1. Ngera me a rebebil a rredemelel a odanges, e ngera kede mo mesuub er tia el suobel?

NGMEKERANG a dolecholt a omengull el mo er a rechad? Kede meruul er tiang sel dochotii a klemeriarreng me a omengull er kid el mo er a rechad. Kede blechoel el chemat er tirke el mla remuul a tekoi el mo uchul e te rredemelel a odanges, me a lechub e ngtirke el mla moterekokl er tir a meklou a ultutelel el ngerachel, me a lechub e ngderuchall. Me ngar tia el suobel e kede mo suubii el kmo te rua techang a rredemelel a odanges, e ngera uchul.

2, 3. (a) Ngera uchul me a Jehovah a ileakl el rredemelel a odanges? (Momes er a siasing er a uchelel a suobel.) (b) Ngtecha ngike el Ngelekel a Sib el medung er a Ocholt 5:13, e ngera uchul me ngkired loldanges er ngii?

² A Ocholt 5:13 a kmo “Ngikel dengchokl er a kingall ma Ngelekel a Sib” a rredemelel a nguu a odanges. “Ngikel dengchokl er a kingall” a melutk el kirel a Jehovah. E ngar er a 4 el bliongel er a Ocholt, e a rechanghel a smodii sel uchul me a Jehovah a “ngikel di ngar el mo cherechar” me ngkmal rredemelel a nguu a odanges. Te dmu el kmo: “Rubak el Dios er kemam! Kau a kirem a klebkall, ma odanges, ma  klisiich. Ele kau a mileob a rokui el tekoi, e uleltirakl a tekingem e ng dilubech el mlor ngii a klengar er ngii.”​—Ocholt 4:9-11.

³ A “Ngelekel a Sib” el medung er a Ocholt 5:13 a melutk el kirel a Jesus Kristus. Kede mekerang e medengei? Sera lengar tia el chutem a Jesus, e ngmle okedongall el “Ngelekel a Sib er a Dios el melubet a kngtil a beluulchad!” (Johanes 1:29) Ngtecha el king a mla kongei el tongetengii a klengar er ngii el kirir a rechedal? Tiaikid a ungil luchul me ngkired el oldanges er ngii. A Jesus a mera el rredemelel a odanges, e le ngii a “King er a re king e Rubak er a rubak.” (1 Timothy 6:14-16) Me ke locha di ua uldesuir a rechanghel el mengitakl el kmo: “A mlad el Ngelekel a Sib a kirel a ngma dereder, ma siich, ma llomeserreng, ma klisiich, ma omengull, ma klebkall, me odanges!”​—Ocholt 5:12.

4. Ngera me nguchul a llomeserreng sel debsa Jehovah me a Kristus a odanges?

⁴ Ngar er a Johanes 5:22, 23, e ngmesaod er a Jehovah el mla rullii a Kristus el mo chad er a kerrekeriil el kirir a rokui el chad. Tiaikid a kot el ngarbab luchul me ngkired el oldanges er a Jesus. E sel doruul uaisei, e kede dirrek el oldanges er a Jehovah. Me sel dengiltii el mo oldanges er a Jesus me a Demal, e ngmo sebeched el nguu a diak a ulebengelel el klengar.​—Monguiu er a Psalm 2:11, 12.

5. Ngera uchul me a rokui el chad a rredemelel a odanges me a omengull?

⁵ A rechad a ulebeob el “okesiul a Dios.” (Genesis 1:27) Tia belkul a kmo, a ruumesingd el chad a ngar er ngii a duch er tir el olecholt a blekeradel el ua blekerdelel a Dios. El ua tiang, a rechad a sebechir el oubltikerreng e meruul a ungil, e dirrek el olecholt er a klechubechub. A rechad a dirrek lulebeob el ngar er ngii a ukltkir, el sebechel el omeklatk er tir er a ungil me a mekngit, me a llemalt me a blulak, me a kirel ketmekill me a diak el kirel. (Rom 2:14, 15) A ruumesingd el chad a sorir a tekoi el klikiid e klebokel, e dirrek el sorir el kiei el budech a delongelir tir me a rebebil. E tiang a diak lemechas a rengud er ngii el tekoi, e le Jehovah el Dios a Dios er a kltarreng me a budech. Me ngbleketakl el kmo, a rokui el chad a ulebeob el ngar er ngii a duch er tir el oukerebai er a Jehovah el ngar er a kakerous el rolel. Tiaikid a uchul me a rechad a rredemelel a odanges me a omengull.​—Psalm 8:5.

