NGAR er a beluu er a Brookings, er a South Dakota, er a Merikel e ak lotkii a ta el tutau el kmal mle imis el mekelekolt. Ngmle sebechek el melechesuar el kmo a kelekolt a kmedu el mei. Ak kmla er a barn el kmal mle mekelekolt ngak me a kekerei el cheldellir a rechad, e kmal ulemritel er a kelekolt el rokui. Aki dilechor er bita er a klou el tank el mla er ngii a ralm er a chelsel el kmal mle mekelekolt! Me chelechang e ak mo ouchais a chisel a klengar er ngak me ke mo medengei el kmo ngera uchul me aki mla er tiang.

Ak milechell er a March 7, 1936. A delak me a demak a mla er ngii a reteua el ngelekir, e ngak a kot el kekerei er tir el rokui. Aki kiliei er a kekerei el sers el ngar er a beluu er a ongos er a South Dakota. A tekoi er a sers a mle ta er a tedebechel a klengar er a telungalek er kemam, engdi ngdimlak el klou a ultutelel. A delak me a demak a miltecholb el mo Sioning er a Jehovah er a rak er a 1934. Te tilib a klengar er tir el mo er a Jehovah, me a omerellel a soal a Jehovah a kmal mle klou a ultutelel el tekoi er a klengar er tir. A demak el Clarence me a okdemelek el Alfred a milsiou el company servant (chelechang e ngokedongall el tebechelel a chelechad er a remechuodel) er a kekerei el ongdibel er kemam er a beluu er a Conde, er a South Dakota.

A telungalek er kemam a mle blechoel el mo er aike el temel a miting e oldingel a obliil el ouchais er a rebebil el kirel a ungil el omelatk er a ngar medad el klebesei el ngar er a Biblia. A kerebai el lullecholt a delak me a demak me a osisecheklir el mei er kemam a ngilsukemam el mo betik a rengmam er a Jehovah. Ngak me a ta er ngak er a Dorothy a mlo omerk a klumech er a Renged er sera el 6 a rekmam. Ngar er a rak er a 1943, e ak mlo teloi er a Skuul el Kirel a Urerel a Dios, el kmal dirk ulemuchel.

A meklou el ongdibel me a ta el sils el ongdibel a kmal mle meklou a ultutelel el tekoi er a klengar er  kemam. Ak dirk melatk er a klou el ongdibel el mla er ngii er a rak er a 1949 er a beluu er a Sioux Falls, er a South Dakota. A Brother Grant Suiter a ultebedii a cheldecheduch el dai er ngii a kmo: “It Is Later Than You Think!” Ngmillisiich er a rokui el rudam me a rudos el mo ousbech er a klengar er tir el mo omerk er a ungil chais el kirel a Rengedel a Dios. A uriul er tiang, e ak tilbir a klengar er ngak el mo er a Jehovah, me ak miltecholb er a ta el sils el ongdibel er a beluu er a Brookings, er a November 12, 1949. Tiaikid a uchul me ak mla er sel barn el kmal mle mekelekolt el kulsaod er ngii er a uchei. Kemam el teuang a milengiil el mo metecholb er a klou el tank el rruul er a deel.

Me a uriul e ngmle soak el mo pioneer me a kulemuchel er a January 1, 1952 er sera el 15 a rekik. A Biblia a mesaod el kmo: “Mosuub er a re mellomes a rengrir el chad me bo le mellomes a rengum,” e kmal mle betok a remellomes a rengrir el chad el ngar er a telungalek er ngak, el dirrek el mle sorir a bok pioneer. (Osisechakl 13:20) Ak mle blechoel el mo omerk er a klumech el obengkel a okdemelek el Julius, el mle 60 a rekil. Me alta e ngkmal mle klou er ngak, engdi ngmle dmeu a rengmam el dmak el terung el oldingel. Ak siluub a betok el dilubech er a klengar er ngii. A Dorothy dirrek el mlo pioneer.

