A RECHAD a sorir el mo dmeu a rengrir engdi kede kiei er a taem er a uriul sils me a rokui el chad a “mor ngii a ringel” er a klengar er tir. (2 Timothy 3:1) A rebebil a mo diak ledeu a rengrir e le te chuarm er a chelebirukel el omeruul, e mo smecher, e oriid a urerir, me a lechub e ngmad a betik er a rengrir. E a rebebil a mo diak ledeu a rengrir e le ngtekoi el dilubech el mlo uchul e ngmo suebek a rengrir me a lechub e ngmlo mekngit a rengrir. Ngmo lmuut er a remengull er a Jehovah me te mo mechitechut a rengrir e dirrek e mo diak ledeu a rengrir. Me a lsekum tia mla duubech leko er kau, e ngmekera sebechel el lmuut el mo klou a deuil a rengum?

A bo donger er tia el ker, e ngkired el me a kot e mo ungil medengelii a belkul a mera el deurreng, me a rolel e a rebebil a millemolem el dmeu a rengrir alta te chilebangel a ringel. E a uriul, e kede mo mesa rolel e ngsebeched el melemolem el dmeu a rengud e dirrek el mo omekeroul er ngii.

A chad el dmeu a rengul a diak el ua chad el di ocherchur. Ka molatk er tiang: A chad el mechetelaol a locha di ocherchur engdi sel bo el klechad er ngii e ngmo diak locherchur e le nglocha dirk betok a mondai er ngii. Me tia el deurreng el lulebang a di mle tedeb e dirrek el dimlak lemera el deurreng.​—Osisechakl 14:13.

Nguaisei engdi a mera el deurreng a bo dolechesuar sel denguu a kmung ngerang me a lechub e ngulterekokl a rengud er a ungil tekoi el bo denguu. A bo ledeu a rengud e ngbelkul a kmo ngdmeu a rengud er a chelsel a ungil me a mekngit el blekeradel. (1 Thesalonika 1:6) Ngsebechel el mo mekngit a rengud el kirel a tekoi engdi osisiu el taem e ngdmeu a rengud. El ua tiang, a rechapostol a milechelebed e le tir el ulemerk el kirel a Jesus. Me nguaisei, engdi sera “le tobed er a blil Olbiil e ng kmal mle dmeu a rengrir, ele te miltik er tir el redemelel a mo chuarm er otuub el kirel a Jesus.” (Rellir 5:41) Me ngdimlak ledeu a rengrir e le tir el milechelebed e ngbai tir el mlo sebechir el melemolem er a blakerreng er tir el mora Dios.

A deurreng a dimlak di demechell e dobang. E ngera me ngdiak? E le mera el deurreng a uldimukl er a rodech er a chedaol reng er a Dios. E a chedaol reng er a Dios a ngosukid el mo “loia beches el klechad,” el uldimukl er ngii a deurreng. (Efesus 4:24; Galatia 5:22, BT) E sel bo ledeu a rengud, e ngmo beot er kid el outekangel a ringel el dechelebangel.

A Jehovah soal lomes a ungil tekoi el mo er ngii er a chutem, el diak el ika el mekngit el tekoi el domes er chelechang. Me alta rechad a meruul a mekngit, engdi Jehovah a di dmeu a rengul. A Biblia kmo: “Sel le ngar ngii a mui er a klisiich ma deurreng.” (1 Kronika 16:27) Me a lmuut el tang, aike el ungil tekoi el remesiungel a Jehovah a meruul a odeuir a rengul.​—Osisechakl 27:11.

Kede oukerebai me a lechub kede melasem el mo ua Jehovah el melemolem el dmeu a rengud a lsekum ngdiak el meketmokl a tekoi el ngar sel domdasu er ngii. Ngbai sebeched el ultaut a osenged er aike el ungil tekoi el dolab er chelechang, e mengiil el klou a rengud er aike el ungil tekoi el mo er ngii er a  ngar medad el klebesei er a bai di debekikl. *​—Momes er a footnote.

