1, 2. (a) Ngua ngera uldesuir a rebetok el rudam me a rudos el kirel a okurulel a klereng er tir? (b) Ngera el meklou a ultutelel ker a bo dosaod?

 A ODOS el ngar er a Canada a mesaod el kmo a okurulel er a tekoi er a klereng a mla rullii el kmal mo dmeu a rengul, e mla ngosuir el kirel aike el mondai er a klengar er ngii. E a odam el ngar er a Brazil el mla bechiil el 23 el rak a mesaod el kmo, a okurulel er a tekoi er a klereng a mla ngosuir ngii me a bechil el mo ungil a chebechiielir. E a odam el ngar er a Huriping a kmo, a okurulel er a klereng a mlo uchul a budech er a uldesuel, e mla ngosuir el mo meduch el teloi er a rudam me a rudos er ngii el kakerous a blekerdelel a klengar er tir.

² Me ngbleketakl el kmo a okuruled er a tekoi er a klereng a di mo uchul a klungioled. Me ngera sebeched el remuul me deluut el mukeroul er a tekoi er a klereng e dengai a klungioled er ngii? Ngkired el mo ungil medengelii a omesodel a Biblia el kirir a rechad el mla mukeroul er a tekoi er a klereng, el tirke el mlukrael loeak a chedaol reng er a Dios, e omdasu a tekoi el ua Jehovah. Me ngar tia el suobel e kede mo onger a edei el meklou a ultutelel el ker el kmo: (1) Ngua ngera blekerdelel a chad el mla mukeroul er a tekoi er a klereng?  (2) Ngera el kerebai a mo ngosukid me ngsebeched el mukeroul er a tekoi er a klereng? (3) Ngmekera blakerreng er kid el “choba chomelebedebekel a Kristus” e ngosukid el mukeroul er a tekoi er a klereng?

3. Ngua ngera omesodel a Biblia el kirel a klekakerous er a chad el diak lengar er a klereng me a chad el ngar er a klereng?

³ A apostol el Paulus a ngosukid el mo medengelii a klekakerous er “ngikel ngara klereng” me “ngikel chad el diak le ngara klereng.” (Monguiu er a 1 Korinth 2:14-16, BT.) * (Momes er a footnote.) Ngike el diak lengar er a klereng a “diak le nguu a ngat ra Reng ra Dios, ele ngklebelung el bedul ngii, ma ka lsebechel mtebengii.” Engdi a chad el ngar er a klereng a “smaod a rokuil tekoi,” e dirrek el “choba chomelebedebekel a Kristus,” el belkul a kmo ngmelasem el mo omdasu a tekoi el ua Kristus. Me a Paulus a melisiich er kid el mo ua rechad el mla mukeroul a klereng er tir. Me ngera lmuut el bebil el klekakerous er a rechad el diak lengar er a klereng me a rechad el ngar er a klereng?

4, 5. Kede mekera dongchii a chad el diak lengar er a klereng?

⁴ Ngua ngera uldesuel a chad el diak lengar er a klereng? A chad el uaisei a omdasu el di ua uldasu er tia el beluulechad, el di melatk er a ngelbesel a rengul. A Paulus a milsaod el kirel a chouaisei el uldasu el kmo, ‘ngreng el oureor er chelechang ra chelsir ar ngalek er chorrengesmengoit.’ (Efesus 2:2, BT) E tia el uldasu a sebechel el mengetikaik a uldesuir a ruumesingd el chad el mo oltirakl a omerellir tirke el chad el iliuekl er tir. Te di meruul aike el tekoi el tir a omdasu el kmo ngmelemalt, e diak lomekerreu a llechul a Dios. Me a chad el diak el ngar er a klereng a blechoel lomdasu el kmo a kloklel me a deruchellel me a ududel me a lechub a llemeltel a lmuut el meklou a ultutelel er a ngii di el tekoi.

⁵ A chad el diak el ngar er a klereng a di blechoel meruul a tekoi el Biblia a mesaod el kmo ‘ngurerel a klechad.’ (Galatia 5:19-21) Ngar sel kot el babilengel a Paulus el mora Rekristiano er a Korinth, e ngmilsaod a bebil el tekoi el loruul a rechad el diak el ngar er a klereng. Te kaititekangel, e melasem el meruul a klekakeakl er a delongelir a rechad, e melisiich er a rebebil el mo omtok, e kaotutakl er a kort, e diak lolecholt a omengull el mora rulab a dereder, e dirrek el ngmai a kall me a ilumel el mo kot el meklou a ultutelel el tekoi er a klengar er tir. A rechad el uaisei a di mereched el kongei el mo meruul a mekngit a lsekum ngmo kirir. (Osisechakl 7:21, 22) A Jude a mesaod el kmo a chedaol reng er a Jehovah a sebechel el diak lebo er a rechad el diak el ngar er a klereng.​—Jude 18, 19.

