A DANIEL ME A MIRIAM a mlo bechiil er a September 2000, e kmal mle ungil a klengar er tir er a Barcelona, er a beluu er a Sebangiol. A Daniel a melekoi el kmo: “A ungil el ureram a uchul me ngmle sebecham el omengur a ungil el blil a blengur, e omais a beluu, e dirrek el oubail a ungil el bail. Ngdirrek el mle sebecham el blechoel el olengeseu el omerk a klumech.” Engdi ngmla er ngii a tekoi el dilubech.

Ngar er a klou el ongdibel er a rak er a 2006, e a Daniel a rirengesii a cheldecheduch el uleker a ker el kmo: “Kid, kede meruul aike el tkurrebab el sebeched el olengeseu er ‘tirkel mesibas el mo mad’ el mo nguu a diak a ulebengelel el klengar?” (Osisechakl 24:11) Tia el cheldecheduch a milsaod el kmo, ngerecheled el mo omerk er a klumech er a Biblia e le klengar er a rechad a ultuil er ngii. (Rellir 20: 26, 27) Me a Daniel a mlo melatk el kmo, “Ak mlo omdasu el kmo, a Jehovah a milengedecheduch er ngak.” Tia el cheldecheduch a dirrek el milsaod el kmo, nglmuut el mo klou a deurreng er kid sel doruul a betok el kirel a omesiunged el mo er a Jehovah. Me a Daniel a mle medengei el kmo, tiang a mle klemerang e le ngmle sebechel el mesa Miriam el dimla omuchel el pioneer el kmal dmeu a rengul.

Tia el cheldecheduch a mla er ngii a lerellii el mo er a Daniel a uchul me ngmlo omdasu el kmo, ngmla mo taem el kirel el rullii a klou el omelodech er a klengar er ngii. Me ngulemuchel el di oureor el sesei el sikang, e mlo pioneer. Ngdirrek el ulemdasu er sel deurreng el bo lolechesuar ngii me a Miriam, a lsekum e te mesiou el ngar er aike el basio el ousbech er a rebetok el olengeseu er a ureor er a berkel a klumech er a Renged.

Ngar er a May 2007, e a Daniel me a Miriam a mlo diak el oureor, e millukl el mo er a Panama, el ta er aike el beluu el leblo er ngii er a uchei. Tia el basio a mla er ngii a bebil el iungs er ngii el ngar er a Bocas del Toro Archipelago er a Caribbean Sea. A ruumesingd el chad el kiliei er isei a rechad er a Ngabe. A Daniel me a Miriam a ulemdasu el kmo, ngdi sebechir el kiei er a Panama el locha di kirel a eai el buil el ousbech aike el udoud el le chiludel.

Me te ulemais aike el iungs el ousbech a chert me a rrat. Te dirrek el dirk melatk er a kot el taem el lebla er a rrat el 20 el mael el mo ngmasech er aike el mekedidai el rois el ngar er a meringel el sils. Seikid el taem, e a Daniel a kmal mlo mesaul me ngkilo e ngtaorer. Engdi, a bebil el telungalek er a Ngabe el blo lodengelterir a kmal mle bekururau, el ileakl er a uriul er tirka el obekel a lesuub a bebil el tekoi er tia el beluu. Me ngar er a chelsel a kedeb el taem, e ngmlo er ngii a 23 el chad el losuub a Biblia el obengterir.

Me ngera dilubech er a uriul er a lokngemed a rokui el ududir? A Daniel a kmo: “Aki lilangel er sera ki momdasu a lmuut el mo er a Sebangiol. Ngkmal mle mekngit a rengmam el choititerir tirke el chad el ki mosuub a Biblia el obengterir.” Engdi a uriul er a ta el buil, e aki ngiluu a kmal lungil el chais. A Miriam a kmo: “Aki mlokedong el mo mesiou el special pioneer. Me ngmera el mlo uchul a klou el deurreng e le ngmlo sebecham el melemolem el mesiou el ngar er tia el beluu!”

Ngokiu aika el omelodech er a cheldebecheled, e a Daniel me a Miriam a mlo diak el losiou el special pioneer er a rak er a 2015. Me te mo mekerang er chelechang? Te uluumerang er a telbiil el debetik er ngii er a Psalm 37: 5 el kmo: “Modersau el mor a RUBAK; moumeral ulsirs er ngii, e ng mo ngosukau.” Me te miltik a urerir el sebechel el mesiou er tir e te melemolem el regular pioneer, e chelechang e te mesiou er a ongdibel el ngar er a Veraguas, er a beluu er a Panama.

A Daniel a kmo: “A uchei er aki mtobed er a beluu er a Sebangiol, e ngdimlak ki momdasu el kmo, ngmo sebecham el kiei el di beot a klengar er kemam. Engdi chelechang e ngsebecham, e dirrek el diak a ngera el ki mngesonges er ngii er aike el ki mousbech.” Me ngera sel kmal klou el deuil a rengrir? Te kmo: “Ngmera el diak a deurreng el sebechel el mo mekesiur sel dolengeseu er a rengariou a rengrir el chad el mo mesuub el kirel a Jehovah!”