Ngkmal betok a ungil kerebai er a rechad el ngar er a Biblia el millemolem el dmeu a rengrir alta ngmle betok a mondai er tir. A Abraham a millemolem el dmeu a rengul el mo lmuut er a taem el lechilebangel a kdekudel el tekoi er a klengar er ngii, me a rebebil a mlo uchul a mondai el kirel. (Genesis 12:10-20; 14:8-16; 16:4, 5; 20:1-18; 21:8, 9) Ngmilekera loruul er tiang? Ngokiu sel lolatk el kirel a omeltkel el kiei er a beches el beluulechad er cheungel a omengederederel a Mesias. (Genesis 22:15-18; Hebru 11:10) A Jesus a dilu el kmo: “A demmiu er a Abraham a mle dmeu a rengul el mo mesa belsechel ak mer ngii.” (Johanes 8:56) Me kede oukerebai er a Abraham sel dolemolem el melatk er sel deurreng el bo denguu er a ngar medad el klebesei.​—Rom 8:21.

A Paulus me a Silas a dirrek el mle mesisiich a klaumerang er tir, e dirrek el millemolem el dmeu a rengrir alta te chilebangel a betok el ringel. El ua tiang, a uriul er a lemechelebed el kmal mo meringel e lemengai el mo kelebus, e te “milluluuch e mengitakl odanges el mor a Dios.” (Rellir 16:23-25) Ngmle sebechir el outekangel a ringel lechilebangel e le te millemolem el melatk el kirel aike el telbilel a Dios er a ngar medad el klebesei. Ngdirrek el mlo dmeu a rengrir e le te mle medengei el kmo te churam e le tir el uleltirakl er a Kristus. Kede oukerebai er a Paulus me a Silas sel dolatk aike el klungiaol el mo er ngii e le ngblak a rengud el mesiou er a Dios.​—Filipi 1:12-14.

Chelecha el taem e ngdirrek el betok a kerebai er a rudam me a rudos el tir a millemolem el dmeu a rengrir alta te chelebangel a ringel. El ua tiang, ngar er a November 2013, e a Typhoon Haiyan a tilemall a kuk betok er a 1,000 el blirir a Resioning er a Huriping. A George el blil a miltemall el ngar er a beluu er a Tacloban a melekoi el kmo: “A rudam a dmeu a rengrir alta te mlo chelebangel er tia el tekoi. Ngdiak el sebechek el mo ouchais er sel deurreng el ki blo molechesuar.” Me a lsekum kede melatk el kirel aike el bla leruul a Jehovah el kired, e olecholt a omereng el saul er kid el mo er ngii, e kede mo melemolem el dmeu a rengud el mo lmuut er a taem el bo dechelebangel a ringel. Ngera bebil el tekoi el bla leketmokl a Jehovah el uchul me ngdmeu a rengud?

A deleuill er kid me a Jehovah a kot el ngarbab el uchul me ngdmeu a rengud. Kede medengelii a King er a chutem me a eanged el rokir. Ngii a Demad, e Dios er kid, e dirrek el sechelid!​—Psalm 71:17, 18.

Ngdirrek el dmeu a rengud e le Jehovah a mla meskid a klengar er kid, e dirrek el sebeched el oldeu a rengud er ngii. (Olisechakl 3:12, 13) Ngii el mla mekrolid el mo er ngii a uchul me ngsebeched el mo ungil medengelii a moktek er ngii el kired, me a rolel a dekiei. (Kolose 1:9, 10) Te betok el chad a diak lodengelii a moktek er a klengar. E a Paulus a liluut el losichii a klekakerous er tiang er a ledu el kmo: “‘A ikel dimlak a chad el mes, ma lechub e te remenges, ma lechub e te mdasu el tekoi a le kildmokl a Dios el kirir tirkel betik a rengrir er ngii.’ E ngdi tiaikid el llomeserreng el mle berrotel a lulechotii er kid a Dios el okiu a Chedaol Reng” er ngii. (1 Korinth 2:9, 10) Me ngmeral mo dmeu a rengud sel bo dungil medengelii a moktek er a Dios.

A Jehovah a mla remuul a betok el tekoi el kired, e ngii a uchul me ngsebechel el musubes a kngtid. (1 Johanes 2:12) Ngii a meskid a omelatk er a klengar er a beches el beluulechad el kmal di kmedung e ngmei. (Rom 12:12) Ngme lmuut er chelechang me a Jehovah meskid a rebetok el sechelid el dobengterir e ngsebeched el mesiou er Ngii. (Psalm 133:1) Ngdirrek lomekerreu er kid er a Satan me a remekngit el anghel. (Psalm 91:11) Me a lsekum kede melemolem el melatk el kirel aika el ungil tekoi el Jehovah a mla meskid, e nglmuut el mo klou a deuil a rengud.​—Filipi 4:4.

