1, 2. Ngera uchul me kede mo mesaod a kerebai er tirka el teua el king er a Juda?

A LSEKUM e ke milsa chad el tilorech e ruebet er a dellas, e kulterekokl el mo kerekikl a obo morael er ngii el rael. Me ngdi osisiu, ngokiu sel dorriter a cheleuid el omeruul el lurruul a rebebil er a klengar er tir, e ngsebeched el oibngid me ngdiak bo doruul a osisiu el cheleuid el omeruul el lurruul. El ua tiang, ngsebeched el ngmai a klubeled er aike el cheleuid el omerellir tirke el chad el ngar er a Biblia.

² Tirke el teua el king el dulsaod er tir er sel dirk mlo merek el suobel, a milsiou er a Jehovah el oba rengrir el rokir. Engdi te mirruul a oberaod el klengit. A tekoi el dilubech er a klengar er tir a lluches er a Biblia me bo el sebeched el melebedebek, e ngmai a meklou a ultutelel el suobel er ngii. Ngera sebeched el suub er a tekoi el dilubech el mo er tir, e kired el mekerang me ngdiak bo doruul a osisiu el cheleuid el omeruul el lurruul?​—Monguiu er a Rom 15:4.

3-5. (a) Alta Asa a mle cherrungel a rengul el mo er a Jehovah, engdi ngera el cheleuid el omeruul a leriruul? (b) Ngera uchul me a Asa a mle ultuil er a rechad, er sera bo loumekemad er a beluu Baasa?

³ A kot e bo dosaod er a Asa. A Asa a mle ultuil er a Jehovah er sel taem el 1 miliol el chad er a Ethiopia a uluumekemad er a rechad er a Juda. Me nguaisei, engdi ngdimlak el ultuil er a Jehovah er sera er a bo loldechelakl er a Baasa el king er a Israel. A Asa mle soal el merrob er a Baasa me lak bo loleketek er a beluu er a Rama el ngii a kmal mle klou a ultutelel el beluu er a Israel el ngar er bita er a renged er a Juda. (2 Kronika 16:1-3) A Asa millilt el kmo, ngkmal mo ungil sel bo longeluch er a king er a Siria me bo lolengeseu er ngii. Me sel taem el rechad er a Siria a mlo oumekemad er aike el beluu er a Israel, e a Baasa a “chilitii a cheuatel er a Rama el mlo diak loleketek er ngii, me ng melterob a urerel.” (2 Kronika 16:5) A kot, e a Asa a locha ulemdasu el kmo ngrirellii a ungil el omelilt!

⁴ Engdi, ngmlo uangera uldesuel a Jehovah? A Jehovah a dimlak ledeu a rengul er a Asa e le ngdimlak el lultuil er ngii, me ngulderechii a profet el Hanani el mo mesmechokl er ngii. (Monguiu er a 2 Kronika 16:7-9.) Me a Hanani a dilu er a Asa el kmo: “Chelechal mong e ke di mo chemau a mekemad.” Me a Asa mlo mengedereder er a beluu er a Rama, engdi klengar er ngii el rokir, ngii me a rechedal a kirir el di mo oumekemad.

⁵ Ngar sel mlo merek el suobel, e kede siluubii el kmo a Jehovah a mle dmeu a rengul er a Asa. Alta Asa dimlak el cherrungel, engdi a Dios a ulemes er ngii el milluu er Ngii el oba rengul el rokir. (1 King 15:14) Me nguaisei, engdi a Asa a millilt el mo meruul a mekngit, me ngdimlak el sebechel el oleiub er ngii er aike el mlo telemellel. Ngera uchul me ngdi mle ultuil er a uldesuel me a rebebil, e dimlak el ultuil er a Jehovah? A Asa locha ulemdasu el kmo, ngsebechel el ousbech er a duch er a resoldau el mo kats er a mekemad. Me a lechub e nglocha ullerrenges a mekngit el uldesuir a rebebil.