Sera kekerei el buik, e a delak me a demak a mle blechoel el mengemedaol er a rebetok el rudam el oldingel a ongdibel me a rebecherir el mo kiei el obengkemam. A ta er a rubekel el Jesse me a Lynn Cantwell a kmal ngilsukak. Te kmal ulemekerreu er ngak e dirrek el millisiich er ngak. Aike el taem el bo loldingel a ongdibel el di kmeed er kemam, e a lebebil er a taem e te melekoi er ngak el mo oldingel el obengterir. Ngmera el mle dmeu a renguk el obengterir. Ngmle soak el oukerebai er tir el mo mechesang el meruul a urerel a Jehovah e dirrek el mo pioneer.

A ongingil el odam el oldingel a ongdibel a mle Bud Miller. Sel taem el ble loldingel a ongdibel er kemam ngii me a bechil er a Joan, e ak mle 18 a rekik. Seikid el taem e ngmle kirek el mo er medal a cheldellir a rechad el tir a melilt el kmo te rua techang a mo teloi er a klsoldau me a lechub e ngdiak. Ngmle sorir a kuruul a bebil er a ureor el kulemdasu el kmo ngomtok er a llechul a Jesus el diak el kired el omekbitang er a tekoi er a balatiks. Engdi ngmle soak el omerk er a ungil chais el kirel a Renged. (Johanes 15:19) Me a kullengit er tir me lebechikak me bok minister.

Ngkmal mle dmeu a renguk er sera louchais er  ngak a Brother Miller el kmo ngmo obengkek el mo oumiting el obengkel tia el cheldebechel. Ngikang a kmal dimlak a rrengel el chad, e dirrek el dimlak el medakt er a rechad. Ngdirrek el kmal mle medengei a Bades. Ngii el ulebengkek a uchul me ak kuleba blekeu! Ngar er a ulebongel el blsechel a kleald er a rak er a 1954, e a mlo orekil tia el miting, e te kilengei er a ongtik el mo minister. Me chelechang e ngar er ngii a ilmeklek el mo meruul a lmuut el betok el mo er a Jehovah.

A kedeb el taem er uriul er sei, e ak mlodurech el mo mesiou er a Bethel el mle okedongall el Watchtower Farm, el ngar er a beluu er a Staten Island, er a New York. Ak milsiou er sei el bekord el 3 el rak. Ngkmal mle betok el ungil el tekoi a dilubech er a klengar er ngak e le ak mlo medengelterir a remellomes a rengrir el rudam me a rudos e dirrek el uluureor el obengterir.

A sers el ngar er a beluu er a Staten Island a dirrek el mla er ngii a razio el WBBR er ngii. E tiang a luluungerachel er ngii a Resioning er a Jehovah er a rak er a 1924 el mo er a rak er a 1957. Te di mle 15 el mo er a 20 el chedal a telungalek er a Bethel a mlukngerachel el mo er tia el sers. A ruumesingd er kemam a mle mekekerei el chad e dimlak a kmal duch er kemam. Engdi a chuodel el ngellitel el odam el brother Eldon Woodworth a uluureor el obengkemam. Ngikang a kora mle ua el demmam e ullisechakl er kemam a betok el tekoi. A lebebil er a taem e ngmo er ngii a chetituokel er a delongelam, e a Brother Woodworth a mo dmu el kmo, “Ngmera el mengasireng aike el bla lrruul a Jehovah, alta rechad el ousbech er tir a diak el mecherrungel.”

A Brother Federick W. Franz a dirrek el ulebengkemam e olengeseu er kemam. Ngika mle mellomes a rengul el chad e mle ungil el medengelii a Biblia. Ngdirrek el mle soal el mo medengelkemam. A Harry Peterson a mirruul a kelam. Ngmle beot er kemam el ousbech er a last name er ngii er a bai ki mousbech er sel mera el ngklel el Papargyropoulos. Ngikang a mle ta er a rengellitel e dirrek el mle soal el oldingel. A Brother Peterson a mle ungil a urerel er a Bethel engdi ngdimlak el lechitii a berkel a klumech. Ngmle blechoel el merous a betok er a dart el magazine er a bek el buil. Ngdirrek el mle ungil el medengelii a Biblia e dirrek el ulenger a betok el kermam.

