Ngar er a rak er a 2012, e a rehakase a miltik a mekekerei el tebtebil a bekai er a mla mo merek el 3,000 el rak. A remesuub a tekoi a kmal mle dmeu a rengrir. E ngera uchul? Ngmle dmeu a rengrir er a tekoi el mle llechukl er ngii, el diak el tebtebil tia el bekai a uchul.

A rehakase er a lodak aika el tebtebil tia el bekai, e ngmlo sebechir el choiuii tia el llechukl el tekoi er a Kanaan el kmo: “Eshba’al Ben Beda,” el belkul a kmo “Eshba’al, son of Beda.” Tiang a kot el taem el rehakase a miltik er tia el ngakl el llechukl er a klalo er a irechar.

A ta er a chad el ngklel a Esbaal a ngar er a Biblia el ta er a ngelekel a King el Saul el sechal. (1 Kronika 8:33; 9:39) A professor el Yosef Garfinkel el ta er a miltik er tia el bekai a dilu el kmo: “Ngkmal mengasireng sel bo dodengei el kmo, tia el ngakl el Esbaal a ngar er a Biblia, e dirrek el ngar er a reksi er a rehakase er sel taem el lulengedereder a King el David.” Tiang a ta er a rolel, e a rehakase a oba osisiu el uldasu ngii me a Biblia!

Ngar er a Biblia, e a ngelekel a Saul el Esbaal, a dirrek el okedongall el Isboseth. (2 Samuel 2:10) Ngera uchul me a “boseth” a miltechir a “baal”? A remesuub a tekoi a silodii el kmo, a chad el milluches er a Ongeru el Samuel a locha millasem el diak lousbech er a ngakl el Esbaal, e le ngmlo omeklatk er a rechad er a Israel er a Baal, el chelid er a ses el eolt el rechad er a Kanaan a milengull er ngii. Me nguaisei, engdi ngar er a babier er a Kot el Kronika el ngar er a Biblia, e ngdirk sebeched el metik er a ngakl el Esbaal.