6. Kede mekera dongchii a chad el ngar er a klereng?

⁶ A chad el ngar er a klereng a kuk ngodech e le ngkerekikl lomekerreu er a deleuill er ngii lobengkel a Dios. Ngkongei el mukrael er a chedaol reng er a Dios, e melasem er a tkurrebab el sebechel el mo oukerebai er a Jehovah. (Efesus 5:1) Ngblak a rengul el mesuub el mo omdasu e omes a tekoi el ua Jehovah, e dirrek el omes er Ngii el mera el Dios er a rengul. Ngkuk ngodech a omerellel er a chad el diak el ngar er a klereng, e le ngmelasem el oltirakl a llechul a Jehovah er a klengar er ngii. (Psalm 119:33; 143:10) Ngdiak loruul a “urerel a klechad” e ngbai melasem el omekeroul a “rodech ra reng.” (Galatia 5:22, 23, BT) Ngsebeched el lmuut el mo ungil smodii a belkul a chad el ngar er a klereng el ua  tiang: A chad el meduch el ousiobai a domekedong er ngii el kmo ngmeduch er a tekoi er a siobai, me ngdi osisiu, a chad el kmal kerekikl er a rolel a omengull er ngii el mora Dios a ngike el chad el mla mukeroul er a tekoi er a klereng.

7. Ngera omesodel a Biblia el kirel a chad el mla mukeroul er a tekoi er a klereng?

⁷ A Jesus a dilu el kmo, ngdmeu a rengrir a rechad el mla mukeroul er a tekoi er a klereng. Kede menguiu er a Mateus 5:3 el kmo: “Te ngeltengat a re medengei el kmo te chebuul a lak lousbech er a Dios; ele te mediukes er a Rengedel a Dios!” E a Rom 8:6 a mesaod el kmo a klengar er kid a ultuil er a domdasu el ua lomdasu a Jehovah, e le ngkmo: “A lomesiur a rengud a di klechad, e ng mekrolid el mor a kodall; e a lomesiur a rengud a Reng, e ng mekrolid el mor a klengar ma budech.” Me a lsekum kede mla mukeroul er a tekoi er a klereng, e ngsebechel mo budech a deleuill er kid lobengkel a Dios, e mo budech a rengud me a uldesued, e mo oba omelatk el kirel a klengar el mo cherechar.

8. Ngera me ngsebechel mo meringel er kid el mukeroul er a tekoi er a klereng, e melemolem el urrekodel er ngii?

⁸ Me nguaisei, engdi kid el kiei er tia el kmal kdekudel a blekeradel er ngii el beluulechad, e kiei el iliuekl er a rechad el diak loltirakl er a uldesuel a Dios a uchul me ngkirel mo blak a rengud el omekerreu er a uldesued. E le lak domekeek er a uldesued er a uldesuel a Jehovah, e tia el beluulechad a mo choitikikid el mo omdasu e meruul a tekoi el uai ngii. Me ngmekera e mo sebeched el oibngid er ngii? E mekera e mo sebeched el mukeroul er a tekoi er a klereng?

9. (a) Ngera sebechel losisecheklid el mo mukeroul er a klereng? (b) Ngera el ungil kerebai a bo dosaod?

⁹ Ngkired el mesuub el mo oukerebai er tirke el chad el mle kmes a deleuill er tir lobengkel a Jehovah, el di ua ngalek el kirel mesuub er a demal me a delal e mo oukerebai aike el ungil lomerellir. Tia osisecheklid me ngsebeched el mukeroul er a tekoi er a klereng. E kuk sebeched el  mo medengei aike el diak el kired el meruul sel domes er a rechad el di oltirakl a ngelbesel a rengrir. (1 Korinth 3:1-4) A Biblia a mesaod el kirel a ungil me a mekngit el kerebai er a rechad. Me bo dosaod a bebil lungil tekoi el sebeched el suub er a blekerdelel a Jakob me a Maria me a Jesus.

10. Ngmilekera Jakob e meketeklii el kmo ngmla mukeroul er a tekoi er a klereng?

¹⁰ A klengar er a Jakob a dimlak lebeot el di ua klengar er a rebetok er kid. A obekul er a Esau a mle soal lomekoad er ngii, e a demal a bechil a di milengeblad er ngii. Engdi ngmle mesisiich a klaumerang er ngii er a telbilel a Jehovah el mora Abraham. Ngmle medengei el kmo a telungalek er ngii a mo uldimukl er a otutel tia el klebokel el telbiil a uchul me ngkmal mle kerekikl er tir. (Genesis 28:10-15) Me ngdimlak lebechei a ngii di el omerellir a rechad el iliuekl er ngii me lerellii el mo obes a telbilel a Jehovah. El ua tiang, a Jakob a ullengit er a Jehovah me losebelii er sera lomdasu el kmo a obekul a mo tomellii. Ngmiluluuch el kmo: “Molatk er a telbilem el kmo, ‘Ak mo meruul a rokui el tekoi el mo ungil el kirem, e ngak a mo meskau a kmal betok el uldidellel a rsechem el diak bo le mochur, el mo ua ildisel a chelechol er a rriil.’” (Genesis 32:6-12) Me ngkmal mle mesisiich a klaumerang er ngii er a telbilel a Jehovah, e ulechotii el okiu a klengar er ngii.

