngmo er tia el beluu e melemolem el kiei er ngii el mo lmuut er a lemad a ngarbab el prist. E tiang a tekoi el kirel el mo rullii. Ngbelkul a kmo ngmo choitii a urerel, me a ungil delengcheklel me a dirrek el ilmeklel el sebechel el merael a beluu. * (Momes er a footnote.) (Ulecherangel 35:25) Engdi tiang a mo uchul a klungiolel. E le lsekum ngtuobed er tia el beluu er osebechakl er a ngii di el taem, e ngolechotel a kmo ngdiak lomekerreu el kmo ngmilekodir a ta er a chad, me tiang a mo uchul engdi ngii el rullii a klengar er ngii el mo kdekudel.

11. Ngmekera Kristiano el mla obult er a kngtil e ochotii el kmo, ngoba omereng el saul el kirel a klechubechub er a Dios?

¹¹ Chelecha el taem, e a chad el obult er a kngtil a ngar er ngii a tekoi el kirel el meruul me bo el sebechel a Dios lousubes er ngii. Ngkmal kirel mo diak loruul a klengit, e tiang a uldimukl er a ngii di el tekoi el sebechel rullii me nglmuut el mo er a oberaod el klengit. A apostol el Paulus a milsaod a tekoi el lurruul tirke el ulebult er a kngterir el Kristiano er a Korinth, el kmo: “Ka di momes er a bla le rellii er kemiu tial klengiterreng el luluusbech er ngii a Dios, kom mla mo semeriar, e orrecheda rengmiu el meledaes er kemiu, e metacherbesul er a rengmiu a mekngit el dilubech, e mo suebek a rengmiu a le dubech a mekngit. Kom dirrek el di ousumengiil ku er ngak, e kmal blak a rengmiu, e ngar ngii er a rengmiu a melsii a mlo mekngit.” (2 Korinth 7:10, 11) Me a lsekum kede mo er a tkurrebab el sebeched el diak deluut el mo meruul a klengit, e kede ochotii el mo er a Jehovah el kmo kede kmal kerekikl a blekerdeled, e dirrek el diak domdasu el kmo ngdi beot el denguu a klechubechub er ngii.

12. Ngera el tekoi a kirel a Kristiano el chemoit me bo lsebechel melemolem el nguu a klechubechub er a Jehovah?

¹² Ngera el tekoi a kirel a Kristiano el chemoit me bo lsebechel melemolem el nguu a klechubechub er a Jehovah? Ngkmal kirel kongei el chemoit aike el tekoi el kmal soal meruul el sebechel mo uchul e ngruebet er a klengit. (Mateus 18:8, 9) El ua tiang, a lsekum a resechelim a mengesuseu er kau el mo meruul a tekoi el diak lodeuir a rengul a Jehovah, e ngmo diak mobengterir? A lsekum ngmeringel er kau el mtebechelii a omelmim er a rrom, e ke kongei el mengeroid er kau er a blekeradel el sebechel mengesuseu er kau el mo imis el melim a rrom? A lsekum ngmeringel er kau el mtebechelii a urungulem el kirel a deleboes lomeruul, e ke kongei el mengeroid er kau er a mubi me a website me a lechub e ngtekoi el sebechel rullau el mo diak el klikiid a uldesuem? Lak mobes, a ngii di el tekoi el mchoit me bo lsebechem lolengesenges er a Jehovah a kmal ungil e melemalt el tekoi. Ngkmal mekngit el tekoi el omekberaod a uldesued sel dodengei el kmo a Jehovah a mla choitid. Engdi ngdiak a lmuut el ungil tekoi el sebechel mo mekesiur a uldesued sel bo dodengelii a ‘bltkil a rengul [a Jehovah] el diak a ulebengelel.’​—Isaia 54:7, 8.

13. Msodii a uchul me ngike el chiliis a sebechel el melechesuar a ulekerreu, e mo dmeu a rengul el kiei er a chelsel a beluu er osebechakl.

¹³ Ngike el chiliis el chad sel ta el lesiseb er a  beluu er osebechakl, e ngmukerreu. A Jehovah a mesaod aika el beluu el kmo: “Ng mo omerteliu.” (Josua 20:2, 3) A Jehovah a dimlak ledu el kmo a chad el chemiis a kirel el lmuut el mukerrekeriil el kirel a osisiu el tekoi. Ngdirrek el ngike el melaitechei a kmal diak el kirel soiseb er tia el beluu el mo omekoad er ngii. Me ngika el chiliis sel lengar a chelsel tia el beluu, e ngar cheungel a ulekerreuil a Jehovah. Me ngdiak el ua lechelsimer er a kelebus. Ngbai sebechel loureor, e olengeseu er a rebebil, e dirrek el mesiou er a Jehovah el ngar a budech. Ochoi, ngbai sebechel mo dmeu a rengul e ungil a klengar er ngii!