Ngsebechel a dmeu a rengul Kristiano el lmuut el mo klou a deuil a rengul? A Jesus a dilu el kmo: “A ika kulekoi er kemiu ma deurreng er ngak le bor a chelsiu, me bo le cherrungel a deurreng er kemiu.” (Johanes 15:11) Me tia ochotii el kmo ngsebechel  blechoel el lmuut el mo klou a deuil a rengud. Ngsebeched lomekesiu er a deuil a rengud el mora ngau. A lsekum e ngsoad a bo leklou a ngau, e ngkired el omelecha betok el idungel er ngii. Me lak mobes, a chedaol reng a ngosukid el mo dmeu a rengud. Me a lsekum e ngsoad a lluut el mo dmeu a rengud, e ngkired el melemolem el olengit er a chedaol reng er a Dios lokiu a nglunguuch. Ngdirrek el kired el mo melemolem el melebedebek er a Biblia, el ngii a mlukrael lokiu a chedaol reng.​—Psalm 1:1, 2; Lukas 11:13.

A ta er a tekoi el mo uchul e nglmuut el mo klou a deuil a rengul a Jehovah a okiu sel bo demechesang er aike el tekoi el rullii el mo dmeu a rengul. (Psalm 35:27; 112:1) E ngera uchul? A Biblia a mesaod el kmo kede ulebeob el mo ‘meluu er a Dios e moltaut a llechul; tiaikid ia ngerechelel a chad.’ (Olisechakl 12:13) Kid a ulebeob el mo meruul a soal a Dios me sel dosiou er a Jehovah, e ngsebechel el mera el mo oldeu a rengud er a klengar er kid. *​—Momes er a footnote.

Sel lemukeroul a deuil a rengud, e kede mo melechesuar a betok el klungiaol. El ua tiang, a Jehovah a mera el mo dmeu a rengul sel dolemolem el mesiou er ngii el oba deurreng el mo lmuut er aike el taem el lengar er ngii a mondai er kid. (Duteronomi 16:15; 1 Thesalonika 5:16-18) Ngdirrek, kid el mera el dmeu a rengud a uchul me ngdiak bo domdasu el kmo a tekoi er a kerruul a kot el meklou a ultutelel el tekoi er a klengar. E kede bai melasem el osiik a rolel e ngsebeched el meruul a lmuut el betok el kirel a Rengedel a Dios. (Mateus 13:44) E sel deues aike el klungiaol el mo er ngii e le kede meruul a betok el kirel a Jehovah e ngmera el mo dmeu a rengud, e mo ungil a uldesued el kired, e dirrek el rulleterir a rebebil el mo dmeu a rengrir.​—Rellir 20:35; Filipi 1:3-5.

Sel loleketek a deuil a rengud, e ngmo mesisiich a bedenged. A Biblia a kmo: “A dmeu a rengul el reng a ungil kar.” (Osisechakl 17:22) A ta er a merriter a tekoi el milsuub el kirel a klisichel a bedenged er a University er a Nebraska er a beluu er a Merikel a millekoi a tekoi el Biblia kongei er ngii. Ngdmu el kmo: “A lsekum e ngdmeu a rengum e ungil a rengum er a klengar er kau er chelechang, e ngmo mesisiich a bedengem er a ngar medam el klebesei.”

Me alta kede kiei er a chelsel a meringel el blekeradel, engdi ngsebechel mera el mo dmeu a rengud sel denguu a chedaol reng lokiu a nglunguuch, me a omesuub, me a omelebedebeked er a Tekingel a Dios. Ngdirrek el lmuut el mo klou a deuil a rengud a lsekum kede melatk el kirel aike el betok el ungil tekoi el Jehovah a mla meskid er chelechang, e doukerebai er a blakerreng er a rebebil, e dolasem el meruul a soal a Dios. Seikid e kede mo melechesuar aike el lolekoi a Psalm 64:10 el kmo: “A melemalt bo loldeu er a rengul er a RUBAK, e losiik osebecheklel er ngii!”