1, 2. Ngera ngmiltebengii a ta el odam el kirel a blekerdelel, e ngera ngmirruul?

 A ROBERT a miltecholb er a lengeasek, engdi a klemerang a dimlak el kot el klou a ultutelel el tekoi er a klengar er ngii. Ngdmu el kmo: “Ngdimlak a mekngit el kuruul er ngii, engdi ak di mirruul aike el kirek el meruul e le ngak el mesiungel a Dios. A rechad a ulemdasu el kmo ak mesisiich er a tekoi er a klereng, e le ak ngar er a bek el miting e mesiou el auxiliary pioneer a lebebil er a buil, engdi ngmla er ngii a olengesonges er a klengar er ngak.”

² A Robert a dimlak bo lodengei el kmo ngera olengesonges er a klengar er ngii el mo lmuut er a bocha lebechiil. Ngmla er ngii a klekool el uluusekool er ngii el obengkel a bechil, el oker a ker el kirel a Biblia. E a bechil a mle ungil medengelii a Biblia me ngmle beot er ngii longer. Engdi a Robert a mle meringel er ngii a onger me ngmle blechoel el mo merur. Me ngdilu el kmo: “Ak mlo melechesukak el ua lak a ngera el kudengei, me ak millatk el kmo, ‘A lsekum e ngkirek el bdelul a telungalek er ngak, e ngkirek louedikel el kirel tia el tekoi.’” Me ngmlo uaisei. Ngdilu el kmo: “Ngmlo blak a renguk el mesuub er a Biblia, e di milsuub el mo lmuut er a bocha lsebechek el omech a tekoi el kusuub. Seikid e ak mlo ungil medengei a tekoi el kusuub, e sel  ngaruchei er ngii a mlo sebechek el mekurulii a kmes el deleuill er ngak lobengkel a Jehovah.”

3. (a) Ngera sebeched el suubii er a chisel a klengar er a Robert? (b) Ngera el meklou a ultutelel el tekoi a bo dosaod er chelechang?

³ Ngsebeched el suub a meklou a ultutelel el tekoi er a chisel a klengar er a Robert. Nglocha ngar er ngii a sesei el klemedengei er kid er a Biblia, e dirrek el blechoel el ngar er a miting e mo oldingel a obliil, engdi tia diak lerellid el mo mesisiich er a tekoi er a klereng. Me a lechub, e kede mla mukeroul er a tekoi er a klereng, engdi sel bo dungil merriter er kid, e ngdirk ngar er ngii a sebeched el meruul. (Filipi 3:16) Ngar tia el suobel e kede mo onger a edei el meklou a ultutelel el ker el kmo: (1) Ngera ngosukid el mo ungil el merriter er a okuruled er a tekoi er a klereng? (2) Ngera kede ousbech el lmuut el mukeroul er a tekoi er a klereng? (3) Ngmekera bo lemesisiich a klereng er kid e ngosukid er a bek el sils?

4. Tia el omellach er a Efesus 4:23, 24, ngmo er a reua techa el chad?

⁴ Sera domuchel el mesiou er a Dios, e kede mirruul a omelodech el ngar er ngii a lerellii er a klengar er kid. E tiang a dimlak el meterrob er sera demetecholb. A Biblia mengelechel er kid el kmo: “A uldesuiu ma rengmiu a kmal kirel el mukbeches el rokui.” (Efesus 4:23, 24) Me kid el diak demecherrungel a uchul me ngkired el melemolem el meruul a omelodech er a klengar er kid. Ngkirel a deleuill er kid me a Jehovah el mesisiich alta kede mla mesiou er ngii el betok el rak.​—Filipi 3:12, 13.