11. Kede mekera e mo medengei el kmo a Maria a mle mesisiich er a tekoi er a klereng?

¹¹ Ka kuk molatk er a Maria. A Jehovah a ngileltii el mo delal a Jesus e le ngmle mesisiich er a tekoi er a klereng. Me bo donguiu a tekingel a Maria er sel taem er a bo loldingel er a rechedal el Sekaria me a Elisabeth. (Monguiu er a Lukas 1:46-55.) Ngsebeched el mesa el kmo a Maria a mle betik a rengul er a Tekingel a Dios, e mle ungil medengei aike el Bades el tekoi er a Hebru. (Genesis 30:13; 1 Samuel 2:1-10; Malakai 3:12) Me a uriul er a bo lebechiil, e ngii me a Josef a milengiil el mo mechell a Jesus e mlochu meruul a durs er a chebechiil. E le ngerachel  el lebilsterir a Dios a kuk mle klou a ultutelel er aike el sorir. (Mateus 1:25) Ngdirrek el mle kerekikl el ‘melebedebek er a rengul’ a rokui el tekoi el dilubech er a klengar er a Jesus e ulerrenges aike el tekoi el lulisechakl. (Lukas 2:51) Me ngbleketakl el kmo ngmle semeriar er a telbilel a Dios el kirel a Mesias. Me kid, ngsebeched el mo oukerebai er a Maria el melasem el meruul a tekoi el soal a Dios a bo doruul?

12. (a) Ngmilekera Jesus e oukerebai er a Demal? (b) Kede mekera oukerebai er a Jesus? (Momes er a siasing er a uchelel a suobel.)

¹² A Jesus a kot lungil kerebai er a chad el mla mukeroul er a tekoi er a klereng, el kuk ngaruchei er a ngii di el chad. Ngar er a klengar er ngii me a omesiungel er tia el chutem, e ngmileketeklii el kmo ngmle soal loukerebai er a Demal. A Jesus a ulemdasu, e ulemelechesiu, e mirruul a tekoi el ua Jehovah. Ngmirruul a soal a Dios e uleltirakl a llechul. (Johanes 8:29; 14:9; 15:10) El ua tiang, momekesiu er sel rolel e a Isaia a milsaod er a klechubechub er a Jehovah el mo er sel rolel e a Markus a milsaod er a uldesuel a Jesus. (Monguiu er a Isaia 63:9; Markus 6:34.) Me kid, kede oukerebai er a Jesus el di mereched el mo chubteterir tirke el lousbech a ngeso? Kede ua Jesus, el semeriar lomerk e olisechakl er a rechad el kirel a ungil chais? (Lukas 4:43) A rechad el mla mukeroul er a tekoi er a klereng a chubechubechad e melasem lolengeseu er a rebebil.

13, 14. (a) Ngera sebeched el suub er a rechad el mesisiich er a tekoi er a klereng? (b) Mosaod.

¹³ Chelecha el taem e te betok a rudam me a rudos el mesisiich er a tekoi er a klereng el melasem loukerebai er a Kristus. Nglocha sebechem el mesa el kmo te kmal semeriar el meruul er a omesiungir, e sorir el oltuchakl er a rechad, e chubechubechad. Te diak lemecherrungel, engdi te melasem el mora tkurrebab el sebechir el omekeroul a ungil blekeradel e meruul aike el soal a Jehovah a bo loruul. A Rachel el odos el ngar er a beluu er a Brazil a dilu el kmo: “Ngkot el mle soak el mesuub er a rolel a rechad er a beluulechad a loubail. Me a rolel a kuubail a kmal dimlak el tabesul. Engdi sera ksuubii a klemerang e ngmlo soak el melodech a omerellek me bo lsebechek el mukeroul er a tekoi er a klereng. Ngdimlak lebeot er ngak el meruul aika el omelodech, engdi tia mlo uchul a deuil a renguk e rirellak el mlo medengelii a mera el moktek er a klengar.”