14. Ngera el tekoi a kirel a Kristiano el mo ulterekokl a rengul el kirel?

¹⁴ A rebebil el chedal a Dios el riruul a oberaod el klengit a dirk mekngit a ukltkir er a uriul er a lobult er a klengit. E a rebebil a kuk omdasu el kmo a Jehovah a kmal diak lsebechel lobes a tekoi el lurruul. Me a lsekum nguaisei a uldesuem, e bo lulterekokl a rengum el kmo a Jehovah sel lousubes a kngtim, e ngmera el cherrungel lousubes. Me ngdiak el kirel melemolem el mekngit a ukltkem. E tiang a dilubech el mo er a Daniel el dulsaod er ngii er a uchei. A uriul er a losmechokl er ngii a remechuodel e lengesuir el mo klikiid a ukltkel e ngkmal mlo mechelaod a rengul, me ngdilu el kmo: “Chelechang e ngmla mo klikiid a ukltkek. Sel ta el bo lak a klengit, e ngdikeang. El ua tekingel a Jehovah el kmo, ngmo ngmai a berraod er a rengud el choroid el kmal mo cheroid er kid, me ngmo diak lsebechem el lmuut el mes.” Me ngike el chiliis sel ta el lesiseb er a beluu er osebechakl, e ngdiak el kirel mo medakt el kmo ngike el melaitechei a mei el mo mekodir. Me ngdi osisiu, a uriul er a lousubes a kngtid a Jehovah, e ngdiak el kired el dirk bekikl el omdasu el kmo nglmuut el mo omals er kid el  kirel ngii el klengit.​—Monguiu er a Psalm 103:8-12.

15, 16. Ngokiu a ngera el rolel e nglmuut el mo mesisiich a klaumerang er kau er a klechubechub er a Dios sel modengei el kmo, a Jesus a kiltmeklii a olubet el tenget e chelechang e ngmla mo Ngarbab el Prist er kid?

¹⁵ A mera er ngii, kid a ngar er ngii a lmuut el betok lungil luchul me kede ultuil er a klechubechub er a Jehovah el diak deua rechad er a Israel. A uriul er a ledu Paulus el kmo “kele kkol chebuul el chad” e le ngii el ulemdasu el kmo ngdimlak lsebechel cherrungel lolengesenges er a Jehovah, e ngdilu el kmo: “Doreng a sulel a Dios loeak a Jesus Kristus el Rubak er kid!” (Rom 7:25, BT) Me ngera mle belkul a tekingel? Alta e a Paulus a dirk uluureor el kirel a mekngit el urungulel me a dirrek el klengit el lurruul er a uchei, engdi ngulebult er aika el kngtil. Me nguluumerang el kmo a Jehovah a mla ousubes a kngtil lokiu a olubet el tengetengel a Jesus. Me kid me ngsebechel mo klikiid a ukltked e mo budech a rengud, e le Jesus el kiltmeklii a olubet el tenget. (Hebru 9:13, 14) A Jesus a ngike el Ngarbab el Prist er kid a uchul me “ngkmal sebechel losobelterir tirkel oeak ngii el mora Dios, ele ngdiblechoel dingar el meluluuch el kirir.” (Hebru 7:24, 25, BT) A irechar e a rengarbab el prist a ngilsuterir a rechad er a Israel el mo ulterekokl a rengrir el kmo, a Jehovah a mo ousubes a kngterir. Me a Jesus el ngii a Ngarbab el Prist er kid a uchul me ngar er ngii a betok lungil luchul me ngulterekokl a rengud el kmo, ngsebeched el “nguu a klechubechub e le mer kid a grazia el ngosukid er sel kirel blsechel.”​—Hebru 4:15, 16.

¹⁶ A lsoad losiik osebechakl er a Jehovah, e ngkmal kired el mo oumerang er a olubet el tengetengel a Jesus. Lak momdasu el kmo tia el olubet a di mora rokui el chad el lemerekong, bai bo moumerang el kmo ke dirrek el mo ngmai a klungiolem er ngii. (Galatia 2:20, 21) Bo moumerang el kmo ngokiu a olubet el tenget, e a Jehovah a ousubes a kngtim. E bo moumerang el kmo a olubet el tenget a meskau a omelatk el kirel a klengar el mo cherechar. A tekoi el lekiltmeklii a Jesus a sengk er a Jehovah el mei er kau!

17. Ngera me ngsoam el osiik a osebechakl er a Jehovah?

¹⁷ Aike el beluu er osebechakl a ngosukid el mo medengelii a klechubechub er a Jehovah. Ngokiu tiaikid el rolel, e a Dios a osisecheklid el mo medengei el kmo a klengar a kmal mekreos. Ngdirrek lochotii a rolel e ngsebechir a remechuodel el ngosukid, me sel belkul a mera el beltel a reng, me sel luchul e ngsebechel el mo ulterekokl a rengud el kmo a Jehovah a ousubes er kid. Me kau, ke osiik osebechakl er a Jehovah? Ngkmal diak a basio er a ulekerreu el mo ua tiang! (Psalm 91:1, 2) Ngar er a ongingil el suobel, e kede mo mesaod a rolel e aike el beluu er osebechakl a sebechel ngosukid el mo oukerebai er a Jehovah, el ngii a kot el ngarbab el olechotel a llemalt me a klechubechub.