6, 7. Ngera klekakerous er a Resioning er a Jehovah me a rebetok el chad sel lolecholt a omengull el mo er a rebebil?

⁶ Kid a medengei el kmo te ngar er ngii a rechad el rredemelel a omengull, engdi nglocha mo meringel er kid el mo medengei el kmo ngera el rolel a omengull a kired el mesterir, e uangera klungel. Tiaikid a uchul me a rediak lemecherrungel el chad a kmal mla mechetikaik er a uldesuel tia el beluulechad er a Satan. Me te betok a mla rulleterir a rebebil er a rechad el mo ua le chederir. Me ngdikea lolecholt er a rolel a omengull me a odanges el oltirakl er a uldesuel a Jehovah, e bai kmal imis el mengull e oldanges er tirka el chad el rulleterir el mo ua lechelid. Me te oubail el uai tir, e mesuub a omerellir me a uldesuir a rechad er a balatiks me a remengeteklel a klechelid, me a remerael a chisir el chad er a klekool me a mubi, me a lmuut el bebil el merael a chisir el chad.

⁷ A remera el Kristiano a medengei el kmo, tia el rolel a omengull el mo er a rechad a kmal mekngit. Ngar er a chelsir a rokui el chad el mla kiei, e a Jesus a ulechotii a cherrungel el kerebai el kired el mo oltirakl er ngii. (1 Petrus 2:21) Lak dobes el kmo a “rokui el chad a mlor a klengit me te mlo cheroid er a klebkellel a Dios.” (Rom 3:23) Ngdiak a chad el ngar tia el chutem el kired el mengull er ngii, e le sel denguu a omengull er kid el mo er a chad, e kede rullii a Jehovah el mo mekngit a rengul.

8, 9. (a) Ngua ngera uldesuir a Resioning er a Jehovah el bedul a rechad er a kabelment? (b) Ngoingera el taem e ngdiak el kired el oltirakl a sorir tirka el chad?

 ⁸ Te ngar er ngii a rebebil el tir a rredemelel a nguu a omengull er kid, e le ngderuchellir er a beluu a uchul. Ka molatk er tirke el ngarbab el chad er a kabelment me a tekoi el loruul el kired. Te omekerreu er a beluu, e dirrek el olengeseu er a rechad er a beluu el ousbech a ngeso. Me ngbetok a klungiolel a urerir. A apostol el Paulus a ulemeklatk el kmo, ngkired el omes er tirka el ngarbab el chad er a kabelment e le a “ikel ngar ngii el omerreder a meldalem er a Dios.” Ngdirrek el dilu el kmo, ngkired el oltirakl a llach el bla loterekokl el kmo: “Mruul a ngercheliu el kirir el rokui; besterir a ikel kakerous el bedengel a tax tirkel kirir a tax, e mongull er tirkel kuoll, e moldanges er tirkel odengesall.”​—Rom 13:1, 7.

⁹ Me kid el Sioning er a Jehovah a mo er a tkurrebab el sebeched el ochotii a omengull er kid el mo er tirka el chad er a kabelment. Ngar er a bek el beluu e ngar er ngii a kakerous el siukang er ngii, me ngkakerous a tekoi el longerechir er kid a rechad er a kabelment er aika el kakerous el beluu. Me nguaisei, engdi ngkired el kongei el olengesenges er tir sel loruul er a urerir. Engdi a lsekum e ngsorir a bo doruul er a tekoi el omtok a llechul a Jehovah, e ngkmal diak el kired el kongei el mo meruul er ngii. E le ngkmal kired el olengesenges er a Jehovah er a bai dolengesenges er a rechad.​—Monguiu er a 1 Petrus 2:13-17.