5. Ngera el ker a sebechel ngosukid el mo medengei el kmo kede mla mukeroul er a tekoi er a klereng?

⁵ Ngkired el mo kerekikl el merriter er kid alta e kede mekekerei me a lechub e kede meklou. Ngungil el dolatk el kmo: ‘Ngak ak melechesukak el mla mukeroul er a tekoi er a klereng? Ngak, a kultirakl a blekerdelel a Kristus? A uldesuek me a omerellek sel kngar a miting, ngochotii el kmo ak uangera el chad? A tekoi el kusaod, ngochotii el kmo ngua ngera el rolel a klengar a soak? Ngera ngomeketakl er ngii a rolel a omesubek, me a rolel a kuubail me a omengetmeklek, me a rolel a kulai a uleklatk? Ngua ngera uldesuek sel kmekesuseu el mo meruul a mekngit? Ngak, ak mla mukeroul er a tekoi er a klereng?’ (Efesus 4:13) Aika el ker a sebechel ngosukid el mo ungil medengelii a okuruled er a tekoi er a klereng.

6. Ngera dirrek el sebechel el ngosukid el mo medengei el kmo kede mla mukeroul er a tekoi er a klereng?

⁶ A lebebil er a taem e kede ousbech er a rebebil el ngosukid el mo medengei el kmo kede mla mukeroul er a tekoi er a klereng me a lechub e ngdiak. A apostol el Paulus a milsaod el kmo a chad el di oltirakl er a klechad er ngii a diak lodengei el kmo, a Dios a diak el deu a rengul er a rolel a klengar er ngii. Engdi a chad el mla mukeroul er a tekoi er a klereng a omes a tekoi loba osengel a Dios. Me ngmedengei el kmo a Jehovah a diak lekengei er a rolel a klengar el di oltirakl a soal a klechad. (1 Korinth 2:14-16; 3:1-3) A remechuodel el oba uldesuel a Kristus a sebechir el mtebengii a odam sel bocha loruul a tekoi el di oltirakl er a klechad er ngii, me te mo melasem lolengeseu er ngii. Me kid, kede mo  kongei er a ngeso el lomeskid a remechuodel e melasem el melodech a blekerdeled? A doruul el uaisei, e kede ochotii el kmo ngkmal soad el mukeroul er a tekoi er a klereng.​—Olisechakl 7:5, 9.

7. Kede mekera medengei el kmo a chad el ngar er a klereng a diak di lengar er ngii a klemedengei er ngii er a Biblia e lemerekong?

⁷ Ngdiak di leklemedengei er kid er a Biblia a rullid el mo mukeroul er a tekoi er a klereng. A King el Salomon a mle medengei a betok el kirel a Jehovah, me a bebil el tekingel a mlo tedebechel a Biblia. Engdi uriul e a deleuill er ngii me a Jehovah mlo mechitechut, e ngii a mlo diak leblak a rengul. (1 King 4:29, 30; 11:4-6) Me kede ousbech er a ngera el tekoi el mo dechelel a klemedengei er kid er a Biblia? Ngkired el melemolem el melisiich er a klaumerang er kid. (Kolose 2:6, 7) Ngmekera doruul er tiang?

8, 9. (a) Ngera mo ngosukid el smisichii a klaumerang er kid? (b) Ngera kirel el turrekong er kid sel dosuub e dolebedebek? (Momes er a siasing er a uchelel a suobel.)

⁸ A irechar e a Paulus a millisiich er a Rekristiano me le “ngesechekl el mor a osisechakl el kirir a re ultebechel el chad.” (Hebru 6:1) Me ngmekera doltirakl er tia el ulekrael er chelechang? A ta el ileakl el rolel a okiu sel dosuub er a babier el Molemolem el Ngar er a Bltikerreng er a Dios. Tia osisecheklau el mo meduch el oltaut a omellach er a Biblia er a klengar er kau. A lsekum ke mla suubii tia el babier, e ngdirk ngar er ngii a bebil er a babilenged el sebechem el mesuub el mo ngosukau el smisichii a klaumerang er kau. (Kolose 1:23) Ngdirrek el kired el melebedebek aike el tekoi el dosuub, e olengit er a Jehovah me lengesukid el mo meduch loltaut er a klengar er kid.