Ngar er a sers, e aki milengetmokl a rodech me a iasai e melecha er a chelsel a beached. Ngbekord el 42,600 liter (45,000 quart) er a rodech me a iasai er a bek el rak a ki mngilai el locha er a chelsel a  beached el mo er a telungalek er a Bethel. Ak uluureor el obengkel a Etta Huth el kmal mle mellomes a rengul el odos. Ngrirellii a recipe el ki mousbech er ngii el mo mengetmokl aike el rodech me a iasai. A rudos a mlei el me oureor el obengkemam, e a Etta a mle blechoel el olengeseu el mengederoder a urerir. Me alta e a Etta mle medengei a betok el kirel a rolel a dolecha kall er a chelsel a beached, engdi ngmle blechoel el olecholt a omengull er ngii el mo er a rudam, el tir a mle overseer er a sers. Me ngkiltmeklii a ungil el kerebai el mei er kemam el rokui.

A Angela Romano a mle ta er tirke el mekekerei el odos el mle olengeseu el oureor er a sers. A Etta a ullengeseu er ngii er sera lemei er a klemerang. Ngak me a Angie a mlo bechiil er a April 1958, e kmal dmeu a rengmam el dmak el mesiou er a Jehovah el bekord el 58 el rak. Chelsel aika el mereko el rak, e a blakerreng er a Angie el mo er a Jehovah a mla smisichii a chebechiielam. Ngmera el mellomes a rengul, e mera el sebechek el ultuil er ngii er a chelsel a ngii di el meringel el blekeradel.

Sel taem el rudam a ulterur a WBBR el ngar er a beluu er a Staten Island er a rak er a 1957, e ak milsiou el kedeb el taem er a Bethel el ngar er a beluu er a Brooklyn. E seikid e ngak me a Angie a mlo bechiil, me ngmlo diak ngar er a Bethel. Aki mle pioneer er a beluu er a Staten Island el 3 el rak. Me ngmlo er ngii a taem, e ak kuluureor el obengkel ngike el beches el mlo oungerachel er sel radio station, el mle okedongall el WPOW.

Ngak me a Angie a mle blechoel el omekbeot a klengar er kemam me bo el sebecham el di kltmokl el mo mesiou er a ngii di el ker el uluusbech er kemam. Me ngokiu tiang, aki kilengei el mlodurech el mo mesiou el special pioneer er a Falls City, er a Nebraska. Engdi uriul er aki bo er sei, e aki mlodurech el mo er a beluu er a South Lansing, er a New York, el ta el buil el mo teloi er a Skuul el Kirir a Remechuodel me a Remesiou er a Ongdibel. Ngkmal mle dmeu a rengmam el ngmai a osisechakl, e ulemdasu el kmo a uriul er tia el skuul e aki lmuut el mo er a Nebraksa. Engdi ngmlo mechas a rengmam er sera ki mnguu a beches el ngerachel el mo mesiou el missionari er a beluu er a Cambodia! Ngar er tia el klebokel el beluu el ngar er a Dimesungos er a Asia, e aki ulemes, e ulerrenges, e milengarm a tekoi el dimlak ki modengei. Ngkmal mle somam el ouchais er a rechad er tia el beluu el kirel a ungil chais el kirel a Renged.

A tekoi er a balatiks a milengodech er a beluu er a Cambodia a uchul me ngmle kiram el mo er a beluu er a Dimes er a Vietnam. A uriul er a 2 el rak e ak kmal mlo smecher, me ngklengiterreng e le ngmle kiram el lmuut el mo er a Merikel. A kuluusbech a taem el mo mesisiich, me sera bok mesisiich e aki liluut el mo pioneer.