10. Te milekerang a remesiungel a Jehovah er a irechar e ochotii a ungil kerebai el kired er chelechang?

¹⁰ Ngsebeched el nguu a klubeled er a blekerdelir a remesiungel a Jehovah er a irechar el tir a uleltirakl a llach er a kabelment me a beluu. E a Josef me a Maria a kmal mle ungil el kerebai. Sel taem el rechad er a Rom a mlo sorir el mo medengei a ulecherengelir a rechad el kiliei er a beluu, e a Josef me a Maria a mirrael el mo er a Bethlehem el mo meluches a ngklir, alta e a Maria a kmal kmedu el mechell. (Lukas 2:1-5) A apostol el Paulus a ta er a ungil el kerebai el okiu a rolel e ngullecholt er a omengull er ngii el mo er a remerreder er a beluu. Sera lemotelechakl er a tekoi el dimlak lerellii, e ngulechotii a omengull er ngii er a losaod er ngii el mo er a King el Agripa me a dirrek el Festus el kabernor er a Judea.​—Rellir 25:1-12; 26:1-3.

11, 12. (a) Ngera me ngdiak el kired el oba ileakl el rolel a omengull el mo er a remengeteklel a klechelid? (b) Ngera dilubech e le Sioning el mla er a Austria a ulechotii a omengull er ngii el mo er a chad er a balatiks?

¹¹ E kuk uangera uldesued el bedul a remengeteklel a klechelid? Ngkired el olecholt a ileakl omengull el bedultir? Ngkired el ochotii a omengull er kid el di ua omerelled el mo er a ngii di el chad. Engdi ngdiak el kired el mesterir a ileakl el rolel a omengull el mo lmuut er a taem el tir a mengerechir er kid el mo meruul uaisei. E ngera uchul? E le klsuul klechelid a diak lolisechakl a klemerang el kirel a Dios me a Tekingel el Biblia. A Jesus a uluungeroel er a remengeteklel a klsuul klechelid, e ulemekedong er tir el cheblad e mekngit el chad. (Mateus 23:23, 24) Engdi ngdiak a kngtil a dolecholt er a omengull er kid el mo er a rechad er a kabelment. E le tirka el chad a dirrek el mla ngosukid er a bebil el tekoi, e le kid el ullengesenges er tir.

¹² A ta el chad el rirellii tia el tekoi a Dr. Heinrich Gleissner, el chad er a balatiks er a beluu er a Austria. Sel taem er a Ongeru el Mekemedil a Beluulechad, e a resoldau er a Nazi a ngiluu el mo kelebus. Me sera longesechii er a train el ngar er a omerollel el mo er a concentration camp, e ngmlo kaodengei ngii me a Leopold Engleitner el blak a rengul el Sioning er a Jehovah el ngar er a Austria. Ngika el Brother Engleitner a uleba omengull, e milsaod er a klaumerang er ngii el mo er a Dr. Gleissner, me ngkmal mle blak a rengul el orrenges er ngii.  Me sera bo lemerek a mekemad, e ngika el Gleissner a mlo betok el taem el lousbech er a deruchellel, e ngosuterir a Resioning el ngar er a beluu er a Austria. Me ke locha dirrek el medengei a bebil el ungil tekoi el dilubech, e le Rekristiano el ulechotii a omengull er tir el mo er a rechad er a kabelment.