⁹ Sel dosuub e dolebedebek, e a turrekong er kid a kirel rullid el mo soad lodeuir a rengul a Jehovah e olengesenges er ngii. (Psalm 40:8; 119:97) Kede dirrek el kired el mo oltngakl a ngii di el tekoi el mo uchul e ngdiak demukeroul er a tekoi er a klereng.​—Titus 2:11, 12.

10. Ngera sebechir a remekekerei el chad el meruul me luut el smisichii a tekoi er a klereng er tir?

¹⁰ A lsekum ke kekerei el chad, e ngmla mo er ngii a turrekong er kau el kirel a omesiungem? A ta el odam el mesiou el ngar er a Bethel a blechoel mengedecheduch er a remekekerei el chad el mochu metecholb er a temel aike el ta el sils el  ongdibel e oker er tir er a turrekong er tir. Me ngmiltebengii el kmo a rebetok er tir a mle kerekikl el melatk er a rolel a bo losiou er a Jehovah er a ngar mederir el klebesei. Ngmla er ngii a remelatk el mo mesiou er a Jehovah el mui el taem me a lechub e te melukl el mora basio el ousbech er a rumerk er a renged. Engdi a rebebil a dimlak lodengei el kmo ngmekera longer er a keril. Me tiang belkul a kmo ngdimlak lolatk er a turrekong er tir? A lsekum ke kekerei el chad, e bo molatk el kmo: ‘Ngak, ak di mora miting e mo oldingel e le rechad er a blik el sorir ak bong? Me a lechub e ngar ngii a ileakl el deleuill er ngak lobengkel a Dios?’ Nguaisei, ngkired el rokui el mo er ngii a turrekong er kid, a demekekerei me a demeklungang. Aika el turrekong a ngosukid el lmuut el smisichii a tekoi er a klereng er kid.​—Olisechakl 12:1, 13.

11. (a) Ngera kired el meruul me bo el sebeched el mukeroul er a tekoi er a klereng? (b) Ngera el kerebai er a Biblia a sebeched el mo oukerebai?

¹¹ Me sel bo dodengei el kmo ngera kired el oureor er ngii, e ngkired el mo meruul a omelodech er a klengar er kid. E tia kmal klou a ultutelel e le ngsebechel el mo uchul a klengar me a lechub e ngkodall. (Rom 8:6-8) A Jehovah a diak longerechir er kid el mo cherrungel e dirrek el meskid a chedaol reng er ngii el mo ngosukid. Engdi ngdirk ngar er ngii a kired el meruul. A odam el John Barr, el milsiou el ta er a chedal a Chelechad er a Ruungerachel, a mle ta el losaod er a Lukas 13:24 e kmo: “A rebetok a mo mechitechut e le tir el diak leblak a rengrir el di tir el melisiich er tir.” Me ngkired el mo ua Jakob el milengaibedechakl er a anghel e dimlak lemeterob el mo lmuut er a lenguu a klengeltengat. (Genesis  32:26-28) Me alta e ngsoad el mesuub er a Biblia, engdi ngdiak el kired lomes er ngii el ua babier er a cheldecheduch. Ngkired el mo blak a rengud el osiik a mekreos el klemerang er a chelsel el ngii a sebechel ngosukid.

12, 13. (a) Ngera mo ngosukid el mo otutii a Rom 15:5? (b) Ngmekera kerebil a Petrus me a omellach el mla er ngii e ngosukid? (c) Ngera sebechem el remuul el mo mukeroul er a tekoi er a klereng? (Momes er a baks el “ Aike el Sebechem el Remuul el Mo Mukeroul er a Tekoi er a Klereng.”)