¹⁴ A Reylene el odos el ngar er a Huriping, a kuk mle ngodech a mondai er ngii. Alta ngmedengelii a klemerang, engdi ngmle soal el mora ngarbab el skuul e mo er ngii a ungil urerel. Me a cherengel a taem e aike el turrekong er ngii el kirel a omesiungel a mlo ua lak a ultutelel er ngii. Me ngdilu el kmo, “Ak mlo melechesuar el kmo ngar er ngii a olengesonges er a klengar er ngak, el ngii a tekoi el lmuut el klou a ultutelel er a urerek.” Me ngildechii a uldesuel e rirellii a omesiungel el mora Jehovah el mo kot er a klengar er ngii. Me chelechang e ngoumerang er a telbilel a Jehovah el ngar er a Mateus 6:33, 34, me ngmelekoi el kmo, “Ngulterekokl a renguk el kmo a Jehovah a mo omekerreu er ngak!” Me ke locha medengelterir a rudam me a rudos el ngar er a ongdibel el mngar er ngii el meruul a osisiu el tekoi. Me sel desa rolel a loukerebai er a Kristus, e ngmo soad el loltirakl er a blakerreng er tir.​—1 Korinth 11:1; 2 Thesalonika 3:7.

15, 16. (a) Ngera kired el remuul me bo deua Kristus? (b) Kede mekera mo ua “chomelebedebekel a Kristus”?

¹⁵ Ngmekera e mo sebeched loukerebai er a Kristus? A Kot el Korinth 2:16 a mesaod el kmo ngkired el mo oba “chomelebedebekel a Kristus.” E a Rom 15:5, BT a omeklatk er kid el mo ‘mesuub ra Kristus Jesus, me dedul mo oba tal uldasu.’ Me a lsekum e ngsoad el mo ua Kristus,  e ngkired el mesuub el mo omdasu e meruul a tekoi el uai ngii. A Jesus a mle kerekikl lomekerreu er a deleuill er ngii lobengkel a Dios el kuk ngaruchei er a ngii di el tekoi. Me sel bo doukerebai er a Jesus e kede mo omdasu a tekoi el ua Jehovah. E tiaikid a kot el klou a ultutelel el uchul me ngkired el mesuub el mo omdasu a tekoi el ua Jesus.

¹⁶ Ngmekera mo sebeched lomdasu el ua Jesus? A redisaiplo er ngii a ulemes a mengasireng el omerellel, e ullerrenges er ngii lolisechakl a meklou el seked, e ulemes a omerellel el mora rokui el chad, e ulemtab er sel rolel e ngmlukrael el okiu a uldesuel a Jehovah. Me te dilu el kmo: “Me kemam olecholt a ikel bek el le riruul.” (Rellir 10:39) Kid er chelechang a diak el sebeched el mesa Jesus, engdi kede menguiu aike el Ebangkelio, me ngsebechel ngosukid el mo ungil medengelii. Me sel donguiu e dolebedebek a babier er a Mateus me a Markus me a Lukas me a Johanes, e kede suub a betok el kirel a rolel a lomdasu a Jesus. E tia ngosukid el mo “mesuub er ngii,” me bo lsebeched el “mo ua uldesuel.”​—1 Petrus 2:21; 4:1.

17. Ngmekera domdasu a tekoi el ua Kristus e ngosukid?

¹⁷ Ngmo uchul a ngera el klungioled a lsekum kede mo omdasu el ua Kristus? Sel domekeek er a uldesued er a uldesuel a Kristus e ngmelisiich er a tekoi er a klereng er kid el di ua sel donga ungil er a bedenged el kall, el sebechel smisichii a bedenged. Cherengel a taem e kede mo medengei aike el bo loruul a Jesus er a chelsel a ngii di el blekeradel. E seikid e ngmo sebeched el ungil melilt a tekoi el mo oldeu er a rengul a Dios e mo uchul a klikiid el ukltked. Me kau, ke kongei el kmo aikang a ungil uchul e ngkirem el ‘oubail er a Rubak el Jesus Kristus’?​—Rom 13:14.

18. Ngera ke mla suubii el kirel a chad el mla mukeroul er a tekoi er a klereng?

¹⁸ Tia el suobel a mla ngosukid el mo medengelii a belkul a chad el mla mukeroul er a tekoi er a klereng. Kede dirrek el mla suub a ungil kerebai er a rechad el tir a mlukrael er a chedaol reng er a Dios. E siluubii el kmo, a lsekum kede mo oba “chomelebedebekel a Kristus” e ngsebechel ngosukid el mo omdasu el ua Jehovah, e mo kmes a deleuill er kid lobengkel. Engdi ngdirk ngar ngii a sebeched el suub. A bebil er ngii a kmo, Kede mekera mo medengei el kmo kede mla mukeroul er a tekoi er a klereng? Kede mekera lmuut el mukeroul er a tekoi er a klereng? E ngera ngrullii er a klengar er kid tia el okuruled er a tekoi er a klereng? Kede mo mesaod aika el tekoi er a ongingil suobel.