13. Te rua techang a rredemelel a nguu a omengull me a odanges, e ngera uchul?

¹³ A rudam me a rudos a rredemelel a nguu a omengull me a odanges er kid. E tiang a kmal klemerang el kirir tirke el odam el omekerreu er kid el ua remechuodel er a ongdibel, me tirke el odam loldingel a ongdibel, me a Chelechad el Omekerreu a Obis er a Resioning er a Jehovah, me a dirrek el Chelechad er a Ruungerachel. (Monguiu er a 1 Timothy 5:17.) Tirka el rokui a omekerreu e omesterir a rechedal a Dios aike el lousbech, e a Biblia a mesaod er tirka el mesiou el “sengk el mor a rokui el chad.” (Efesus  4:8) Me ngkmal melemalt el tekoi a dochotii a omengull me a odanges el mo er tir el diak lultuil er a kmo ngchad er ker el beluu, e uangera skulel, me a deruchellel er a beluu, me a lechub e ngurerel. Tirke el Kristiano er a irechar a kmal ungil kerebai el kirel tia el tekoi. Te ulechotii a omengull er tir el mo er tirke el ullab a ngerachel, me kid a dirrek el meruul er a osisiu el tekoi. Me sel dobengterir tirka el chad, e ngdiak domes er tir el ua rechanghel me a lechub e te ua chelid. Kede bai ochotii a omengull er kid el mo er tir el kirel a meringel el urerir, me a klengariourreng er tir.​—Monguiu er a 2 Korinth 1:24; Ocholt 19:10.

14, 15. Te mekerang a Rekristiano el mechuodel e kuk ngodech er a rebetok el mengeteklel a klechelid?

¹⁴ Tirka el mechuodel er a ongdibel a ua ngariou a rengrir el mengkerengel a sib. Ngdiak el sorir a domes er tir el ua merael a chisir el chad. Te kuk ngodech a omerellir er a rebetok el mengeteklel  a klechelid er chelechang, me a dirrek el sel taem er a Jesus. A Jesus a milsaod el kirir el kmo: “Ng sorir a ikel kot el ungil kingall er a mur ma ikel kingellir a re kuoll er a blil ongdibel; ng kmal sorir a longull er tir a re chad me losus er tir er a blil a makit.”​—Mateus 23:6, 7.

¹⁵ A Rekristiano el mechuodel er a ongdibel a olengesenges a tekingel a Jesus el kmo: “Ng diak le kiriu el mokedong el kmo ‘Sensei’ ele kemiu el rokui a di odam, e ngar ngii a di tal Sensei er kemiu. E dirrek el diak le kiriu el omekedong er a ngii di le chad er tial beluulchad el kmo ‘Chedam’, ele ng ngar ngii er kemiu ngikel di tal Chedam el ngar a eanged. E dirrek el ka bo lomekedong er kemiu a re chad el kmo ‘Merreder’, ele ng di tal Mesias a merreder er kemiu. Ngikel kot el ngarbab er a delongeliu a kirel el mo mesiungiu. Ngikel di ngii el olengesechekl er ngii a mo monganget, e ngikel di ngii el olenganget er ngii, a mo mongesechekl.” (Mateus 23:8-12) Me a lsekum a remechuodel er a rokui el ongdibel el meliuekl er a beluulechad a olecholt er a klengariourreng e olengesenges a tekingel a Jesus, e a rudam me a rudos er tir a mo betik a rengrir er tir e mo oba omengull me a odanges el mo er tir.

16. Ngera uchul me ngkired el melemolem el olecholt a omengull el mo er a rebebil?

¹⁶ Kede locha ousbech a taem el mesuub el mo meduch el olecholt a omengull el mo er a rebebil. E tiang a mle klemerang el kirir a Rekristiano er a irechar. (Rellir 10:22-26; 3 Johanes 9, 10) Me sel dolecholt a omengull er kid el mo er a rebebil el okiu sel rolel el soal a Jehovah e ngmo uchul a betok el klungioled. Ngkmal diak bo desong a doruul er ngii.