¹² Sel bo leblak a rengud el melisiich er a tekoi er a klereng er kid, e a chedaol reng a mo ngosukid el ngodechii a rolel a domdasu a tekoi. E a cherengel a taem, e ngsebeched el mesuub el mo omdasu el ua Kristus. (Rom 15:5) A chedaol reng a sebechel ngosukid el mo oltngakl a mekngit el ngibeserreng e mo omekeroul a blekeradel el oldeu er a rengul a Dios. (Galatia 5:16, 22, 23) A lsekum kede mtebengii el kmo kede di mechesang el melatk el kirel a kerruul me a lechub a tametereng, e ngdiak el kirel mo mechitechut a rengud. Ngbai kired el melemolem lolengit er a Jehovah el kirel a chedaol reng er ngii me lengesukid el mo melatk a melemalt el tekoi. (Lukas 11:13) Molatk er a apostol el Petrus el dimlak leblechoel el lomdasu el ua Kristus. (Mateus 16:22, 23; Lukas 22:34, 54-62; Galatia 2:11-14) Me nguaisei, engdi ngdimlak bo lemechitechut a rengul, e a Jehovah a dirrek el ngilsuir. E a cherengel a taem, e ngmilsuub el mo omdasu el ua Kristus. Me kid me ngsebeched el mo uaisei.

¹³ A uriul e a Petrus a milsaod a ileakl el blekeradel el sebechel ngosukid. (Monguiu er a 2 Petrus 1:5-8.) Me ngkirel mo blak a rengud lomekeroul a blekeradel el ua ulserechakl el reng me a ducherreng me a bltikerreng er a klodam me a lmuut el bebil el ungil blekeradel. E bek el sils el kired el di kid el oker el kmo, ‘Ngera el blekeradel a sebechek lomekeroul er ngii er chelecha el sils el ngii a mo ngosukak el lmuut el mukeroul er a tekoi er a klereng?’

14. Ngmekera okuruled er a tekoi er a klereng e ngar er ngii a lerellii er a klengar er kid?

¹⁴ A lsekum kede omdasu el ua Kristus, e ngar er ngii a bo lerellii er a blekerdeled sel dengar er a ureor, me a skuul, me a dirrek el rolel a dongedecheduch me a dolilt a tekoi er a bek el sils. Me a omelilt er kid a mo ochotii el kmo kede melasem el oukerebai er a Kristus. Me kid el mla mukeroul er a tekoi er a klereng a diak el soad el mo tomellii a deleuill er kid me a Jehovah. Me a lsekum kede mekesuseu el mo meruul a mekngit, e a okuruled er a tekoi er a klereng a mo ngosukid el otngeklii tia el mekngit el tekoi. Me a uchei er a doruul a omelilt er kid, e kede mo chelellakl e melatk el kmo: ‘Ngera el omellach er a Biblia a sebechel ngosukak? Okmo ngmle Kristus, e ngmo mekerang? Ngera el tekoi a mo odeuir a rengul a Jehovah?’ Ngkired lomeksau er kid el mo omdasu el uaisei. Me bo dosaod a bebil el blekeradel el sebechel duubech me a omellach er a Biblia el mo ngosukid el mo ungil melilt a tekoi el bo doruul.

15, 16. Ngmekera omelebedebeked el ua Kristus e ngosukid el mo oba llomeserreng el melilt (a) er a mo bechid? (b) er a remo sechelid?

¹⁵ Melilt er a mo bechid. A omellach er a Biblia el kirel tiang a ngar er a 2 Korinth 6:14, 15. (Monguiu.) A Paulus a mileketeklii el kmo, a chad el mla mukeroul er a tekoi er a klereng a diak el omes a tekoi el ua chad el diak el ngar er a klereng me a lechub e ngdi melatk a tekoi er a klechad. Ngmekera tia el omellach e ngosukau er sel taem el mosiik er a chad el mo bechim?