6. Ngera sebeched el suub er a cheleuid el omeruul el lerirellii a Asa? Mosaod.

⁶ Ngera sebeched el suub er a cheleuid el omeruul el lerirellii a Asa? Ngar er a chelsel a ngii di el blekeradel, e ngkired el ultuil er a Jehovah er a bai di dultuil er a uldesued. Ngkired el olengit er ngii a ngesou, alta mondai el dechelebangel a kmal oberaod me a lechub e ngkuk diak el oberaod. Ngungil a dolatk aikang: Kid, kede ultuil er a di uldesued a lebebil er a taem, loeak sel dolasem el mesmechokl a mondai el domdasu el kmo ngmo uchul a klungioled? El ua tiang, oleko telungalek er kau a rullau me ngmo meringel er kau a mo er a miting me a lechub e ngta el sils el ongdibel. Ke mo olengit er a Jehovah me ngolengeseu er kau el mo medengei aike el bo moruul er a chelsel tia el blekeradel? Me a lechub e nguriul er a lak a urerem el kmal meketeket, e ke mocha metik er a chad el soal a obo moureor. Ke mo subedii el kmo, ngar er ngii a miting el kirem  el mo er ngii er a bek el sandei, alta e ngsebechel el mo uchul e ngdiak bo mnguu tia el ureor? Me a ngii di el mondai el bo dechelebangel, e ngkmal kired el melatk er a tekingel ngike el milluches er a psalm el kmo: “Modersau el mor a RUBAK; moumeral ulsirs er ngii, e ng mo ngosukau.”​—Psalm 37:5.

7, 8. Ngera el cheleuid el omeruul a lurruul a Jehosafat, e ngera mlo rsel? (Momes er a siasing er a uchelel a suobel.)

⁷ Chelechang e kede kuk mo mesaod er a kerebil a ngelekel a Asa el Jehosafat. Ngika mla er ngii a ungil el blekerdelel el Jehovah a kmal mle ungil a rengul el kirel. E sel lultuil er a Jehovah, e ngmirruul a betok el ungil el tekoi. Engdi ngdirrek el mirruul a bebil el mekngit el omelilt. El ua tiang, ngkilengei me a ngelekel el sechal a mlo bechil a ngelekel a King el Ahab el kmal mle mekngit el chad. A uriul, e a Jehosafat a mlo obengkel a Ahab e oumekemad er a rechad er a Siria, alta profet el Mikaia a ulemeklatk er ngii me ngdiak bo loumekemad. Ngar er tia el klaumekemad, e a rechad er a Siria a uldechelakl er a Jehosafat e millasem el omekoad er ngii. (2 Kronika 18:1-32) Me sera luut el mo er a Jerusalem, e a profet el Jehu a uleker er ngii el kmo: “Kau ng kirem el olengeseu er a re mekngit e oubltikerreng el mor tirkel mengemikr er a RUBAK?”​—Monguiu er a 2 Kronika 19:1-3.

⁸ A Jehosafat, ngar er ngii a lesiluub er a tekoi el dilubech el mo er ngii me a uleklatk el mla er a reprofet? Ngklengiterreng e le ngdimlak. Alta e ngdirk betik a rengul er a Jehovah e soal el meruul a soal, engdi a Jehosafat a liluut el omak a deleuill er ngii el obengkel a chad el dimlak el soal el mengull er a Jehovah. Ngika el chad a mle King el Ahasia el ngelekel a Ahab. A Jehosafat me a Ahasia a milleketek a diall el terung. Engdi aika el diall a miltemall  er a uchei er a bo el sebechir el ousbech.​—2 Kronika 20:35-37.