17. Ngera bebil el klungiaol el mo er ngii el olechotel a omengull me a odanges a uchul?

¹⁷ Sel dochotii a omengull me a odanges el mo er a remerreder er a ureor er a beluu, e ngklou a techall el bo losebechakl er a llemelted el omerk er a klumech. Ngdirrek el mo ungil a uldesuir el kirel tia el urered er a berkel a klumech. Tiang a dilubech er a sesei el rak er a uchei el ngar er a beluu er a Dois, el ta el pioneer el Birgit a mlo er a graduation er a ngelekel el redil. A resensei a dilu er a Birgit el kmo, ngkmal mle ungil a rengrir el ngar er ngii a rengelekir a Resioning er a Jehovah el ngar er a class er tir er aika el mereko el rak. Te omdasu el kmo, a rengelekir a Resioning a rullii tia el skuul el mo ungil basio. Me a Birgit a dilu er tir el kmo, “A rengelekam a mosisechakl el mo oltirakl a llechul a Dios er a bek el taem, e tiang a uldimukl er a lolecholt a omengull me a odanges el mo er a resensei er tir.” A ta el sensei a melekoi el kmo, oleko rokui el ngalek er a skuul a mo ua blekerdelir a Resioning, e ngkmal mo beot el lolisechakl er tir. Ngkmal mle ungil a uldesuir el kirir a rengalek el Sioning er a Jehovah a uchul, me a sesei el sandei er a uriul e a ta er tirka el sensei a mlo er a klou el ongdibel er kid.

18, 19. Ngera kired el melatk er ngii sel dolecholt a omengull el mo er a remechuodel?

¹⁸ A omellach el debetik er ngii er a Tekingel a Dios a sebechel ngosukid el mo medengelii a  rolel, e kede ochotii a omengull er kid el mo er a remechuodel er a ongdibel. (Monguiu er a Hebru 13:7, 17.) Ngkmal sebeched e kired el chemat er tir el kirel a meringel urerir. Me sel dekengei el olengesenges a ulekrael lomeskid, e kede ngosuterir me ngmo dmeu a rengrir el meruul er a omesiungir. A Biblia a dirrek el omeklatk er kid el mo oukerebai er a klaumerang er tir. Engdi tiang a diak lebelkul a kmo ngkmal kired el mo mesuub a rolel a loubail, e longedecheduch e lolisechakl ngike el kmal soad el odam er kid. A lsekum kede mo meruul el uaisei, e ngua bocha doltirakl er a chad el diak el Kristus. Ngkmal diak el kired lobes el kmo a remechuodel a di uai kid el diak lemecherrungel.

¹⁹ Me sel dolecholt a omengull me a odanges el mo er a remechuodel, e ngdiak el soad el omes er tir el ua merael a chisir el chad, e le tiang a sebechel ngosuterir. El mekerang? Ngrulleterir me te melemolem el ngariou a rengrir me ngdiak bo lomdasu el kmo, te kuk ungil er a rebebil me a lechub e bo lomdasu el kmo, a tekoi el loruul a rokui el di melemalt.

20. Ngmo uchul a ngera el klungioled sel dechat er a rebebil?

²⁰ Sel dechat er a rebebil e ngosukid me ngdiak bo lekedidai a rengud, e bai melemolem el loba klengariourreng a lsekum a rebebil a chemat er kid. Ngdirrek el omekerreu er kid me ngdiak lemetemall a rengud, a lsekum a chad el doba omengull el bedulngii a rullii a tekoi el tomellii a rengud. A ta er a klungiolel tia el tekoi a rullid me kede melemolem el teloi er a cheldebechelel a Jehovah. E tia el cheldebechel a diak lekengei el omsa chetengakl me a ileakl el odanges el mo er a ngii di el chad.

21. Ngera kot el ngaruchei el klungiolel a dolecholt er a omengull el mo er a rebebil?

²¹ Me a kot el ngaruchei el klungiolel sel dochotii a omengull el mo er a rechad, a mo sebeched el lodeuir a rengul a Dios. Kede mo meruul a soal tekoi el mo uchul e kede melemolem el blak a rengud el mo er ngii. Me a Jehovah a mo sebechel longer er a tekingel a Satan el kmo ngdiak a chad el sebechel el melemolem el blak a rengul. (Osisechakl 27:11) A rebetok el chad er tia el beluulechad a diak lodengelii a melemalt el rolel a dolecholt a omengull. Engdi kid a oba klou el omereng el saul e le kede medengelii a rolel a dolecholt a omengull el oltirakl er a soal a Jehovah!