Ngar er a March 1965 aki ulemuchel el mesiou el merael el oldingel a ongdibel. Ngbekord el 33 el rak, e ngak me a Angie a kmal mle dmeu a rengmam el ngar er a circuit me a district el ureor, e dirrek el olengeseu el mengetmokl a meklou el ongdibel. Ngkmal dmeu a renguk el ngar tia el ureor, e le meklou el ongdibel a taem el kmal dmeu a renguk el kirel. A bebil el rak e aki uleldingel a ongdibel el ngar er a New York City me a lechub aike el ongdibel el kmeed er ngii. E dirrek a bebil er aike el meklou el ongdibel a mla er ngii er a Yankee Stadium.

Ngak me a Angie a ngilai a betok el beches el ngerachel me a dirrek el ngerachel el kmal mle chetituokel  er aika el mereko el rak. Ngar er a rak er a 1995, e ak mlodurech el mo olisechakl er a Ministerial Training School. A uriul er a 3 el rak, e aki mlodurech el mo er a Bethel. A uriul er a 40 el rak, e ngkmal mle dmeu a renguk el lmuut el mo er a Bethel, el ngii a kulemuchel el ngar er a mui el taem el omesiou. A lebebil er a taem, e a kuluureor er a Service Department e dirrek el mlo olisechakl a betok el skuul. Ngar er a rak er a 2007, e a Chelechad er a Ruungerachel a rirellii a Department er a Skuul er a Tekoi er a Klereng el mo oungerachel aike el rokui el skuul el mosisechakl er a Bethel, e ngak a mle overseer.

Ngkmal betok el omelodech a mla meketmokl el mo er aike el skuul el ngar er a Bethel. A Skuul el kirir tirke el Congregation Elder a ulemuchel er a rak er a 2008. E a uriul er a 2 el rak, e te betok er a 12,000 el mechuodel a mlosisechakl er a Patterson me a dirrek el Bethel er a Brooklyn. Tia el skuul er chelechang a dirk melemolem el ngar er ngii er a betok el basio. Ngar er a rak er a 2010, e a ngakl el Ministerial Training School a milengodech el mo Skuul er a Biblia el kirir a Remesobil el Odam, e a beches el skuul a mlo er ngii el okedongall el Skuul er a Biblia el Kirir a Rekristiano el Obekel.

Ngar er a September 2014, e aika el teblo el skuul a mlo dmak e rirellii a Skuul el Kirir a Rumerk er a Rengedel a Dios. Ngsebechir a rubekel, me a remesobil el rudam me a lechub e te rudos el mei er tia el skuul. Te betok el meliuekl er a beluulechad a kmal mle semeriar el mo rongesii el kmo ngmo er ngii tia el skuul er a belurir. E kmal dmeu a rengud el mesa el kmo te betok a mo er ngii a techellir el mo er aika el skuul. E kmal dmeu a renguk el mlo sebechek el mo medengelterir a rebetok el mlo sebechir el melodech a klengar er tir me bo el sebechir el ngmai aika el osisechakl.

Me sel kulatk er a klengar er ngak er a uchei er ak metecholb er sel mekelekolt el barn el mei er chelechang, e ak mera el oureng a sulel a Jehovah el mlo sebechek el mo medengelterir tirka el mellomes a rengrir el chad. Te ullengeseu er ngak el mo medengelii a Jehovah e mo blak a renguk el mesiou er ngii. A rebebil a mle mekekerei er ngak me a rebebil a kuk mle meklou er ngak. E a rebetok a mle ngodech a siukang er tir er ngak. Engdi ak miles a blekerdelir me a omerellir el kmo te mera el mle betik a rengrir er a Jehovah. Ngmera el dmeu a renguk el mlo er ngii a betok el sechelik el mellomes a rengrir el ngar er a delongelir a rechedal a Dios el sebechek el ngmai a klubelek er tir.