9. Ngera sebechel el mo duubech a lsekum kede melilt er a remekngit el sechelid?

⁹ Ngera sebeched el suub er a tekoi el dilubech el mo er a Jehosafat? A Jehosafat a mirruul a llemalt e “milsiou er a RUBAK el oba rengul el rokir.” (2 Kronika 22:9) Engdi, ngmillilt el mengoit a taem el obengterir a rechad el dimlak el betik a rengrir er a Jehovah, el mlo uchul a klou el telemall er a klengar er ngii el kileed e ngmad. Ka molatk er a osisechakl er a Biblia el kmo: “Mosuub er a re mellomes a rengrir el chad me bo le mellomes a rengum. Cho mousechelei er a re mekebelung el chad e ke mo metemall.” (Osisechakl 13:20) Me ngkmal kired el ouchais er a rebebil el kirel a Jehovah. Engdi ngdirk mo uchul a telemall a bo desechelirir a rechad el diak el losiou er a Jehovah.

10. (a) Ngera sebeched el suub er a Jehosafat a lsekum e ngsoad el mo bechiil? (b) Ngera diak el kired el obes er ngii?

¹⁰ El ua tiang, a lsekum e ngsoad el mo bechiil, e ngera sebeched el suub er a Jehosafat? Kede locha mo soad a chad el diak el betik a rengul er a Jehovah. Kede locha mo omdasu el kmo, ngdiak bo debetik er a chad el bo debechil el ngar er a delongelir a rechedal a Dios. Me a lechub, e a rebebil el chedad a locha di melekoi er kid el kmo, ngkired el mo bechiil er a uchei er a bo demeklou el chad. Me nguaisei, engdi ngkired el mekerang a lsekum e ngdiak el sebeched el metik er a ungil el chad el bo debechil? A ta er a tekoi el sebechel el mo ngosukid, a oeak sel dolebedebek aike el dilubech el mo er a Jehosafat. Ngmle blechoel el olengit a ulekrael er a Jehovah. (2 Kronika 18:4-6) Engdi sera bo el sechelil a Ahab el dimlak el betik a rengul er a Jehovah, e a Jehosafat a dimlak el lolengesenges er a uleklatk el mla er a Jehovah. A Jehosafat a mle kirel el diak el obes el kmo, “a osengel a RUBAK a mekelekelii a beluulchad el rokir, me ng omesterir a klisichir tirkel blak a rengrir er ngii.” (2 Kronika 16:9) Me kid me ngdirrek el diak el kired el obes el kmo, a Jehovah a soal el ngosukid. Ngmedengei a tekoi el dechelebangel, e kmal betik a rengul er kid. Kau, ke oumerang el kmo a Dios a mo meskau sel bltikerreng el mousbech er ngii, me a dirrek el chelmengem? Me bo lulterekokl er a rengum el kmo, ngmo er ngii a taem e ngmo kutmokl aikang!

11, 12. (a) Ngmilekera Hesekia e ulechotii sel mera el ngar er a rengul? (b) Ngera uchul me a Jehovah a uluusubes er a Hesekia?

¹¹ Ngera klubeled el denguu er a Hesekia? A Jehovah a ullengeseu er a Hesekia me bo el sebechel el mo medengei aike el mera el ngar er a rengul. (Monguiu er a 2 Kronika 32:31.) Sel taem el Hesekia a kmal mlo smecher, e a Dios a dilu er ngii el kmo ngmo mesisiich, e dirrek el milsang a olangch el mo oterekeklii a uldesuel. A Jehovah a ullutii a chuu er a terebel el teruich el bakes. Engdi uriul, e a king er a Babilon a mle soal el mo medengei a betok el tekoi el kirel tia el olangch me nguleldurech er a rechad el mo er a Hesekia el mo oker er ngii el kirel tia el tekoi. (2 King 20:8-13; 2 Kronika  32:24) A Jehovah a dimlak el ouchais er a Hesekia er a rolel e ngmo omekerreu er tir. A Biblia a mesaod el kmo, a Jehovah a “di milecherei” me bo lesa el kmo ngmo mekerang. Me a Hesekia a ulecholt er tirka el chad er a Babilon aike el rokui el mekreos el klalo el lullab. E tiang a ulechotii sel mera el mla er a rengul a Hesekia. El okiu a ngera el rolel?