¹⁶ Melilt er a remo sechelid. A omellach er a Biblia el kirel tiang a ngar er a 1 Korinth 15:33. (Monguiu.) A chad el mla mukeroul er a tekoi er a klereng a diak bo el sechelirir tirke el sebechir el choitechetur a klaumerang er ngii. Ka di molatk er a rolel e ngsebechem loltaut er tia el omellach er a chelsel a kakerous el blekeradel. El  ua tiang, ngmekera lengesukau er a rolel a omolilt a tekoi el kirel a social networking? Ngmekera lengesukau er a omelilt er kau el mo ousekool a game er a Internet lobengterir a rechad el diak modengelterir?

17-19. Ngmekera okurulel a tekoi er a klereng e ngosukau (a) el mo oltngakl a tekoi el moruul el ngii a diak a belkul? (b) el mo er ngii a ungil turrekong er kau? (c) sel bom chelebangel a klekakebosech er a uldasu?

¹⁷ A tekoi el doruul el tomellii a tekoi er a klereng er kid. Kede metik er a klou a ultutelel el omengelechel el kirel tiang el ngar er a Hebru 6:1. (Monguiu.) Ngerang a “diak a belkul el ureor” el kired el oleiub er kid er ngii? Aike el tekoi el doruul el ngii a diak lolisiich er a tekoi er a klereng er kid. Tia el omengelechel el kirel a diak a belkul ureor a sebechel el ngosukid el mo onger aika el ker el kmo: ‘Tiang ngmo uchul a klungiaol me a lechub e ngdiak a belkul? Ngdi ungilbesul a bo kungesechusem er ngak er tia el tekoi er a siobai? Ngera me ngdiak el sebechek el mo teloi er a cheldebechellir a rechad el tir a melasem el melodech a blekeradel er tia el beluulechad?’

¹⁸ A turrekong er kid er a tekoi er a klereng. Ngar sel Cheldecheduch el Ngar er a Rois, e a Jesus a milskid a ungil uleklatk el kirel a omeruul el turrekong. (Mateus 6:33) Me a chad el mla mukeroul er a tekoi er a klereng a nguu a Rengedel a Dios el mo kot er a klengar er ngii. Me tia el omellach a mo ngosukid el mo onger a chouaika el ker el kmo: ‘Ngak, ngkirek el mo er a university er a uriul er a ktobed er a high school? Ngkirek el kongei a ileakl el ureor?’

¹⁹ Kakebosech el uldasu. A uleklatk el ledillii a Paulus el mora Rekristiano er a Rom a sebechel ngosukid er sel taem el bo el kakebosech a uldesued kid me a rebebil. (Rom 12:18) Kid a oukerebai er a Kristus, me kede melasem el meruul a ‘budech kid ma rokui el chad.’ Me kede mo mekerang sel lebo er ngii a klekakebosech er a uldesued kid me a rebebil? Ngmeringel er kid el kongei er a uldesuel a ta er a chad? Me a lechub e a rechad a medengelkid el kmo kede chad el soad el melisiich er a budech?​—Jakobus 3:18.

20. Ngera me ngsoam el melemolem el mukeroul er a tekoi er a klereng?

²⁰ Aika el blekeradel a ochotii a rolel a omellach er a Biblia a ngosukid el melilt a tekoi el okiu a chedaol reng er a Dios. Me a lsekum kede mla mukeroul er a tekoi er a klereng, e ngmo dmeu a rengud er a klengar er kid. A Robert el dulsaod er ngii er a uchei a dilu el kmo: “Sera lemukeroul a kmes el deleuill er ngak lobengkel a Jehovah, e ak mlo ungil bechiil sechal e mlo ungil chedam. Ngdirrek el mlo ungil a renguk er aike el ngar er ngii er ngak e mlo dmeu a renguk.” Me a lsekum kede mora tkurrebab el sebeched el melemolem el mukeroul er a tekoi er a klereng, e kede mo ngmai a betok el klungiaol. Ngmo dmeu a rengud er a klengar er kid er chelechang, e a ngar medad el klebesei e kede mo nguu a “meral klengar.”​—1 Timothy 6:19.