¹² Ngklengiterreng, e le Hesekia a mlo kedidai a rengul. E tiang a mlo uchul me, “ng dimlak loreng a saul el kirel a ngesou el milekedmokl el mor ngii.” A Biblia a diak losaod er a uchul me a omerellel a mlengodech. Engdi nglocha ngii el mlo kats er a mekemad er a delongelir tir me a rechad er a Asiria, me a lechub e ngsel taem el Jehovah a ulemekungil er ngii. Me a lechub e ngii el mlo meteet e mlo merael a chisel el chad. Me alta Hesekia a milsiou er a Jehovah el oba rengul el rokir, engdi ngmlo er ngii a taem e ngmlo kedidai a rengul, me a Jehovah a dimlak ledeu a rengul er ngii. Engdi a uriul, e a “Hesekia ngiluu a rengul el mor iou,” me a Dios a uluusubes er ngii.​—2 Kronika 32:25-27; Psalm 138:6.

13, 14. (a) Ngera el blekeradel a sebechel el ochotii sel tekoi el ngar er a rengud? (b) Ngkirel el mo uangera uldesued a lsekum a rebebil a chemat er kid?

¹³ Ngera sebeched el suub er a Hesekia me a cheleuid el omeruul el lurruul? Lak dobes el kmo, a Hesekia a mlo kedidai a rengul er a uriul er a lengesuir a Jehovah el mo mesisiich er a rechad er a Asiria, e dirrek el ulemekungil er a secherel. Me kede mo mekerang a lsekum e ngduubech a ungil el tekoi el mei er kid, me a lechub e a rebebil a mo chemat er kid? Ngokiu a uldesued el kirel tia el tekoi, e ngochotii a ngar er a rengud. El ua tiang, a odam a locha mle meringel el oureor el mengetmokl er ngii el mo oltobed er a cheldecheduch el mo er a klou el seked. Me a rebetok a chilat er ngii er a tekoi el lerirellii. Ngmo uangera uldesuel el kirel tia el tekoi?

¹⁴ Ngkired el blechoel el melatk er a tekingel a Jesus el kmo: “Sel bla mruul a ikel rokui el mlodurech el mo meruul e mdu el kmo, ‘Kid a di mesiou; ma ikel bla deruul a kired el meruul.’” (Lukas 17:10) Lak dobes er sel taem el Hesekia a mlo kedidai a rengul, me ngdimlak lolecholt a omereng el saul er ngii el mo er a Jehovah er sera lolengeseu er ngii. Ngera mo ngosukid el mo melemolem el oba klengariourreng, er sel taem el rebebil a mo chemat er kid e le ngcheldecheduch el ble dotebedii? Ngkmal sebeched el melebedebek aike el bla lrruul a Jehovah el mei er kid. Ngdirrek el sebeched el mesaod el kirel me a rolel e ngullengeseu er kid. Ngdi ngii el tang a mla meskid a Biblia me a chedaol reng er ngii me bo el sebeched el oltobed a cheldecheduch.

15, 16. Ngmilekerang a Josia el mlo uchul a kodellel?

¹⁵ Ngera sebeched el suub er a Josia? Alta Josia a mle ungil el king, engdi ngriruul a cheleuid el omeruul el mlo uchul a kodellel. (Monguiu er a 2 Kronika 35:20-22.) Ngera dilubech? A Josia a miluchelii a mekemad el obengkel a King er a Ekipten, alta e ngdimlak a ungil el uchul e ngmeruul er ngii. Me a Neko a dilu er a Josia el kmo, ngdimlak el soal el mo  oumekemad er ngii. A Biblia a mesaod el kmo, a tekoi el lullekoi a Neko a mle “tekingel a Dios.” Engdi a Josia a mlo oumekemad me ngmlad. Me ngera uchul me nguldechelakl er a Neko? A Biblia a diak losaod.

¹⁶ A Josia a mle kirel el merriter el kmo aike el tekingel a Neko, ngmera el mla er a Jehovah me a lechub e ngdiak. Ngmilekerang? Ngbai mle kirel el oker er a Jeremia el ta er a profet er a Jehovah. (2 Kronika 35:23, 25) Ngdirrek, a Josia a mle kirel el melatk aike el klemera el tekoi. A Neko a mle kirel el mo er a Karkemish el mo oumekemad a bebil el renged el diak el Jerusalem. Me a Neko a dimlak el lolasem el melenguul er a Jehovah me a lechub a rechedal. Me a Josia a dimlak el kerekikl el omtab aika el tekoi er a uchei er a lolilt el mo meruul a tekoi. Ngera klubeled er tiang? Sel lengar er ngii a mondai er kid me bo el kired el meruul a omelilt er kid, e ngkired el melatk el kmo ngera soal a Jehovah a bo doruul.

17. Sel lengar er ngii a mondai er kid, e ngmekera doliub er kid me ngdiak bo doruul a osisiu el tekoi el lerirellii a Josia?

¹⁷ Sel bo el kired el meruul a omelilt, e ngkired el me a kot e melatk el kmo ngera el omellach er a Biblia a sebechel el ngosukak e mekera kultaut er a klengar er ngak. Ngar er a chelsel a bebil el blekeradel, e nglocha mo soad el meruul a betok el omerriter er aika el babilenged me a lechub e kede olengit a ngesou er a remechuodel. Ngsebechel el olengeseu er kid el mo omdasu a bebil el omellach er a Biblia. Ka molatk er tia el blekeradel: A odos a bechil a chad el diak el Sioning. E ngika el odos a mla rullii a telbilel a rengul el mo oldingel er a ulterekokl el sils. (Rellir 4:20) Engdi ngar seikid el sils, e a bechil a diak el soal a bo loldingel. Me ngdmu er ngii el kmo ngkmal dirkak el longoit a taem el dmak el terung me ngsoal el nguu el mo er a kmung ker. Me ngika el odos a millatk a Bades er a Biblia el sebechel el olengeseu er ngii el mo meruul a ungil el omelilt. Ngmedengei el kmo ngkirel el olengesenges er a Dios, e a Jesus a mengelechel er kid el mo meruul er a remo disaiplo. (Mateus 28:19, 20; Rellir 5:29) Ngdirrek el diak lobes el kmo a bechil el redil a kirel el mengull er a bechil, e dirrek a remesiungel a Dios a kirir el oba delemedemekerreng. (Efesus 5:22-24; Filipi 4:5) Me a ngika el bechiil el sechal, ngmelasem el merrob er ngii me ngdiak bo loldingel, me a lechub engdi soal el mengoit a taem el obengkel er seikid el sils? Me kid el mesiungel a Jehovah a uchul me ngsoad el meruul a omelilt er kid el ngar er a melemalt el rolel e dirrek el odeuir a rengul a Jehovah.

18. Ngera sebechem el suub sel molebedebek aika el kerebai er tirka el teua el king er a Juda?

¹⁸ A bebil er a taem, e kede dirrek el locha mo remuul a osisiu el cheleuid el omeruul el lurruul tirka el king er a Juda. Kede locha (1) di ultuil er a di uldesued, (2) melilt er a remekngit el sechelid, (3) kedidai a rengud, me a lechub (4) e kede meruul a omelilt er kid el diak dolatk el kmo ngera soal a Dios. Engdi a leuaisei, e ngdiak a ungil el uchul e kede mo omdasu el kmo ngdiak el sebeched el odeuir a rengul a Jehovah. Ngomes aike el ungil er kid el ua lulemes aike el ungil er tirke el teua el king. A Jehovah dirrek el omes a bltkil a rengud el mo er ngii me sel urunguled el soad el mesiou er Ngii. Me ngmla meskid a kerebai el sebechel el olengeseu er kid me ngdiak doruul a oberaod el klengit. Me a leuaisei, e dolebedebek aika el cheldecheduch er a Biblia e doreng a sulel a Jehovah el mla meskid aika el kerebai el kired.